自從邊度都唔使去嘅日子到嚟，原來最好就係打理屋企。蔣家喺舊年開始搬嚟搬去，年幾兩年，就係搞緊屋企嘢。而家睇返轉頭，果然預兆咗有呢一日。
哈哈，世事唔只話「點到你估」，原來仲鋪咗條路過你，就睇你對眼有冇珠，又或者你個緣有冇份，同埋夠唔pop 行得落呢條路啫。
唔止蔣家大本營（即係我屋企），大少一家三口，啱啱至搬定新屋。兩三個月前，因工作關係，大少焗住要搬，仲要搬埋新士多房、新舖頭⋯，絕對係一頭煙嗰隻。
平時，照計劃，呢個時辰，我已經漫遊緊世界唔知邊一忽喇。咁樣臨時臨急要搬，我可能幫唔到手喎。好彩（？）爆咗呢件共業病毒，咁就留咗我喺雪梨。我呢個老豆咁handy ，so far ，仲係冷氣機都托得起，幫手搬粗重嘢、擒高擒低，補窿揼釘⋯總之無所不為喇。
前幾個禮拜，卒之入伙大吉。你話，係咪整定呢。仲有，大小姐又到達人生另一境界⋯哈哈哈，要置新巢。回想佢同占士個婚禮，六角蜂巢logo ，係宴會主軸。而家時機成熟，係時候，要落手落，積極將理想變成現實嘞。
大小姐每日忙於喺個MacBook 法庭，用視象，同佢個honour 大老爺斟世界、拗手瓜，咁多formality 要兼顧，仲邊有時間，理埋呢尐瑣碎嘢。又好彩（？）兩件老嘢焗咗喺雪梨，邊度都冇得去。兩手揈揈，大把時間，最啱同地產佬纏鬥嘞。又財務、又法律⋯總之濕濕碎碎一大堆。而家，密鑼緊鼓，設計緊進駐佢哋嘅新巢嘅步驟。兩件老嘢，又等call 囉。
一日，去完買餸返屋企，行入門廊porch ，預備開門入屋，有兩條光影由頭頂略過，嗖一聲，飛出門廊。嘩，好快！即刻回頭，由門廊向街望。原來兩隻燕子喺我屋前草地上空打圈盤旋。
燕子出晒名擅飛，速度快，敏㨗，短時間起飛、急停、轉彎抹角等acrobatic skills ，人人知曉。
雪梨，而家正值春天，係燕歸時份，屋企附近，到處都見到呢班空中雜耍專家表演。我家門廊牆角，成日黐住尐不知名嘅昆蟲，啱晒佢哋口味，呢排，間唔中都見佢入嚟叼返幾隻，見慣不怪嘞。
不過，今日有尐古怪。以前佢叼咗蟲仔就走頭，今日，佢哋喺外面唔飛遠，好似又想飛返入嚟咁款，不過，見我哋仲喺門口，所以一路兜圈，唔敢飛入嚟。岳高頭，門廊右上角有幾笪泥，仲零零丁丁吊住幾條枯草。我咁醒目，一睇就知。哦，原來呢兩隻嘢，就喺我家門前造緊竇！即刻開門入屋，唔好阻住工程進行。
入屋即刻要認真諗諗，係唔係要接納呢對新住客呢？因為，如果唔想，就要早尐郁手喇。一來，點可以浪費人哋嘅心血。大佬，起一個雀竇，要用千二至二千粒泥丸仔mud bead ，每一粒都用燕子口水撈埋乾泥搓成，真係𦧲口味水都𦧲到口乾；再者，到臨盆至冇咗個竇，咁你話幾淒涼。
仲有，根據澳洲Department of Environment, Water and Natural Resources Animal welfare 指引：“Remember that parent birds can’t just pick up their babies and move them to a new nest site. “It’s an offence under the National Parks and Wildlife Act 1972 to destroy the nest of a native species if there are eggs or baby birds present. 咁即係犯法㗎。
當然，由細到大，認識嘅華夏傳統都認為，家燕來訪係好事。但係，雀竇對落牆身、地下嗰尐林審嘢，就要經常清理嘞。不過，回心一諗，前一年，我哋就搬咗兩次屋；上個月，大少啱啱搬完；呵，冇耐，大小姐又話搬！原來廿一世紀二十年代伊始，就係搬屋黃金時期。家燕而家都嚟埋，人哋用一家大細嘅前途命運嚟助慶，我點可以拒絶。好be my guest 喇。
既然立定主意，咁就多尐留意下佢虵個竇工程進展如何。根據觀察，佢哋只喺日間開工，不停來來回回叼泥黐上牆。一隻做緊，另一隻又會企係門鐘上，離遠觀察，好似做緊building surveying 咁款。大約兩個禮拜左右，一個似模似樣嘅竇口就懸掛喺門邊磚牆上。
睇咗咁耐，我有一個問題：佢哋喺造好個竇之前，究竟住喺邊度？係咪好似我哋人類咁，結婚前，咪就係繼續住在喺父母屋企呢？
咁大嘅難题，即刻問下谷歌大神。哈哈，世紀大發現。
好，而家逐一拆解：
燕詩（我，滾瓜爛熟，而家仍然成首背得出）都有講：⋯「卻入空巢裏，啁啾終夜悲」⋯。又有所謂「空巢一族」。講嚟講去，巢，就係屋企。有咗呢個大前提，就有頭先嗰個問題：個竇未起好，佢哋住在喺邊？
答案係：個「巢」nest ，根本唔係「家」，而係一個「育嬰室」。主要用嚟生蛋、菢蛋、餵雀仔，直至自立就可以離巢。注意：「離巢」，只係離開育嬰室，但絕對唔等於「離家」。
既然有咁特別嘅同屋住，一於燕肉大起底。各位觀眾：燕燕的故事：
除咗南極，全世界都有燕子，已經有達爾文嘅自然選擇論，解釋因應環境不同，各種燕子亦大異其趣。呢度，只講我嘅同屋燕：
Welcome Swallow 係佢哋嘅俗名，學名叫Hirundo neoxena （鬼理個咁嘅名咩）。當然即刻喺網上再摷佢嘅中文名，但係只搵到「喜燕」。乜咁似唐餐館㗎，我唔多鍾意。再者，英文叫慣welcome 。我諗：喜迎燕係咪好聽尐？(咦，喜盈，又如何？）
佢哋係澳洲士著物種native to Australia ，即係有人類之前，已經住咗喺紅土大地。咦，佢哋至係自古以來，紅土大地嘅主人喎，咁講，係佢哋讓笪地方畀我住至真，公道尐，分清莊閒好喎。燕子唔收澳幣，咁，我幫佢掃雀屎當交租嘞。
再講一次，巢nest ，唔係家，而係育嬰室。喜迎燕係群居嘅雀仔，冇人類所謂「家」嘅概念。勉強類比，佢哋嘅家，其實係一笪搵食、休息、生活嘅範圍，叫做roost 棲息地。好嘞，而家要解答第一個問題：喜迎燕喺邊度瞓覺？
因為畀個巢誤導咗，以為去個巢就係返屋企，咁，就喺個巢度瞓覺，就係最直接嘅答案囉。錯錯錯！佢哋喺棲息地，邊度都瞓得。樹枝、石上、電線桿，總之感覺安全就得喇。
一群雀一齊生活，就係棲息族群gregarious flock ，喜迎燕族群可以去到成百隻燕子，佢哋一齊嚟，一齊生活，互相照應。到有一日，又會一齊走頭。燕子巢，雖然本身唔係家，但一定喺棲息地範圍內。
巢要嚟生蛋菢仔，所以一定要好安全。雀蛋，係美味食物，而燕子BB出世時又盲又光禿禿，點樣至唔會畀其他動物食咗，雀巢嘅選址就好重要。
如果個巢起喺樹上，其實好危險，大隻尐嘅食肉雀，例如鷹、烏鴉，都好容易襲擊樹上嘅竇，如果有蛇爬上嚟，咁仲死多兩錢。而家，個竇起喺我屋企門廊上角，遮風擋雨避太陽不特只，邊會有蛇呀，貓呀爬上我牆？大鳥亦唔敢飛咁近人家。當然十分安全喇。
有人話：「我真係見過燕子喺個竇瞓覺」。大佬，開工都會瞌下眼瞓，有時喺個雀巢側邊休息下，又或者一路菢蛋，一路閉眼唞下又得，總之，真正瞓覺，就一定喺棲息地。最好嘅棲息地就係冇天敵，又多嘢食嘅地方，可以係草原，可以係水邊。而我屋企，根本就喺一個十八洞嘅高爾夫球場中間，周圍都係草地及矮樹叢。因為亦係民居，所以燕子天敵都唔敢太放肆。呢度，就係喜迎燕安全嘅棲息地。
佢哋係飛行高手，擅長追住飛行昆蟲，而且即刻喺空中食埋。咁犀利嘅開餐技術，要靠佢副尊容嘞，佢好似陸小鳯，嘴邊有兩撮鬚，高速飛行撞埋蟲仔度，再擘開佢個又大又闊嘅口，蟲仔就順住條鬚，瀡咗入口，冇得走！佢哋仲有一個耍家技術，就係一路貼住水面飛，一路擘大口飲水。
用咁多能量飛行，佢哋好大食，每日要食400 次嘢，平均兩分鐘就要開餐，真係奉行小食多多多餐，犀利過我呢個細胃總幹事好多。計埋數，每日嘅食量，係等於佢自己嘅體重。真係好𩟔得。
喜迎燕係澳洲原生鳥類，只會喺澳洲同埋附近離島搵到，直到1900年初，開始有部份移民去咗紐西蘭。冇錯，喜迎燕係候鳥，不過唔似北美洲，有尐燕子飛到去阿根廷咁遠。秉承澳洲夠hea 嘅傳統，佢哋飛嚟飛去都喺澳洲範圍，只係睇住氣候，南北來回咁飛而已。燕子冬天飛走，唔係怕凍，而係天冷冇乜蟲食，佢哋係追住尐蟲而飛嚟飛去啫。
話說：幾個禮拜前，燕子仔仔喺高球場上空邂逅燕子妹妹，佢用高超飛行技巧俘虜靚女嘅心，既然情同意合，亦毋須徵得雙方家長同意，即刻拉埋天窗。首要大事，就係要造個竇，於是⋯⋯，就發生開頭我所寫嘅故事嘞。
呢兩件「翩翩雄與雌」，非常勤力，我匿埋喺架車靜靜昅住，佢哋五分、十分鐘就返一轉，叼著泥、叼住草，黐喺嗰竇就走頭，又做第二轉。呢十幾日，「銜泥兩牆間」，個竇已經幾睇得下。
據估計，下一步就係生蛋，不過唔係一次過生晒，而係每一、兩日就生一隻蛋，平均，呵，真係⋯⋯「一巢生四粒」。其他地區嘅燕子，有可能雌雄輪流菢蛋，但係喜迎燕，就淨係阿媽先至菢蛋，阿爸就繼續揾食。如果，有時菢菢下，阿媽行開行埋，離巢一陣，阿爸又會幫手睇住竇口，不過就絶對唔會坐入去菢埋一份。
咁勤力造個巢，個個都會認為，個巢係呢對雄與雌嘅私產。好似保險波話齋：收成期，咪搞我個竇好喎！卻原來，巢係可以共用嘅。佢哋用完，同族群嘅其他燕子亦可以再用。再誇張尐，如果有燕子生得少，例如生得嗰兩粒蛋，横掂個巢咁大地方，住得唔好嘥吖，其他燕子又可以用嚟生蛋。哈，鴛鴦蛋喎，咁，邊隻負責菢先？哦，新嚟新豬肉，遲嚟就付出養育之恩嘞。
其實燕群嘅「家」，係「大」嗰個家，原來，孔夫子禮運大同世界，真係有㗎：「不獨子其子」吖嘛。仲有，如果不幸，有乜冬瓜豆腐，巢中幼燕成為孤兒，同族燕就會負起照顧責任，將孤兒養大。咁咪即係「鰥寡孤獨廢疾者，皆有所養」囉。咁嘅高尚情操，人類就齋噏咗二千年。而燕子世界，禮運大同，就好似陽光空氣咁自然，點到你唔服？
阿媽菢咗兩個禮拜蛋，一眾小燕破殻而出。雖然最初，毛都冇乜，眼又未開，四條化骨龍安坐巢中，只需擘大口，就有嘢食。不過，咁大條蟲，BB燕點吞落肚？定尐嚟，阿爸阿媽已經將各式蟲蟲，嚟個大雜會，加埋自己口水兜勻，咁BB就食得開心又放心喇。
「青蟲不易捕」，呢一句，唔出現喺我眼前世界。我望出後園對開高球場草地，陽光反映下，一粒粒銀閃閃，成個天都飛滿好似蚊螆仔嘅昆蟲。喂，天堂嚟㗎。雖然「黃口」真係「無飽期」，梗係喇，飽完又餓，正常生理啫。呢度大把嘢食喎，未飽？再去繼續捉蟲。燕子咁醒目，唔多嘢食，佢哋點會千里迢迢，移民嚟呢度？常識嚟啫。
再過多三四個禮拜，有毛有翼，會飛嘞，鬼子佬叫fledged 。其實燕子仲多一樣嘢，至叫「一旦羽翼成」，就係學識一路飛，一路捉蟲，仲一路食埋落肚。
食嘢，就係燕子嘅日常生活。一旦搞掂埋呢個技術，就可以自立，亦係離巢嘅時間嘞。注意：係「離巢」絶唔係「離家」。「舉翅不回顧」嘅係個巢啫。
事實係，此時，雌雄雙燕帶領呢一巢四兒，加入棲息地，成為燕族一分子。就算「隨風四散飛」，都喺棲息地範圍內，同生父生母、世叔伯，兄弟姊妹等一齊，過住愉快生活。
至於「雌雄空中鳴，聲盡呼不歸。卻入空巢裏，啁啾終夜悲」⋯⋯等，全屬老作。
我理解香山居士，樂天先生，佢寫燕詩係借題發揮，想人念親恩，否則有報應bla bla bla ，佢呢個初衷動機，無可厚非。但係千幾年嚟，受燕詩誤導，而相信錯誤訉息，就大有人在嘞。起碼我就係其中一個。我以為：
（一）巢，就係屋企，要一家大細住喺要面，夜晚收工就要返個竇瞓覺。
（二）離巢，就係離家，而且以後都見再唔到對方，係悲劇收場
（三）巢係私產，產權屬於起巢個對燕，所以下年再會返嚟用。（其實，喺燕嘅世界，邊個用？有乜所謂）
（四）⋯仲有冇⋯？
我喺呢度要鄭重致歉，一九七九年，我初出道，兼教過四年中文，當然教過燕詩。各位同學仔，我道行未深，畀人誤導之餘，仲誤導埋你哋。而家首先改正，跟住下次返香港，同大家飲杯，賠個不是嘞。同學仔，記住踴躍出席，一齊飲杯喇。
記得十年前，我去巴勒斯坦百利恒，入到耶穌出生地⋯聖誕教堂，嗰度有好多耶穌降生壁畫。忽然，我有一個問題：點解冇馬嘅？耶穌降生「馬槽」，係我咃由細到大嘅觀念。人哋見我提出呢個問題，都覺好奇怪，當時牧民只有羊、最巴閉都係會有駱駝，絕對唔會有馬。因為，staple 譯做「馬槽」，一個錯誤嘅譯名，就將事實混淆，而且可以一代傳一代，繼續錯落去。
又記得我喺耶路撒冷，嗰度係應許之地，到處flowing with milk and honey。我行咗成個禮拜，都未見過一隻蜜蜂。我又問人，冇蜜蜂又何來honey ？佢哋又唔明點解我有咁嘅問題。原來honey 唔係蜂蜜，係由棗（dates ）提煉出嚟嘅棗蜜。
冇馬嘅馬槽。冇蜜蜂嘅honey。畀咗我一個好大嘅教訓。到今日，離巢並冇離家！原來，教訓，陸續有來。
其實，一生人中，有好多固有觀念，唔知幾時，又唔知畀邊個，擺咗喺個腦裏面，就咁，成世人都以為係真理。到有一日，一個因緣際會衝激，先至恍然大悟。吓，乜係咁嘅咩！知道都好喇，其實有更多不知不覺嘅嘢，會帶埋去見上帝。
咪住，每日咁多人見上帝，個個帶埋咁多問題。咁煩，上帝都有火喇。都係喺見佢之前，盡量搞搞佢⋯⋯
打開個網：地球暖化？綠色生活？種族歧視？平權？黑命貴？帝國主義？殖民主義？共產主義？義和拳？太平天國？有國有家？愛國賣國？五族共和？千年中華？新疆西藏台灣海參崴？唐宋元明清？自古以來乜乜？⋯⋯？
嘩嘩嘩！我想問下全能嗰位，而家人世搞出咁多問題，好多似是，而唔知非唔非，咁都要頗長時間至搞得清楚噃。
我想⋯申請⋯
遲多些少時間至見你⋯⋯，OK？
再噏過，
嚤囉仔
