2016.06.23 唔知喊定笑，慣噏人生本無聊；決止腩肉消，狂Hea郵輪珊瑚礁。
柯拿，大家好
六月份係袋鼠國嘅冬天，雪梨天氣，地中海式氣候，照例又係多雨季節。估唔到，今年咁應景，六月五日，落咗連場大雨，「紐修威」四圍水浸，有尐地區仲要大徹退。好彩袋鼠國，福大命大，咁嘅天災都冇人命損失。至於財產，又有保險賠。冇買保險？唔緊要，福利國家，政府養起你。喺電視見報導災區，「災民」絕唔會大喊十，反而有尐災區居民，見水浸街咁得意，家長居然由得細路喺浸咗嘅車路游水，袋鼠佬果然天真爛漫。搞到市議會要叫「災民」唔好咁得戚，一來尐水唔乾淨，再者，慢吓手，有毒蛇或者鱷魚喺水中出沒都未定。咁嘅災區，你話係咪好過癮呢？
將災區變成水上樂園，咁係喊定笑？認真夠晒吊詭。其實，人生就充滿吊詭。
六月十二日，佳叔喺睡夢中奔赴天國，佢好有福，離去時，子女都喺身旁。雖言，此生無憾無悔無牽掛，終歸係大別，悲傷、不捨，都係人之常情。第二日，十三號，鬼仔占士向大小姐求婚，仲嚟個大龍鳳，喺雪梨歌劇院前面，搞個盛大求婚 party ！（其實，鬼仔占士喺一個禮拜前，已經話咗畀我知佢要向大小姐求婚嘅事，連戒指個樣我都見過，不過求婚詳情就未定，我負責保守秘密。原來鬼佬世界好重視求婚呢單嘢。喺佢精心策劃，卒之就搞咗呢壇大龍鳳）。淚未乾，就要開懷大笑，應咗袋鼠佬話齋：That's life， mate 。12 號嘅飛時卜，個個叫我節哀，第二日就恭喜恭喜！人生條路會係點走，幾時笑，幾時喊，㸃會畀你估到。
回想兩三個月前，個個得知我發現細胞變異嘅詳細故事，都嚟恭喜我！佢哋唔係要整蠱我，而係真心實意戥我高興，因為真係好彩發現得早！你話，呢句恭喜，又係唔係好吊詭呢？咁我耍畀乜嘢反應？笑定喊？
總之。經過呢件事之後，我以後條路點行，就一清二楚嘞。咁係好事定係壞事？我真係唔識講。
我三月十九日變咗個「差不多無謂人」，貶吓眼又三個月喇。外邊觀察，我行得走得，整花園、斬樹枝、鋪地磚，擔擔抬抬都好似幾得咁，睇嚟以為已經好得七七八八。其實，內部復元，比我想象中慢得多。有時都頗為煩惱。
因為冇咗好大個個胃，一段小腸就做咗胃嘅替工，嗰尐食物，未經消化就畀呢位替工處理。睇嚟，呢位仁兄仍然未適應呢份工，每次開工都唔係好高興，無論你點慢慢食，唔夠兩三啖食物，佢就發出警告，起初仲猛打思噎，等你食唔到嘢，後來雖然慢慢習慣，再唔輕易打思噎，但係好快就有漲滯感覺，如果同佢抝氣，繼續食嘢，佢就肚痛畀你睇！成三個月嘞，到而家都係咁，食完嘢，個肚就嘰哩咕嚕，響個不停，仲會有尐痛，要坐低起碼半粒鐘，個肚仔至肯收聲！ ⋯⋯ 食嘢，並唔係開心愉快嘅過程。
就算畀你食落肚，咁又吸收到幾多？濟公，呢件嗱渣和尚有名句：「酒肉穿腸過，佛祖心中留」，我而家起碼有佢一半功力，就係，食物只穿腸而過，果真「腸直肚直」。不過，凡事都可以多面睇，呢兩年，我猛呻我個肚腩大，嗌嘈晒話要搞搞佢。啱嘞，而家吸收能力咁水皮，個直接嘅副作用就係⋯⋯減肥，而家比手術前已經瘦咗 8 kg，二十幾年前個條 Apple Texwood 卡奇短褲，而家都着得返。我而家要少食多餐，食嘅總量唔算太少，但係仲未有肥返嘅跡象。本來嗌嘈晒嘅減肥計劃，居然用咁嘅方法達至目的。好似葉麗儀喺上海灘話齋：「成功？失敗？浪裏看不出有沒有」。咁唔係吊詭又係乜？
出院後，卒之喺屋企 hea 足三個月。又唔係乜都唔做，有時會有尐客交尐 jobs 過我；屋企前前後後、上上下下又梗有尐嘢可以做 ⋯⋯ ，總之一日喺屋企，一日都唔會繞埋手唔做嘢，咁就好難，好好咁，hea 住休息嘞。大少爺大少奶心生一計，仲大解慳囊，買咗兩張南太平洋島國十一日郵輪嘅飛，送畀我倆。計劃中，兩件嘢一上船，就邊度都唔使去。郵輪上除咗食，就係 hea，咁就啱晒我養好個新胃仔。
計劃歸計劃，又係嗰句，幾時到你計？佳叔嘅事，事出突然，阿珊要即飛香港，我是否陪同佢一齊，已經無關宏旨。郵輪船飛又冇得退，我只好收拾細軟，一支公獨 hea 太平洋島國。此行目的有兩個：其一，加磅；其二，恢復體力。方法：全天候 hea 住食。
其實，阿仔吼得好時機，喺做大減價嗰日買到飛，兩個人十一日郵輪，只收袋鼠幣$1363，維起上嚟，每人每日七十蚊都唔使，平到冇人信。當然，而家就 double 咗喇，不過都仍然平過正價，而且係單人住晒一間房，當然都唔算貴。
又咁講，而家諗返轉頭，如果真係按計劃上晒船，嗰時就真係 Lea 咁 hea ，唔知點算嘞！又係嗰句：人生，邊到你計呢，又？
呢個十一日航程係咁嘅：頭四日就係喺南太平洋向東北航行，即係茫茫大海喇。跟住四日就喺法屬 New Caledonia 同雅魯阿圖共四個小島、城市停泊，到時可以上岸玩。跟住兩日回航，到第十一日就返回雪梨港喇。
六月十三日係星期一，不過，好彩係英女皇壽晨假期。放假，道路非常暢通，大小姐車咗我去火車站，我就搭火車出雪梨港環形碼頭。喺 Circular Quay 火車站高架站頭，已經見到呢隻 Carnival Spirit 郵輪泊咗喺雪梨國際碼頭。我大鄕里，嘩，真係好大隻船喎。
火車站到碼頭只係投石之遙，我成個遊客咁嘅款，拉住拖喼，五分鐘就行到碼頭。一組組工作人員，已經分佈喺行人路，指導乘客寄運行李及安排進入禁區範圍。渡假喎，乘客個個都掛住笑面，成個安檢及離境手續，都喺輕鬆氣氛下進行，十分愉快。我哋買平飛，寫明係 interior cabin，不過都分配到一間右舷有梗窗嘅向海房，就算斜臥喺牀頭，都睇到 180 度海景。俟住玻璃，坐喺窗台上，十幾呎下，就係船頭撞起，白花花嘅滔滔海浪，如果大浪起上嚟，海面就喺窗底下冲過，浪花打喺窗上，非常壯觀。買平飛，都有咁嘅靚景，算係咁喇。
我係第一批 check in 嘅客，好早就上咗船，搵到自己間房。不過，行李仲安排緊，有排至入到房。好似每次我到新嘅地方一樣，我即刻孭起背囊，起程四圍行，睇吓呢隻船點嘅款。
我住喺第一層，全層都係客房，二樓、三樓就係主要活動地方。酒吧、餐廳、賭場、劇院、各類服務櫃位 ⋯⋯ ， 都喺晒呢兩層，咁又好方便我喎。第四層至第八層，全部係客房，有露台嘅房間，全部喺晒呢五層。今次呢水船，有二千四百個客人，加埋九百個各類工作人員，三千幾人，就喺呢艘 Carnival Spirit 號郵輪，同舟共濟十一日。咁當然係緣份一場。
第九層就係熟食大牌檔，各式南北東西飲飲食食，按時按候擺滿各個檔口，有尐仲廿四小時全天候服務，大家唔使畀錢，任食唔嬲，咁唔係天堂係乜嘢？如果有人食免費嘢食到厭，硬係要畀錢至安樂，亦有「高級」尐嘅餐廳招呼呢尐人。不過佢哋掙唔到我錢！蔣家家廚咁了得，乜嘢好嘢我未食過？使唔使畀錢食尐咁嘢？Hm hmmm！
上船第一日，郵輪安排咗一個緊急事故演習，三點半，緊急訊號響起，大牌檔拉閘收檔，各層工作人員亦趕人離開客房，大家紛紛走到第三層兩邊船舷甲板上，按住所屬區域排隊集合。頭頂就掛住一隻一隻嘅救生艇 tender boats，有乜依郁，大吉利是嘅話，就按指示，登艇投奔怒海喇，咁當然要 fingers crossed 喇（唔係 touch wood 喎 ）。大家都乖乖聽過安全指令，睇過着救生衣示範。半粒鐘後，解散自由活動喇。
第九層船頭船尾都係曬太陽嘅地方，有幾個細細嘅水氹（我唔會叫佢做「泳池」），旁邊擺滿各款戶外、沙灘籐椅。鬼佬鬼婆一見太陽，就會顛晒咁顛曬，所以，呢度亦係最多人使用嘅地方。而家架船泊正雪梨港，九樓船尾 sun deck 對正雪梨海港大橋，同埋雪梨歌劇院，嘩，咁好風景，即刻攤低，一邊望住雪梨兩大地標，一邊曬個冬曰太陽。真係好舒服。
我大大約約上上下下行咗個大匝，對隻船嘅設施，有咗個大概印象。至於乘客方面，個樣似退休人士嘅，當然唔少，有三、四成啩，亦有不少係年輕家庭帶埋十歲八歲細路嚟玩，亦有連群結黨嘅廿零歲𡃁仔𡃁妹、出雙入對嘅年輕情侶 ⋯⋯。睇嚟年齡層都幾多樣化，並唔係想象中，全船都係老餅。上船前，有人警告我：小心！可能半架船都係強國人！我一路睇真尐，咦，呢隻船，一尐都唔強喎。
行到夠本，返房。咦，點解行李仲未到，門邊信箱有張紙，話我個行李有違禁品，可能影響郵輪安全！有冇咁誇？唔通有回教份子擺咗炸彈喺我個喼？去到實Q辦公室，被扣查嘅行李都唔少，擺滿走廊。原來我個電拖板唔合規格，實Q提議我喺船買返個船公司專用拖板，要使寃枉錢？唔係我嘅性格！佢嘅好意我心領嘞。拉返拖喼返房，整理好衣物，又話晚餐時間。
喺買船飛時，就要揀定晚餐時間，阿仔幫我揀咗「your time dinning」，即係話唔使預訂，亦即係話手快有，手慢冇。五點半開餐時間，我早 15 分鐘就到，順利排到頭位，並獲安排坐到窗口邊（點到你唔服，此後船上共十日晚餐，我都係坐埋同一張枱）。餐廳提供 3 course 西餐，如果要飲品或者特別嘅餐，就要額外畀錢喇。伙記埋抬：「水？有氣？冇氣？」我唔中計，我知，有氣冇氣都要畀錢。我：「tap water ，please」。「do you want something from the bar？」佢好盡力，契而不捨。要額外畀錢，違反我嘅原則。我微笑：「no thanks 」。
喺碼頭登記上船時，每個乘客都獲派一張信用咭 size 嘅乘客證，乘客證又已經同你嘅信用咭掛鈎，乘客喺船上嘅一切使費，「嘟」張乘客證就得嘞，方便你使多尐錢。不過，於我，乘客證就只係門匙 key card，同埋上落船嘅證件而已。
冬天嘅雪梨，五㸃都唔使就天黑。食食吓晚餐，郵輪就喺暮色中升火，啓航離開雪梨港，向東北方向駛入南太平洋。郵輪上第一個晚餐好唔好食呢？又係嗰句，食到今時今日，好難再有乜嘢驚喜，呢一餐，OK 咁喇。呢個晚餐食咗成兩粒鐘，食西餐係要尐時間嘅，慢慢食，咁咪啱晒我個肚仔囉。
離開雪梨，最顯著嘅啓示，就係 iPhone 冇咗綱絡！今時今日，通訉咁發達，冇咗網絡，時辰點過？船公司自然有辦法搵你錢，連我咁孤寒，都買咗個最平嘅 wifi 服務，就係袋鼠幣 ＄85 蚊全程使用。不過，只係接通包括 whatsApp 及飛時卜等七個最通用嘅 apps，而大型出名航空公司、交通 apps 亦都可以接通。不過， whatsApp ，messenger 等 apps 嘅電話功能，就 block 住咗嘞，真狡猾！不過為咗可以保持全天候聯絡，冇辦法唔畀佢賺！
晚上九點幾開通咗個網，whatsApp 、飛時卜即時傳嚟喜訉：就係開頭話嘅，占士喺雪梨歌劇院外，糾集咗約半百老友，畀大小姐一個大大大驚喜：求婚！呢 85 蚊，抵畀喇。諗返轉頭，占士求婚時，我呢隻郵輪正係啱啱開船離開碼頭，如果我企喺船邊，加埋望遠鏡，係有機會睇到占士向大小姐求婚，呢個歷史嘅一刻，不過，邊有早知。接到呢個咁大嘅喜訉後，蔣家分别喺世界唔同角落，大家繼續 whatsApp 一大輪，我仲即時鋪咗上飛時卜，等各方好友都見證大小姐新的一頁。
第一個南太平洋嘅好夢，果然甜到漏。
我唔係貪瞓嘅人，既然有個「生肉計劃」，即係密食同埋運動，咁就要晨咁早起身喇。每日，唔夠七點，就上到九樓大牌檔，嘆個第一輪早餐。早起果然方便，唔使排隊，想食乜都得，不過，我個胃仔咁細，都係攞半碟立立雜，加杯咖啡算數。咪話佢細碟，都要成粒鐘至搞得佢掂。即刻落返房換返運動 Tee 裇短褲，腳踏美津濃跑鞋，再𣛟上十樓開工嘞。第十層，沿住船邊就係一條環型緩跑徑，為咗保䕶下肢關節，我唔會跑，只會急行。我嘅路綫就係先兜船行一圈，再沿樓梯由十樓行落一樓，即刻又行返上十樓，跟往再次兜船邊行，再撑樓梯，餘此類推。就咁行行重行行，行足粒半鐘就收工。第一日測試，咁嘅運動量，完全冇問題。
除咗四個上岸活動日，我每朝都係咁樣運動，其中，只有第一日係稍為好天，跟住每日都係落住細雨，而且好大風。風風雨雨又點阻得到我，就算濕晒身又如何？可以頂住咁大風嚟運動（當然要安全），有幾何有咁難得嘅機會，我點會錯過？不過，風雨中，成隻船就只有我一個儍佬喺度行，係就係有尐異相，嚤囉仔係我行我素嘅人，人哋點睇？who cares！
運動後，略作休息，即刻食第二輪早餐。其實都唔食得好多，半碟已經嗌肚漲，然後慢慢行返落房，冲個靚涼，換返乾淨衫，帶埋 iPad ，上返九樓船尾陽台，斟定杯茶，搵張唔曬，又避到雨嘅籐椅，咁就開始一日嘅 hea hea 時段嘞。我成件攤低喺籐椅，得閒就游目四盼，有時又閉目養神，唔啱又用 iPad 寫吓嘢，發吓噏瘋，一陣又呷啖茶再搞吓 whatsApp 、飛時卜⋯⋯，哈，又真係勁 hea 喎。
如是者 hea 到中午，又去大牌檔搵嘢食，又係先嚟半碟，個零鐘頭後，又嚟尐生果、蛋糕仔甜品等等小食。我要好小心自己嘅食量，如果一個唔小心食多咗，個肚仔又發老脾，咕咕聲唔在講，原來個消化系統一受壓力，就會引起「心悸」，即係個心仔「迫嚦噗綠」跳一輪，好似唔知驚死做錯咗乜嘢，心虛嗰種感覺嘅心跳。三個月嚟，情緒最低落就係食嘢嘅時候。偏偏而家要花咁多時間食嘢，真係要搵尐嘢搞吓，製造多尐 andophine 畀個腦仔嘆吓，等我開心返尐。
九樓船尾陽台，係細路禁地，要18歳以上至入得，冇百厭𡃁仔呱呱叫四圍走，咁嘅安排令呢度寧靜舒適，每日食完中午飯，我都會喺呢度坐三幾粒鐘，直到五點就返房，換返長褲，穿鞋着襪，執正些少，又去食 fine dinning 喇。
講起船上晚餐，其實都有好多選擇，我係簡單嘅人，我去最大嘅餐廳，船頭二、三樓 The Empire Dinning Room，餐牌每日都換，食物亦好有心思，我做乜要四圍䠮去搵嘢食？每晚，九樓大牌檔，到處都擺滿食物，任君選擇，我睇過都冇乜好食，食客亦比午餐少。自助餐好處就係可以食多尐，同埋，笠記牛記都冇人理，可能啱細路多尐。此外，亦有兩間要畀錢嘅餐廳。一間喺頂樓，每人最低消費係袋鼠幣 45 蚊，餐廳喺門口擺咗尐未煮嘅牛扒，以作招徠。我未去過，唔知多唔多人幫趁。樓下二樓又有一間壽司店，我有時行過，成日都係小貓三四件。睇嚟，要額外畀錢，好多人都唔制！
傳說中，搭郵輪，會有餐「船長晚宴」，到時要着靚靚至可出席。因此，我都帶咗裇衫西褲，黑襪皮鞋，仲帶埋我四十年前葛師嘅校呔。最後，發覺只有兩餐係要執正尐，稱為 1st and 2nd Cruise Elegant ，不過亦冇船長在場食飯，其他日子晚餐，唔好波褲拖鞋就得嘞。睇嚟，郵輪旅行呢家嘢，而家，貴氣盡減，其實已經非常平民化喇。不過都做吓樣，船長同一眾高層，都搵尐機會見吓乘客，就係喺第一次 Cruise Elegant 晚餐後，喺船中庭酒吧開個簡短酒會，叫做 Captain's Celebration，半個鐘都唔夠，叫做聊表一格喇。
由十三號，郵輪啓航開始，連續四日都係 Sea Day ，焗咗喺隻船上，每日所做嘅嘢亦係周而復始，無乜大變化。大少關心我，慌死我會悶，問我有冇睇騷，有冇參加尐乜嘢活動？其實每晚，房門邊信箱，都有派第二日詳細活動表。真係好多活動，可惜活動唔多啱我脾胃，教跳舞、教煮餸 ⋯⋯，又或者鬼佬戙篤笑，我都唔知佢噏乜，點笑得出？不過，大少過慮嘞，我係嚟 hea 嘅，眼光光冇嘢做，就預咗嘞。悶？又唔覺喎，係無聊咗尐。不過，寄生塵世，本來就係一件無聊透頂嘅事。其實，所謂「人生計劃」，似足船上舉辦活動，就係喺無聊中搵尐嘢搞吓，一世人流流長，咁咪無咁悶囉。而家喺船上只係十一日，點會悶到我？
十七號，呢日開始，有尐搞作嘞。如常，六點半 iPhone 鬧鐘響。我打開窗簾，「LAND！」以前睇海盜卡通，爬上桅桿頂嘅賊仔，用單筒望遠鏡睇到陸地時，必定要大嗌 LAND！今次行咗四日船，卒之睇到陸地嘞！其實，噚晚派嘅節目表已經講咗喇，仲好詳細講明離船及回船嘅注意事項。而家大聲嗌 LAND ，只係搞吓氣氛啫。
此行第一個登陸嘅島，叫做「神秘島」 Mystery Island，係瓦魯阿圖最南端嘅領土。個島好細，長 lei lei ，周圍都係沙灘。由船上望落去，就知小島坐落環型珊瑚礁嘅中間。小島之所以叫做神秘，係因為此島冇人居住，因為土著傳說，呢個島入夜就有鬼魅出沒。介紹又講，1974年，英女皇喺南太平洋之行，前往澳洲途中，亦曾經到過呢個島，亦係唯一一個女皇到訪嘅地方，而冇人喺岸上揮手歡迎佢。
郵船唔可以埋島，只可以喺珊瑚礁外拋錨，離船嘅人要搭救生艇 tender boat 上岸，咁樣好明顯係環保理由。今日天氣唔算好，四圍都係一嚿嚿黑雲，遠處仲落緊雨，晨光喺東面水平線，穿過嚿嚿黑雲向外投射，一條七色彩虹，就鑲嵌喺西邊亂雲之上，一早見彩虹，梗係順景嘅一天。
照舊晨咁早食過早餐，即刻返落房換晒游水戰衣，準備吸管面鏡蛙鞋，GoPro 又點少得。跟隨指示，去到法老王劇院，每人分配好次序，經過登記離船手續，就排隊喺低層船邊，搭救生艇登陸。救生艇原來都幾寬敞，應該可以坐到一百人左右。
約十五分鐘航程，救生艇埋岸，沿住簡單但實淨嘅碼頭登岸，碼頭附近嘅街市廣場，小販已經開好檔。當然喇，島上雖然冇人住，有錢揾嘅地方，就吸引商人，附近居民，知道船期，就按時嚟擺賣。街市用樹枝搭建成一排排㰙檔，似足香港年宵攤檔，都係賣埋尐唔等使嘅遊客紀念品，絕對唔會引起我嘅興趣，不過，我鍾意行街市，體驗人生百態。街市中間有個樹枝搭成、十分簡陋嘅避雨停，裏面有一群著住校服嘅學生唱歌，前面放咗字條，原來學校籌款建設新校舍，籌款白桶裏面多數係袋鼠幣，怪唔得，我哋呢隻船，多數係袋鼠國子民。
街市盡頭小廣場，用木頭搭起一個幾呎高嘅台，上面造咗個浴缸咁大嘅圓㷛，下面仲氹氹圈喺㷛底擺滿大碌木柴，又有火，當然係畫嘅喇，有個鬼婆（真人，係郵輪上嘅客人！）喺㷛邊伸個頭出嚟，旁邊有兩個土人，揸住長茅作狀殺人，鬼婆又好合作，扮晒嘢，有時反抗，有時詐死 ⋯⋯，鬼婆個 friend 喺台下幫佢影相。乜嚟呢？好簡單啫，你肯畀錢就有得表演。原來據說不久之前，呢度附近小島嘅土著係食人族，所以就有咁嘅表演喇。 哈！cannibal soup ？如果白人講，仲唔係種族歧視？等收告票喇。佢哋自講 ⋯⋯ OK 喎。唔公道？係咁嘅喇。
行返出海灘，擺低背囊，着上蛙鞋，戴上吸管面鏡，全個投入南太平洋海中。珊瑚礁海底好平，行到好出都好淺。皮膚畀南太平洋海水緊貼住，溫度啱啱好，呵！好舒服。我着住蛙鞋，愈游愈出，遠離好多細路嘅淺水區，透過吸管，深吸一口氣，低頭鴨潛入水 ⋯⋯，海底係另一個世界，白沙海底之上，就係一叢叢高高低低，形態各異嘅珊瑚礁，珊瑚礁周圍，就集結咗一群群慢慢游弋嘅珊瑚魚。魚仔見我游落去，即刻匿入一條條珊瑚觸鬚之間，稍為大尐嘅魚就走入珊瑚底部，又或者水底嘅地窿裏面。呢尐情景，當然唔能夠同國家地埋雜誌記錄片相提並論，但係而家我親眼見，而且同魚仔有互動，咁樣實在好過癮。此情此境，GoPro 梗係要紀錄一切喇。
原來游嚟游去睇魚仔，真係會留連忘返，唔捨得走㗎。上岸曬一陣，又再落過海 ⋯⋯，唔捨唔捨都要上水喇。再兜住海岸，圍繞小島，漫行一個圈，咁細嘅島，一陣就返返碼頭。已經有返航嘅救生艇等緊，好快返返母船，再做入境手續，過安撿，上返大船。上午神秘島之旅正式結束，馬上冲涼裝身，不在話下。
食過午餐，又喺船尾喪 hea 。whatsApp 收到仔女新抱仔嘅指示，原來隻船有兩個著名電台 DJ ，Hamish and Andy 進駐，主持現場節目，拉闊直播雪梨電台。佢哋慌死我唔知呢兩件 DJ 係乜款（我又真係唔知喎），仲畀埋相我睇，要我搵到佢哋，並且要影返張合照咁講。
我攤攤吓，眼咪咪，昏昏欲睡之際，水氹中走出兩件鬼，隔籬鬼仔鬼妹忽然起哄，連附近阿婆阿伯，都走埋佢兩個度話要合照，我唔使對吓張相，都知係名人喇啩，雖然唔肯定係咪兩個目標 DJ，本住有殺錯，冇放過嘅原則，我即刻起身哄埋一份，成功同佢哋合照，隨即將相 whatsApp 出去，冇耐，蔣家 whatsApp 即刻起哄，我知我完成任務喇。大小姐將我呢張相放上佢嘅飛時卜，有百幾個 like 咁多，有尐人仲話好妒忌，乜真係咁巴閉咩。我企喺佢兩個中間影相，呢兩件鬼好高大，我只去到佢哋嘅膊頭，呢張相，其實好怪相。
郵船喺夜幕低垂中駛離神祕島，食過晚飯，搞 lee 搞 lo 又係一日嘅結束。我哋好夢正酣之時，郵船就喺黑夜中航行。第二朝打開窗亷，船已經埋頭，用右舷 starboard 靠岸，我嘅窗門正正望住碼頭堤岸，冇耐，一隊黑人樂隊 marching band 喺我窗前下面提岸走過，向船頭方向操去，梗係喺郵船出口處演奏，歡迎生意來臨。
如常，我食過早餐就離船。呢幾日都係咁，晴雨無常，而家，一落船，就落起大雨，唔夠十分八分鐘又出太陽。好在我嘅衫褲，係隨時可以就咁跳落水嗰隻，濕身，完全冇有怕。
郵輪碼頭，離開市中心都有一大段距離，岸上泊咗一隻隻摩打舢舨仔，可坐二十人左右，呢尐水上的士，游弋於郵輪碼頭與市中心之間，單程收費，每位 5 蚊袋鼠幣，明碼實價。我即刻跳上其中一隻，喺暴雨朝陽中，駛入瓦魯雅圖首都 Vila 港。
一上岸，就有人埋身，推銷旅遊產品，呢尐都係預見得到嘅事。我會首先好留心聽，睇下好唔好玩。如果冇乜特別、冇興趣嘅話，就好有禮貌咁拒絕。呢次佢話 150 蚊四圍遊，睇吓士著村莊，帶去海灘潛水，行吓個城 ⋯⋯，佢見我一尐都唔心郁，冇耐自動減到百二。當我行行吓街，又見返佢，佢已經帶住一班客，就話跟埋呢班客，只收我 50 蚊。我微笑擰擰頭，繼續行我嘅街。
瓦魯雅圖首都 Vila 港，我睇，都應該有上世紀五十年代西灣尾橫街水準。其實即係冇乜嘢好睇。而且只得一條爛溶溶嘅主街，我由頭行到落尾，連土著街市都行埋，都係冇乜嘢睇。偶然行過一笪空地，八吓卦行出去，原來係個碼頭仔，岸邊小亭放咗一疊紙，我又八卦睇吓係乜。寫住 Iririki 島1500 vatu，計一計，都唔使 20 蚊袋鼠幣。實在，呢個 Iririki 島喺邊，我都未知，直覺就係去Iririki 島嘅船費，冇所謂喇，有地方去就去馬喇。冇耐，有隻幾骨子嘅船埋頭，跳上船。哈，原來 Iririki 島就係一箭之遙，喺正對面嘅島，呢個 Iririki 島，係一個私人渡假村小島，呢 20 蚊，唔係船費，而係包一日嘅活動，可以用渡假村小島嘅設施。
咁正嘅嘢，冇乜人知！幫吓尐客，船公司應該宣傳吓。不過，可能同佢嘅旅遊生意有矛盾，在商言商，咁又明白嘅。我攞住小島地圖，差唔多係自己一個人喺渡假村小路漫遊，非常輕鬆寫意。沿斜路行落海邊，有個 Snorkel Bar ，馬上戴好裝備，迅即投入大海懷抱。比較噚日神秘島，呢度可能較為人少到，珊瑚又大尐靚尐，魚仔亦多尐，真係潛得好開心。
小路路邊，座落一排排出租渡假嘅單層平房，睇嚟而家未係旺季，都冇乜住客喺左近。渡假村一頭一尾有兩個大泳池，我兩個都游過，又攤低曬下太陽。成個池小貓三兩件，玩得咁鬆動，20 蚊，抵畀喇。
橫掂個城都冇乜好遊，喺渡假村，玩夠皮，直接返大船食晏好過。本來打算要搭返渡假村駁艇，出返 Vila 港市中心，再搭水上的士返船。點知居然喺渡假村碼頭，截到一架正在駛返郵輪碼頭嘅水上的士！舉手截船，佢又駛埋嚟，我蹤身一跳，安全上船！「递手截水上的士」！咁奇特嘅經驗，都係第一次試。
照舊，郵輪又係喺我哋食緊晚飯時，離開瓦魯雅圖，駛向此行嘅第二個島國 ---- 法屬 New Caledonia 。
架船行到蟻躝咁慢，梗係較定時間，八點左右到達 New Caledonia 嘅 Lifou 島。呢個島係火山活動地層上升嘅結果，個島亦係氹氹匝圍滿珊瑚礁，所以大船都唔可以埋岸，又係要喺珊瑚礁外拋錨。今次係第三次離船，手續都慣晒，快手快腳，早餐後即刻落船。哈，我係第一批搭 tender boat 上岸嘅遊客。
上兩次上岸，見步行步，今日就目標明確，就係去島嘅北角，嗰度有個自然保䕶嘅海灣 Jinek 海灣。
因為太早，碼頭邊空地，做遊客生意嘅土人簡陋攤檔都未開檔。真係好早，成條路我一個人行晒，盡頭岬角係一個小山丘，沿石級上去，原來係附近最高點，可以270度觀賞海景，觀景台後面有有一個聖母小教堂，簡單整潔而不奢華。由碼頭行嚟呢度，沿途只見到幾戶人家，教堂就為佢哋而設？
行返落山仔，有條小路向東行落海灘，就係今日嘅目的地，Jinek 海灣。海灘有石級行落水，有個小亭喺石級盡頭，裏面有管理員，控制落水人數。我喺船上冇買到飛，好彩我嚟得早，畀15 蚊袋鼠幣買條手帶，就可以喺呢個受「保護」嘅海灣潛水。哦！受「保護」唔係唔准游，而係要交「保護費」！呢尐保護費係交畀海洋管理局，作為保養珊瑚礁之用。哦，應該嘅。
岸邊唔係沙灘，唔係石灘，而係鈣化咗嘅珊瑚平台，時日嘅冲刷，已經磨到滑 leut leut。我坐喺白雪雪、千千萬萬嘅珊瑚祖先之上，著好潛水裝備，落水觀賞佢哋千秋萬代之後，子子孫孫開枝散葉嘅盛況。
喺膝頭哥以下水深嘅珊瑚淺灘行走，非常麻煩。又驚自己跌親，又唔可以撳住珊瑚，又驚踩爛珊瑚 ⋯⋯，總之好論盡。行過麻煩淺灘，到有大髀水嘞，就可以入水跣出去。此時，吸一啖氣，低頭睇下呢個受保護嘅水中世界⋯⋯。
如果話第一日喺神秘島睇珊瑚係好睇，第二日喺 Iririki 島睇，就係好靚。呵，今日，呢個 Jinek 海灣，就係震撼喇。呢度尐水夠深，珊瑚礁生得又高又大，如果陽光夠，反映出嘅顏色就非常鮮艷。最犀利就係尐珊瑚魚，好多一群群，有尐又好大條，款式又多。佢哋唔怕人，只係同我保持適當距離。當然，論震撼，呢個海底世界，同我喺加拉巴哥斯島見過嘅，仲有好大距離，不過，嗰度冇咁嘅珊瑚礁。Jinek 海灣，so far，係我經歷過最靚嘅珊瑚礁。
海底世界，各有各生活，似乎生態非常和諧。珊瑚魚，多數顏色非常鮮艷，一群群走埋一齊，喺一朵朵巨型珊瑚中，啄吓啄吓，似乎食緊尐唔知乜嘢。我有時浮游喺水面，居高臨下，俯視眾生百態，有時潛入兩三米水，近距離同魚民接觸，與民同樂。
呵，睇吓，前面一條黑白相間水蛇，喺我幾米前方，由一組珊瑚礁，舞住蛇步，扭住蛇腰，橫過白色海底平原上空，走入另一組珊瑚礁。我屏住呼吸，慌死會驚動佢，唔知佢有冇毒㗎！
海底真係好睇，有時追魚仔，追追吓，浮出水面，原來已經去咗離岸好出，嗱嗱冧，即刻游返近岸處。海底又會令你不知時日過，游游吓，整乜咁凍，原來已經浸咗海水粒幾鐘嗱。一來早餐能量已經消耗得七七八八，二來減肥後，冇咗咁多肥膏，冇以往咁襟凍。即刻上返岸，抹乾身，睇下個島仲有乜嘢好玩嘅地方。
我呢身裝束，上水後唔使換衫，着返涼鞋就走得，非常方便。沿住原路行返出碼頭，再向島嘅另一方向走，呢邊較多人居住，亦有農田，仲有一個有百幾年歷史嘅教堂，此外就真係冇也好睇喇。我回頭返返碼頭，土著熟食㰙檔都開得七七八八，我雖然唔多肚餓，都應該係食第二餐嘅時候。不過我點會畀錢買！走落碼頭搭返 tender boat 返大船，直奔九樓大牌檔，免費自助餐，任食唔嬲。哈，仲有 wifi 𠻹。
食埋呢餐，先啱啱係中午，抖一陣，即刻搭救生艇，再去 Jinek 灣玩多次。已經係識途老馬，同一日第二次上岸，梗係快手快腳。呢條手帶繼續有用，咁又慳返 15 蚊。我喺珊瑚礁游弋，同尐珊瑚魚又玩多粒幾鐘，帶住濕立立、凍鐵鐵嘅身軀，但又好唔捨得嘅心情，同呢個珊瑚世界，講聲拜拜喇。
上返船就又係 hea 同食嘅時段，我不負所托，個口唔停咁食嘢。I've done my job，可惜，個肚仔又係鬼咁老實，直腸直肚，你畀幾多佢，睇個樣，佢又椗返好大部份出嚟。咦！咁係咪即係人稱：「嘥米飯」呢？唉，人生！果然無謂！
第四日登陸活動又嚟喇。八點左右，大船就泊好 Noumea 郵輪碼頭，「郵輪碼頭」其實只係貨櫃碼頭。似葵涌多過似尖沙咀海運大厦。為安全計，乘客唔可以喺碼頭走動，必須搭穿梭巴士或者觀光「火車」仔出入碼頭，其實，市中心只係十分鐘車程之遙。巴士載我哋去咗一個海邊商場仔。照舊，一堆堆落車嘅遊客，喺巴士站接車嘅旅遊公司職員眼中，就係一疊疊花綠綠嘅銀紙。Noumea 雖云係法屬 New Caledonia 嘅首府，為咗生意，都要講英文喇。
雖然我都帶備潛水裝備，但我知道可能踩到單車，所以任由推銷員向我推銷旅遊產品，我只係問返佢有冇單車租。生意做唔成，佢都好有禮貌，仲話我知單車舖喺邊。35蚊袋鼠幣租半日，即係四粒鐘，單車舖老闆娘畀張地圖我，略略交帶踩車路綫，我擺低郵船乘客證，交埋車租，就出發嘞。
其實，路綫非常簡單，只係沿住小島一個角嘅半島踩個匝，就返返原點嘞。依地圖睇，有好大段路係單車徑，不過，由市中心區踩入海灘區，都會踩過馬路，如果冇乜技術，都唔係容易。單車徑沿海而建，經過好多靚沙灘、靚公園、靚觀景點，仲有靚酒店、食肆、商場，連賭場都有。我踩吓，又停低影吓相、睇下景，實在舒服到不得了。
睇嚟呢條單車徑好新淨，佢亦係一條緩跑健身徑，每隔一段距離，就有公園水準嘅健身設備。一路上，好少好少人踩單車，不過跑步，健身嘅人就唔少。Noumea 畀我嘅印象，應該有一個普通歐洲城市嘅水平。
踩踩吓，再對吓地圖，我覺得我踩錯路，即刻喺路邊問人。呢度係居民區，英文唔多使得，法文喎，除咗「今晚打老虎」外，我就只係識「磅豬」。好彩攞住地圖，同路人甲指手畫腳，雞同鴨講一輪，都得知大概位置，再踩多一陣，路邊有警局！呢度咁多斜路上上落落，為咗唔使踩咁多冤枉路，一於入去問警察叔叔。
放低單車喺門口，拉開玻璃掩門，櫃枱坐咗位肥師姐，預咗佢唔識英文，打開地圖手指指，希望佢明白。睇嚟師姐唔多明白，佢搵嚟一位師兄，師兄可能又揸唔到主意，就帶我入房。再揾個高級尐嘅！我心諗，問路啫，使唔使咁誇呀？我自己開口講： 「is it that serious ？」呢個坐房嘅識英文，聽到我咁講就笑。 「you think it's serious ？」我道明來意，話只係問路而已。佢睇吓地圖，知道我想去邊，仲諗咗一大餐，原來佢認為由警局呢度返去市中心，交通比較複雜，唔知我搞唔搞得掂，於是想話搵警車載我返去。我即刻有個念頭：搭吓 Noumea 警車都幾得意噃。不過，隨即我又諗：咁咪完成唔到個單車路線囉。我堅持，佢只需指示方向畀我，咁就足夠嘞。佢帶我出門口，好詳細咁話畀我聽條路點走，我按足指示，再用多半個鐘就返到市中心。不過，原來呢段路真係交通較為繁忙，又多上落大斜路，警察叔叔佢嘅擔心，我又明白嘅。
返到市中心，仲有半粒鐘至交車，踩得唔好嘥，就喺附近兜嚟兜去。喺碼頭再踩入兩條街，居然見到中國式牌樓，旁邊又有中文寫住「中國城」，唐人街果然係國際品牌，世界各地，梗有唐人街喺左近。
唔使15分鐘，成個城中心地區，七七八八我都兜勻過，交咗車，喺碼頭坐多一陣，愈坐愈悶，此城已再無可戀，搭返穿梭巴士上返船。此至，呢程郵輪四個登陸活動，就喺 Noumea 呢度畫上句號。我正在食緊晚餐之際，郵船已經升火起航，掉頭西南，向雪梨進發。跟住，就係兩日盡情咁 hea 嘅 sea days。
坐郵輪呢單嘢，我本來以為，要老到咁上下至會做嘅活動，而家有幸，多謝大少、大少奶慷慨解囊，畀我提早試下尐咁嘅嘢。今次完成呢個十一日郵輪之旅，我感覺係：睇嚟，我嘅心態，仲未成熟到坐郵輪呢個階段。不過，今次唔係嚟玩，而係有個更重要嘅任務，就係啓動「生肉計劃」。十一日已過，作為啓動，我認為任務完成得非常好，我畀自己滿分！而且，仲有額外得益，就係，我對我嘅體力復元，增加咗信心。希望盡快可以實行我下一個目標。
好開心喺船上收到大小姐喜訊。航程中，雖然見唔到面，不斷透過 whatsApp 問訉、解惑、調笑 ⋯⋯。蔣家雖然分別喺地球四個唔同角落，一家人嘅精神，互相支持，我喺呢隻 Carnival Spirit 郵船，全部收到晒。真係啱到極，人生就係追求快樂，每日都好似去咗 Carnival ，咁至有 Spirit 㗎。
再噏過
嚤囉
六月份係袋鼠國嘅冬天，雪梨天氣，地中海式氣候，照例又係多雨季節。估唔到，今年咁應景，六月五日，落咗連場大雨，「紐修威」四圍水浸，有尐地區仲要大徹退。好彩袋鼠國，福大命大，咁嘅天災都冇人命損失。至於財產，又有保險賠。冇買保險？唔緊要，福利國家，政府養起你。喺電視見報導災區，「災民」絕唔會大喊十，反而有尐災區居民，見水浸街咁得意，家長居然由得細路喺浸咗嘅車路游水，袋鼠佬果然天真爛漫。搞到市議會要叫「災民」唔好咁得戚，一來尐水唔乾淨，再者，慢吓手，有毒蛇或者鱷魚喺水中出沒都未定。咁嘅災區，你話係咪好過癮呢？
將災區變成水上樂園，咁係喊定笑？認真夠晒吊詭。其實，人生就充滿吊詭。
六月十二日，佳叔喺睡夢中奔赴天國，佢好有福，離去時，子女都喺身旁。雖言，此生無憾無悔無牽掛，終歸係大別，悲傷、不捨，都係人之常情。第二日，十三號，鬼仔占士向大小姐求婚，仲嚟個大龍鳳，喺雪梨歌劇院前面，搞個盛大求婚 party ！（其實，鬼仔占士喺一個禮拜前，已經話咗畀我知佢要向大小姐求婚嘅事，連戒指個樣我都見過，不過求婚詳情就未定，我負責保守秘密。原來鬼佬世界好重視求婚呢單嘢。喺佢精心策劃，卒之就搞咗呢壇大龍鳳）。淚未乾，就要開懷大笑，應咗袋鼠佬話齋：That's life， mate 。12 號嘅飛時卜，個個叫我節哀，第二日就恭喜恭喜！人生條路會係點走，幾時笑，幾時喊，㸃會畀你估到。
回想兩三個月前，個個得知我發現細胞變異嘅詳細故事，都嚟恭喜我！佢哋唔係要整蠱我，而係真心實意戥我高興，因為真係好彩發現得早！你話，呢句恭喜，又係唔係好吊詭呢？咁我耍畀乜嘢反應？笑定喊？
總之。經過呢件事之後，我以後條路點行，就一清二楚嘞。咁係好事定係壞事？我真係唔識講。
我三月十九日變咗個「差不多無謂人」，貶吓眼又三個月喇。外邊觀察，我行得走得，整花園、斬樹枝、鋪地磚，擔擔抬抬都好似幾得咁，睇嚟以為已經好得七七八八。其實，內部復元，比我想象中慢得多。有時都頗為煩惱。
因為冇咗好大個個胃，一段小腸就做咗胃嘅替工，嗰尐食物，未經消化就畀呢位替工處理。睇嚟，呢位仁兄仍然未適應呢份工，每次開工都唔係好高興，無論你點慢慢食，唔夠兩三啖食物，佢就發出警告，起初仲猛打思噎，等你食唔到嘢，後來雖然慢慢習慣，再唔輕易打思噎，但係好快就有漲滯感覺，如果同佢抝氣，繼續食嘢，佢就肚痛畀你睇！成三個月嘞，到而家都係咁，食完嘢，個肚就嘰哩咕嚕，響個不停，仲會有尐痛，要坐低起碼半粒鐘，個肚仔至肯收聲！ ⋯⋯ 食嘢，並唔係開心愉快嘅過程。
就算畀你食落肚，咁又吸收到幾多？濟公，呢件嗱渣和尚有名句：「酒肉穿腸過，佛祖心中留」，我而家起碼有佢一半功力，就係，食物只穿腸而過，果真「腸直肚直」。不過，凡事都可以多面睇，呢兩年，我猛呻我個肚腩大，嗌嘈晒話要搞搞佢。啱嘞，而家吸收能力咁水皮，個直接嘅副作用就係⋯⋯減肥，而家比手術前已經瘦咗 8 kg，二十幾年前個條 Apple Texwood 卡奇短褲，而家都着得返。我而家要少食多餐，食嘅總量唔算太少，但係仲未有肥返嘅跡象。本來嗌嘈晒嘅減肥計劃，居然用咁嘅方法達至目的。好似葉麗儀喺上海灘話齋：「成功？失敗？浪裏看不出有沒有」。咁唔係吊詭又係乜？
出院後，卒之喺屋企 hea 足三個月。又唔係乜都唔做，有時會有尐客交尐 jobs 過我；屋企前前後後、上上下下又梗有尐嘢可以做 ⋯⋯ ，總之一日喺屋企，一日都唔會繞埋手唔做嘢，咁就好難，好好咁，hea 住休息嘞。大少爺大少奶心生一計，仲大解慳囊，買咗兩張南太平洋島國十一日郵輪嘅飛，送畀我倆。計劃中，兩件嘢一上船，就邊度都唔使去。郵輪上除咗食，就係 hea，咁就啱晒我養好個新胃仔。
計劃歸計劃，又係嗰句，幾時到你計？佳叔嘅事，事出突然，阿珊要即飛香港，我是否陪同佢一齊，已經無關宏旨。郵輪船飛又冇得退，我只好收拾細軟，一支公獨 hea 太平洋島國。此行目的有兩個：其一，加磅；其二，恢復體力。方法：全天候 hea 住食。
其實，阿仔吼得好時機，喺做大減價嗰日買到飛，兩個人十一日郵輪，只收袋鼠幣$1363，維起上嚟，每人每日七十蚊都唔使，平到冇人信。當然，而家就 double 咗喇，不過都仍然平過正價，而且係單人住晒一間房，當然都唔算貴。
又咁講，而家諗返轉頭，如果真係按計劃上晒船，嗰時就真係 Lea 咁 hea ，唔知點算嘞！又係嗰句：人生，邊到你計呢，又？
呢個十一日航程係咁嘅：頭四日就係喺南太平洋向東北航行，即係茫茫大海喇。跟住四日就喺法屬 New Caledonia 同雅魯阿圖共四個小島、城市停泊，到時可以上岸玩。跟住兩日回航，到第十一日就返回雪梨港喇。
六月十三日係星期一，不過，好彩係英女皇壽晨假期。放假，道路非常暢通，大小姐車咗我去火車站，我就搭火車出雪梨港環形碼頭。喺 Circular Quay 火車站高架站頭，已經見到呢隻 Carnival Spirit 郵輪泊咗喺雪梨國際碼頭。我大鄕里，嘩，真係好大隻船喎。
我係第一批 check in 嘅客，好早就上咗船，搵到自己間房。不過，行李仲安排緊，有排至入到房。好似每次我到新嘅地方一樣，我即刻孭起背囊，起程四圍行，睇吓呢隻船點嘅款。
我住喺第一層，全層都係客房，二樓、三樓就係主要活動地方。酒吧、餐廳、賭場、劇院、各類服務櫃位 ⋯⋯ ， 都喺晒呢兩層，咁又好方便我喎。第四層至第八層，全部係客房，有露台嘅房間，全部喺晒呢五層。今次呢水船，有二千四百個客人，加埋九百個各類工作人員，三千幾人，就喺呢艘 Carnival Spirit 號郵輪，同舟共濟十一日。咁當然係緣份一場。
第九層就係熟食大牌檔，各式南北東西飲飲食食，按時按候擺滿各個檔口，有尐仲廿四小時全天候服務，大家唔使畀錢，任食唔嬲，咁唔係天堂係乜嘢？如果有人食免費嘢食到厭，硬係要畀錢至安樂，亦有「高級」尐嘅餐廳招呼呢尐人。不過佢哋掙唔到我錢！蔣家家廚咁了得，乜嘢好嘢我未食過？使唔使畀錢食尐咁嘢？Hm hmmm！
上船第一日，郵輪安排咗一個緊急事故演習，三點半，緊急訊號響起，大牌檔拉閘收檔，各層工作人員亦趕人離開客房，大家紛紛走到第三層兩邊船舷甲板上，按住所屬區域排隊集合。頭頂就掛住一隻一隻嘅救生艇 tender boats，有乜依郁，大吉利是嘅話，就按指示，登艇投奔怒海喇，咁當然要 fingers crossed 喇（唔係 touch wood 喎 ）。大家都乖乖聽過安全指令，睇過着救生衣示範。半粒鐘後，解散自由活動喇。
第九層船頭船尾都係曬太陽嘅地方，有幾個細細嘅水氹（我唔會叫佢做「泳池」），旁邊擺滿各款戶外、沙灘籐椅。鬼佬鬼婆一見太陽，就會顛晒咁顛曬，所以，呢度亦係最多人使用嘅地方。而家架船泊正雪梨港，九樓船尾 sun deck 對正雪梨海港大橋，同埋雪梨歌劇院，嘩，咁好風景，即刻攤低，一邊望住雪梨兩大地標，一邊曬個冬曰太陽。真係好舒服。
我大大約約上上下下行咗個大匝，對隻船嘅設施，有咗個大概印象。至於乘客方面，個樣似退休人士嘅，當然唔少，有三、四成啩，亦有不少係年輕家庭帶埋十歲八歲細路嚟玩，亦有連群結黨嘅廿零歲𡃁仔𡃁妹、出雙入對嘅年輕情侶 ⋯⋯。睇嚟年齡層都幾多樣化，並唔係想象中，全船都係老餅。上船前，有人警告我：小心！可能半架船都係強國人！我一路睇真尐，咦，呢隻船，一尐都唔強喎。
行到夠本，返房。咦，點解行李仲未到，門邊信箱有張紙，話我個行李有違禁品，可能影響郵輪安全！有冇咁誇？唔通有回教份子擺咗炸彈喺我個喼？去到實Q辦公室，被扣查嘅行李都唔少，擺滿走廊。原來我個電拖板唔合規格，實Q提議我喺船買返個船公司專用拖板，要使寃枉錢？唔係我嘅性格！佢嘅好意我心領嘞。拉返拖喼返房，整理好衣物，又話晚餐時間。
喺買船飛時，就要揀定晚餐時間，阿仔幫我揀咗「your time dinning」，即係話唔使預訂，亦即係話手快有，手慢冇。五點半開餐時間，我早 15 分鐘就到，順利排到頭位，並獲安排坐到窗口邊（點到你唔服，此後船上共十日晚餐，我都係坐埋同一張枱）。餐廳提供 3 course 西餐，如果要飲品或者特別嘅餐，就要額外畀錢喇。伙記埋抬：「水？有氣？冇氣？」我唔中計，我知，有氣冇氣都要畀錢。我：「tap water ，please」。「do you want something from the bar？」佢好盡力，契而不捨。要額外畀錢，違反我嘅原則。我微笑：「no thanks 」。
冬天嘅雪梨，五㸃都唔使就天黑。食食吓晚餐，郵輪就喺暮色中升火，啓航離開雪梨港，向東北方向駛入南太平洋。郵輪上第一個晚餐好唔好食呢？又係嗰句，食到今時今日，好難再有乜嘢驚喜，呢一餐，OK 咁喇。呢個晚餐食咗成兩粒鐘，食西餐係要尐時間嘅，慢慢食，咁咪啱晒我個肚仔囉。
離開雪梨，最顯著嘅啓示，就係 iPhone 冇咗綱絡！今時今日，通訉咁發達，冇咗網絡，時辰點過？船公司自然有辦法搵你錢，連我咁孤寒，都買咗個最平嘅 wifi 服務，就係袋鼠幣 ＄85 蚊全程使用。不過，只係接通包括 whatsApp 及飛時卜等七個最通用嘅 apps，而大型出名航空公司、交通 apps 亦都可以接通。不過， whatsApp ，messenger 等 apps 嘅電話功能，就 block 住咗嘞，真狡猾！不過為咗可以保持全天候聯絡，冇辦法唔畀佢賺！
晚上九點幾開通咗個網，whatsApp 、飛時卜即時傳嚟喜訉：就係開頭話嘅，占士喺雪梨歌劇院外，糾集咗約半百老友，畀大小姐一個大大大驚喜：求婚！呢 85 蚊，抵畀喇。諗返轉頭，占士求婚時，我呢隻郵輪正係啱啱開船離開碼頭，如果我企喺船邊，加埋望遠鏡，係有機會睇到占士向大小姐求婚，呢個歷史嘅一刻，不過，邊有早知。接到呢個咁大嘅喜訉後，蔣家分别喺世界唔同角落，大家繼續 whatsApp 一大輪，我仲即時鋪咗上飛時卜，等各方好友都見證大小姐新的一頁。
第一個南太平洋嘅好夢，果然甜到漏。
我唔係貪瞓嘅人，既然有個「生肉計劃」，即係密食同埋運動，咁就要晨咁早起身喇。每日，唔夠七點，就上到九樓大牌檔，嘆個第一輪早餐。早起果然方便，唔使排隊，想食乜都得，不過，我個胃仔咁細，都係攞半碟立立雜，加杯咖啡算數。咪話佢細碟，都要成粒鐘至搞得佢掂。即刻落返房換返運動 Tee 裇短褲，腳踏美津濃跑鞋，再𣛟上十樓開工嘞。第十層，沿住船邊就係一條環型緩跑徑，為咗保䕶下肢關節，我唔會跑，只會急行。我嘅路綫就係先兜船行一圈，再沿樓梯由十樓行落一樓，即刻又行返上十樓，跟往再次兜船邊行，再撑樓梯，餘此類推。就咁行行重行行，行足粒半鐘就收工。第一日測試，咁嘅運動量，完全冇問題。
除咗四個上岸活動日，我每朝都係咁樣運動，其中，只有第一日係稍為好天，跟住每日都係落住細雨，而且好大風。風風雨雨又點阻得到我，就算濕晒身又如何？可以頂住咁大風嚟運動（當然要安全），有幾何有咁難得嘅機會，我點會錯過？不過，風雨中，成隻船就只有我一個儍佬喺度行，係就係有尐異相，嚤囉仔係我行我素嘅人，人哋點睇？who cares！
運動後，略作休息，即刻食第二輪早餐。其實都唔食得好多，半碟已經嗌肚漲，然後慢慢行返落房，冲個靚涼，換返乾淨衫，帶埋 iPad ，上返九樓船尾陽台，斟定杯茶，搵張唔曬，又避到雨嘅籐椅，咁就開始一日嘅 hea hea 時段嘞。我成件攤低喺籐椅，得閒就游目四盼，有時又閉目養神，唔啱又用 iPad 寫吓嘢，發吓噏瘋，一陣又呷啖茶再搞吓 whatsApp 、飛時卜⋯⋯，哈，又真係勁 hea 喎。
九樓船尾陽台，係細路禁地，要18歳以上至入得，冇百厭𡃁仔呱呱叫四圍走，咁嘅安排令呢度寧靜舒適，每日食完中午飯，我都會喺呢度坐三幾粒鐘，直到五點就返房，換返長褲，穿鞋着襪，執正些少，又去食 fine dinning 喇。
講起船上晚餐，其實都有好多選擇，我係簡單嘅人，我去最大嘅餐廳，船頭二、三樓 The Empire Dinning Room，餐牌每日都換，食物亦好有心思，我做乜要四圍䠮去搵嘢食？每晚，九樓大牌檔，到處都擺滿食物，任君選擇，我睇過都冇乜好食，食客亦比午餐少。自助餐好處就係可以食多尐，同埋，笠記牛記都冇人理，可能啱細路多尐。此外，亦有兩間要畀錢嘅餐廳。一間喺頂樓，每人最低消費係袋鼠幣 45 蚊，餐廳喺門口擺咗尐未煮嘅牛扒，以作招徠。我未去過，唔知多唔多人幫趁。樓下二樓又有一間壽司店，我有時行過，成日都係小貓三四件。睇嚟，要額外畀錢，好多人都唔制！
由十三號，郵輪啓航開始，連續四日都係 Sea Day ，焗咗喺隻船上，每日所做嘅嘢亦係周而復始，無乜大變化。大少關心我，慌死我會悶，問我有冇睇騷，有冇參加尐乜嘢活動？其實每晚，房門邊信箱，都有派第二日詳細活動表。真係好多活動，可惜活動唔多啱我脾胃，教跳舞、教煮餸 ⋯⋯，又或者鬼佬戙篤笑，我都唔知佢噏乜，點笑得出？不過，大少過慮嘞，我係嚟 hea 嘅，眼光光冇嘢做，就預咗嘞。悶？又唔覺喎，係無聊咗尐。不過，寄生塵世，本來就係一件無聊透頂嘅事。其實，所謂「人生計劃」，似足船上舉辦活動，就係喺無聊中搵尐嘢搞吓，一世人流流長，咁咪無咁悶囉。而家喺船上只係十一日，點會悶到我？
十七號，呢日開始，有尐搞作嘞。如常，六點半 iPhone 鬧鐘響。我打開窗簾，「LAND！」以前睇海盜卡通，爬上桅桿頂嘅賊仔，用單筒望遠鏡睇到陸地時，必定要大嗌 LAND！今次行咗四日船，卒之睇到陸地嘞！其實，噚晚派嘅節目表已經講咗喇，仲好詳細講明離船及回船嘅注意事項。而家大聲嗌 LAND ，只係搞吓氣氛啫。
此行第一個登陸嘅島，叫做「神秘島」 Mystery Island，係瓦魯阿圖最南端嘅領土。個島好細，長 lei lei ，周圍都係沙灘。由船上望落去，就知小島坐落環型珊瑚礁嘅中間。小島之所以叫做神秘，係因為此島冇人居住，因為土著傳說，呢個島入夜就有鬼魅出沒。介紹又講，1974年，英女皇喺南太平洋之行，前往澳洲途中，亦曾經到過呢個島，亦係唯一一個女皇到訪嘅地方，而冇人喺岸上揮手歡迎佢。
郵船唔可以埋島，只可以喺珊瑚礁外拋錨，離船嘅人要搭救生艇 tender boat 上岸，咁樣好明顯係環保理由。今日天氣唔算好，四圍都係一嚿嚿黑雲，遠處仲落緊雨，晨光喺東面水平線，穿過嚿嚿黑雲向外投射，一條七色彩虹，就鑲嵌喺西邊亂雲之上，一早見彩虹，梗係順景嘅一天。
照舊晨咁早食過早餐，即刻返落房換晒游水戰衣，準備吸管面鏡蛙鞋，GoPro 又點少得。跟隨指示，去到法老王劇院，每人分配好次序，經過登記離船手續，就排隊喺低層船邊，搭救生艇登陸。救生艇原來都幾寬敞，應該可以坐到一百人左右。
約十五分鐘航程，救生艇埋岸，沿住簡單但實淨嘅碼頭登岸，碼頭附近嘅街市廣場，小販已經開好檔。當然喇，島上雖然冇人住，有錢揾嘅地方，就吸引商人，附近居民，知道船期，就按時嚟擺賣。街市用樹枝搭建成一排排㰙檔，似足香港年宵攤檔，都係賣埋尐唔等使嘅遊客紀念品，絕對唔會引起我嘅興趣，不過，我鍾意行街市，體驗人生百態。街市中間有個樹枝搭成、十分簡陋嘅避雨停，裏面有一群著住校服嘅學生唱歌，前面放咗字條，原來學校籌款建設新校舍，籌款白桶裏面多數係袋鼠幣，怪唔得，我哋呢隻船，多數係袋鼠國子民。
原來游嚟游去睇魚仔，真係會留連忘返，唔捨得走㗎。上岸曬一陣，又再落過海 ⋯⋯，唔捨唔捨都要上水喇。再兜住海岸，圍繞小島，漫行一個圈，咁細嘅島，一陣就返返碼頭。已經有返航嘅救生艇等緊，好快返返母船，再做入境手續，過安撿，上返大船。上午神秘島之旅正式結束，馬上冲涼裝身，不在話下。
食過午餐，又喺船尾喪 hea 。whatsApp 收到仔女新抱仔嘅指示，原來隻船有兩個著名電台 DJ ，Hamish and Andy 進駐，主持現場節目，拉闊直播雪梨電台。佢哋慌死我唔知呢兩件 DJ 係乜款（我又真係唔知喎），仲畀埋相我睇，要我搵到佢哋，並且要影返張合照咁講。
我攤攤吓，眼咪咪，昏昏欲睡之際，水氹中走出兩件鬼，隔籬鬼仔鬼妹忽然起哄，連附近阿婆阿伯，都走埋佢兩個度話要合照，我唔使對吓張相，都知係名人喇啩，雖然唔肯定係咪兩個目標 DJ，本住有殺錯，冇放過嘅原則，我即刻起身哄埋一份，成功同佢哋合照，隨即將相 whatsApp 出去，冇耐，蔣家 whatsApp 即刻起哄，我知我完成任務喇。大小姐將我呢張相放上佢嘅飛時卜，有百幾個 like 咁多，有尐人仲話好妒忌，乜真係咁巴閉咩。我企喺佢兩個中間影相，呢兩件鬼好高大，我只去到佢哋嘅膊頭，呢張相，其實好怪相。
郵船喺夜幕低垂中駛離神祕島，食過晚飯，搞 lee 搞 lo 又係一日嘅結束。我哋好夢正酣之時，郵船就喺黑夜中航行。第二朝打開窗亷，船已經埋頭，用右舷 starboard 靠岸，我嘅窗門正正望住碼頭堤岸，冇耐，一隊黑人樂隊 marching band 喺我窗前下面提岸走過，向船頭方向操去，梗係喺郵船出口處演奏，歡迎生意來臨。
如常，我食過早餐就離船。呢幾日都係咁，晴雨無常，而家，一落船，就落起大雨，唔夠十分八分鐘又出太陽。好在我嘅衫褲，係隨時可以就咁跳落水嗰隻，濕身，完全冇有怕。
郵輪碼頭，離開市中心都有一大段距離，岸上泊咗一隻隻摩打舢舨仔，可坐二十人左右，呢尐水上的士，游弋於郵輪碼頭與市中心之間，單程收費，每位 5 蚊袋鼠幣，明碼實價。我即刻跳上其中一隻，喺暴雨朝陽中，駛入瓦魯雅圖首都 Vila 港。
一上岸，就有人埋身，推銷旅遊產品，呢尐都係預見得到嘅事。我會首先好留心聽，睇下好唔好玩。如果冇乜特別、冇興趣嘅話，就好有禮貌咁拒絕。呢次佢話 150 蚊四圍遊，睇吓士著村莊，帶去海灘潛水，行吓個城 ⋯⋯，佢見我一尐都唔心郁，冇耐自動減到百二。當我行行吓街，又見返佢，佢已經帶住一班客，就話跟埋呢班客，只收我 50 蚊。我微笑擰擰頭，繼續行我嘅街。
瓦魯雅圖首都 Vila 港，我睇，都應該有上世紀五十年代西灣尾橫街水準。其實即係冇乜嘢好睇。而且只得一條爛溶溶嘅主街，我由頭行到落尾，連土著街市都行埋，都係冇乜嘢睇。偶然行過一笪空地，八吓卦行出去，原來係個碼頭仔，岸邊小亭放咗一疊紙，我又八卦睇吓係乜。寫住 Iririki 島1500 vatu，計一計，都唔使 20 蚊袋鼠幣。實在，呢個 Iririki 島喺邊，我都未知，直覺就係去Iririki 島嘅船費，冇所謂喇，有地方去就去馬喇。冇耐，有隻幾骨子嘅船埋頭，跳上船。哈，原來 Iririki 島就係一箭之遙，喺正對面嘅島，呢個 Iririki 島，係一個私人渡假村小島，呢 20 蚊，唔係船費，而係包一日嘅活動，可以用渡假村小島嘅設施。
咁正嘅嘢，冇乜人知！幫吓尐客，船公司應該宣傳吓。不過，可能同佢嘅旅遊生意有矛盾，在商言商，咁又明白嘅。我攞住小島地圖，差唔多係自己一個人喺渡假村小路漫遊，非常輕鬆寫意。沿斜路行落海邊，有個 Snorkel Bar ，馬上戴好裝備，迅即投入大海懷抱。比較噚日神秘島，呢度可能較為人少到，珊瑚又大尐靚尐，魚仔亦多尐，真係潛得好開心。
小路路邊，座落一排排出租渡假嘅單層平房，睇嚟而家未係旺季，都冇乜住客喺左近。渡假村一頭一尾有兩個大泳池，我兩個都游過，又攤低曬下太陽。成個池小貓三兩件，玩得咁鬆動，20 蚊，抵畀喇。
橫掂個城都冇乜好遊，喺渡假村，玩夠皮，直接返大船食晏好過。本來打算要搭返渡假村駁艇，出返 Vila 港市中心，再搭水上的士返船。點知居然喺渡假村碼頭，截到一架正在駛返郵輪碼頭嘅水上的士！舉手截船，佢又駛埋嚟，我蹤身一跳，安全上船！「递手截水上的士」！咁奇特嘅經驗，都係第一次試。
照舊，郵輪又係喺我哋食緊晚飯時，離開瓦魯雅圖，駛向此行嘅第二個島國 ---- 法屬 New Caledonia 。
架船行到蟻躝咁慢，梗係較定時間，八點左右到達 New Caledonia 嘅 Lifou 島。呢個島係火山活動地層上升嘅結果，個島亦係氹氹匝圍滿珊瑚礁，所以大船都唔可以埋岸，又係要喺珊瑚礁外拋錨。今次係第三次離船，手續都慣晒，快手快腳，早餐後即刻落船。哈，我係第一批搭 tender boat 上岸嘅遊客。
上兩次上岸，見步行步，今日就目標明確，就係去島嘅北角，嗰度有個自然保䕶嘅海灣 Jinek 海灣。
因為太早，碼頭邊空地，做遊客生意嘅土人簡陋攤檔都未開檔。真係好早，成條路我一個人行晒，盡頭岬角係一個小山丘，沿石級上去，原來係附近最高點，可以270度觀賞海景，觀景台後面有有一個聖母小教堂，簡單整潔而不奢華。由碼頭行嚟呢度，沿途只見到幾戶人家，教堂就為佢哋而設？
行返落山仔，有條小路向東行落海灘，就係今日嘅目的地，Jinek 海灣。海灘有石級行落水，有個小亭喺石級盡頭，裏面有管理員，控制落水人數。我喺船上冇買到飛，好彩我嚟得早，畀15 蚊袋鼠幣買條手帶，就可以喺呢個受「保護」嘅海灣潛水。哦！受「保護」唔係唔准游，而係要交「保護費」！呢尐保護費係交畀海洋管理局，作為保養珊瑚礁之用。哦，應該嘅。
岸邊唔係沙灘，唔係石灘，而係鈣化咗嘅珊瑚平台，時日嘅冲刷，已經磨到滑 leut leut。我坐喺白雪雪、千千萬萬嘅珊瑚祖先之上，著好潛水裝備，落水觀賞佢哋千秋萬代之後，子子孫孫開枝散葉嘅盛況。
喺膝頭哥以下水深嘅珊瑚淺灘行走，非常麻煩。又驚自己跌親，又唔可以撳住珊瑚，又驚踩爛珊瑚 ⋯⋯，總之好論盡。行過麻煩淺灘，到有大髀水嘞，就可以入水跣出去。此時，吸一啖氣，低頭睇下呢個受保護嘅水中世界⋯⋯。
如果話第一日喺神秘島睇珊瑚係好睇，第二日喺 Iririki 島睇，就係好靚。呵，今日，呢個 Jinek 海灣，就係震撼喇。呢度尐水夠深，珊瑚礁生得又高又大，如果陽光夠，反映出嘅顏色就非常鮮艷。最犀利就係尐珊瑚魚，好多一群群，有尐又好大條，款式又多。佢哋唔怕人，只係同我保持適當距離。當然，論震撼，呢個海底世界，同我喺加拉巴哥斯島見過嘅，仲有好大距離，不過，嗰度冇咁嘅珊瑚礁。Jinek 海灣，so far，係我經歷過最靚嘅珊瑚礁。
海底真係好睇，有時追魚仔，追追吓，浮出水面，原來已經去咗離岸好出，嗱嗱冧，即刻游返近岸處。海底又會令你不知時日過，游游吓，整乜咁凍，原來已經浸咗海水粒幾鐘嗱。一來早餐能量已經消耗得七七八八，二來減肥後，冇咗咁多肥膏，冇以往咁襟凍。即刻上返岸，抹乾身，睇下個島仲有乜嘢好玩嘅地方。
我呢身裝束，上水後唔使換衫，着返涼鞋就走得，非常方便。沿住原路行返出碼頭，再向島嘅另一方向走，呢邊較多人居住，亦有農田，仲有一個有百幾年歷史嘅教堂，此外就真係冇也好睇喇。我回頭返返碼頭，土著熟食㰙檔都開得七七八八，我雖然唔多肚餓，都應該係食第二餐嘅時候。不過我點會畀錢買！走落碼頭搭返 tender boat 返大船，直奔九樓大牌檔，免費自助餐，任食唔嬲。哈，仲有 wifi 𠻹。
食埋呢餐，先啱啱係中午，抖一陣，即刻搭救生艇，再去 Jinek 灣玩多次。已經係識途老馬，同一日第二次上岸，梗係快手快腳。呢條手帶繼續有用，咁又慳返 15 蚊。我喺珊瑚礁游弋，同尐珊瑚魚又玩多粒幾鐘，帶住濕立立、凍鐵鐵嘅身軀，但又好唔捨得嘅心情，同呢個珊瑚世界，講聲拜拜喇。
上返船就又係 hea 同食嘅時段，我不負所托，個口唔停咁食嘢。I've done my job，可惜，個肚仔又係鬼咁老實，直腸直肚，你畀幾多佢，睇個樣，佢又椗返好大部份出嚟。咦！咁係咪即係人稱：「嘥米飯」呢？唉，人生！果然無謂！
第四日登陸活動又嚟喇。八點左右，大船就泊好 Noumea 郵輪碼頭，「郵輪碼頭」其實只係貨櫃碼頭。似葵涌多過似尖沙咀海運大厦。為安全計，乘客唔可以喺碼頭走動，必須搭穿梭巴士或者觀光「火車」仔出入碼頭，其實，市中心只係十分鐘車程之遙。巴士載我哋去咗一個海邊商場仔。照舊，一堆堆落車嘅遊客，喺巴士站接車嘅旅遊公司職員眼中，就係一疊疊花綠綠嘅銀紙。Noumea 雖云係法屬 New Caledonia 嘅首府，為咗生意，都要講英文喇。
雖然我都帶備潛水裝備，但我知道可能踩到單車，所以任由推銷員向我推銷旅遊產品，我只係問返佢有冇單車租。生意做唔成，佢都好有禮貌，仲話我知單車舖喺邊。35蚊袋鼠幣租半日，即係四粒鐘，單車舖老闆娘畀張地圖我，略略交帶踩車路綫，我擺低郵船乘客證，交埋車租，就出發嘞。
其實，路綫非常簡單，只係沿住小島一個角嘅半島踩個匝，就返返原點嘞。依地圖睇，有好大段路係單車徑，不過，由市中心區踩入海灘區，都會踩過馬路，如果冇乜技術，都唔係容易。單車徑沿海而建，經過好多靚沙灘、靚公園、靚觀景點，仲有靚酒店、食肆、商場，連賭場都有。我踩吓，又停低影吓相、睇下景，實在舒服到不得了。
睇嚟呢條單車徑好新淨，佢亦係一條緩跑健身徑，每隔一段距離，就有公園水準嘅健身設備。一路上，好少好少人踩單車，不過跑步，健身嘅人就唔少。Noumea 畀我嘅印象，應該有一個普通歐洲城市嘅水平。
踩踩吓，再對吓地圖，我覺得我踩錯路，即刻喺路邊問人。呢度係居民區，英文唔多使得，法文喎，除咗「今晚打老虎」外，我就只係識「磅豬」。好彩攞住地圖，同路人甲指手畫腳，雞同鴨講一輪，都得知大概位置，再踩多一陣，路邊有警局！呢度咁多斜路上上落落，為咗唔使踩咁多冤枉路，一於入去問警察叔叔。
放低單車喺門口，拉開玻璃掩門，櫃枱坐咗位肥師姐，預咗佢唔識英文，打開地圖手指指，希望佢明白。睇嚟師姐唔多明白，佢搵嚟一位師兄，師兄可能又揸唔到主意，就帶我入房。再揾個高級尐嘅！我心諗，問路啫，使唔使咁誇呀？我自己開口講： 「is it that serious ？」呢個坐房嘅識英文，聽到我咁講就笑。 「you think it's serious ？」我道明來意，話只係問路而已。佢睇吓地圖，知道我想去邊，仲諗咗一大餐，原來佢認為由警局呢度返去市中心，交通比較複雜，唔知我搞唔搞得掂，於是想話搵警車載我返去。我即刻有個念頭：搭吓 Noumea 警車都幾得意噃。不過，隨即我又諗：咁咪完成唔到個單車路線囉。我堅持，佢只需指示方向畀我，咁就足夠嘞。佢帶我出門口，好詳細咁話畀我聽條路點走，我按足指示，再用多半個鐘就返到市中心。不過，原來呢段路真係交通較為繁忙，又多上落大斜路，警察叔叔佢嘅擔心，我又明白嘅。
返到市中心，仲有半粒鐘至交車，踩得唔好嘥，就喺附近兜嚟兜去。喺碼頭再踩入兩條街，居然見到中國式牌樓，旁邊又有中文寫住「中國城」，唐人街果然係國際品牌，世界各地，梗有唐人街喺左近。
唔使15分鐘，成個城中心地區，七七八八我都兜勻過，交咗車，喺碼頭坐多一陣，愈坐愈悶，此城已再無可戀，搭返穿梭巴士上返船。此至，呢程郵輪四個登陸活動，就喺 Noumea 呢度畫上句號。我正在食緊晚餐之際，郵船已經升火起航，掉頭西南，向雪梨進發。跟住，就係兩日盡情咁 hea 嘅 sea days。
坐郵輪呢單嘢，我本來以為，要老到咁上下至會做嘅活動，而家有幸，多謝大少、大少奶慷慨解囊，畀我提早試下尐咁嘅嘢。今次完成呢個十一日郵輪之旅，我感覺係：睇嚟，我嘅心態，仲未成熟到坐郵輪呢個階段。不過，今次唔係嚟玩，而係有個更重要嘅任務，就係啓動「生肉計劃」。十一日已過，作為啓動，我認為任務完成得非常好，我畀自己滿分！而且，仲有額外得益，就係，我對我嘅體力復元，增加咗信心。希望盡快可以實行我下一個目標。
好開心喺船上收到大小姐喜訊。航程中，雖然見唔到面，不斷透過 whatsApp 問訉、解惑、調笑 ⋯⋯。蔣家雖然分別喺地球四個唔同角落，一家人嘅精神，互相支持，我喺呢隻 Carnival Spirit 郵船，全部收到晒。真係啱到極，人生就係追求快樂，每日都好似去咗 Carnival ，咁至有 Spirit 㗎。
再噏過
嚤囉
No comments:
Post a Comment