2017.12.31 新年又到嚟，做過乜嘢逐件睇；自己送大禮，行程玩具逐件砌
除夕嗰一日：
如常一早起身，喺自己一手一腳砌出嚟嘅 patio 上面，食個自製早餐。今日除夕，送舊迎新。唔好客氣，趁住一年將盡，即刻送自己一個大禮，以迎新歲。係乜嘢？遲下再開估。
今日嚟一個 surprise babysit ，我倆同孫女玩咗一朝就返歸。下晝，執好細軟，我就走頭喇。呢幾年都係一樣，除夕，我就一支公去橋底過新年，今年都唔例外。
揸車出屋企附近火車站，泊低車就搭火車，一條路直出城（雪梨 downtown ）喇。時間尚早，搭火車出城未算好多人，不過人群中，已經有著晒晚禮服，化行晒裝嘅女仔起程赴晚宴嘞。唔使半個鐘就出到 Wynyard 站，落到月台再上返站頭就感覺到節日氣氛。出站沿佐治街向樂士區The Rocks， 行去雪梨海港大橋橋底。因為省政府而家起緊雪梨破天荒第一個 Metro 工程嘅原因，成條佐治街變成工地，平時已經得一半可以行車，今日更加封晒成條馬路，變成行人專用通道。
雪梨海港大橋，就梗係焦點中嘅焦點。我十分鐘左右行到橋底，好多人已經霸佔有利位置，尤其一家大細，又或者一棚人，如果唔早尐嚟霸位，唔使旨意可以喺有利位置坐埋一齊？我得一支公，咁就方便得多嘞。一如以往，我唔使四圍䠮，求其就喺橋底，隨便喺人群中一個罅仔，攤開綠色小地𥱊坐低。問下隔籬左右，佢哋今早九點已經到埗，先至霸到個呢個位置。哈哈，我五點先嚟，就有如此 prime location，一支公，真方便。
有尐人話你知，要睇煙花靚景，一定要離遠睇。咁講冇錯，全景煙花梗係靚。不過，我又話你知，煙花唔係齋睇，仲要有色香味，仲要聽埋聲。睇住煙花喺眼前爆開，點著藥引嘅茲茲聲，濃煙散出嘅火藥味道 …，呢尐咁特別嘅官能刺激，只有近距離至可感受得到，遠睇，根本唔能夠感受其萬一。離遠？不如返屋企睇電視好過。
當然，感受周圍熱閙氣氛，亦係睇煙花重要元素。唔想同人逼，千期唔好出嚟。
一支公坐喺橋底。今日好好風，袋鼠國旗喺雪梨海港大橋個拱頂上，迎風飄掦，蔣家同呢支旗非常有緣。
藍底國旗左上角有 Union Jack，生我育我嘅嗰粒東方明珠，佢嘅旗幟亦一樣。廿幾年前，移民時，見到袋鼠旗，就有種非常親切嘅感覺。同樣係藍色襯底，寓意浩翰大海， 米字旗嘅背後，就係西敏寺式民主政治。自我阿爺清末民初着草走落香港，蔣家四代人，都受蔭於米字旗下。回想我一生，前三十幾年，幾時擔憂過尐乜嘢。飲水不忘掘井人，我未見過阿爺係乜嘢樣，都經常感激佢著草走佬呢著。世紀末，滂沱大雨之夜，唔止落雨收柴，皇子、肥彭親手捲旗歸國 …。Hah ，都咪話，柳暗花明，呢尐無憂無慮嘅生活，竟然又喺另一幅米字旗下延續，仲福蔭子孫，能不感恩。際此歳末，向賜福於我嘅造物感恩戴德，當喺應有之義。加上呢十幾廿年，睇得太多尐咁嘅人，佢哋幾十年嚟，受人恩惠而唔識感恩，仲掉返轉頭話畀咗幾多着數人哋。經常持住人多耍流氓，講過嘅嘢完全唔算數，仲用卑劣口舌以為偽術，當全世界係 lulu ……。我居然喺黃昏之年，有幸（不幸？）耳聞目睹呢尐醜態，居然可以大剌剌、毫不遮掩咁公開展現，雖然隔住大洋，仍然大開眼界！噓！而家，望往雪梨橋頂迎風招展呢幅旗，梗係再三感恩。
趁冇乜好做，就回顧一下 2017 都好喎。
2016 ，當然係好大轉變嘅一年，感覺過得非常缓慢。除咗做咗細胃總幹事之外，亦去咗好多地方，感覺好多事發生咗。而 2017 嘅感覺就剛好相反，真係好似冇乜做過乜嘢，一年就咁就冇咗喇。當然其中好大原因，係有半年時間離開咗屋企，到返屋企時，一七年已近尾聲喇。
好嘞，而家擰轉頭，睇吓舊年做過尐乜先：
一七年初，趁阿珊仍然喺香港，我就砌咗個 patio 喺後園，以規模嚟講，呢個工程絕對係空前，以後仲有冇再破紀錄嘅工程，我當然唔可以排除有咁嘅可能，不過，機會就好微嘞。呢個 patio 效果好到不得了，如果我留喺屋企，有一半以上時間，坐咗出去。自從安裝埋 BBQ，我每日嘅早餐都喺 patio 自煮自食。呢個工程絕對唔係大白象，實用得很。
喺雪梨住屋，識少少手作功夫仔都係有着數，咁大間屋，梗有嘢要修理。如常，今年成年咁長，斷斷續續都做咗唔少工程，不過最大、最緊要嘅工程，就係策劃年中尼泊爾、印度嘅出遊工程，呢個工程，其實喺我 2016 年 3 月尾出院後已經開始構思。
記得我做手術前，史密夫醫生同我講，佢話切咗胃之後，幾乎可以肯定唔肥得返（which I think is no harm at all），不過體力就可以完全恢復。佢知我去過額峰大本營，所以仲加多幾錢肉緊，佢話：You'll lose some weight and not put it all back on again. Your energy levels will come back and then you can do base camp again。佢既然咁講，我就有興趣親身驗證喇。其實，肌力、肌耐力我覺得都係OK嘅，只係擔心食得小，會唔會影響活動能量。不過，尐嘢唔試過，你永遠唔知得唔得。唔理三七廿一，一於決定去尼泊爾行山喇。
一六年喺香港，同老友講起，至知道無線有個特輯叫「天與地」，講幾個藝員上喜馬拉雅山嘅故事，其中有經過雪山，並且有一個最高上到五千八。乜話？唔使學過爬雪就可以上雪山？有冇作大？我即刻摷資料，原來真係有個行程可以爬雪山，毋須有爬雪經驗，行程中會有訓練。呢個行程最勁者，係可以登上六千一百公尺雪山頂峰！今時今日，我由手術牀跳返落地，捽木，會行會走，仲有乜牽掛？成功、失敗，又有乜所謂。橫掂去開，一不做二不休，咁就報咗呢個 19 日 EBC and Island Peak 嘅行程，加前加後，即係話會逗留喺尼泊爾廿幾日。
以我嘅典型行程，廿幾日實在太短，再加多兩個禮拜就差不多嘞。諗過加去不丹，不過，如果已經登上尼泊爾高峰，再行返低海拔，又差不多風景路線，冇理由啫。再諗：印度又如何？即刻叫旅行社達人 Peggy 幫我設計行程，仲聲明一定要喺泰姫陵踩單車。佢不負所托，即刻幫我搞咗個印北金三角加埋踩單車，再加恆河嘅兩周行程。結果，五月十二日起程加德滿都，至六月十七日離開印度德里返香港，完成五個幾禮拜南亞兩國之行，所有計劃要做嘅嘢，全部完成，滿意到不得了。
喺計劃行程時，已經知道尼泊爾有笨豬跳。跳笨豬係我心願之一，其實我已經預留日子做呢單嘢，不過從未向任何人透露分毫。完成尼泊爾攀山活動後，就喺加德滿都參加呢個笨豬跳一日行程。跳完後，先至向全世界公報。跟住，成日有人問我驚唔驚。我嘅答案係：當你喺手術牀跳返落地，你又點會驚跳呢 160 公尺，而且仲有咁多「安全」措施。如果你仍然聽唔明，咁唔係我嘅文字解說水皮，而係你未有過我嘅經歷而已。
好嘞，除咗 160 m 笨豬跳外，南亞行程仲創出多個人生新紀錄，計有：
～ 喺 4800 m 露營
～ 行山超越 5900 m
～ 用繩索、雪爪等登山裝備爬雪山
～ 雪山登頂 Island Peak
～ 登高至 6189 公尺（二萬0 三百0五英呎）
～ 連續活動四十粒鐘
～ 五千米曠野辦大事
～ 攝氏 47 度印度德里行街
～ 連續踩單車 103 km
………
https://www.facebook.com/media/set/?set=a.1551740001570081.1073742034.100002022875470&type=1&l=27bb366801
https://www.facebook.com/media/set/?set=a.1551740001570081.1073742034.100002022875470&type=1&l=27bb366801
除咗旅行創出紀錄，喺香港亦創出紀錄。
六月十七日由印度返香港，因為要幫外母睇住裝修及搬新屋，本來諗住只係逗留兩個月左右。做咗咁多日人，我梗明白：人算不如天算其實係常態。結果，終於要喺 10 月 17 日至返得雪梨。回想 1992年移民雪梨，其後，每次返香港探屋企人、老朋友，都係十日八日頂晒籠，呢次居然喺香港留咗 159 日，梗係紀錄喇。話時話，我都睇唔到有打破呢個紀錄嘅可能。
香港熱天好恐佈，我哋住咗雪梨四分一世紀，習慣溫和乾爽天氣，如果要返香港，其實都儘量唔揀喺香港暑假。再唔講夏天正正係風的季節，咁，喺香港又有紀錄喇，就係遇上 8月 23 日嘅十號風球 ～ 天鴿。原來十號風球唔係經常有，戰後七十年來，計埋呢隻天鴿，香港只扯過十五次十號波。如果計我移民咁耐，就只扯過三次，咁都畀我撞正，仲唔係紀錄？！
159 日香港，其實好鬼悶，好彩有好多識於兒時嘅朋友仔、書友仔，佢哋抽空同我呢件無謂閒人解悶，天南地北，兒時瑣事，猛噴口水，小生這廂謝過了。
噏都唔噏得咁多，都要搵尐方法殺吓尐時間，所以一得閒，又學下子厚河東先生：其隙也，則施施而行，漫漫而遊。日與其徒（我多數一支公）上高山，入深林，窮迴溪 …。咪住，其實我唔係特別鍾意幽泉怪石，我多數會行海邊，又或者區跨區咁行，感受人氣，感受歷史，我其實鍾意 city walk 多尐。不過，同老友一齊行，又係另一種感受，七月九日，多謝超記，井少仲遠道由台北飛嚟，一齊登上西貢釣魚翁 344m ，佢係香港三尖之一，其他兩尖係蚺蛇尖同埋青山。師範 PE Camp 時上過蚺蛇尖，一講，已經係四十年前嘅事。咁，幾時上埋青山，又造多個紀錄呢？
香港係世界跳板，由香港向世界出發，邊度都非方便。今次留港百幾日，只係去過日本、台灣、澳門。去得咁少地方，實在令人失望。雖然係咁講啫，有得玩梗係好過冇，人生本如此，有幾多玩幾多而已。咁梗係要多謝麥陳賢伉儷倍我倆東京幾日遊，又助我締造另一紀錄，就係第一次喺國外揸車，多謝晒。King King 美儀相伴台灣遊，多謝井少接侍。除咗坐「棵樹」呢個人生第一次外，兩美相伴外遊，當然係我人生紀錄喇。
據說，鍾意講笑話嘅人，大多都係悲觀嘅人，我唔知呢句說話有幾真，不過我自己就係嘞。正正感覺人生無常，荒唐世事，每日上演。生我育我嘅東方明珠，今日，已經面目全非，嗰種無力感愈嚟愈強烈。舊時，我注意香港政事，話晒，香港係我故鄉，我今日之所有，亦全拜佢所賜，我感恩之餘，梗關心佢嘅一切。如今，我都有睇香港新聞，但已彷如局外之人。太用力去關心，得返嚟就係更大嘅嘆息。與其唞大氣，不如嘻嘻哈哈笑咗佢。所以我鍾意笑，笑口常開，無論真笑假笑，訕笑苦笑，總之就係笑。小民一個，有何能力去左右大局，不過，笑，對小我嘅身心健康，則有莫大裨益也。
2017 香港，梗係一個由年頭笑到年尾嘅一年。三月林鄭「選」蠃上台；一人一票民選議員畀人踢落台；一地兩檢；港珠澳大橋；肖迠华；曾蔭權；朱經緯；樓市股市 ……，一個笑話大過一個，真係年頭笑到年尾。你可能話：乜你咁衰，咁都笑。我又話：咁，唔笑，又有乜可以做？幾時飲茶吹水，歡迎各位老友指教指教，諗唔到好計仔都有餐食，OK喎。
香港 159 日仲有一個紀錄，不過就唔係發生喺我身上。嗰一日，我仲喺台灣 happy 緊，係七月廿五，下晝一點45分，灣仔街市畀人跣一鑊，阿珊右手手㬹就鑲咗一塊金屬片，此後三個月，不斷喺醫院做物理治療、職業治療。好彩多得剩返低嘅英式醫療系統，佢得到完善嘅照顧，當然常懷感恩之心。要接受咁長時間嘅治療，咁梗係又一個紀錄喇。佢成日話，當佢有乜嘢要幫手嘅時侯，我永遠都唔喺身邊。又唔知點解，呢個又係常態，好彩佢係硬淨嘅人，雖然個過程係痛苦，佢都搞得掂嘅。呢篇係我嘅自噏自話，不宜替人發言，就此打住。
一年伊始，除咗回顧，梗係仲要前瞻。二〇一八，大約分年初年中及年尾三部份，都係出遊計劃，而家正在密鑼緊鼓進行緊，到時再同大家噏過。呢篇回顧嘅開頭話送自己一份禮物，其實係一架山地單車 mountain bike ，人一世物一世，豪些少買架靚仔尐嘅車，用嚟刺激一下自己郁多尐，梗係最佳藉口喇。十二月三十一日，擁有一架碳纖維車架，雙懸掛避震嘅山地單車，又係一個紀錄。
二〇一七，就用呢個紀錄作結。出年……
再噏過
嚤囉
