2011.07.24 朱門酒肉獨肥，路有寒骨鋪地，枉噏大國崛起

2011.07.24  

朱門酒肉獨肥，路有寒骨鋪地，枉噏大國崛起。

柯拿，大家好，

上周日，朝九晚五去上高落低，行山相鋪咗喺fb，芝芳comment話，大自然母親待我不薄。Touch wood當然舉腳贊成，但當我享受緊自由空氣，享受緊較合人性嘅社會制度，令我及家人得以有起碼嘅教育、醫療、社會保障，無憂無慮咁長大成人。我又會睇吓周圍，老土講句，幸福唔係必然。因此，鄭少話退休後致力搞吓中國教育，即刻大把人支持。裡面梗有我，撑硬你！

雪梨周仔話九樓啲大男人，口邊成日掛住侯寶口頭禪「唔知點解」（周仔，你嘅觀察力，勁！）。今次你又講啱咗，我又要講唔知點解。

乜唔係全民都應享有起碼基礎教育咩？唔理住喺城市、或者住喺邊遠山區，都係共和國子民，中央政府都應負起呢個責任。點解要余慕蓮姐姐用佢畢生積蓄起學校？話時話，佢都唔係乜嘢富貴人家。

教育係咁，醫療係咁，唔駛講社會保障喇！偉大祖國今日（國語講）「豬的屁」上升驚人，人民交稅世界稱冠，號稱萬稅國，坐擁龐大儲備。國家大把錢，點解唔何以惠及子民？啲錢去晒邊？

美國商人，微軟啊標，呼籲紅肚腩大款捐身家，造福大唐子民。反應冷淡！大陸商人，又係啊標，居然現兜兜攞住「茄殊」去美麗島通街派。台灣人駛唔駛你咁救濟？香港人個個都知道唔好直接捐錢比大陸「慈善」機構，原因大家心知肚明。喺咁嘅氛圍下，鄭少，你可能要戴多幾副放大鏡，樣樣look see真真至得！

講開又講，每年都有好多祖國同胞探訪袋鼠國，好多人返歸後會話﹕「有乜好睇，建築物又舊，路又舊，橋又舊，乜都唔夠威。點及我哋啲...... 乜乜，咁新咁大……」，總之唔順 眼。加燦、澳燦、港燦，一定有同感。

叫啲大款喺海外買少幾個豪宅，買少幾個包包。叫啲人民公僕起少啲面子工程，叫啲擁有大權嘅人貪少啲，就乜都喺番度喇！鄭少，你雖然有米，但係如果政府孭起晒條數，又駛乜我哋呢啲蟻民「乙組代刨」呢塊甲組木呢？咁你啲錢亦可駛喺第二度。例如，收養第三世界孤兒？不治之症研究基金？自己環遊世界？贊助嚤囉做背囊友？……？

「你梗係發緊夢」，你話。

如果係夢，我唔想醒。唔醒唔醒終須醒。依靠呢班友，就真係發夢喇！鄭少，預埋我啦，有乜計, 呢又？多就冇嘞，聊表心意，支持大鏡行動咁話啦！

人說人生如夢

我說夢如人生

短短的一剎

有快樂，有興奮

怱怱的一場

你衰老，你苦悶

皇帝的尊嚴

乞丐啲窮困

山峰上的白雪

海底裡的奇珍

當你從夢中醒覺

你已走完了人生

上世紀六十年代，電影「不了情」內其中一首插曲，顧嘉輝曲，顧媚唱。歌名「夢」（唔係綺夢）。人生苦短，喺有生之年，做自己認為啱嘅嘢。好！鄭少，撑硬你喇！

BTW，咁樣諗，算唔算係「真理」呢又？

再噏過，

嚤囉