2011.11.12 入咗票站見唔到，你噏乜水鬼知道？

2011.11.12 

入咗票站見唔到，你噏乜水鬼知道？

柯拿，大家好，

上星期五係六條一，人稱光棍節，邊個知，究竟係台灣人講先，抑或係大陸人講先？，唔知點解咁多人揀呢日結婚，光棍節特別吉利咩？不過，每年11月11日係停戰紀念日Remembrance day，11時11分喺商場會響紀安息號，所有商場內嘅人都停止活動，肅立，向喺所有戰争死亡嘅人致哀。我喺去年11月13日嘅周記，寫過一則有関停戰紀念日嘅笑話。轉眼又一年喇。

呢個禮拜電台時事目大講特講區選嘅嘢，講得最多就係民主派大敗，好似好悲咁。唔駛悲喎，只要選舉制度公平，勝敗乃兵家常事。就算你話蛇齋餅糉米，專車跨境直達票站，老人院抬長者投票…等等，都係合情、合理、合法之舉。亦唔係乖孫專利，你民主派做都得嘅。

好彩英國佬留低不記名投票呢個制度，選民行咗入票站，佢投邊位，又有乜水知道。所以，選舉勝負，全在選民手中嘅選票，輸咗，有乜好講。各政黨如果著緊選票，就只好做啲選民likie嘅嘢喇。理想？有時要丟埋一邊喇！

至於各位專貴嘅選民，亦要為自己嘅選擇負責。天使或魔鬼，都係你一手選出，種出蜜瓜抑或苦果，選民都耍親嗜，冇得走雞。

民主制度好就好在有得揀，今次揀錯咗？冇有怕，下次再揀過。臺灣人一錯再錯，揀錯咗啊扁，第三次就轉揀馬九仔，比佢試吓，做得好，繼續有得做。如果表現未如理想，啊英姑已經預備好坐呢個位。

歷史一眾先烈，打生打死，得到民主制度。唔係老馮揀到好人，始終係要尊重有「揀」嘅權利。

只要制度公道，選到嘅唔係我心日中嘅人，我唔開心，但我尊重結果。重要嘅係我尊重人有「揀」嘅權利。

btw今次選戰結果，有否令仁類改變你對民主嘅睇法？起碼認為香港已經係一個可行民主之地？

兄弟姊妹們，企硬，唔好比人攞走你「揀」嘅權利。

再噏過，

嚤囉