2017.06.02 Nepal finale by cycling Kathmandu Valley

2017.06.02 Nepal finale by cycling Kathmandu Valley 

嚟尼泊爾旅行，好似好單一，剩係爬山咁，其實，如果肯花尐時間搵資料，都有幾豐富嘅活動可以玩。例如噚日講嘅圖博河渡假村，除咗笨豬跳之外，又可以玩急流橡皮筏、爬繩、越野單車、遠足 ⋯⋯ ，又或者參加義工活動，修橋補路教英文等等，大把嘢玩。今日最後一日，我又約咗個半日單車活動。

又係早起，珍惜呢個他條早餐，唔知幾時再有機會嚟呢度 hea 。單車領隊凖時嚟大堂接，我一身踩車裝備，五分鐘行到去佢舖頭。舖頭只係横街小巷一個屋邊小天井，搭咗簡單上蓋遮風擋雨，牆邊掛咗十架八架單車，仲有尐一般嘅踩車用品。領隊大約廿零歳，呢個係佢 one man band 生意，同其他旅行社掛勾，專接外判單車活動。

揀咗一架冇咁多泥嘅爬山車畀我，略作撿查，泵滿氣，我戴上手套黑超頭盔，等佢落埋舖頭捲閘，就跟住佢車尾離開小巷。

喺橫街窄巷左穿右插，避過人群，踩過一個二個地窿，好快就踩出河邊大街，嗰度係車水馬龍嘅大馬路，搭三輪車時已經領教過 Thamel 亂晒籠嘅交通，不過坐車仔有大包圍，又有車伕，我穩坐車中，啋你都儍。而家自己踩，皮包鋁；對腳就喺人哋車轆隔籬，手臂就掂到人哋側鏡，咁嘅款，梗係要打醒十二個精神喇。

喺繁忙交通環境踩車，因為緊貼群車，睇起上嚟就非常凶險，雖然我唔可以用「安全」嚟形容，但我覺得，其實險極有限也。一來，塞車塞成咁，所有車都慢吞吞，即使真係畀佢揩到，咁嘅速度，點會造到尐乜嘢嚴重嘅事！再者，交通繁忙，個個寸土必爭，狀似如狼似虎，其實一眼關七，隨時預備踩逼力，你出現喺乜嘢位置佢都見到，揩嘢嘅可能性又減低喇！不過，如果遇到大貨車或者泥頭車，咁就即刻要避之則吉喇。當然，喺咁嘅環境踩車，自己嘅路面經驗亦好重要，肌力、平衡力，都係控制單車嘅重要元素，要藝高，先至可以人膽大，我快速機靈跟住領隊，嗱嗱聲踩過塞車大馬路，過橋離開 Thamel。

過咗河就一路北行，離開中心市集，路人亦愈嚟愈少。踩咗約兩三公里，已經開始上斜，並且進入市郊範圍，四周再唔係街巷舖頭，而係村舍農田。我哋沿住山間車路向上踩，好闊嘅路，間唔中都有大泥頭車同巴士行過，不過，交通一尐都唔繁忙，安全得很，舒服得很。如是者向上踩咗十幾公里，斜路頂有個小市集，我哋稍作休息，喺小店補充些少樽裝水後，就向右轉入鄉間小路並且開始落山。

鄕間小路唔易踩，如果唔係凹凸不平嘅泥路，就係一嚿二嚿光滑突晒出地面嘅石膥路，而且一路落斜。呢尐路面，對控制單車嘅能力有一定要求，唔好以為揀住逼力就安全，相反，唔適當嘅剎掣非常危險。好彩已經係踩緊爬山車，經驗再加上小心翼翼，呢尐路於我，都係遊刃有餘嘅。

呢段單車路徑其實係兜住山谷嘅半坡嚟踩，一路都睇住成個山谷，隨便邊度停低，都係風景秀麗嘅觀景台。可能最近都係雨水充足，背靠青翠綠坡，眼前山谷下，就係大片大片綠油油嘅農田，種嘅都係稻米。尼泊爾係食飯民族，稻米好賣錢。唔好睇輕耕田佬，很度種米人家，身家都唔係少嘢。

我哋今早由西邊向北踩上山坡，而家再由東邊向南踩返落 Thamel，用三粒鐘踩咗 26 公里，非常輕鬆寫意嘅一段單車路程。擺低車後，到咗中午左右就返返酒店，跟住成個晏晝就喺洒店範圍附近 Hea。又係喎，乜都做晒喇，唔 hea 又有乜好做。

晚餐過後，同唐餐館老闆、伙記道別。前生乜嘢業力，呢班三唔識七嘅陌生人，照顧咗我幾日飲食？都係緣份一場。

臨瞓前執好行李，聽日，喺印度

再噏過，

嚤囉仔

2017.06.01 Bungee Jumping at Bhote Kosi suspension bridge

2017.06.01 Bungee Jumping at Bhote Kosi suspension bridge

今日活動其實係一個秘密行動，喺行動成功前絶對唔會透露分毫，所以噚日嘅預告都係蓄意誤導公眾嘅。哈哈哈。今日，絕對唔係踩單車。

因為要晨咁早就出發，食唔到酒店早餐，噚晚除咗叫 morning call 外，仲要叫廚房預備早餐畀我拎走。

晨早嘅 Thamel 區仲未瞓醒，一支公由酒店行去集合地點，嗰度喺市中心一個商場內，我去到要拍鐵閘叫「實Q」開門至入到去，你話早成點嘞。

主辦活動嘅公司叫 The Last Resort ，個名都話你知，佢哋唔係做一般活動嘅地方。好快，搞妥手續，驗明正身後，一行二十人，跳上小型巴士，出發喇。早上六點，離開 Thamel 區，巴士沿住 AraniKo Highway 一路北上。

阿尼哥公路，喺尼泊爾，赫赫有名。長度計，佢只排第四，大約 120 公里。點解咁出名？原因係：

其一，呢條公路，接駁住加德滿都至中土圖博 Tibet 邊境。原來條條大路，不單剩係通羅馬，呢條公路，只需跨過中尼友誼橋（邊境通道），就接駁住嗰條中間劏開神州大陸、全長 5476 公里嘅 318 國道！即係話，由加德滿都出發，行五千八公里就直達上海，咁睇，阿尼哥公路就梗係一條重要交通綫喇。回帶至 2011 年，我曾經由拉薩出發，到達圖博加措鄕嘅聖母峰 Basecamp 觀景台，遙望 8848 聖母峰嘅東坡，嗰個行程，就係搭四驅車，行咗 318 國道其中五百公里。點估得到呢個行程，同六年前嗰個行程，就用呢條路串起一齊喎。

其二，阿尼哥公路順住 Bhote Kosi 圖博河，依河谷山勢而建。喜馬拉雅山脈，年青又反斗，郁下就地震，再加上仲夏嘅季候雨（五月至八月），同埋高山極端氣候嘅影響。呢條公路，山泥傾瀉、塌方冧路，就係家常便飯。呢條路，咪就係，出晒名 ⋯⋯ 危險囉！又真係估唔到，搭完最危險嘅航班，而家又唔覺意，竟然踩上咗全尼泊爾最驚險嘅公路。

既然做咗咁多估唔到嘅嘢，今日嘅活動，就玩尐唔係咁尋常，唔係咁易畀你估到嘅嘢。

巴士繞住沿山坡開鑿出嚟嘅車路而行，旁邊嘅圖博河，條河嘅源頭就喺東土圖博，佢經過中尼邊界，流入尼泊爾，所以，就因以為名喇。巴士不斷跨過小橋，圖博河有時喺左，有時喺右。上到上游山谷，車路山坡亦愈黎愈斜，離河面亦愈嚟愈高，即係話，巴士就喺懸崖邊行駛喇。公道講，好彩路面都算寬闊，坐喺車裏面望出去，亦唔覺話真係好險要，並唔係一路行駛，尐車轆一路突出崖邊，嚇死人嗰隻。經過 2015 年嗰次地震，沿途都見到冧山泥而未及復修嘅地方。約四個鐘左右，行咗百一公里，巴士到達目的地 —— Bhotekosi Resort —— 圖博河渡假旅館。

落車，呢度係個峽谷山腰。再行去懸崖邊，成個峽谷就喺眼前，向下望，圖博河就喺200米山谷底下，河水穿越峽谷由北流向南。前望，一條 166 米長鋼索吊橋就喺眼前，佢懸空跨過峽谷，連接住對面山。而家，呢條吊橋係來往兩座山嘅重要通道，喺未有吊橋之前，村民要花五個鐘頭，先至可以行過對面山。唔似其他由政府建造嘅吊橋，呢條橋係私人擁有，設計主要用嚟做活動，當然，畀人行亦冇問題，不過喺活動進行其間，行人就唔可以通過。梗係喇，行人過橋，震震貢，點玩嘢呀？

冇錯，今次我就係嚟呢度玩嘢 —— 笨豬跳！

圖博河笨豬跳，世界聞名，論距離地面（或水面）高度，佢只係世界排名第九，如果計由吊橋跳落，咁就排第三，不過，佢有 160 公尺全世界最長嘅自由下落 free fall ，呢樣就係世界第一嘞。

由吊橋行過對面山，就係一組組簡陋平房，喺接侍處搞掂手續，大隊就喺室外有蓋小廣場集合。話明笨豬跳，每隻豬仔都要過磅，再將磅數寫喺手背，並且三令五申，唔好洗甩，更加唔好更改。

豬仔過磅後就排排坐，聽指令。教練做個簡單介紹後，就講笨豬點樣跳。首先第一大重點就係「跳」，即係話，豬仔要自己主動「跳」落去，工作人員絕對唔會推豬仔落橋嘅。而叫豬仔可以開始跳嘅指示，唔係 now jump （據說會同 NO jump 混淆，咁就好大劑），而係 3－2－1 Bungee ！非常清晰。而跳橋嘅動作，最好用頭落先 head first，而唔係腳行先 feet first。咁好簡單啫，即係跳水嗰個動作囉，我，優為之喇。然後等橡筋彈定之後，就要解開勾住雙腳嘅扣，令自己由倒轉位置回復頭上腳下原位⋯⋯ 等等、等等 ⋯⋯。嘩，乜仲有咁多嘢要記，可能跳咗出去之後，嚇到三魂唔見七魄。真係擔心，唔知仲記唔記得咁多嘢呢？

各位笨豬要輕裝上陣，衫褲要扣緊，以免倒轉時露出性感肚腩惹人暇思。所有跌得出嚟嘅物件都唔可以帶上橋，太陽帽、眼鏡要除低，更加要合埋口，以免假牙跌咗落河，相機更加唔可以帶。麻煩嘞，邊個幫我影相？唔使驚，大會備有專業攝影，唔只硬照，仲有短片，只要肯使些少錢，珍貴紀錄，自有人代勞。

橋上每次只跳一隻笨豬，每跳都要用五至十分鐘，即係一粒鐘頂晒籠跳十隻八隻，原來全日活動，花最多時間係睇人笨豬跳。不過，又真係幾好睇㗎。

條橋唔可以企太多人，豬仔分批上橋。喺橋上近距離睇人跳，一方面可以壯下自己膽，仲可以重溫每個笨豬跳嘅步驟，當然係好過癮。不過，有人愈睇愈驚，亦係大有可能嘅。

個幾鐘頭後，到我登橋嘞，喺前一隻笨豬預備跳嘅時候，我已經要戴晒裝備，並且坐好，而且扣上安全繩索，唔畀我四圍走。攝影師開機，同我做個簡單訪問，並且將一個 GoPro action cam 綁喺我左手腕。

我坐低欣賞前面豬仔跳。工作人員叫 ： 3-2-1-  笨豬，⋯⋯ 冇反應喎，呢隻笨豬妹，面有難色，擘大個口唞大氣，佢內心交戰之情，浮晒上面喇。再叫 3-2-1- 笨豬！⋯⋯ ，都唔得。「可唔可以推我落去？」佢真係咁問。問都多餘喇，一早話咗要自己跳，有乜三七二十一，如果人哋推咗你落去，咪告人謀殺都唔得掂喇。卒之，叫極唔跳，唯有「 Next 」，到我喇。

我深深吸一口氣，等我個腦多尐氧氣滋潤，氧氣就係勇氣，我充滿力量喇。工作人員再三探查我身上所有裝備，將安全扣解開，移去跳台前嘅繩索，呢個時候，嗰條笨豬繩就出現喇。

原來所謂笨豬 bungee ，就係指呢條橡筋繩。其實所有橡筋繩，無論粗幼，都可以叫做 bungee cord，包括嗰尐紅紅綠綠頭尾有鈎，用嚟喺單車尾穩固貨物嘅橡筋繩，都可以稱為 bungee cord，當然而家扣住我呢條笨豬繩，就梗係粗得多喇，就咁睇，吋幾兩吋直徑應該走唔甩。

笨豬繩穿過我腳踭上嘅扣環，再扣緊我胸前扣環，我而家同條笨豬繩就連成一氣嘞。瓹過吊橋欄桿，企喺由橋邊伸出嘅跳台上，百六公尺下面就圖博河河面，周圍上下左右冇遮冇掩，真係未試過企得咁空曠。跳台上工作人員解開我背上安全繩，用手揪住我背扣，我一路慢慢行向跳台邊沿，但係個身就不自主咁挨向後。我繼續碎步滑前，直至半隻腳掌喺跳台外，佢揪任我背後條帶叫停。  

呢個時侯，橋頭可能有人踩上吊橋，須知活動進行中係唔准行人過橋。佢大聲嗌出去，鬼知佢噏乜，不過相信似乎係阻止有人上橋。

一切就緒，我望住 160 公尺下面，大佬，就係康樂大夏咁高！其實當時係有一尐尐猶豫，不過，都未及細諗，後面揪住我嗰個就嗌嘞：3-2-1-  Bungee ！根本冇時間畀我再考慮。乜都冇諗，我稍微屈膝，縱身一躍而起，使出我看家本領：記住合腿收緊，後擺，吸氣抬頭挺胸，雙臂向後向上平伸展 —— 就係一個完美嘅大鵬展翅 Dive 喇！為咗幫自己壯膽，跳嘅時候，唔可以缺少嘅就係 —— 大聲嗌 ⋯⋯啊 ⋯⋯！

原來高速下墜，最初雙眼冇能力調校到焦點，就只係白茫茫一片，乜都睇唔到。不過，高速下降，好響嘅颯颯風聲喺耳邊檫過，就非常清楚嘞。唔使兩三秒，四周景物就淸晰起嚟，其實係因為橡筋拉緊，減慢咗下降速度。當橡筋伸展到最盡，回彈 renounce 就嚟嘞。

可能你聽過人講，橡筋回彈會拉親條腰！但係，我可以話你知，當橡筋再次拉返起時候，我根本冇上升緊嘅感覺，即係話由高速下降，至停頓，至回彈，呢個轉變其實係非常圓滑暢順，點會拉親條腰？不過，當橡筋拉高我之後，地心吸力又令我再次下墜，今次嘅速度冇咁高，因為好快又畀橡筋掹住。呢個時候，我已經回晒魂，周圍嘅環境，我亦一清二楚。趁往仲揈下揈下，我即刻對住我左手腕嘅 GoPro 猛講野：「good morning , I've done it 」！半天吊，乜嘢都亂噏一餐，唔好嘥咗呢個咁珍貴嘅時刻吖嘛。

如是者，好似老鄧咁樣，三上三落，雖然條笨豬繩仍然繼續兩頭揈，其實已經穩定好多嘞。根據指示，我收腹向上，搵到腳邊紅繩，掹繩解咗綁住雙腳嘅扣環，我成個人即刻回復返頭上腳下姿勢。我一邊繼續講嘢，橋上面就放另一條繩落嚟，我要自己將呢條繩扣住我胸前扣環，再三檢查之後，向外平伸雙臂，示意上面我已經預備要當，橋上就開摩打，將我扯返上去。

我慢慢上昇返到跳台，工作人員掹返我入橋。卒之，我又完成咗一件幾特別嘅事，咁，當然又係一個新記錄喇。

做完笨豬，其實都只係中午。緊張過後，又有尐肚餓，呢個活動包埋一個自助午餐，係尼泊爾印度餐，簡單，好味。餐後，攝影師將各人跳姿嘅硬照、短片放出，隻隻笨豬即刻數籠畀錢，冇托手踭。梗係，咁珍貴嘅紀錄，點會唔買。成功笨豬仲有免費 Tee 裇做獎勵，大棚豬仔，雖然三唔識七，冇乜兩句。今次死過翻生，着往笨豬 Tee 一齊影張相留念喇。

傳統印象話，男人比女人大膽。我而家話你知，實情唔一定係咁。今次呢班笨豬團有成廿人，男人只有五件，除咗一件豬女臨陣退縮外，全部完成任務。由是觀之，我認為膽量同心態反而有更大關係。一個人太多資訊，太識計算，顧累多咗，膽量自就然細；如果懶得計算、費時諗咁多、話之佢、死咗罷就，有咁求其嘅心態，個瞻就大尐喇。相信，我而家嘅心態就比較接近後者。不過我又冇話女士係咁樣，大家自己演譯喇。

兩點左右就搭返巴士回程。由圖博渡假村呢度，如果再向北行多 12 公里，即係十五分鐘車程，就可以到達中尼邊境。不過，我哋背道而馳，沿舊路行車四個鐘頭，順利返返加德滿都。諗都唔使諗，又係喺 Thamel 我喜歡嘅唐餐館食晚飯。聽日，就係呢個行程最後一日尼泊爾活動。

再噏過，

嚤囉仔

2017.05.31 Swayambhu Monkey Temple

2017.05.31  Swayambhu Monkey Temple

又係五年前，我去嗰個個行山團包咗一日加德滿都遊，其中包括馬騮寺（佛教唔應該叫廟），記憶所及，因為嗰日去得太多地方，馬騮寺不過係到此一遊，水過鴨背而已。不過，當日已經奇怪，點解個名叫馬騮，我哋都只係見到幾隻，名不副實噃。今日自己安排節目，一於重遊猴地，要搵多幾隻大聖至得。

隔晩已經摷定期地圖，馬騮寺離我住嘅 Thamel 區酒店只係 3.5 公里，以我嘅步速，唔使一粒鐘就乜嘟搞掂，況且而家尐谷歌地圖咁犀利，邊度去唔到？今早歎完早餐後，攞住「唉風」，即刻起程向西，行去馬騮寺嘞。

又係嗰句，世事點到你計劃，你話行就真係行到咩。一出酒店冇遠，就有三輪車仔阿叔嚟兜生意，我執意要行路，所以一口拒絕。可能真係淡季，呢位車仔阿叔真係由街頭跟到我街尾，見佢咁有誠意，仲開價只係 500 盧比，即係五蚊美金！為支持本土小商販，殺你！即刻跳上車。

車仔踩出 Thamel 小街窄巷，喺交通亂晒籠嘅車路左穿右插，過橋跨過 Bishnumati 河，再次踩入河西窄巷。呢度開始，車仔阿叔嘅腳骨力就經受考驗喇。雖然馬騮寺所在地並唔係乜嘢高山，但都算係附近最高點，過咗河後，就一路微微上斜，路面又窄，又一個二個窿，仲要避車避人，其實佢都踩得好辛苦。忽然經過一個大氹，阿叔踩唔掂，就要落地推車。人心肉造，我大隻騾騾，點好意思坐喺度等人推過坑渠，即刻跳落地幫手推埋一份。如是者坐下推下，卒之嚟到馬騮寺山腳。睇下時間，未必夠我行路行得快啫。不過只係消費五蚊，當係一個節目，咁又係 OK 嘅。

嚟到山腳，車仔阿叔見我咁幫得手，收咗我五蚊後又攬又惜，唏！使唔使咁呀？靚女又話啫。落車後向山行，過咗馬路就見到一座三米高佛像，佛像邊就係頂頂大名嘅 365 級石階。十七世紀，馬拉王 King Pratap Malla 下令興建呢組東向石級，方便信眾登山參拜。我踏住五百年咁有歷史嘅階梯，一口氣登上馬騮寺。

氣喘未過，第一眼就見到三隻眼同你五目交投。Swayambhu Stupa （stupa 係白色 Tibetan 圖博佛塔）就喺正梯級頂，白塔有四面，每面都有三隻眼，仲有一個問號鼻。呢個塔，大有來頭，而且同加德滿都嘅存在，息息相關。各位，又係 Story time ，話說⋯⋯

而家住滿人嘅加德滿都山谷，N年前，本來係一個大湖（據說有現代地質學證據），呢度地傑人靈，咁靚山水，唔好嘥，佛祖喺湖底放咗一粒蓮子 lotus seed ，蓮子由水底生出枝莖，一路伸出水面，一朶聖潔嘅蓮花就喺湖面盛放。佛祖種下嘅善因，點止係蓮花咁簡單，呢朶蓮花就變成呢座白塔 Swayambhu Stupa，佛教 Swayambhu 嘅意思，係解作自我創造。由蓮花自我創造成白塔，呢個湖又叫做 Swayambhu 喇。佛塔一開始，四組三隻眼就已經存在，兩隻普通眼俯視人寰，分清善惡。個問號鼻係「一」字咁解，意思係萬法歸一（我佛）。而第三隻眼就大有文章嘞。

呢個塔由佛祖令佢自我創造，當然滿載善因，第三隻眼就向四方八面放出異彩，指引參拜之路，使信眾得沾佛緣。呢度異彩係佛光唔係幻彩，當然勁過詠香江嗰隻多多聲，佛光一直跨過喜馬拉雅山，直達東土五台山。當時，文殊菩薩 Manjushri the bodhisattva 正喺五台山修行，一見佛光，即刻起程西行，佢踏住五彩祥雲，話咁快就到達 Swayambhu 喇。

湖上白塔，佛光普照，可惜受湖水包圍，點樣令萬民更加容易接近佛塔呢？文殊菩蕯右手楊起愚月劍 Chandrahasa，手起劍落，將 Swayambhu 南面嘅 Chovar  Gorge 劈䦕，Swayambhu 湖水就由 Chovar 峽谷，順住 Bagmati 河向南瀉走，從前畀水浸住嘅水底，即刻變成肥沃谷地，呢個谷地，就係今日嘅加德滿都山谷。至於蓮嘅枝同埋莖就變成呢座小山，承載住由蓮花變成嘅白塔，自此，信眾嚟白塔供奉就方便得多喇，因利成便，附近亦陸續起咗好多大大小小塔寺、修院等。Swayambhu 山仔，就成為佛教聖地喇。

文殊菩薩亦繼續喺呢度修行，呢度唔係東土，佢修行毋須削髪，啱啱相反，原來文殊菩薩係一個長毛，可能土地肥沃嘅緣故，長毛菩薩生滿頭蛩，周不時，佢好似賣洗頭水廣告咁將長髮左右兩頭揈，頭蛩就揈晒出嚟。講都唔信，揈出嘅蛩乸就變成通山跑嘅馬騮，就算長毛菩薩離開咗，馬騮仔仍然繼續喺山上開枝散葉。又因為係嚟自菩薩，所以，呢班馬騮又有個朶，叫做聖猴  —— holy monkey ，佢哋雖然未至於榮華富貴，咁都受盡保䕶，生活無憂咁喇。

白塔呢度係山嘅最高點，向東望落加德滿都，其實係一個好好嘅觀景點。山頂夠大，起咗好多大大細細唔同嘅佛寺、神龕，被譽為尼泊爾佛教及印度教最神聖嘅聖地之一，難怪香火如此鼎盛。

行到攰，我坐入其中一個塔，裏面有小型咖啡店，坐近窗前，叫咗杯凍啡加件餅，望落塔前小廣場，佛祖石像就喺眼前，浸住東方古老文化飲西茶，置身於歷史上下縱橫，心境果然舒泰。

白塔呢邊雖然又叫馬騮寺，其實馬騮唔多，馬騮原來聚居喺另一個山頭，要探大聖，請移玉步。飲罷咖啡，向西北行，穿過「世界和平」水池，就嚟到真正嘅馬騮山嘞。呢度一大群有之，三三兩兩，馬騮媽抱住馬騮仔又有之，總之四圍都係。馬騮世界都好似人間，雖然多數都係冇惡意嘅，不過，頑皮嘅，甚至惡馬騮都唔少，行呢個山頭，一定要打醒十二分精神咯喂。

原路由東面石級落山，唔再搭車仔，睇住唉風谷歌地圖，非常容易就行返 Thamel 區。

要喺尼泊爾血拼，時日無多嘞。因為早幾日喺山區南齊買咗尐高山羊毛披肩，奉命再買多些少。高山羊毛 pashmina 製品，係山區特產，喜馬拉雅一帶國家，到處都是有得賣。加德滿都 Thame 區大街小巷，都係呢尐舖頭，賣嘅嘢都大同小異，只要有心機，行多幾間舖頭格價，好容易就搵到貨品嘅價格底綫。血拼過程中，我發現一樣嘢：尼泊爾係佛國，加德滿都係佛寺之城 City of Temples，奇怪嘅係，原來不少賣高山羊毛嘅舖頭係由穆斯林所開。不過只係我個人觀察，又唔知有幾真實。

另一個觀察就係中國大陸人多咗，無論街上遊客，同埋大陸人開嘅舖頭，都比我五年前所見為多，不過入山區行山，仍然唔係大陸人嗰杯茶。大陸人話：仲要上山下鄉？儍的嗎？不過今次我搵到一間好食嘅唐餐館，就喺酒店行五分鐘路程。「好」嘅意思係十分家常，例如肉炒菜、菇類、雲耳、苦瓜等等菜式，我好簡單，因為簡單就係好菜式。幾日來，幾乎喺Thamel 嘅午餐、晚餐，我都喺個度打躉。哈，仲有免費 wifi 𠻹。

血拼完畢，食埋雲耳炒肉片，一日就咁結束。洗潄過後，瞓個好覺，迎接聽日 —— 加德滿都單車之旅。

再噏過

嚤囉仔

2017.05.30 Kathmandu Valley tours , temples, palaces and Nagarkot sunset

2017.05.30  Kathmandu Valley tours , temples, palaces and Nagarkot sunset 

如常早起，六點幾落到酒店餐廳，他他條條用兩個鐘食個早餐，真舒服。九點，導遊喺大堂接咗我，連司機一行三人加埋架車仔，開始一日嘅活動。今日有三個活動地點，全部喺加德滿都東面。

住喺加德滿都舊城，一定會去 Durbar Square。原來所謂 Durbar Square，其實就係皇宮及附近寺院、水池等建築群嘅統稱。尼泊爾，同其他地方人類歷史發展一樣，自古以來，都係群雄爭霸。互相廝殺、朝代更替，梗係閒過立秋喇。馬拉皇朝 Malla Dynasty 統治咗尼泊爾六百年，其間，十六世紀末，加德滿都山谷呢度，就曾經出現過三個王國，每個王國都有自已嘅皇城，其中一個就係舊城區，行都行到去嘅 Kathmandu Durbar square 。咁近，我一落地，自己就行咗幾次喇。其餘兩個，就係離舊城呢度東南五公里嘅 Patan Durbar Square，同埋東面十幾公里外嘅 Bhaktapur Durbar Square。

其實呢三個王國都係有好相同嘅文化，所以三個 Durbar Squares 內內外外，皇宮、寺院等建築，都有九成九相似。而三個皇城，我五年前都嚟過，今次重遊，主要係想睇佢哋地震後變成點樣。

就肉眼所見，似乎越近 Kathmandu 舊城，損害越大。Patan 王城，有不少建築物都係成座冧晒，頽垣敗瓦一地都係，為保安全，倒冧處都圍晒䥫絲網。維修古蹟，在在需財。尼泊爾咁窮，邊有咁多錢，好彩呢三個王城都列入咗 UNESCO 名冊內，世界各國慷慨解囊。可能日本仔最捨得畀錢，好多工地鐵絲網上都掛咗標示，講明日本官民團體資助震後維修工程。

似乎離得最遠嘅 Bkaktapur 影響最細，我幾乎睇唔到有成座倒冧嘅古建築，連Nyatapola  Pagoda 方塔寺嘅五層高架木結構頂部，都奇蹟咁保存得好好，而喺加德滿都嗰個類似結構嘅方塔寺，就冇咁好彩嘞。我梗係即刻跑上五層石梯級，居高臨下，氹氹匝行個圈 360 度俯瞰成個皇城。

方塔寺座落 Taunadhi 廣場，我哋喺廣場邊一間餐廳嘅頂層天台食午餐，一邊食一邊欣賞風景。食食吓，遠處烏卒卒一片，即刻搬返落室內繼續午餐，冇耐，驟雨殺到，怱怱食完個餐，通知司機接返我哋，車仔冒雨去下一個站 —— 上山睇日落。日落？仲睇到咩？

今日最後一站 —— Nagarkot。

五年前嚟尼泊爾去過 Pokhara ，半夜搭的士再模黑上過一個山頭 Sarangkot 睇日出，嗰個山頭千六米高，俯覧晒成個 Pokhara 市，連埋市旁邊嘅個 Phewa lake 一齊睇，靚到無倫。盡眼遠處就係一連串明星級高山：Dhaulagiri 、Annapurna 、Manaslu，其中山峰高過 8000 嘅 Annapurna 山脈及其造型惟肖惟妙嘅魚尾峰 Machapuchare 6993，更加係喺尼泊爾行山愛好者之中，無人不識。不過今次睇日出嘅地方係 Nagarkot ，我烏瀡瀡，睇到個 Kot 字尾，仲以為係我去過嘅 Sarangkot。一早都覺得奇怪嘅嘞，點解可以由加德滿都咁快就去咗 Pokhara ？原來 Kot 嘅意思係山上嘅城堡咁解，尼泊爾泊爾好多類似地形嘅地方，都係 Kot 尾嘅！既然喺高地，當然係睇日出日落嘅好地方喇。我將馮京作馬凉，果然係差不多先生。

車仔喺湮雨迷濛嘅蜿延山路登高，路唔算太窄，不過遇對頭車嘅時候，大家都要小心翼翼，擦肩而過，路上不時都有大大小小氹仔，唔算話好危險，不過都要打醒十二分精神行車。迷霧中到達一條有路邊攤檔嘅小街市，開擋營業嘅檔口廖廖可數，淡季吖嘛。路邊有梯級上山。我頂住細雨拾級而上，唔夠二三十米，就到達山頂平台，平台大約有一個籃球場咁上下大細。呢度係全市最高點，中間有一個高塔鋼架，用嚟擺放電子通訊設備之用，四周氹氹匝圍咗鐵欄桿，就係一個完美 360 度睇晒全市嘅觀景台。既然東南西北都睇晒，咁觀賞日出日落，應該絕對唔係問題喇啩？「應該」唔係必然，原來今日最啱係 ⋯⋯ 賞霧。

百分百濃罩全城，除咗霧，乜都睇唔到。咁靚霧景，欣賞十零分鐘，乜都夠晒皮喇啩，車仔回頭落山。喺顛簸山路中，車仔停咗落嚟，前面大貨車停正喺路中間，開放式車斗上企滿人，又揷滿旗幡，路上一樣都係人頭湧湧，個個着住鮮艷服式，小女孩個個化晒濃裝，精壯後生仔敲鑼打鼓，明明白白就係慶祝巡遊喇。原來只係兩周前，尼泊爾地區大選，得勝政黨到處謝票，並且順手宣示黨威，抬頭睇下乜嘢黨咁巴閉。呵！非常簡單嘅標記，白色旗幟上印咗一個斧頭鐮刀。尼國毛派仍然係今次選舉嘅大贏家，據說，雖然喺市區選區已經大不如前，但喺廣大鄉村區域，仍然佔有好大影響力。我打開車窗，戙起手指公，分享佢哋嘅喜悅，佢哋亦向我揮手回敬。車仔慢慢駛過人群，我閂返車窗，匿埋眼。斧頭鐮刀！一幕幕百年歷史喺我腦仔重播。我祝佢哋好運。

咁又結束我一日嘅加德滿都山谷遊，雖未盡如意，作為 hea 佢一日，亦算交到功課。喺附近行街買嘢食埋飯，又係覺豬時分。第二朝瞓醒 ⋯⋯

再噏過，

嚤囉仔

2017.05.28 - 29 Namche back to Lukla then Kathmandu

2017.05.28 - 29 Namche back to Lukla  then Kathmandu 

五月廿八日

我一個人連埋兩個書僮，好易話為，想要幾時走就幾時走。既有行山團嘅支援，又有背囊友嘅自由，雙得益彰，果然樂悠悠。如我命令，八點準時出發。

由南齊市集去我今日嘅目的地 —— 亦係全個爬山旅程嘅終點站 —— Lukla ，唔夠二十公里，全程又只係三千幾「低」海拔，難度可歸入「濕濕碎」級別，而且市集咁近機場，咁就吸引咗好多短程行山客。沿路都見到好多自己嚟嘅行山友，佢哋唔使請嚮導、挑夫，先由機場行到南齊，Hea 一兩晚，回頭行返出 Lukla ，再搭機返加德滿都，咁樣一個 round trip，已經係一個四、五日嘅喜馬拉雅山行程。呢度嘅客棧房錢，只收 500 盧比一晚，即係5蚊美金，平到你唔信。客棧餐費又相宜，就算加埋加德滿都食宿，十幾日嘅尼泊爾行程，自己嚟，一尐都唔昂貴。

呢一段路多人行，路又闊，實在非常好行，只要肯嚟，一般正常人都可以應付裕如。路上我就踫到一個係我姐姐輩分嘅女士，佢喺路邊休息緊，我八卦，同佢嗲幾句。佢就係咁樣一個人嚟行山，唔需要好似我行得咁急，佢慢慢行，非常他條咁享受喜馬拉雅風情。咁有型，即刻叫 Sapta 同我哋影返張相。

呢段路應該係 GHT （喜馬拉雅山陘）其中最繁忙路段，一路向下行，唔止愈行愈多人，仲有數唔盡咁多嘅動物運輸隊。一般嚟講，行山友一定要讓路畀 porters ，因為佢哋孭住重嘢，我哋要 be considerate。不過如果遇到動物，就更加要速速貼埋山坡嗰邊，咁樣唔係要 consider  人哋，而係為咗自己安全著想，否則佢個大 pat pat 隨時 Bel （逼）咗你落山，冇仇報。尤其係過吊橋，動物一定大晒，離遠見到佢哋，就算已經過咗一半，為咗唔畀佢夾扁，都即刻走返轉頭，等佢哋班動物大哥過晒嘞，就急步過橋，如果慢一步，有另一班動物大哥駕到，又要等十幾廿分鐘喇。今日呢程山路，唔止過橋要等，連山陘都不時「塞動物」，呢個係五年前所少見嘅。

十八公里，寛闊山路，易行到不得了，用咗五粒鐘，下午一點就到 Lukla 衝綫終點。Lukla，我已經係識途老馬，客棧安頓後，再食埋晏晝，就出街去星巴克飲凍啡食件餅。喺星巴克，食嘢唔係主旋律，其實最重要係上網，即時通報天下：喜馬拉雅挑戰自己之旅，至此，成功完成！

食過鐵板水牛朳晚餐後（勁靱嘅水牛肉），多謝兩位書僮服待咗我十三日，雖然大圍已經畀咗貼士，我都再醒多每人二千 ⋯⋯ 盧比啫，即係廿皮美金，以示謝忱喇。書僮 Sapta 投桃報李，拍晒心口，話聽日飛出加德滿都機票，它喺佢身上喎。

五月廿九日

再無牽掛，又係好好瞓嘅一晚，早餐都未食完， Sapta 就跳吓跳吓咁走埋嚟，好得戚咁講：「Look，Flight ticket 」。佢係得嘅，即刻上房執嘢，唔使半粒鐘，已經喺機場 check in。Sapta 好得戚咁望住我，我忽然問佢：「我個入山證呢？」佢即刻謝晒，馬上飛跑返客棧去攞。

入山證係進入聖母峰 Sagarmatha （額菲爾士峰嘅尼泊爾稱謂）National Park 嘅證件，分為團體及個人兩種。入山證，除咗係入山通行證外，其實係遊客入山後，維持良好行為嘅一個保證。如果係團體入山證（仍然係每人一證）嘅話，所屬行山公司，要就客人嘅行為負責；個人證就當然係自己孭晒上身咯。當然，行山完畢後，呢尐過期入山證，就變成好有價值嘅記念品，佢見證住我幾時幾日，曾經到此一遊。Sapta 烏瀡瀡，今朝唔記得畀返我，而家咪要飛快返客棧去攞喇。

好彩客棧就喺機場隔籬，唔使五分鐘，書僮 Sapta 已經攞返行山證畀我，再送埋我上機之後，佢就要行路返家鄉嘞。原來五月尾，已經踏入行山淡季，再遲半個月，季候雨 monsoon 殺到，雨季嘅喜馬拉雅山區，其實唔係好啱行山，呢尐時節，領隊、挑夫大多都返歸做屋企嘢，或者休息享受天倫，等候八、九月開始，另一個行山旺季嘅來臨。

坐入十七座雙螺旋槳飛機仔，今次仲坐正喺機師後面，同佢哋只有一米距離，睇實機師點揸飛機，當然好過癮。講過好多次，Lukla 機場，被評為全世界最危險機場（唔係「之一」，而係第一），呢個朶，當然唔係浪得虛名。2017年5月27日 ⋯⋯ 冇錯，就即係前日，一架好似我而家坐緊嘅飛機仔，下午兩點，預備降落 Lukla 嘅 Tenzing Hillary 機場 ⋯⋯ 冇錯，咪就即係呢度囉，可能因天氣關係，撞咗喺跑道對落 200米山崖，好彩飛機仔當時冇戴客，不過兩個機師同一個空姐全部受傷送院，機長送院後仲死埋𠻹。撞機不足四十小時，喺同一跑道，我又飛喇。驚唔驚？都坐咗上嚟咯，又真係冇乜好驚。又咁講，原來最危險係降落 Lukla 機場，而家我係起飛，咁又 OK 喎，況且應死唔使病，我冇驚過！講開講，唔似大型機，原來撞飛機仔，好多時都唔係全機香晒，喺空難嚟講，都有頗高嘅生存率㗎，各位，放膽多尐嚟 Lukla 行山喇。

今日天色晴朗，兩位機師，白色制服，整齊妥貼。肩章上貼住四條嘅機長，佢戴著住黑超揸飛機，指揮若定，好鬼有型啫。三十五分鐘後，飛機仔平穩降落加德滿都國際機場。兩位機師精湛技術，梗係又搏得全機人掌聲。乘客落機前，仲大大聲同機師講 thank you，四條機長回眸揮手報以微笑！哈，搭飛機仔，係親切好多喎。

司機一早喺機場等，接返我去加德滿都上次住嗰間酒店，因為時間尚早，未 check 得 in 住 ，咁就要畀錢，先至可以食個酒店早餐，多謝 1000 盧比！都即係 10 蚊美金啫。貴唔貴？個早餐實在唔錯，又可以舒舒服服，由朝坐到中午，都係好化算嘅。不過 10 蚊呢個價錢，可以喺附近唐人開嘅客棧，租到一晚連浴厠嘅房！咁，你話 10 蚊一個早餐平唔平呢?

因為早咗完成任務，我要喺加德滿都留多兩日。早餐後，上去旅遊公司商量呢四日活動，老闆認真幫手，好快就幫我搞掂，又送多幾件公司 Tee 畀我著，仲提醒我：今晚公司請食 farewell dinner ！呵，今晚會見到美國佬喎，而且有得食，我一定出席。

跟住幾日行程如下：

30.05 加德滿都河谷皇宮遊，Sarangkot 觀日落

31.05 自己搞掂

01.06 笨豬跳，哈哈哈

02.06 首都單車遊

03.06 一早飛印度，展開次大陸之旅

搞掂行程後，下晝冇乜好做，四圍 Hea下，睇下有乜嘢好買。勁揪咁行咗十幾日山，酒店嚟個按摩，舒舒筋胳都好喎。咪咪嚤嚤，搞哩搞嚕，又到晚飯時分。

加德滿都有不少有水凖餐廳，公司請客，唔可以太寒酸。今晚，領隊 Bimel 帶我哋去一間餐廳，睇下餐牌，幾好嘅一份餐，都只係千零盧比，即係十零廿蚊美金，已經好豪咁食一餐。加德滿都使費咁相宜，當然可以吸引唔少鬼佬鬼婆嚟旅行消費喇。席間講起美國佬佢哋點樣由 Island Peak 出返嚟，原來佢哋只係早我一日出加德滿都！個個當然盛贊我嘅英明決定，再晤講美國佬成日掛喺口嘅一句說話：「you are a walking machine。」呢句嘢我視為 complement ，我受晒，Thank you 。

今晚早尐瞓，迎接聽日開始嘅新行程。

再噏過，

嚤囉仔

2017.05.27 Chhukhung back to Namche Bazaar

2017.05.27 Chhukhung back to Namche Bazaar 

成日有人問我，五年前咪去過額峰營囉，點解又要去多次？咁就要回帶睇返轉頭，舊年（2016二月）做手術前，我個外科醫生預言我手術後可以完全恢復體力，佢仲話我去多次 EBC 都冇問題。既然佢咁講，我又不妨一試，以檢視下自己嘅體力復元成點。行程再加多一個勁揪主菜，順便創造多一個記錄。預咗可能會失敗，所以毫無壓力。結果證實，體力更勝從前。史密夫醫生，你係得嘅。

兩個主菜：EBC 同埋 Island Peak ，已經享用完畢。而家剰低嘅任務，就係安全快速咁出返加德満都。

五月嘅喜馬拉雅，好早天就光，雖然噚日好攰，六點鐘就掰大眼嘅習慣真係改唔到。一覺醒來，漫天大雪，原來噚晚一路落雪冇停過。行出客房，腳踏住地面積雪走入餐堂，一路食奄列早餐，一路同領隊、 porters 打牙較。

唔止噚晚，天氣預報話今日都唔會好天，額峰營 EBC 都排晒大隊等直升機，睇個樣，美國佬佢兩位大哥，今日都唔使旨意離得開 Island Peak Base Camp 嘞。我愈嚟愈欣賞噚日我嘅英明徹退決定！

領隊 Bimel 叫我今日停 Dingboche ，我就堅持要去到 Namche，佢當然順晒我意，因為兩日行程，一日行晒，咁樣就同公司慳返一日住宿錢，porters 又可以早日收工，大家 happy，何樂而不為呢，又。

應我要求，外面仍然落緊雪，我、Sapta、Hokim 一行三人，凖時八點起程。雖然雪勢稍減，我都唔敢造次，出動羽絨背心外加雪褸，仲著埋雪褲，斷估幾大雪都冇有怕嘞。兩個𡃁仔加一個有過度活躍毛病嘅超齢頑童，一路笑騎騎、跳扎扎咁離開 Chhukhung  客棧。

回程係全程落山路，除咗路程長短因素外，根本毫無難度可言，行得十分輕鬆。早段行喺 Imja  河谷時，四周濛瀧一片，仍然落緊茸茸飄雪。行近 Dingboche 轉入 Khumbu 河谷時，天氣逐漸晴朗，冇風冇雪，仲愈行愈熱，我呢身裝束，已經不合時宜。叫停 Hokim ，叫佢放低我尐行李，喜馬拉雅就係我嘅大更衣室，除低雪裝，換上輕便行山裝束，既然通山換衫咁過癮，即刻叫 Hokim 幫我影多幾張野外換衫相，以留鬼馬記錄。

雖然愈行愈暖，仍然一路落住微雨，回頭向北望入山，濛瀧天地繼續畀雲霧掩蓋。一路行出嚟都見唔到直升機蹤影，睇嚟，困喺兩個大本營嘅人，今日都唔使旨意出得到嚟，美國佬佢兩位大哥，又要瞓多一晚帳幕喇。我愈諗愈開心，行行吓仲笑咗出嚟，唔係幸災樂禍，而係再三證明我果斷決定徹出 Base Camp 係幾咁英明，哈哈哈。

行山野路，我一個人同埋兩個 porters 行，真係好有古時書生同書僮趕路 feel ⋯⋯ 。正沈吟間，喺湮雨濛朧中，唔知幾時，忽然灑一陣雨，前面有座破廟，咦，裏面有冇小倩 ⋯⋯ ！

我呢個書生行動迅速，兩個書僮都唔敢迨慢，以我嘅體能嚟講，咁嘅速度，係全速前進模式。平時，行山團拖住大棚人，好難行得快，所以 porters 孭住客人行李，早早離開大隊趕路，飛快去到當晚投宿客棧，一來，可以預早幫客人行李入晒房。而最重要嘅，就係早到者先至揀到靚房，客人住得好尐，貼士都畀多尐喇，所以行山公司有 fit 馬 porters，當然係重要資產。今日，我呢兩件書僮梗係 fit 馬，不過我亦步亦趨，一尐都唔輸蝕。書僮行得快，當然同佢哋雪巴人體能有關，另一個重要因素，就係佢哋識得行捷徑，嗰尐捷徑可能係特別斜，又可能有一尐危險性，尐路唔係咁啱一般人行。不過今日，我叫兩位書僮照行 porter's track ，我照跟可也。今次，我可以行尐特別嘅路，咁又過癮好多喎。

快速落山，就明顯咁睇到山區垂直高度嘅變化。由冰川、冰湖，至碎石高頂；由寸草不生嘅大石山谷，行到四千以下，開始有草地，矮樹。而雪山融化嘅水，隨住高度下降，由淙淙小溪亦匯集成為滚滾江河。再次睇雪巴人嘅屋，亦明顯咁睇到高度變化。喺高地，屋前都有一幅用牦牛糞堆成嘅牆，行低過三千幾，山坡生滿兩三米高嘅樹叢，雪巴村民就可以用柴枝作為燃料，咁樣，佢哋屋外都堆滿一排排斬好嘅乾柴枝。

中午左右就過咗 Tengboche monastery 3870m ，呢個小高原係上、下 Khumbu 河谷嘅分界，由呢度落山，山徑兩旁都係茂密樹林。初夏時份，到處都係綠色，充滿生機。想當然，春天百花盛開時，成個山，繁花似錦，一定好好睇。而家入夏，以為「開至荼蘼」，本應「花事了」，誰不知有一種樹，堅持開花，開到今時今日。本來成個 SoloKhumbu （下段）都係綠色，只要有一叢雜色嘅花，都會好搶眼。而家呢種樹，又唔係話漫山遍野咁生，而係東又一叢，西又一叢，每一棵樹嘅花都生得非常茂密。花嘅顏色都好趣緻，偶然喺高山四千幾米都見到，花嘅顏色就粉紅偏白，愈落得低，花就愈紅。如果成個山都紅卜卜，咁就梗係震憾喇，不過原來萬綠叢中點點紅，又別有一番味道。乜嘢樹咁巴閉呢又？好彩有書僮跟住，即刻問個因由。

書僮 Sapta 話，呢尐叫 Rhododendron ，佢好特別，因為花期開到初夏，成個喜馬拉雅 Khumbu 山區，就只得佢開得咁茂盛，尼泊爾人就揀咗佢做國花。即刻谷哥 Rhododendron 係乜東東。哦！原來就係杜鵑，係野杜鵑。呵，杜鵑花！佢令我諗返起上世紀六十年代尾開始，杜鵑時節，港督府每年都開放畀公眾賞花。詩云：「往年今日督轅中，人面杜鵑相映紅，人面已回吉利去，杜鵑尚能笑春風？」能不感慨哉。

行山團提供早午晚餐，行到接近中午，為咗趕時間，我決定中午呢餐，我自費，只喺吊橋前客棧，一齊食個簡單小食，咁就可以早尐去到 Namche ，到埗先再用公司錢食餐好嘅。兩位書僮都舉辦腳贊成。

怱怱食過咖啡三文治就起行，冇耐，眼前湮雨濛濛，分唔清係鏡片嘅霞氣，抑或山間嘅薄霧；面上濕立立，糊成一片，真係唔知是雨是汗。雨，愈落愈密，好彩唔係傾盆嗰隻，我件薄薄防水風褸，都搞得掂。過咗下晝三點，在雨中，到達 Namche。

今日一早由 Chhukhung 開始，用七粒鐘行咗廿四公里半，我好滿意喎。

食過三點幾嘅午餐，即刻出街買嘢。因為五年後，再次完成 EBC trekking ，梗係要買返件额峰營 Tee 裇，以作紀念。而創紀錄，成功登上6189，更加要買尐 Island Peak 相關嘅嘢以茲奬勵喇。

行出客棧，條街仲係光燦燦，不過間間舖頭裏頭都烏燈黑火，原來係停電，我唔詫異，因為停電係尼泊爾嘅常態，舖頭就照常營業。我就戴上頭燈，繼續血拼南齊市集。

我提過， Khumbu 山區係藏傳佛教嘅地區，其實其中居民，不少喺由東土藏區逃避中共，而翻過喜馬拉雅山，再定居尼泊爾嘅「藏民」，南齊市集呢度就有好多佢哋開嘅舖頭。好易認，呢尐舖頭一定供奉達頼喇嘛，不少仲有雪山獅子旗展示喺當眼處。佢哋唔係尼洎爾人，佢哋嘅身份認同，更加絶對唔係 Chinese （華人 or 中國人）而係 Tibetan 圖伯特人。我喺烏燈黑火中，就撞咗入一間圖伯特人開嘅舖頭。

喺頭燈照耀下，我唔止買咗Tee 裇，仲好好彩畀我買到一頂 Island Peak 喼帽，大話夾好彩，此後，有關 Island Peak 嘅紀念品，我行勻南齊、Lukla、加德滿都，再搵唔到多一件，此是後話。唔！爬 Island Peak ，真係冷門嘢。

呵，買買下，居然有返電，圖伯特老闆娘梗係覺得我係貴人，喺燈光火猛中介紹我買高山羊毛 pashmina 披肩，當然係特價喇。既然緣份一場，我亦唔抗拒，買咗喼帽、Tee 裇等紀念品畀自己之餘，亦買咗十幾條披肩作為手信。老闆娘仲送咗一條有雪山獅子 logo 嘅 headband 畀我，大家互講 Tashitala  ，就行出舖頭。你都咪話，一出舖頭，又停返電。冇電，即係冇 wifi ，亦整唔到咖啡喇，本來想去8848 咖啡室上網，冇電即係冇晒行喇，惟有疊埋心水返客棧。

冇電，客棧餐堂今晚燭光晚餐，食個鐵板牦牛扒，再同 Sapta 安排好聽日行程後，黑孖孖冇乜好做，落返房瞓覺好過，聽日 ⋯⋯

再噏過

嚤囉仔