2018.11.06 離巢燕，老嫰齊飛覓新天。情難捨，舊物隨身繼續車。
for more photos :
for more photos :
離巢？邊個話係雛燕嘅專利。今時今日，老燕都得。
上集講到，住咗西敏寺路二十年呢間屋要大翻身，雖然我冇明講為乜，但係，你哋咁聰明，當然已經諗到我哋嘅意圖，就係 …… 賣屋！
其實，蔣家喺澳洲呢廿幾年嚟，兜兜轉轉，都做過好幾單地產買賣，不過，今次賣屋，都算係全新嘅經驗。咁梗係要寫低佢，等痴呆時睇返，都過吓癮。
今年八月初，我仲喺烏茲別克 Tashkent 四圍 Hea 緊，what’s app 收到最高指示 ：玩完好即刻返歸，因為，袋鼠國安居 D 計劃，正式展開。原來一家之煮，喺我快樂不知時日過之際，已經聯絡咗地產經紀。之後，並且跟隨佢嘅指示：整靚間屋，務求以最佳價格，快速甩手。西敏寺路舊居裝修，以及由此引起嘅回憶，經已喺上集詳述。
你咪以為匿埋喺袋鼠國，世界政治就唔関你事。年尾，「侵侵」大力向遠東強國説不，美國國策影響神州經濟，少咗強人資金，唔正常上昇嘅澳洲屋市，馬上回復正常，即係話：袋鼠佬要賣屋，未必一定咁快可以賣得出喎。無論如何，我哋個 D 計劃已經啓動，蔣家個個好硬頸，頭也不回，向前邁進喇。
根據策略，裝俢妥當後，攝影師嘅沙龍相，連同詳細物業介紹，就登喺雪梨物業期刊同埋地產網站，公告天下。我哋再定出，跟住嗰四個禮拜內嘅每個星期六日，總共開八次 open home，等準買家可以實地欣賞到西敏寺屋點靚法。而第五個禮拜六，就舉行公開拍賣。不過，如果有人喺拍賣前，出一個令人無法抗拒嘅價錢的話，我地絶唔會 say no 喇。
自從九月十五開咗第一次 open home 後，市場反應正面，各準買家亦開出價錢以示誠意。卒之係拍賣前三日，透過荷蘭式拍賣較勁，西敏寺屋成功易手，七個禮拜嘅努力，總算得到合理回報。
西敏寺屋順利賣出，租返嚟嘅 display 傢具，就即時還返畀設計師喇。間屋吉成咁，最啱就係開 party 嘞。一家之煑好快組織咗三個 parties ，主要目的，就係同呢間屋講聲拜拜。
安居 D 計劃，順利踏上 D1 階段。總指揮隨即馬不停蹄搵屋租，同時安排搬屋。因為只係臨時駁腳屋，咁就冇乜特別高嘅要求，只要夠地方擺晒舊屋尐嘢就得嘞。唔使兩個禮拜，我哋睇咗三幾間屋就落槌，呢個臨時新居，就座落雪梨大西北新發展區：家利圍。
繼大少爺大小姐相繼離巢，呢間二十年前親手策劃建造嘅西敏寺屋，亦完成服務蔣家嘅歷史任務。而我哋，喺大致滿足上天交落呢瓣「承先啟後」嘅任務後，兩件老燕亦係時候離開舊居，另築新巢，享受另一階段人生嘞。
搬屋，從來都係一件煩事。摷起晒全屋家當，分門別類裝箱，運走再擺返好，個中滋味，毋須細表，人人明白。
十月最後一日，請嚟四位大隻佬加一架大 box truck，走咗三轉，由上午九點搬到夜晚十點！打破咗各位大隻佬最長搬屋時間紀錄 …… 。睇住擺到通度都係嘅雜物，呢個念頭，就油然而生 ：其實，兩個人，使唔使咁多嘢？記得 2012 年，我去古巴，途經倫敦，喺特拉法加廣場，睇到流浪者抽住幾個 carrier bags 喺 street of London 驣嚟驣去。唔好笑！我哋喺行為上、心態上，同呢班流浪者，其實冇乜分別。有尐人拎著成屋飛甩雞毛、阿貓泥；又有尐人，成身掛住大代政協、乜勲章物勲章尐咁嘅 label ……；一生負累，同 the old man in street of London 又有乜分別呢？咁我都唔好得好多，孭住一生足跡回憶，唔捨得！唉！都係一擔擔喇。
大隻佬十幾粒鐘，將最辣嘅嘢塞晒喺家利圍呢間駁腳屋仔之後，我呢隻工蟻將家當簡單分類，再抽出常用嘅嘢，例如廚厠、日用衣裳等備用，咁， D 1 計劃，就初步大功告成嘞。
至於，喺家利圍呢間屋仔住幾耐，就視乎 D2 計劃進行成點喇。咁，D2 又係乜傢伙？又係嗰句 ：拭目以待喇。
真係冇時停，搬屋唔夠一個禮拜，我倆即飛香港。阿珊要搞返掂舊年 Whanchai big fall 嘅一尐手尾，而蔣氏老家又有尐家事要辦，借尐意留港一個月，咁又點會錯過同老友飲茶吹水嘅機會。咦，台灣又大選喎，香港人恨唔到，睇下都好吖。好，又嚟一次台灣環島！哈，今次唔係 solo ，犀利嘞，有至愛同行，行孖咇。
美麗島，我哋嚟嘞。
再噏過
嚤囉仔
No comments:
Post a Comment