2012.07.03 胡阿濤奢噏多自由，小學雞貼圖快走頭

2012.07.03 

胡阿濤奢噏多自由，小學雞貼圖快走頭

柯拿，大家好，

同阿珊傾電話，第一句聽到嘅就係話香港又濕又熱，好辛苦。當香港好似蒸籠，雪梨就係最凍嘅日子。雖然話最凍，實在都幾温和，晚上5度左右，日間十幾度，我全年都係着Tee，全無問題。我架車洎喺屋外，因為車房畀大小姐同啊珊霸咗，如果晴朗嘅晚上，又夠凍嘅話，車頂同擋風玻璃就會結霜。知唔知點樣整走啲冰？千祈唔好刮，咁會整花玻璃。只要用水--係凍水，潑上去，冰就溶嘞。朝頭早坐上架凍鐵鐵嘅車，都唔係好舒服。

七一，適逢周日，有娥姐幫手睇鋪，唔駛我開工。即刻響應遊行號召（梗唔係慶回歸啦），都係用腳，不過係踩單車，由我屋企踩出雪梨downtown 大約30km。市政府都幾鼓勵人用單車，用現成內街車路，豎立路標，又喺路面油上單車標誌，就將成個大雪梨metro Sydney連起，即係話，用單車邊度都去到。住咗雪梨20年，第一次由山區屋企踩單車經雪梨橋出城，遍遊達令港、魚市場、重去唐人街飲茶，非常開心。想睇相，可上fb。

當我踩緊單車之際，香港正值改朝換代之時。呢邊廂，阿狼及其班底，指天起誓，走馬上任。那邊廂，維多利亞女皇銅像眼底下，唔知幾多萬人，唔怕蒸籠咁嘅天氣，明知行都冇用（我係咁諗），但，硬係要出嚟贈吓慶，話過你知，我而家條氣唔順……。香港從來冇民主，百多年來，托庇英帝，有幸尚算自由自在，帝力於我何有哉。自由空氣，唔係老逢嘅，袋穩佢呀，老友。

咩博致力還67歷史真相，果然有「韌力」，當然「銀力」亦係不可或缺。我--作為一隻塘邊鶴，都略略體會到，你做呢單嘢，會受好大壓力。而家總算有嘢睇，恭喜晒。

傳來陶傑同丁佬嘅短文，我好認同。即刻諗吓，67年，我做過啲乜。

66年我由登龍街搬去波斯富街，包租公叫李毛，佢有8個仔女，全部讀培橋，大哥耀熙畢業後留校任教。我嘅親共思想由嗰時開始，學講國語，讀毛語錄，唱革命歌。小學畢業前，已經識唸老三篇。

66年，神州大地翻天覆地，上有黨爭，下有文鬥武鬥，死得人多。我作為一隻小學雞，識乜嘢？，人話乜，我話乜。上工會，加入文宣隊。記得表演過一齣獨腳戲，內容取自文匯報，數臭叛徒、內奸、工賊劉少奇，批鬥佢嘅「三自一包」！大佬，我連「三自一包」係乜都唔知，就亂噏廿四，而家諗番，真係戇居居。

67年我五年班，我喺左報剪咗張反英坑暴漫畫，約理同班另一個左仔盧業成，佢睇水，我將幅畫貼喺厠所個鏡上。貼完雞咁腳走頭，心仔砰砰跳。冇人叫我咁做，係自發嘅。嗰時通街就係貼大字報，寫標語，我哋雞雞地，人做我又做。好彩乜事都冇。

李耀熙不時會投稿文匯報，嗰時文匯報喺波斯富街、高士打道海邊。佢會叫我送稿去，重叮囑，唔好畀人跟踪返屋企。所以我送完稿，會兜個大圈至返屋企。

67暴動，就係受當時文革所影響，傳统愛囯，或為公（？），或為私，一於照跟。如果搞到好似澳門咁，就發喇！以為中央會大力支持，點知周恩來叫停！香港畀大陸極左派跣咗一鑊，跌得好金，之後重收口，唔再講。受咗委屈、甚至無咗命仔嘅，你自己諗掂佢。

咁多年來，所謂愛国，就係一心一意緊跟中央。文革批劉，就炮打司令部。林彪得勢時，就高呼副统帥永遠健康。林彪到台，就話571工程暗殺偉大領袖。江清得勢時就係偉大旗手，四人幫倒台後就變咗係白骨精。鄧小平得勢時就宣揚劉鄧大軍如何英勇，開放改革設計師、鄧小平理論創造者；失勢時就係走資當權派、修正主義、妄想翻案，死不悔改嘅走資派。………etc, etc.

四十五年喇，愛国人氏仍然緊跟。中央一日未定調，愛国人氏一日都唔敢表態。67年呢單嘢，啊爺未定調，愛国人氏跟唔到，竊竊私語怕者有，有頭有面嘅，點會表態！

殖民地時期，香港從來都係多元聲音。有文匯大公，有華僑工商；有漢華勞校，有珠海大同。雙十、十一，任君選擇……。

胡啊濤話，回歸後多咗自由。你話呢。

再噏過，

嚤囉