2018.09.17 - 22 玩雪邊嫌多，再度雪板笑呵呵。失足跌落坡，鬆㬹排骨嗌唷唷。
睇返我飛時卜個帖，原來仲係成個月前滑雪嘅故事，點解咁耐冇喱聲氣？我冇失蹤到，本月十七號至廿二號，我又喺雪場！哈！玩，點會嫌多，趁雪季收爐前，又去玩多一個禮拜雪板。
袋鼠國雪季，一般由六月開始，到九月尾就完結。今年天氣特別尐，過咗春天仲好凍，八月份，雪梨、墨爾本都錄得六十年嚟最凍紀錄，雪山區仲連續落咗好多雪，雪場梗係把握時機賺多尐，雪季順延至 10 月初至完結。
我貪玩，點會錯過大好機會，即刻安排二度雪板之行。
唐人滑雪團早早已經收爐，焗住要自己諗計嘞。記得每次上 Perisher 雪場，路邊都經過一間叫Skirider Hotel 嘅雪山酒店，佢離開雪場只有 11 公里，而且有酒店專用穿梭巴士來回雪場，十分方便。如果喺正雪季入住，隨時係唐人團兩、三倍價錢。而家季尾，大減價，只係比唐人團多二百蚊左右。殺你，趁仲有得玩，幾大玩咗至算。
不過，咁就要自己揸車去酒店。由屋企經坎培拉到雪場酒店，單程要五百公里，計埋休息食晏，要揸7、 8 粒鐘車。再計日數，前後要預兩日車程，即係咁樣一個四日滑雪行程，就要頭尾六日，而酒店就要 book 五晚嘞。
電話電郵卜位，易過借火。一切就緒。
呢一日，一早預備晒咖啡、茶水，腰果朱古力等零食，亦擺喺司機位就手處。為咗要喺天黑前到達雪山，星期一，晨咁早就出發。一支公跳上車。係呀！又係一個人。今次係第一次一個人揸車入雪山。
星期一叫做 Mondayitis，個個晏起身，條路塞滿趕返工嘅車，不過好快駛上咗 M7 公路，跟住就冇遮冇擋，再一條氣駛入接駁維多利亞省，著名嘅 31 號希姆公路，南行向坎培拉方向進發。咦！來回 1000 公里嘅油費都要計埋落條數㗎，兩嚿水有找喇！
天公造美，晴天萬里，乾爽嘅 Freeway，非常舒服，唔知點解，今日，連車都唔多，揸呢程車，一尐都唔辛苦。袋鼠國揸車速度執行得好嚴格，公路上不時見到匿埋樹叢等獵物嘅警察。我嘅經驗，多數人都好守規矩，揸車亦好斯文。沿路我都開著巡航系統，咁就唔怕超速嘞。
中午前就轉聯邦公路駛入坎培拉，喺 Dickson 區唐人街食碟什會炒麪。稍事小休後，就繼續向南沿 Monaro Highway ，朝住紐修威及維多利亞兩省交界處嘅雪山區 … Kosciuszko 山區進發。
澳洲，古老紅土大地，好耐之前已經突出水面，億萬年來，只有風化磨損，又冇板塊推高地表，南方大陸，永冇增高。而家最高嘅山 一一一 Mt Kosciuszko ，亦只係2228m ，真係濕濕碎。好彩山區唔太近海，而且位處溫帶南面，借住大分嶺帶嚟太平洋水氣，每年都有唔錯嘅降雪量，山區內嘅谷地坡面，經常積住兩三米厚嘅積雪，再加以人工整理、經營，就變身成為呢片，畀好多人帶嚟歡樂，同時又養活好多人嘅澳洲著名滑雪勝地 一一一 Kosciuszko National Park 。
有飯食，梗係一齊食。來往雪山路上，都有好多人勤勤懇懇付出時間精力，為雪山旅遊業貢獻力量，順手搵銀維持生計，就係人之常情嘞。小鎮 Cooma ，係進入雪山嘅大門。由 Monaro Highway 右轉入 Kosciuszko Highway 交界處，就係 Cooma 小鎮之所在。1949 年 Snowy Mountain Scheme 雪山水電工程計劃，將附近 Jindabyne 變成人工湖，積蓄雪山流落嚟嘅水，除咗供應食水、農牧灌溉外，亦化成乾淨電能，造福人民。建造呢個龐大水電計劃，吸收咗好多戰後歐洲移民，當時雪山工程總部，就喺 Cooma 。
百周年紀念公園行入內街，百年郵政局隔籬就係 Cooma 法院及附設建築群，百幾年嘅法院大樓於 1877 年落成，居然用到而家，今日，仍然係 Cooma 地方法院所在地，認真襟用。各位行過 Cooma 可略作停留，實在有唔少歷史遺跡，值得一睇也。
雪山工程完工後， Cooma 魅力不減，成為滑雪愛好者嘅後勤補給站。住宿、餐飲，做滑雪用具補給生意嘅鋪頭到處都係。話時話，我都要喺 Cooma 停一停。因為法例規定，每年六月至十月所有駛入 Kosciuszko 國家公園嘅車輛，都必須帶備雪鍊 snow chains（四驅可免），如果咁好彩，揸揸吓車落起大雪，路邊有chain bays，大家就駛入去裝上防跣雪鍊，咁樣喺雪地行車至夠安全。我喺 Cooma BP 油站附設嘅雪具店，租咗一對 snow chains ，租五日，承惠 50 蚊。嘩，佢都幾好賺喎。
講開又講，咪睇Cooma 細細，一向都係重鎮。1788 年，大不列顛第一艦隊登陸後冇耐，就有歐洲人開發 Cooma 。1840 年，嚟自波蘭嘅 Sir Paweł Edmund Strzeleck ，受總督邀請，經過 Cooma ，進入山區，親身測量並且爬上澳洲最高峰，佢睇到呢個山峰個樣，似足佢波蘭家鄕，用嚟紀念民族英雄嘅 Kosciuszko 土堆，咁就因以為名嘞。咁樣，澳洲最高峰就得咗個波蘭名喇。都好嘅，據聞， Kosciuszko 大將軍係人權鬥士，好多移居呢片南方大陸嘅人，都係嚟呢度尋求自由樂土啫，呢個名，夠晒貼題喇。各位由 Cooma 向雪山方向揸車冇耐，喺 Jindabyne 湖邊，就有好大個 Paweł Edmund Strzeleck 嘅雕像，大家上雪山前，不仿嚟瞻下一代偉人嘅風采。
睇返時序，Cooma 嘅開發，同香江維多利亞城同步開始，真有緣。
Kosciuszko 雪山區有四個雪場，其中 Perisher 同埋 Thredbo 係兩大龍頭，其實係兩組背對背嘅山頭。兩個雪場，鹹魚青菜，各有所好，不相伯仲。以往唐人團都會去齊兩個雪場。前幾年，雪場 lift pass 電子化， Thredbo 要人買飛時影埋相，咁，唐人團導遊就唔可以幫客人買飛，即係冇咗回佣喇！斷人衣食喎。此後，唐人團就去晒 Perisher 喇。
我都鍾意去 Perisher。佢有四個雪場區：Smiggin Hole、Mt Blue Cow、 Guthega，同埋我最啱玩嘅旗艦雪場 Perisher Valley。
澳洲紐修威呢兩個龍頭大雪場，都座落 Mt Kosciuszko 國家公園範圍之內。入國家公園，即係又要畀錢喇。巴士就計人頭，車上乘客每位每次多謝 11.45 蚊（咁了能嘅？），而私家車就成架車計，每日多謝 29 蚊。我入山停留五個整日（廿四小時計），咁就百五有找！咦！原來又可以買一年國家公園入場飛，六十歲以上高級巿民只需 152 蚊。個選擇就好明顯喇嘛，咁，我而家可以成年出入全紐省國家公園喇。
買咗國家公園入場飛，離開收費亭五公里就到達 Skirider 酒店。酒店嘅客人服務區，好似大堂、餐廳、酒吧等就喺路邊一座單層建築物裏面，後面沿山坡起咗一排排嘅平房，就係客房。大大話話有成百間房。有雙人房，亦有五六人大房。雪季時幾百人喺呢度出入，一定非常熱鬧。就算而家好似係淡季，當然唔會全院滿座，但喺到咗開餐時間，都人來人往。原來一團團學生嘅 snow excursion 活動不減，咁都為酒店提供唔錯嘅穩定客源㗎。
雪山酒店，一定附設雪具鋪頭，我搞掂入住手續後就即刻租埋雪板，加埋自備嘅頭盔同埋雪鏡，咁就一切就緒，隨時有得玩嘞。又咁講，畀多兩個錢，租到嘅雪具又真係新尐、企理尐。同以往喺唐人團租到嘅 cheap cheap 雪具，又真係一分錢一分貨喎。
我喺雪山假期，生活都非常規律化，每日做嘅嘢都差不多。
酒店住宿已經包埋早晚兩餐。每朝六點45分，我就已經喺餐堂門口，同一眾學哥、學生妹一齊排隊攞早餐，令我好似回復學生時代，咁樣，有益身心呀。餐堂每日供應嘅早餐唔係大同小異，而係完全一樣！鬼佬早餐，全世界都咁上下喇。「咁食足五日厭唔厭？」又唔會喎，哈哈，我喺屋企，自己整嘅早餐，咪又係差不多啫。
嚟雪山就係玩雪，早餐後即刻換上滑雪裝備，揪住雪扳就走頭。雪山酒店有一大優勢，就係近雪場，當然又有喺正雪場裏面嘅旅館，所謂 ski in ski out ，咁又要多尐銀両喇，而家我住呢間，離雪場 11 公里，酒店專用穿梭巴士有固定行車時間表，來住雪場只係 15 分鐘車程，絕對已經十分方便。以往參加唐人團，多數住喺 Cooma 附近旅館，平時來往雪場，個半鐘車程走唔甩，唔好講遇到大雪，中途又要上 snow chains 。箍住雪鍊，架架車行到蟻躝咁慢，隨時要行兩三粒鐘，咁仲邊有時間玩。我聼過有唐人團落山遇大雪，半夜至返到酒店 …。
穿梭巴士放咗我落雪場，就好似放咗馬騮入山。由嗰一秒鐘開始，就喺雪山唔停咁上上落落。雪山好大，吊椅同 T-bars 就係上高點及來往各個山頭嘅交通工具。Lift Pass 係唔少得，而且係滑雪活動嘅一項大支出。如果埋櫃位單買，每日就要成百五蚊，我網上買連續四日，多謝四嚿。
雪場裏面，喺好幾個吊椅大站，都有餐廳酒吧，只要有錢，唔怕會餓親。不過我唔鐘意食佢尐嘢，我會一早自備兩三份簡單三文治，同時費時同人逼，早上玩到十一點左右，就入餐廳搵個靚風景位，去酒吧買杯 beer on tap，然後嘆我份 BYO 三文治，咁就係我嘅午餐喇。我當然明白每間酒吧啤酒價錢都唔同，不過原來都有個規律，就係上得愈高，價錢就愈貴。中午雪山中，我手上嗰杯凍啤，仲係細杯，多謝 13 蚊！不過呢份午餐可以歎一粒鐘，都好扺食喇。跟手繼續通山走玩埋個下午。冬天雪山日短夜長，到三點幾鐘，個太陽已經落到好低，天色亦開始陰暗。原來喺雪地，光綫唔夠，會影響對距離判斷嘅感覺，從而影響對速度嘅感覺，最直接嘅後果就係成日 PK ，咁即係到咗返歸時候。由高點瀡落山，剷過凌亂嘅雪面，山腳解開雪板，穿梭巴士就載我返酒店，又真係好方便喎。
酒店晚餐就多尐花臣，而且每晚不同，雖然都係要攞住個 tray 去排隊嗰隻食法，不過都叫做 3 course meal，有湯有 main 有甜品，質量 OK 咁話喇。其實酒店仲有個 Grill Bar 可以食 BBQ ，我懶得燒，所以冇專登揀。係到咗星期五，3 course 變咗 Pizza ，我最憎，所以去咗 Grill Bar。BBQ 個餐已經包咗每人自選一塊大肉，如果要加碼，就多謝 10 蚊一塊。呢度配菜任食，仲有沙律麫麭，加埋嚿大肉，我食得晒已經好巴閉喇，加碼？唔係我杯茶。話時又話，自從做咗細胃總幹事，營養師預咗我正餐時唔飲流質嘢，而家餐餐都啤一啤，我除咗用力捽木外，更加係心存感激， Hey ， keep it up，唔好畀佢停。
我鍾意玩雪板，因為雪板對身體平衡能力要求好高，只係要做到唔好 PK ，已經花費好多時間心力，最近兩年，我已經有幾大嘅進步，一般斜坡雪地，一般速度，我都可以話控制自如。就算好斜，我慢吞吞都可以搞掂佢。喺雪場，係用顏色嚟示意雪道嘅難易程度：綠色就係一般容易，多數都係冇問題嘅。藍色就開始有難度，一般藍色雪道，將將就就，我都係可以應付嘅。而黑色 … 我梗係諗都唔會去嘅地方喇。
雪板最大嘅樂趣，就係建立喺雪板上控制平衡身體嘅能力。每次由高點滑落，身體每吋肌肉都要參與活動，眼看四面，耳聽八方，留意附近左右有冇盲毛撞過嚟。是旦一嚿肌肉控制不力， PK 就係結果，而且係即時話過你知。撻咗喺雪地，每次都要即時撿討，睇下衰咗邊瓣。隨即馬上拍拍身上雪粒，頭也不回，邊度跌倒，邊度起返身，繼續玩過。咦！人生亦係如此啫！Snowboarding ，真哲理。
快樂時光梗係快過，眨下眼，又到星期五，滑雪第四日。如常一早上咗 Perisher 4座吊椅，喺 mid station 閞始滑落，如常小心 翼翼 Zig Zag 滑落太斜波，淡季雪場，周圍都冇乜人，其實滑得好輕鬆。到達稍平嘅斜坡，減慢些少速度，做下轉身、小跳動作，一切都好順利，大「之」字再落一個斜坡，坡底之後就係一段平路，中間有減速牌提醒滑雪友注意速度，因為再過 50 公尺，就係山腳吊椅站。我緩緩 zig zag 跣過減速指示牌，喺完全冇先兆下，成個人向左跣低，兜頭向左㨔咗落雪地，因為季尾冇乜雪落，雪面其實都幾硬，呢一撼係撼到暈得一陣陣個隻，如果冇頭盔，真係可能有事。稍為回魂後，左面肋骨畀自己手臂頂親，就好似自己鬆咗自己一㬹，連吸氣都痛。即刻自己撳下，初步評估，應該係撞親肌肉，排骨應該冇事啩。拍拍身上雪粒，爬返起身，每一步郁動排骨肌肉嘅動作，都有痛感，不過又唔係頂唔順嗰隻。繼續排隊上吊椅，上咗高頂再橫過藍牛山雪場。都玩咗兩次吊椅。不過都係一路玩一路痛，雖然稍有舒緩，但係真係冇晒心機。於是喺藍牛山食咗午餐，再塔雪山小火車 Ski Tube，過返 Perisher Valley。又繼續上返吊椅滑落，每一個動作都拉到患處而引起痛感，因此而就住就住，又會影響動作平衡，咁就更容易 PK！
咁嘅款，唯有 …
三點鐘搭返穿梭巴士返歸，仲以為 snow trip last day 會玩夜尐。估唔到咁樣結束我呢個雪季！我又係咁講：人生嘅嘢，點到你估，有得玩就好去玩，點知道聽日開邊㦚。
雖然個結尾係咁出人意表，總嘅嚟講，都係一個好過癮嘅雪山假期。燒塊肉眼扒，飲杯凍啤，好好瞓一覺，第二朝星期六，食過地條早餐，就揸車返歸嘞。
玩得咁過癮，約定你，出年又嚟玩過喇。
話時話，而家屋企搞緊世紀大棵蓆，係乜？留意下一個帖喇。
再噏過，
嚤囉仔
No comments:
Post a Comment