2016.09.01 廣島長崎啓先聲，西伯利亞氣笛嗚；列寧格勒莫斯科，維京聖誕宜家城。臥龍馳騁勝鐵鷹，牆傾鐡塔公社靈，加東老友談聚首，舞罷草裙寰宇情。
柯拿，大家好，
九月，踏入袋鼠國嘅春天。2016年，跨過咗一個一生難忘嘅夏天，多謝現代醫學，巨人大國手仁心仁術，我秋天入廠大修，再 hea 幾個月，到咗冬天，居然喺同一個雪季去咗兩次滑雪假期，加上控制雪板技術又有顯著進步，開心到飛起！又係嗰句，有得玩就好去玩，點知聽日開邊瓣。
記得對上一次滑雪假期係 2013年，我喺雪山上寫過一篇嘢，而家睇返，感言仍然有效 （回味可 click 入：http://kinfaichiangessays.blogspot.com.au/2016/02/20130916-the.html ）
其實，袋鼠國滑雪，對我咃窮等人家嚟講，係一件幾奢侈嘅事。喺雪梨，參加唐人雪山團，已經係一個比較化算嘅方法。就以我今次嚟計，一個五日團，團費包食包瞓包交通，多謝 850 蚊袋鼠幣；又要畀100 蚊租雪具、同埋四日共 500 蚊雪場 lift pass，再加林林審審使費，我一個人咁樣玩五日，千五、六，走唔甩。
今年七月滑咗一次雪，之後，藉口話，雪板技術見有些少進步，我戚起條根，當然加上種(寵）壞我嘅愛妻嘅大力鼓勵，八月，趁雪季完結前又去多一次。點知誤打誤撞，唐人團擺烏龍，本來五日團變成七日，真係未試過喺雪山咁長時間。多出呢兩日，又額外使多成 400 蚊交通住宿，加埋原本團費，今年嘅兩團共 12 日雪山，計埋使咗 3500 ！咁梗係貴喇，不過，可以換嚟開心，當然值得。
滑雪呢單嘢，係移民澳洲後至接觸嘅事。當時，仔細老婆嫰，每個錢都要因住使，滑雪咁貴，邊捨得玩。州政府康體局，本住人人都有玩雪嘅權利，特別推出平價雪山假期套票，住嘅係雪山腳下 Jindabyne 小鎮康體營（類似烏溪沙青年營），營內包早、晚兩餐；仲慌死窮人喺雪山會餓親，中午喺雪場上仲有檔口派三文治、飲品。當然唔少得嘅，就係兩日嘅 lift pass。雖然，由屋企至雪山區呢段路（600 公里單程）、以及每日來往雪場、營地嘅交通，都要自己搞掂，不過，有政府資助，都慳返唔少銀両。呢個康體活動，雪梨唐人社區，好多人都曾經受惠過。而家講返起，已經係十幾廿年前嘅事。
我認識嘅朋友，去雪山只係陪仔女。到仔大女大嘞，𡃁仔𡃁妹，邊會再同你去雪場顛。到而家，我呢輩人，叫佢哋再去雪場？凍鐵鐡唔在講，慢吓手，撻親大陣點算？好多人，早已收山，唔再踏足雪地。好似我咁顛，絕對係稀有動物。
以前同細路一齊玩雪，就係玩雪橇 ski，（「雪橇」呢個名咁好聽，又叫咗咁耐，最憎有人而家叫雪橇做「雙板」！點解有尐人，硬係持住人多，就亂咁改晒人哋已經叫咗好多年嘅名）。玩雪橇，因為當雙腳造成內「八」字時（即所謂 pizza)，成個人嘅重心（CG)，就經常喺三角型底部支撐面之內，實在非常穩陣。如果速度唔係太快，動作又唔太古怪嘅話，其實非常容易控制活動。就算動作水皮，學壞師都好，仍然唔容易跌倒。卻原來，咁樣唔係好處！點解？因為太穩陣，就冇咗誘因去改善動作，尤其好似我咁懶。但係，動作唔好，就進步唔到，嚟嚟去去都係行前轉彎褪後，咁就愈玩愈悶。
六年前，開始試玩雪板 snow board（唔好叫單板）。玩雪板，對靴固定喺塊板之上，力學上，底部支撐甚至唔係一個平面，而只係一條綫！要保持平衡，身體重心（CG）經常跌咗喺條支撐綫之外，所以活動時，就要不停移動身體（其實係改變重心），以保持滑行中嘅平衡。呢種移動身體，其實就係一路不停預測緊下一秒嘅平衡狀態，一但估錯咗，PK 就係懲罰！速度愈快、彎度愈大，PK 就愈甘。唔想跌，就要正確移動身體，咁樣對正確動作掌握就有要求。每次搭吊椅上坡再滑落嚟，都係一個試煉：有時動作掌握得好，就會好有滿足感；有時冇咁好，就諗吓邊度有問題；有尐動作試極都唔得，又會好苦惱 ⋯⋯。總之每個上落，都係一次挑戰，內心同埋肉體有如打瀉五味架，甜酸苦辣乜都齊，玩雪板嘅樂趣就喺晒呢度。
有人話：你玩咗六年喎，梗係好叻喇。實情係今年之前，我只係玩咗四次（每次四日），你話咁會有幾叻？！其實好水皮至真。不過今次連續滑咗十日，咁又真係有顕著進步，我而家可以搭吊椅上較高雪場，有尐藍綫雪道都勉強可以應付，今年，真係好玩好多，呢三千五蚊，值回票價！
去雪山，尤其我獨行俠，最簡單就係參加唐人雪山團。呢尐團，以雪梨唐人客為主，簡中亦有唔識中文嘅 ABC 香蕉仔女。遇到香港暑假，又有香港嚟雪梨旅行、探親戚朋友嘅香港客，所以，一向以來，導遊都以廣東話及英語為主。到咗呢三幾年，導遊連英文都唔使講，全部只講國語，原因，就梗係多咗好多國語人喇。本地導遊多數係嚟自大陸嘅廣東人，佢哋都識國語同埋廣東話。我哋一上車，導遊就會問：講廣東話嘅客人聽國語有冇問題。就算點水皮，十成十講廣東話嘅客，聽國語都唔會有問題。不過，掉轉嚟講，大多數國語人，就一句廣東話都唔地除喇！結果？咪係全程國語囉。
講開國語，我諗起香港「普教中」，有人話，要同十三億人溝通，所以要學㷛東瓜。其實，香港人講廣東話之餘，用㷛東瓜同人溝通，從來都唔係問題。我家大少從來未正式學過國語，而家可以用英、粵、國三語做司儀。我家大小姐連漢文都唔識寫，當然更加未學過國語，就只係因為有尐講國語嘅朋友，佢勉勉強強，尐音歪歪哋都講得兩咀。原因就係蔣家粵語基礎打得好，由粵語過渡國語，易如反掌。「普教中」？唔單止多餘，絕對係詭計！另外，要學生專登學寫減筆字亦係一樣咁多餘。其實，只要學識正體，減筆字點會唔識寫？道理一字咁淺，佢阿爺絶對唔會唔知。毛主席講湖南話，學正體字；小平設計師講四川話 ⋯⋯。溝通？有問題咩？
又講遠咗，拉返嚟喇。本來就劃好嘅 2016 三月出遊，因為入廠大修，無法進行。大修過後，再計劃一個環球之旅，最初打算用兩個月左右，繞地球一個圈。計下計下，原來兩個月唔夠時間，要差不多80日，果真八十日環遊世界 Around the world in 80 days！
行程係咁上下：
29/09 ⋯⋯ 雪梨飛日本，停約 10 日，留福崗、長崎、廣島、境港
08/10 ⋯⋯ 境港搭船至韓國，10/10 到達俄羅斯海森威，留5日
14/10 ⋯⋯ 海森威搭西伯利亞鐵路到莫斯科，車程7日
20/10 ⋯⋯ 到達莫斯科，留5日
24/10 ⋯⋯ 搭火車到聖彼德堡，25/10 到埗，留3日
27/10 ⋯⋯ 聖彼得堡搭船過波羅的海，29/10 到達芬蘭赫爾辛基，留兩、三日
31/10 ⋯⋯ 用約一個月，買Euro pass 搭火車由北歐到西歐到南歐。路經瑞典、挪威、丹麥、德國、瑞士、意大利、西班牙、葡萄牙。歐洲尾站係里斯本
26/11 ⋯⋯ 里斯本飛多倫多，27/11 下午到埗
27/11 ⋯⋯ 留多倫多，會晤加東好友，一共用 9 日，由多倫多玩落紐約
05/12 ⋯⋯ 紐約飛夏威夷，留四日，潛水，跳草裙舞（我哋最叻）
08/12 ⋯⋯ 夏威夷飛香港，09/12 晚上到港
09/12 ⋯⋯ 留港四日，好友共敍
13/12 ⋯⋯ 晚機飛雪梨
14/12 ⋯⋯ 返屋企
咁樣，就繞咗地球一個西匝。數日曆，其實係七十七日，都係 in 80 days 啫。
日本段，預算買 日本 JR pass，主題係原爆城市。
俄羅斯段，咁啱喺飛時卜，見到有老友啱啱去過。李饅頭啱啱去完海參威，洪先生又啱啱遊完莫斯科、列寧格勒，我稍後會麻煩幾位老友，問問料，
至於歐洲段，我係搭火車，一個一個城市咁去，我完全未試過咁做，各位有好介紹、提點 ⋯⋯，唔該指教一下。
講到北美，就靠晒加東老友喇。東仔，你走唔甩喇！我計劃參加巴士團由多倫多玩落紐約。
夏威夷就係尾聲，只係 Hea，冇乜計劃。
成個行程已經大定，主要機票、火車飛、船飛，亦逐步搞掂。
我未試過出門咁耐，當然又係獨行。我嘅座右銘：最緊要好玩！
好緊張，就嚟又出發喇。
再噏過
嚤囉
