2012.06.04 鹿死垂手又低頭，噏句公道口咪收

2012.06.04

鹿死垂手又低頭，噏句公道口咪收。

柯拿，大家好，

六月，袋鼠國踏入冬季，雪梨嘅冷天係雨季，呢個禮拜，雨落個不停。補鞋佬話good for business，因為鞋底穿竉入水，一定要嚟揾我，忙到飛起，不在話下。都好嘅，冇銀就邊度都冇得去。Work hard play hard係我嘅座右銘。有work就有盤川。

井少一定受咗好大刺激，洋洋灑灑，一篇長文，記述佢嘅今次行山嘅艱苦、精彩、難忘、感觸、及紀錄。我哋全程一齊，我梗係感受得到。講到同房異夢，我的確唔知佢發咗乜嘢夢，不過，一定有一個共同嘅夢，就係要完成呢次珠峰營之旅呢個夢。千祈唔好多謝我，完成夢想係百分之百靠自己，冇人可以幫到手。井少，係你自己一手一腳搞掂。我咁啱又係附近，見證到呢件事，咁就係緣分喇。至於垃住你，唔俾你跌落屎渠，一來受儒家思想薰陶。孟子曰：「今人乍見儒子將入於井，皆有怵惕測忍之心」，此乃與生俱來，人之本性也。二來，如果跌落屎渠，咁真係水洗都唔清，喂，同你一間房，成晚芬香撲鼻，重駛唔駛瞓？所以，拉你一把，梗係應有之義，你又唔駛多得我唔少嘅。

今次尼泊爾行山，除咗壯麗景色，風土民情外，我重加倍留意觀察一樣嘢-----厠所！舊年9月我去西藏珠峰營。全個行程，團友講起要去厠所就怕怕，尤其係女士。阿珊喺青海，俾厠所臭到休克，之後，喺「信博」寫咗篇文，媽到大陸啲厠斫七彩。我今次又係喺山區，生活條件、環境又好相似，作個對比，都好適合啫。

由加德滿都開始，到入到山區，各個小店，客棧等，用過嘅厠所都好滿意。山區厠所都冇自來水冲水設備，各人用完後，都用水売喺大水桶載水冲厠。又因要為防止塞厠所，好似大陸咁，放咗一個，裝用過厠紙嘅桶。好神奇，厠所不但乾乾爽爽，而且無臭味。道理好簡單，一個字---「勤」！勤洗，勤換，勤清理。一山之隔，珠峰東面，強國厠所，濕濕立立，遍地黃金，臭到你暈，又係一個字---「懶」，懶洗，懶換， 懶清理。我要向尼泊爾人敬個禮。

前排，喺雪梨，一個飯局，我講起厠所呢個話題。席中有人話，中國經歷好多苦難，又天災又人禍，食樹皮，人食人。咁慘嘅事都經過，污糟廁所，就唔係乜嘢奇事喇。……….…。唔係第一次喇，我每次講起强國厠所，梗有人講：好咗好多喇，以前重臭啊。or俾啲時間佢喇。or條件所限，唔好要求咁高。or大家標準唔同啫。Or……..etc etc。重之，梗有好多人幫呢啲懶人辯護。好嘞，個個都唔去要求呢班懶人做好佢嘅職責，重幫佢哋講好話。結果？到而家，强國厠所唔駛用眼睇，用鼻聞就知喺邊度喇。

偉光正嘅檔應該感謝佢哋運氣，強國子民真係容易管，统治者對子民好事多為幾十年，到今日，不少人仍然認為冇咗呢個檔唔得。聽過程翔一個節目，佢話單獨禁錮時，孤單到想自殺，後來遇到一個肯同佢講嘢嘅守衛，佢就當呢個係大恩人，呢啲係唔係斯德哥爾摩症候群？？？喂，你受到非法審判，本來就唔應該受咁嘅對待。

你唔出聲要求乾淨厠所，就要踩住黄金辦事。對殘民貪腐當政者之不仁啞忍，甚至幫佢講好話：係咁嘅嘞，已經好好喇，本來重衰呀….。結果？到而家，強國官僚點嘅款，你話嘞！

一年容易又鹿死，我移居袋鼠邦同呢隻鹿死亡有關。而家，我對要求官府平反呢隻鹿嘅死因已經唔感興趣，當然因為喺我心中，黑黑白白，清清楚楚，毋需官府噏三噏四。更重要嘅係，如果冇真正嘅改革，所謂平反，都係一派人，用嚟打擊另一派敵對勢力嘅藉口，並唔係真正嘅反省。以後重會有七五、八六等事再發生。

我唔識亦唔敢暴力革命，甚至值唔值得咁做，都係一個大大問題。不過睇唔過眼要出聲都係我會做嘅嘢。

井少話，人生要有夢想，有夢想就有動力。啱到極。我信，只要人人肯出聲，踎厠所唔驚踩黄金嘅偉大夢想，終有一日會實現。

話時話，九月投票喎，有聲出喎。咁，你會唔會去出句聲呢，又？

再噏過，

嚤囉