2019.04.23 話之你牛一，真相紅毛泥冚實；天機冇洩密，時到就知得唔得。
睇相，可入 ：
自從有飛時卜，每當牛一之日，我都唔會客氣，喺度恭祝自己生日快樂。今年 4．15，居然冇貼生日相！點解？因為守緊一個大秘密吖嘛。話說 …
舊年六月至八月，我喺南韓及中亞快活緊之際，一家之煑安坐雪梨家，正在策醞釀大革命：就係實行蔣家袋鼠國安居 D 計劃。旅行之後，由住咗廿幾年嘅雙層舊屋搬去租住屋暫住，稱為 D 1 計劃，亦已經喺 一八年尾做咗。跟住嘅大秘密，就係：乜嘢係 D 2 計劃呢？
因為啱心水又啱銀両嘅屋好難買到，所以一家之煑花咗好大心力去搵屋地起屋，大大話話呢兩三年，一有時間就四圍睇屋地，有尐甚至已經落訂，不過基於種種原因都一一告吹。直至年尾，睇中西北新發展區一處叫 Marsden Park 嘅大型 Project，隣舍環境都唔錯，附近全部係全新屋及新平整好嘅屋地，住嘅以中產年輕小家庭 為主。因為要遷就小家庭有限嘅經濟能力，屋地就切到好細，主要係三百米左右居多。屋地細，就意味住得逼夾。不過，咁細屋地，又點啱我哋起單層大屋？
一日，發展商職員，居然喺芸芸細地中，幫我哋搵到一幅八百幾米嘅扇型屋地。八百幾米，可以起一間 size 唔錯嘅主屋，仲再加一間獨立嘅 Granny flat。容許同一屋地再加建 granny flats ，其實係各市地方政府嘅折衷用地政策，最初原意係起畀家中
公公婆婆住，方便後生可以照顧。不過今時今日， granny flats 多數用嚟出租，幫補家計之用喇，租住嘅大多都係冇乜經濟能力嘅後生家庭，又或者初出道、大學生等，市政府為咗舒緩房屋需求，都隻眼開隻眼閉算數。
搵到心水大地，唔使多諗，即刻畀錢。
賣地中心旁邊就有好多 project home builders 嘅 show houses，做好功課，揀定有信心嘅建築公司，再揀定合心水嘅 project home 屋款，喺幾個月內，來來回回、加加減減圖則設計，再選定全屋上上下下，裏裏外外嘅物料、質地、尺寸、顏色 ……，所有嘢，都係用時間心血搓成。卒之，喺年尾，一間䚍靚單層屋，旁邊仲有一間唔錯嘅 granny flat ，就出現喺圖則之上。屋外一磚一瓦，屋內門窗水喉潔具一一確認。跟住落嚟，就係最重要嘅一步 ：簽約授權、入紙市政府申請動工，即所謂入 DA ，development application 嘞。
我一路都以為條路就係咁行嘅喇，同所有朋友講起，我都話，係吖，我哋預備起屋，入 DA 批咗就動工嘞，咁講嘅。
畀你咁易估到，又點算係多姿多彩嘅人生？
原來一家之煑心中嗰條刺，從來都冇掹到出嚟。係乜？project home 新居嘅設計，唔可以講百份百合晒心水，但係，已經算係喺能力中做到最好，亦非常滿意。條刺就係：我哋係八百米大地，不過周圍都係兩三百米細地。造成既效果就係要同九至十間屋有共同籬笆 fence 。扇型地有好大嘅後園，呢幅地嘅後園夠起一個十幾米長嘅泳池！本來係好大嘅優點，不過，當你攤喺度晒太陽，十間屋都睇到你，而且，細屋地只可以起雙層屋！居高臨下睇晒！我就一尐所謂都冇，不過，佢囉喎 ……
咁梗係好大條刺喇。
雖然離簽約入紙起屋只係半步之遙，一家之煑對搵靚屋呢團心火從未降溫，可能心中嗰條刺幫呢團火加柴升溫，愈燒愈旺。佢無時無刻揸住 iPad 就睇雪梨地產最新情報 ……。咦，都就嚟起屋喇，仲睇乜啫。「你咪理喇 …」佢話。
卒之 …，我唔講喇，大家睇下呢兩篇文喇。
眾新聞 link
早喺年初，我冇諗過咁快又要搬屋。搬咗去暫租屋住咗都唔夠五個月，就可以搬入新屋，實現袋鼠安居 D 2 計劃。既可以快快入住新屋，又可以慳返一年租金，咁樣實在係好事喇，梗係要大大感恩。當然喺感恩之餘，點可以唔佩服一家之煑，佢嗰種追到底都要捉到最好嘅精神。哦 … 每次照鏡，都覺得自己係獵物，怪唔得喇 。
既然計劃改得咁突然，我就趁機玩吓嘢。買屋嘅事就上升為最高機密，除咗屋企人，對外照講：起屋繼續進行，其實想畀大家有個驚喜。
點樣請朋友返屋企，而又唔講係 house warming ，就變成焦點所在。間屋交吉係三月尾，隨即着手螞蟻搬屋，喺搬屋公司大隻佬出動前，先將細件可以自己處理嘅嘢，逐少搬走，同時組識兩個 surprise parties。藉口係幫我慶祝生日，同埋結婚週年。其實如果心水清，就知有景轟。第一，除咗同家人借尐意聚聚，同埋砌蛋糕留個紀念外，我幾時試過做生日咁巴閉請朋友慶祝？第二，結婚周年係二月初，三月尾嚟慶祝？有尐牽強噃。不過，馬照跑，舞照跳，party 就繼續開。
兩個 party 隔咗十幾日開，亦終於完成，surprise 呢個原素，亦順利成功演出。大家都玩得好開心，亦唔怪我兩件嘢，百厭搞搞震呃人。不過，個副產品就係我嘅生日相唔可以即時貼上 ……。
仲有仲有，騙案情節中，唔可以一早講屋企地址，就叫人去附近高球會等，話 party 會喺高球會開，個個人以為 eat out ，於是 … 我就收到唔成比例嘅厚禮，我面皮雖然厚，其實都有尐尐唔好意思嘅，不過，財到光棍手，點會有回頭？各位受騙苦主，下次帶兩梳蕉嚟舍下，𩟔餐勁，補返數。
好嘞，今日，就係穿橋嘅日子嘞。
噓，唔使講大話，舒服晒。
No comments:
Post a Comment