2011.12.04 司徒拔、羅富國，噏到跑馬泡一鑊

2011.12.04

司徒拔、羅富國，噏到跑馬泡一鑊。

柯拿，大家好，

踏入12月，就係袋鼠國夏天嘅開始。又乾又熱係典型雪梨天氣，但居然又濕又凍，唔通聖女嬰La Nina真係發功，攪到天氣都反常。上周居然居然破50年最凍嘅12月，星期日，屋企附近居然落起冰雹。

大小姐正喺金山玩個不亦樂乎，上周去咗LA，探訪米奇同米妮，亦不忘喺荷李活英文字下留影。而家去咗喬治亞，任咗喺個朋友嘅農莊。正如啊Jo講，而家啲年青人真幸福。

啊爺真犀利，特首跑馬仔，本來，個個（係！個個）都知道，啊爺唔首肯嘅馬仔，無論幾有民意，都一定唔會跑得出。但係特區各大賓架，力撐上海唐唐。民建工聯各大紅人，又捧山東振英。各大傳媒、學府，又出問卷，又做民調，沸沸揚揚、真嘅一樣。特區老百姓（而家唔叫市民），搞吓搞吓，以為真係Election，一眾善良老百姓，以為自己真係有得say，感覺良好，好似普選不經不覺已經降臨。咁，重駛乜爭取。掟紙飛機？下午茶遊行？着救生衣跳海？收皮喇！啊爺食咗東方珍珠末，果然老當益壯，唔講得笑。此小島上，達官貴人、販夫走卒，無一不在啊爺掌握之中。當啊爺可操控賽果，老百姓不爭普選之日，亦係全民可以普選之時，世上吊詭之事，以此為至甚矣！

講起跑馬仔，唔覺意提及民主。楓葉國鳴仔，唔理解，因乜解究港英時代，港人唔向英國佬爭取民主，卻喺重回偉大祖國懷抱後，向啊爺要民主。鳴仔可能要睇吓香港史，睇吓昔日黃夢花，葉錫恩等做咗啲乜，兩市政局由委任到民選。尤德時代開始推行代議政制。你可以話英國佬喺回歸前埋地雷，不過如果民主意識嘅建立就係埋地雷，呢個地雷都係要嚟炸暴君，OK噃！

退一步講，就算舊時真係冇爭取，亦唔表示而家唔可以爭取，遲到好過冇到吖！

又有人話，舊時啊督，由英庭指派，港人有置喙餘地咩！如今特首由啊爺欽點，又有乜嘢問題！

我又要講吓故仔，各位知否，上世紀二、三十年代前，香港係可以合法蓄婢。隨住人權意識普及，本地有識之士及教會人士，大力鼓吹廢除養「妹仔」。於是引發爭論：廢除派話，妹仔即係奴隸，不人道，要馬上廢除。有妹仔嘅有錢佬就話，養妹仔係華人風俗，大家好似一家人一樣，根本唔係乜唔奴隸，冇理由要廢除。

督爺司徙拔，當然明白多數華人商賈都有妹仔，點會郁佢哋。就算民間點爭取，一於唔肯立法廢止養妹仔，並解釋話香港已有足夠法律保護婢女。

當時有個駐港海軍少校希士活H.L. Haslewood, 佢兩夫婦喺教會得知華人社區有蓄婢習慣，非常震驚，多次向督爺進諫，並参加好多公開活動爭取廢蓄婢。啊督好唔likie佢，趕咗佢返祖家，以為冇眼屎，乾淨盲。點知希士活夫婦，一於咬住唔放，喺英倫多份報紙寫文章，鞭撻香港蓄婢制度。英倫民間嘩然，堂堂大英帝國，居然有個屬土有奴隸制度，情何以堪！經多番討論，於1922年擺上英國國會，並决定要責承殖民地部，要港督盡快立例廢止蓄婢。港府1923年訂立「家庭女役條例」，直到1938年港督羅富國再作多次法例修訂，養妹仔風俗，就廢徐喇。

呢個故事話比我哋聽，啊督爺根據「皇室制誥」及「英皇訓令」治理香港。看似至高無上，土皇帝一樣。事實，啊督只係英國外交及聯邦事務部属下嘅一個公務員（肥彭除外），佢老細係部長、首相。數到最後，就係一個民選嘅政府。啊督所作所為，要向人民交代，要受民意指揮，但可惜係英國人民，及英國民意。

不如又睇吓特首。特首係由千二人「選」出，呢千二人又有幾多民意授權。香港人喺特首選舉中有幾多say，你話比我聽嘞。最終特首都要由中央委任，中央人民政府又有幾民主，你話比我聽嘞。

 二羅上載嗰幅漫畫係出自老夫子水虎傳（典藏版p.396），內容係宋江借李師師同皇帝嘅関係，可親見皇帝，提出「被招安」，但李逵唔想投降。皇帝知道李師師借佢過橋，就出拳打李師師，唔覺意打到老夫子，老夫子還手打皇帝……，其他人亦互相打起嚟。咁就出現呢個全頁混戰嘅場面。

我番睇水虎傳，仍然笑到肚痛。被招安？唔…，幾有現實意義喎。

再噏過

嚤囉

Ps. 多謝Ｋ仔捧場。