 |
| 緣起登龍大水坑，羅素街邊𩟔三餐；登科菜園播良種，四口柴灣點得閒。 鹿死德生唔再盼；南逐水草蘭谷行。廿年情牽西敏寺；餘力冇嘥整多間。 |
去我飛時卜，睇多尐相 ：
Ecclesiastes 3 ：A Time for Everything 萬物有時
There is a time for everything，and a season for every activity under the heavens:
a time to be born and a time to die,
a time to plant and a time to uproot,
a time to kill and a time to heal,
a time to tear down and a time to build,
a time to weep and a time to laugh,
a time to mourn and a time to dance,
a time to scatter stones and a time to gather them,
a time to embrace and a time to refrain from embracing,
a time to search and a time to give up,
a time to keep and a time to throw away,
a time to tear and a time to mend,
a time to be silent and a time to speak,
…… 仲有好多，自己摷喇。
今日唔係講英文，亦唔係講耶蘇。人，只係一堆蛋白質，我哋之所以同初級生物（邊個可以界定高等/低等）有分別，就係因為有咗記憶。記憶就係歷史，有人叫我哋唔好睇返轉頭，我專抝頸，今日就用歷史開頭。
2014 年四月廿八日下晝，我喺舖頭做緊個客，返緊學嘅大小姐忽然嚟商場，佢走埋 counter，紅晒眼，喊咁口對住我，連個客都嚇咗一跳。原來佢知道商場唔同我哋續約嘅消息，非常擔心我，所以出嚟想話安慰我 …… ！到而家，呢一幕，仍然非常深刻，因為實在好感動。不過嗰時佢仲細，唔了解老豆心情，其實唔使開工，我絕對高興到不得了，慶祝都嚟唔切，邊使安慰 ？！
冇耐，我將執舖頭件事擺咗喺飛時卜，大小姐就用傳道書第三節作出回應，同年五月二日，我將我同舖頭嘅淵緣記錄喺我個 blog 度，有 link 為證：
「萬物有時」，呢句說話，喺每個人生道路歧點，都好有力量。睇返轉頭，原來一生人真係經歷過好多歧點，so far 計有：
1955年 …… 係時候嚟呢個世界玩一轉喎
19 …………
1984年 …… 係時候拉埋天窗喇
19 …………
1986、91 … 係時候製造生命嘞
19 …………
1992年 …… 係時候走頭，另辟新天地
20 …………
2014年 …… 係時候唔使點開工，最緊要好玩
20 …………
2018年 …… 係時候 …… 做呢件事，咪就係呢篇嘢嘅主題 一一一 搬屋！
搬屋，往往發生喺重要嘅人生歧點。人生軌跡，由一點移去另一點，其中需要取捨、放棄、堅持、尋覓、計算 …… ，真係好多嘢要諗，好多嘢要決定。好！今日講，蔣家搬屋史：
1955 年，我住嘅第一間屋係喺鵝鵛橋大水坑行入，登龍街十七號三樓尾牀位，一家四口，一張綠色 4X6 角鐵碌架牀，係當時窮人必備家當。人生第一次搬屋，發生係 1966 年，我老豆由五蚊一個月牀位租金，升呢到 95蚊一個月嘅板間房，呢個決定，佢一定諗到頭都大晒，因為成日擔心冇銀交租。其實，我出世之後，老豆生性咗好多，非常顧家，佢擔心欠租嘅事，從來冇發生過。而我喺波斯富街呢間板間房，就渡過咗我重要嘅青少年時期。
 |
| 羅素街板間房 |
搬屋冇耐，有幸見證六七暴動。嗰時，我未夠班掟菠蘿，不過作為紅色小鬼宣傳隊，都參加唔少非常活動，唔講啱定唔啱，呢一段，都係充滿顏色姿彩嘅人生經歷。由官立小學雞，升讀香港雞私立學店，繼而用七年時間，遊走多間中學，渡過火紅年代，跟手就完成唔使點做功課，而又多姿多彩、十分過癮嘅學生歲月，之後仲烏啄啄，變身人之患，工作就係上體育堂，一路收銀一路玩 …… ，一切一切，都發生喺板間房時期呢 16 年間。
由要去涼茶舖飲甘蔗水借電話打，至到有自己電話，當然係十分重要嘅歷史關鍵，因為，每晚同愛人煲電話粥至深夜嗰個黑膠電話，就擺咗喺呢間板間房。
煲粥需要時間，呢煲粥由 13 歲開始落米加水，仲要小心睇火，唔好煲燶，又唔好生米。詩云：慢火煲粥，時機成熟。就要拉埋天窗嘅嘞，咁，又係搬屋時候喇。新建嘅蔣家二人小天地，築喺上水彩園邨。呢次搬屋，梗係人生重要轉捩點喇。其中引以為傲嘅事，就係主要家居裝修，都出自嚤囉仔之手。哈哈，呢尐功夫仔，一有機會就露兩招，傳統延續至今。
 |
| 彩園邨新頴設計 |
 |
| 到頂大衣櫃 |
事頭婆 1972年 派咗個高佬麥嚟做阿督，佢一行出慕蓮夫人號，走上皇后碼頭石級，就提出十年建屋計劃，令香港大部分人得到公營房屋照顧，真係大庇天下寒士俱歡顔。唔使十年，我有機會住入公屋，亦託麥督之福。兩年後，蔣家開枝散葉，彩園小居不敷應用。好彩高佬麥嘅居屋計劃，喺 1978 年就推出首批居屋屋苑，例如：柴灣山翠苑，何文田俊民苑，沙田穗禾苑 …。蔣家住咗上水兩年後，又沾到恩惠，搬入柴灣康翠臺居屋，擁有一間 747 呎，面對鯉魚門海港嘅家屋企。
 |
| 康翠臺天台 |
柴灣居屋，景靚風水好，大少爺、大小姐都喺呢度出世。男女主人升職加薪，雖然忙碌，但係晴天萬里，前景一片美好。咁靚屋企，點會咁快又諗搬屋呢？
原來晴天除咗可以萬里外，仲可以霹靂嘅。咁乜嘢係晴天霹靂呢？卒之，1989 年，畀你見識。都好嘅，講清講楚，費事諗埋尐唔實在嘅幻想。我北望神州 … 嘩 … 咁嘅欵，再回望香江 … 唉 … 感覺大限將至。我只係小小薯仔，何來有力正乾坤，睇嚟又係搬屋時候嘞。今次唔係上水搬落柴灣，而係北半球嘅香港搬落南半球袋鼠國第一大埠 一一一 雪梨。
九二年，心口掛個勇字，蔣家毅然搬屋南國。開講話：安居樂業，我就話要樂業咗先，然後至安得到居嘞。初嚟步到之際，人生又路不熟，喺盲公竹李小姐住處就近，蘭谷區，海倫街，租咗間 town house 住住先，咁都叫做初步搞掂安居問題，我稱之為袋鼠安居 A 計劃。期間，我就專心找尋樂業之道，進一步 BCD 安居計劃囉喎，咁大件事，就由阿珊一力承擔。
 |
| 第一間澳洲租住屋，慶祝大小姐 1 歲生日 |
 |
| 大少招呼同學返屋企玩，鬼婆係 ESL 英文教師 |
 |
| 香港玩具反斗城帶嚟嘅瀡豬仔 |
袋鼠國住咗年零，對附近地區都稍有認識，亦決心留低長住，咁就喺雪梨西北山區買咗第一間屋，此為蔣家袋鼠安居 B 計劃。呢間單層三房屋仔，座落小區車厘布祿，姬絲汀路第一號，仲有一個後園泳池仔，當然住得好舒服，嚤囉仔亦喺呢度，打下咗澳洲樂業基礎。
 |
| 澳洲買第一間屋 |
仲有仲有，喺正 1995 年一月廿五國慶日，蔣家四口正式成為袋鼠國公民。
 |
| 市長親自頒發入籍證書 |
隨住愈嚟愈樂業，仔女亦稍大尐嘞，對生活質素要求亦稍有提升，咁樣就發覺地方好似唔係幾夠用。對改善生活永不言倦嘅一家之煮，佢又策動安居 C 計劃：就係要一間更大、更新嘅雙層屋。
心水屋唔係話有就有，屋靚得嚟，地點又未必啱，得到有靚屋靚地，又唔夠錢買。如是者嗰幾年，不斷睇屋，不過都係靚屋難求。安居計劃總負責人長期蒐集資料，得知：買現成屋，未必係安居唯一途逕，其實係可以買地起屋嘅！以我哋香港見識，除咗如李超人等地產霸權，同新界鄕紳外，香港人好難可以玩得起買地起屋呢個遊戲。既然呢度有尐咁嘢玩，咁就唔好嘥咗大好機會喇。
目標改變，方法亦要隨之而變，唔再一味睇屋，專攻睇地，同埋去各區雲集所有大建築公司嘅 Home World，去睇起好咗嘅 display homes 嘞。其實，香港人去歐美加澳紐旅行時，都好鐘意順道睇下人哋尐 display homes，呢尐係流行旅遊項目，我哋都帶過不少朋友去睇。
自己先買咗屋地，再同建築公司揀定屋欵，即所謂 project homes，決定晒改動細節，就可以簽約入則動工。澳洲係成熟法治社會，一切有根有據，雙方明白權責，簽約作實，當中有公共條例監管，雙方律師保障各自權益，亦有保險公司保障各種可能發生嘅風險損失，只要事事留心，其實起 project homes 係幾安全嘅。
咁樣，袋鼠安居 C 計劃，就係買地起新屋喇。
 |
| 賣咗屋至有錢起屋 |
我哋唔係超人，冇乜銀兩儲備，要先賣咗屋至可以有錢起新屋。即係話喺新屋入伙之前，就要租屋住住先，所以，C 計劃就要有 C1、C2 兩個階段。C1 ，我哋喺附近一個叫 Beecroft 嘅小區租咗一間單層屋仔，一直住到新屋起好為止。
 |
| 租屋住住在先 |
 |
| 大小姐第一日返小學，其實叫 Kindy |
住喺呢間臨時駁腳屋嘅時空，都發生咗好多大事：1997年二月，大小姐入讀小學，我親自揸車送佢返學。第一次正式返學，梗係人生大事嚟喇。冇耐，大少爺亦完成小學階段。至於我嘅事業，補鞋舖已經全歸我名下，蔣家四人，五年來喺自己範圍各自努力，都算平穩踏上前進軌道。
呵！仲有，點會唔記得呢一幕：當我住緊呢間屋仔時，一個狂風暴雨夜晚，喺我嘅家鄉，米字旗緩緩落下 ……！哦！呢一日，終於嚟到。呢一晚，隔住兩個大陸睇直播，睇到半夜三更。唔知係唔係眼瞓，眼濕濕嘅？
據聞，東方呢粒染紅明珠，自盤古開天地以來，都屬於今日中囯中原汉人嘅祖先嘅，講到嘅歷史，大大話話都五千年。咦，可以上溯到周口店噃，橫掂口講口賠，認埋直立人做祖先都冇所謂喇，咁樣，「中华民族」呢個「自古以嚟」嘅招牌，就可以再推前 一百萬年。By the way ，就信你舊時祖宗真係擁有過，就可以天長地久㗎嗱？乜原來天長地久，就因為曾經擁有！真犀利。
一時感觸，講多咗，講返起屋：
用咗 13 個月，新屋終於落成，C2 計劃就係一間兩層高，三千幾呎紅磚屋。座落袋鼠國紐修威省堡壘山西敏寺路（唔係乜嘢威斯密士特）一幅八千呎屋地上。1998年4月正式入伙。
 |
| 新屋石屎地台，呢度係車房 |
 |
| 十三個月，起好間屋 |
時間唔等人，口水花一噴，呢間屋，乜就住咗二十年嗱！打破晒我倆以前所有住屋最長紀錄。二十年！喺呢個時空，可以發生幾多事！
二十年 … 就係由一頭黑髪，變到而家咁，差尐尐啫，就擔遮時可以無法無天。咁都好嘅，慳返尐飛髪錢，又令我去旅行時，養成買 cap 帽嘅嗜好。工作上由買舖做老闆仔，到執埋機器退休返屋企；由日日忙忙碌碌做到冇時停，到而家日日 un un 腳，鍾意去邊就去邊。講起嚟，真係有尐後悔，點解唔早尐退休？真笨。有得亦有失，此理千古不易，二十年精心調養出嘅小肚腩，就喺改造細胃行動中同時消失。子厚名言：「以彼易此，孰得孰失，必有能辨之者」，其實，又何需辨解，隨緣也罷。
二十年 … 大少爺由小學生變成老豆，另築新巢，開枝散葉。又擁有自己專業，成為雪梨民族社區婚禮業界一面大旗。而大小姐亦步亦趨，經歷大中小學路程，嫁為人婦仲做埋律政俏佳人。而一家之煮，秉持一貫，持家有道，創造有利環境扶助蔣氏家業蒸蒸日上，更督促指導其他三件成員，努力不懈做好本份。佢似佢老豆，係唔停得嘅人，趁住我 Motorola ，就即刻向專業出發，佢而家係有牌翻譯，又有調解專業資格，鍾意就返下工，鍾意又玩下孫 …。
二十年嘞，睇返轉頭，西敏寺路呢間屋，喺呢度，寫上蔣家歷史重要嘅篇章。
二十年嘞，又係時候，劃上一個句號，揭開新一頁紙，好等另一段人生道路，有空間寫上新篇章。
一家之煮定出短、中、長期期計劃，處理調配金融人力資源，並指揮監督各個行動細節。而我則發揮工蟻所長，喺遊歷四個斯坦，登山涉水，再闖袋鼠冰天雪地之餘，努力協調配合計劃順暢進行。咪以為天殘地缺，夾檔起上嚟，如虎添翼，計劃喺提出三周後，即時付諸行動！乜真係快成咁！
乜計劃？呢個就係蔣家袋鼠安居 D 計劃。
其實，而家只係喺 D 計劃嘅初期，有可能好似 C 計劃咁，係有 D1，D2 階段。總之兵來將擋，水來土掩就係嘞。有人叫呢尐策略做「摸住石頭過河」，并稱之為偉大創見！喂，ABC 嚟啫。「見步行步」，講成偉大設計！使唔使擦鞋擦成咁！
又講多咗。
無論計劃點樣走，重新裝修呢間二十年西敏寺屋，就係第一步。自家業餘眼光絶對唔夠班勝任，所以專誠聘請咗專業室內設計師，包辦全部裝修工程。工作包括清潔瓦頂、磚牆、室內磚地板；全屋內外包埋後園圍欄、 driveway ，全部油油翻新；修理好屋內外小甩小漏，拆低古老照明，換上時尚燈飾。將全屋舊傢俬柄埋，換上趨時傢具，務求令呢間屋換然一新，散發無可抗拒魅力。
執拾屋企，擔擔抬抬，係我之所長。正當油漆佬開工之際，就係我逐閒房拆櫃入箱之時。住咗二十年嘅三千呎屋，你估收埋咗幾多嘢呢？
樓下一入門口左手面就係書房，二十年前，擺咗兩套書枱書架，大少大小姐背對背各自修行。到大少爺入咗大學，已經好少用呢個書房，佢係學生會幹事，喺大學有自己辦公室。佢又有自己車，嗰時開始，唔返屋企食飯，唔喺屋企瞓，唔知成日去咗邊 … 已經係常態。佢有自己生活社交圈子，遇到乜嘢重大事件，都唔會出聲，自已搞掂算數。回頭睇，嗰段大學階段，應該係同屋企最疏離嘅日子。不過，書房佢嗰部份，都塞滿佢由香港幼稚院至大學階段嘅所有嘢。一張紙、一支筆，一疊筆記、一支BB彈槍 …，都係每階段成長嘅見證。雖然唔會再「有用」，不過我哋有地方，又點捨得唔愛呢？好，入咗箱，收埋佢。
大小姐從來唔理政治，亦冇乜興趣做學生會，最鍾意同朋友同學四圍去玩。佢好似我一樣，從來唔係點使做功課，所以亦好少用個書房，就算考試都係攞咗個 MacBook 坐喺牀。同阿哥一樣，入咗大學就有自己車，一早就躝咗街，夜孖孖又唔和幾時返。雖然書房唔用嚟讀書，但係貼滿 label 嘅書、寫滿字嘅一疊疊筆記就塞滿書架，擺到一枱都係。偶然打開筆記簿，發現充滿童真嘅隨寫圖畫，仲配咗好有意思嘅文字。亂書亂簿中亦夾集賀咭、戒指、耳環等小飾物，仲經常發現二十年來，唔知邊年邊日用過嘅刀义餐盒 …，都係每階段成長嘅見證。雖然唔會再「有用」，不過我哋有地方，又點捨得唔愛呢？好，入咗箱，收埋佢。
近幾年，呢間書房其實已經變成我嘅書房，MacBook、printer 、hard disks 都放喺呢度，好多次旅行設計行程，聯絡酒店，印簽証、住宿行程表，都喺呢間房進行。我用完嘅行程記錄，帶返嚟嘅地圖等，都放咗喺呢間房， … 咁都係我部份人生嘅見證。雖然唔會再「有用」，不過我哋有地方，又點捨得唔愛呢？好，入咗箱，收埋佢。
門口右手面係 formal lounge 客聽，牆邊掛咗一個銅線雕塑，草原上有四隻雀仔，自由自在，飛向南方。呢個雕塑，入伙冇耐已買咗，咁有意思，掛咗喺呢度二十年！用紙皮造個盒，收埋佢先。
 |
| Flying to the south |
沿走廊行人㕑房，經過 formal dinning ，印象中，二十年來從未喺度食過飯。飯廳擺嘅古老美式鄉村餐枱，大少未出世已經買咗。喺呢張餐枱上，都唔知做咗幾多次生日會、食咗幾多次溫馨飯餐，真係滿載甜蜜喎。佢跟住蔣家移民南國，同我哋一齊已經三十幾年。十幾年前有一次，飯枱上面天花漏水，原來冷氣出水部份有問題，搞到餐枱受潮漲起。保險公司出錢油過晒受潮嘅天花同埋牆身，順手仲做埋新地板。呢張餐枱歷盡蒼桑，忠心耿耿，收埋佢，等佢繼續服務蔣家。
 |
| 大少出世前已經有呢張枱 |
 |
| 帶埋嚟澳洲，用到今日 |
走廊盡頭右手邊就係廚房。現代家庭，廚房係屋嘅中心靈魂所在，係用得最多嘅地方。用咗二十年嘅 cooktop、焗爐，雖然仲用得好好，不過少少小小毛病，都梗係有尐尐嘅。而且廚櫃係二十年前嘅時尚設計，今日就顯得老餅喇。大手筆尐，幫佢嚟個大翻身。
廚房前面係 Family room，其實係每日食飯嘅地方。電視側邊擺咗音響櫃。乜話，LD player 都有，先鋒音響，變調卡拉OK mixer、大喇叭 … 古董陳列室咩？呢套音響係移民前買，當時想買太古城一層樓，落咗細訂。九零年前後，香港樓價發晒癲，業主反價係常態，佢寧願賠訂，都唔賣畀我。呢筆意外之財，就變成呢組音響。咦，膽機嚟嘅噃。全部掹綫，入晒箱喇。
樓下最東面，係特別起出嚟嘅 Rumpus Room，當年標準屋欵，並冇呢一個室，不過如果肯加多六千蚊建築費，就有個打得乒乓波咁大嘅活動室。最初真係擺咗張波枱。呢張波枱唔止用嚟打波，又可以做功課，大小姐喺呢度學長笛同色士風。佢又試過喺呢度幫學生補習，賺咗自己第一份人工。
 |
| 呢張波枱真好用 |
呢間活動室最特別嘅地方，就係東面嘅一幅牆，係用明口砌嘅磚牆，紅磚牆上掛滿蔣家家庭相，有我哋嘅結婚影樓相、太少爺大小姐嘅 BB 相、有學校相 …… 紀錄住每一個成長階段。其中有一張，上面係啱啱過咗三歲生日嘅大少，佢頭戴黃色頭箍，手揸住三角旗仔，上書 democracy ，呢一幕經常提醒我哋移民南國嘅原因。
活動室嘅入口都好闊，有兩道趟門。2002 年，李小姐嚟袋鼠國渡假，咁啱遇到延綿天雨，邊度都唔使去。蔣家糾集咗三四家朋友嘅細路，做咗場表演。活動室裏面就係舞台，我哋坐喺外面，趟門左右打開，就好似拉開舞台布幔。各細路使出渾身解數，鋼琴、長笛，紛紛出籠，大小姐嘅獨腳戲：賣火柴的女孩，感人嘅演出；大少反串做灰姑娘嘅家姐，笑到反肚 …… ，當年笑聲，好似仲係凝喺室內空氣之中。
細路大咗，仲邊得閒玩尐咁嘅嘢，波枱都摺埋，活動室逐漸變成阿珊寫書法練字嘅地方。二十年前，我哋特別設計嘅紅磚牆，今日，設計師話唔夠時尚喎，油漆佬就將磚牆帚上白色。咁樣睇起嚟，白色牆，又真係光猛尐，摩登尐。白漆可以遮蓋磚牆顔色，但係當日歡樂嘅一幕，仍然由磚牆透出，而且長留心中深處，咁就點遮都遮唔住㗎嘞。
活動室同 family room 各有一組玻璃趟門通向後園，後園係一個六、七米深嘅向南空地，其實好好用，可惜十幾年嚟都冇時間搞搞佢。2016 年初，我變身細胃總幹事之後，唔知手術期間，史勿夫醫生戚起咗我邊條根，跟住兩年，我做咗好多「第一次」。一六年尾，趁阿珊返咗香港，一條冷喺後園就起咗呢個 patio。我好鍾意坐出嚟，一坐可以坐成日。patio 有個多用燒烤爐，係我煑早、午餐嘅室外廚房。大小姐出嫁前，又兩次喺呢度 BBQ 大宴親朋，呢個 patio ，滿載歡樂回憶。「一手一腳造出嚟嘅，會唔會唔捨得？」又係傳道書話：放手有時喇。佛家話「捨、得」；身外之物，色相而已，留心中，足矣 ……，哈，仲有飛時卜填補老人痴呆缺憾𠻹：
個 patio 仲咁新，只需要移走舊物，擺上時尚室外家俬。最點睛當然係我砌嘅四頭燒烤爐加抽油煙機，咁呢個室外活動區，就夠晒 presentable 喇啩。
由樓梯行上二樓，左手面係 Games Room，其實係望前園向北嘅一個大㕔。論座向，呢度應該係全屋最舒服嘅地方。喺南半球，向北就係冬暖夏涼嘅位置。不過，要撐上樓上，咁就唔多就腳，所以唔係經常嚟呢度嘆世界。但係，佢畀樓上造咗一個好大嘅空間感，加埋樓梯位置兩層樓高嘅通天 Void ，前面一扇由地下上到天花，四米嘅高窗，呢個位置，開揚到不得了。冬天時，溫暖陽光由北面映入，坐喺疏化，飲杯奶茶，嘩，發達喇。可惜，二十年嚟，蔣家四口，各有各忙，喺呢度大嘆冬日陽光嘅時間，少之又少。得到而家，唔使開工嘞，但係又仔大女大，有自己世界，嘆冷天暖日，又係剩返我一支公喇。
 |
| 樓上活動室 |
四間睡房都喺晒樓上，向北嘅係大少間房，數下手指，佢住呢間房完成佢六年中學階段，入大學後，已經變咗冇尾飛舵，好少返嚟瞓，佢係蔣家第一隻離巢飛燕，計起嚟，佢真正以呢間房為家嘅日子，都大約係七、八年左右。睇返轉頭，一生人可以同仔女一齊生活嘅時間，其實唔多。過咗去就算，珍惜以後，來日見多尐至係正經。
 |
| 大少房 |
向東嘅一間房係大小姐嘅，窗口望住西敏寺公園仔，一望無際，非常開揚，唯一缺憾係睇住日出。每朝好早，就有太陽曬羅柚，後生女仔想瞓到黃朝白晏，唯有落晒窗廉，大被冚過頭。大小姐住呢間房，住足二十年。佢喺呢度完成大中小學，仲考埋律師牌，哈，仲嫁埋的𠻹。我提過，大小姐唔知點解咁忙，入咗大學後，就好少喺屋企活動，每日好夜至返屋企，一返屋企就入房瞓。所以我哋都好珍惜能夠一齊嘅時間。大小姐亦好識做，一有時間，都儘量陪我咃飲茶食飯，有時佢見我一支公坐喺 patio 食早餐，都會主動坐埋嚟哆兩句。大小姐，細細粒，其實好識做。
 |
| 大小姐房 |
大小姐不拘小節，忙碌起上嚟，衫褲鞋襪、耳環首飾、唇膏胭脂，書簿筆記，you name it ，揈到一房都係。大小姐唔鍾意畀人幫佢執嘢，我哋見到咁嘅環境，只可以做一件事 … 閂埋門。乜都見唔到，咪冇嘢咯。佢係第二隻離巢燕，到我卒之有機會入去執嘢之時，其他唔使講，我喺間房各個位置，收集咗至少 50 個膠水樽，有空樽，亦有半滿，又要咁睇，廿年都係幾十個樽，都係咁上緊喇。我又發現一樣嘢，原來鋪咗一、兩個 cm 咁厚嘅麈，都唔太難吸啫。我係執嘢高手，咁點難得到我，一兩日就清理妥當。
樓梯旁邊嘅一間房，放咗一張港式三人碌架子母牀，係大少出世後冇耐，喺跑馬地兒童家私訂製。呢張牀，大少大小姐 BB 時代都瞓過。三十幾年，佢都跟住蔣家攀山涉水，見證每個歡樂片段。佢好大張，我要將佢分拆好，至搬得落樓下，就好似我第一次拆牀，將佢喺柴灣運嚟澳洲一樣。
全屋最大嘅一間房，就係向南嘅主人套房。講真，同規模嘅屋欵，我未見過好似我哋呢間房咁大嘅睡房，亦係我哋揀呢個屋欵其中一個原因。主人房有個 walk in 衣櫉，一般起屋，都會包貼牆安裝嘅衣櫥掛衫層架。我哋就唔要，就擺咗三個大衣櫃。呢三個衣櫃，係三十幾年前喺太古城 Bif 韓國家俬買。 Bif ！好奇上網摷過，原來而家仍然存在。舊時用尐木料，真係好實淨，大大話話，呢三個衣櫃，又裝又拆咗三、四次，仍然堅挺。今後繼續服務蔣家，絕對唔係問題。
 |
| 呢張牀喺香港買 |
 |
| 張牀仲用緊，不過已經喺麥家 |
睡房最搶眼應該係古老美式鄉下木牀，同餐枱一個系列，都係三十五年前，喺北角環美家俬購買。咦，古老大牀呢？原來大小姐同占士有興趣做大牀新主人，而家已經移居麥生麥太之家。
成個樓上，設計師只容許留低三張牀及一個 Bif 大櫃，牀上用品及其他擺設都要重新配置。其他所有嘢都要消失。工蟻又要出動，將所有嘢入箱收埋嘞。
呢一日一早，我仲食緊早餐，設計師帶埋三件大隻佬已經喺門口。早一日，我哋已經將間屋執清，好似一幅白畫布，交畀設計師添上色彩。戴滿家俬嘅大貨車停喺屋前，大隻佬小心翼翼搬家俬落車，然後聽住指示，擺喺屋裏面各個角落。牀單被鋪，枕頭咕𠱸，設計師專業擺放，精心得嚟又顯得隨意，藝術得嚟又好家常，咁樣咪係 professional 咯。 Me me 擵擵，真係要搞成日㗎。
下晝三點，約咗攝影師，用個幾鐘頭，先至影得十幾張相，咁梗係張張沙龍。到下晝五點，又有另一位攝影師到場，佢專影室外，五點鐘到，係要影埋屋外黃昏環境。真係好認真喎。即刻睇相，又真係好靚，真係唔信我住緊嘅屋，打扮起上嚟，可以變到好似家居雜誌嘅示範屋咁樣。
至此，我哋西敏寺路呢間屋已經完成大變身。呢個世紀大棵蓆，就等待最重要嘅一刻。係乜呢？
未發生，講唔到，
再噏過
嚤囉仔
No comments:
Post a Comment