2018.12.31 雨失魂，雪梨橋底兩頭䠮；似尋親，三十九年終現身
睇相可入飛時卜
老土都要講呢句：嘩，咁又一年嗱。
今早嘅早餐，再唔可以喺我親手整嗰個 patio 食嘞，因為，佢已經明花再有主喇。住咗 20 年堡壘山，而家已經搬咗入雪梨大西北新發展區，呢個叫「北家利圍」嘅住宅小區。地點唔同，早餐都冇變，仍然係咖啡煎蛋、番茄仔配牛角麭。冇變嘅仲有我手多多嘅本性，就喺屋出面嘅小小天地，裝咗個帳蓬。食完早餐，點起蚊香，就安坐帳內嘆咖啡、睇 i 報紙。
除夕，出城睇孤獨煙花，係每年嘅必備節目，今年都唔例外。出城，最好搭火車，由屋企揸車去最近火車站 Schofields ，再搭火車出城。記得我初嚟步到之時，Schofields 絕對係鄉下地方，廿年後，呢度已經成為雪梨大西北新發展區。隨住地鐵系統伸入西北，Schofields 及隣近地方，大興土木，到處都係由草地、叢林、田野開拓出嚟嘅屋地。而家係下午三點幾，車站附近大把車位。泊低車，火車就停喺站頭，跳上車，出城咯！
去雪梨 Wynyard 站，都要成粒鐘車程。由月台行上佐治街，記得舊年仲圍晒板做緊雪梨輕鐵工程，而家近岩石區 The Rocks 呢一段已經鋪好路軌，拆晒圍板之後，由車站行去雪梨大橋底，比舊年輕鬆舒服得多嘞。一如以往，喺正大橋底搵笪草地，我鋪好膠布坐低。
Solo 睇煙花要帶備飲食，我帶咗乾牛河同埋炒飯，身為細胃總幹事，就算午餐、晚飯加宵夜，都已經足夠有突。其實 solo 都有個難處，就係出口問題。霸咗靚位，就唔捨得起身，要成十粒鐘唔可以去方便，對肌肉嘅耐力，都有尐要求，當然儘量唔飲咁多水，都係重要策略之一喇。
究竟煙花有幾好睇，我已經寫過晒，大家可以摷返我舊年嘅回顧嚟睇。今年？睇樣都差無幾啩。正喺無所事事之時，趁住一年將盡，最好就係擰返轉頭，快速回帶，睇下今年做過尐乜先。話說 ……
喺正戊戌大年初一，蔣家大小姐喺雪梨紐省最高法院，宣誓成為執業律師。跟手已經喺律師樓返工，專做 family law case。因為係年青律師搞嘅細行，咁就乜都要做，出入法庭就係日常工作。每次家庭聚會聽佢講佢嘅工作經驗，都非常有趣。睇個樣，雖然工作忙碌，每日都早出晩歸，不過，佢就得到好大工作滿足感。咁，我都安樂晒喇。
五月，大小姐同占士拉埋天窗，變身麥太！2018 呢一年，都係蔣大小姐人生重要嘅一年喇啩。按俗例，老豆又要喺婚禮噏嘢，初初諗：又要噏雞腸！真煩。諗深一層，邊個話一定要雞腸㗎？ 喺個箱外邊諗計：呢件係蔣家大事嚟，梗係用母語：港式粵語！「唓，九成賓客係講鬼話噃」！你定，我自有辦法。
今日，蔣大小姐同佢夫婿仲喺日本過年渡蜜月，我都回顧下，呢一年，我又去咗邊：
記得冇？一七年最後一日，我出重槌買咗架山地單車，其實係為咗今年兩個單車旅行做準備。打響頭炮，係為期一個月嘅農曆新年台灣之旅。台灣人，除咗想世人尊重佢哋擁有獨立主權外，仲有三個願望：登玉山、橫渡日月潭，同埋單車環島。三月，我就參加咗一個九日單車環島團。橫掂嚟咗台灣，冇理由齋踩單車，所以早兩個禮拜已經飛台灣，用十二日，先火車順時針環台一周。其中停花蓮，探訪呢個震後小城，再落南端重鎮…高雄，然後北上嘉義，入阿里山四日，再落返嘉義睇全台灣最大燈會，真係大開眼界。跟手搭台鐵返台北，咁就完成火車環台呢單嘢嘞。
喺台北練兩日車，就正式環台。單車環島呢件事，其實已經諗咗好多年。遲遲唔郁係有兩大憂慮：其一係要有一日 130 公里嘅能力，其二係駕馭蘇花公路嘅能力。經過一七年印度單車之旅， 一日百三公里，我係 OK 嘅。至於蘇花公路，我唯有相信單車領隊嘅能力。結果，九日成功單車環台，呢單嘢，當然會寫喺我人生記事簿上面喇。
一個月台灣行，梗係要多謝老友照顧。這廂謝過了。既然有老友長駐台北作支援，環島又咁過癮，幾時再車多轉？
嗱嗱臨離開台灣，就趕返屋企參加大小姐婚禮。喺雪梨屋企又唔夠一個月，六月中，喺雪梨機場又見到我嘞。
今次主要目的地係中亞四國（冇咗土庫曼），因為要攞烏茲別克簽證，所以要專程飛去首爾，既然如此，順手就喺韓國玩佢一個禮拜。除咗首爾外，我搭 high speed train 落光州。點解光州？去實地了解下光州事件嘅始末囉。唔通去喪買喪食咩，我？
每處留三數日，都真係得到韓國嘅大概嘅。佢好易遊，係值得返尋味嘅國家。今次仲去咗板門店 DMZ，可惜噚噚同肥仔金有嘢傾，入唔到三八線會議大㕔喎。下次喇。
中亞，當然係令人神往嘅地區。佢地處東西文明嘅中界，政治、歷史，人文、社會 … ，陌生得嚟，又好似同我哋熟悉嘅中原文化，有好大牽連。加上成百年共產鎖國，總之就係神秘喇。
今次一個月中亞之旅，有兩個主題，其一係山地單車 mountain bike trip，就只喺哈薩克同吉爾吉斯兩個斯坦活動。我提過舊年尾買嗰個單車，就係預備呢個 trip 嘅，可惜都只係練習過幾次，叫做好過冇咁話喇。呢個 trip 其實唔易，山路、碎石路、勁斜坡路 … 根本唔容易踩。喺上到四千幾米高海拔踩車，我又未試過。其實參加呢個團，我都係膽粗粗就去馬，正因為呢個單車團嘅高潮所在，係兩日直升機載單車上高點，然後再踩落山。第一日 Heli-biking，我根本踩唔到，全程一仆一碌。而家回想，我其實唔係幾夠班，實在係有尐危險嘅，一個唔該，絕對有係咁先嘅可能。好彩，我係完成晒全部車程，都算唔錯喇。咁樣難度嘅 trip，我相信我唔會再有能力去多一次，所以我慶幸我玩過。 我可以講：I have done this！又引證和成日掛喺口邊嘅說話：玩得就去馬，唔好等，出年你唔會 fit 過而家㗎。
踩完單車又再喺哈薩克開始過，今次加埋塔吉克、烏茲別克，一共四個斯坦。大漠草原，就係中亞嘅招牌，全程四驅車喺茫茫大漠奔馳。之前嗰十四日單車，係同大然融合，呢兩周就係體會人文歷史。
中亞呢四國，睇到佢哋已經逐漸開放，但仍然感受到，遊牧民族嘅單純、自然嘅一面。而家海外遊客仍然唔多，我地喺條街四圍行，好容易惹到人同你傾偈；識英文嘅後生仔女，亦愈嚟愈多。其以十年八年，一定有好大變化。又係嗰句，有得去就好快尐去，以後會變成點？邊個知道。
就喺茫茫大漠中，收到一家之主煮嘅最高指示：決定賣樓，進入袋鼠國安居 D 計劃。八月八號返雪梨，八月十一號就執屋開始裝修。正在勁綵 turbo 進行賣屋計劃，點知噚噚開炮強攻亞洲大国，袋鼠地產亦應聲回軟。好彩一家之煮行動迅速，由開始決定賣屋，到成功賣出，只係用咗兩個月時間，其中用咗三個禮拜裝修，五個禮拜開放參觀，絕對係奇妙速度。喺呢兩個月內，我仲可以去咗兩次滑雪，最後嗰次仲裂咗左邊三條排骨𠻹！真係可以快成咁。
屋又賣咗，唔可以無家可歸㗎，咁就啓動「袋鼠安居 D 1 計劃 」…… 租屋暫住喇。兵貴神速，一家之煮由賣屋至到搬入新屋，只須 20 日！
話你都唔信，搬咗屋六日後，我兩件嘢帶埋小孫女飛返香港。今次會離開雪梨屋企足足一個月。其實個主菜，係要搞掂一家之煮，佢一七年喺香港 big fall 嗰單嘢嘅手尾。手術安排喺十一月尾。托賴，一切順利，仲即時感覺到活動能力真係好咗，咁真係要感謝百多年剩落嚟嘅香港醫療系統。
咁遠水路返香港，梗係要趁機去玩下。喺手術前，我倆去咗台灣一匝，我用我年初環島嘅經驗，再走一趟，又係火車環島，真係駕輕就熟喇。話時話，我倆咁樣孖咇去旅行，對上一次，已經係大少爺出世，三十幾年前嘅事，犀利！
今次雖然離家一個月，可惜都唔係好夠時間會友，好多老朋友都未能一見，憾事也。好開心嘅係，見返四十年前啱啱畢業教過嘅第一班學生。佢哋對我嚟講非常特別：我連續教咗佢哋三年/四年，此後，我未有教一班超過兩年；我係佢哋中一至中三嘅班主任，教佢哋中文科，離開呢間中學後，再冇做過班主任，唔好話再冇教中文，連 入課室教學都冇喇。
見返面後先知道，原來成四十年來，佢哋一路都摷緊我。佢哋話：見到人哋班班 reunion 都有班主任，但係 C 班就 ……！真感動！即刻建立聯繫網路，以後，多尐見面嘞。
十二月初，帶返小孫女返雪梨。即刻搞埋西敏寺屋嘅手尾，終於，十二月十日正式交吉，真係一個時代嘅終結，係一個好大嘅句號，而且仲係一個色彩繽紛、近乎完美嘅圓滿句號。
十二月！係執屋月，成屋堆滿一箱箱家當，打開裏面，滿戴回憶。打開一個箱，嘩，有老豆老媽子一九五三嘅「米証」，仲 keep 到而家！哦，乜原來嗰時糴米要配給嘅咩？真犀利 ……
……
整乜嘢？大大粒嘅水，兜頭淋過嚟，我由甜蜜回憶返返現實。個天黑晒，仲行雷落雨，人人都四圍䠮搵碇避雨。咁嘅款，我撐起雨遮收拾細軟，走頭喇。
2018 年除夕，睇唔到煙花，敗走雪梨大橋。我好識自我安慰，今年一定係成功嘅一年，因為失敗乃成功之母吖嘛。
再噏過
嚤囉仔
