 |
感恩，呢次已經係今年第二次雪板，早排，阿仔一家三日雪地假期，我又搭單做電燈膽。又有得玩，又可以聚天倫，人間美事。
呢兩年，呢隻共業病毒搞亂全世界，好多活動都要取消。我唔可以出國，連跨省旅行都唔得。呵，真係好彩，澳洲主要雪場就喺紐省，咁我先至有機會去玩。不過，限聚令、禁足令亦影響雪山旅館同埋雪場營運，呢個環境，澳洲仔女想去雪場，都要費一番周章。
去玩雪，首先要訂住宿，雪山旅館要求收晒房租至肯同你留位。但係雪埸 chair lift pass 又未開賣。麻煩嘞，咁，萬一租咗房，但係入住時間買唔到 lift pass ，咁去雪山把鬼咩。又或者，買咗 lift pass ，但係又租唔到房 …？ 真係唔知有雞先定有蛋先嘞。
又多謝旅遊達人 Peggy 幫我搞掂住宿交通，我就放心去買 lift pass ，呢個六日雪地假期，得以成行，再三多謝。
哈哈哈 lift pass ，今年我可以買 Senior 飛，咁又慳返嚿零水， yeah！
八月第一個星期一，連司機一行五人，由雪梨直奔雪山，途經雪梨市中心。平時人多到爆嘅 Central 火車站附近，我居然可以企喺佐治街路中心自拍！尐人去晒邊呢？
以往大巴士，一行四十人，今日四個客。一個係台灣嚟工作假期嘅女仔，佢入嚟做一日嘢，滑一日雪，然後返雪梨。
叧一對香港後生仔女，喺南十字星大學讀旅遊，男嘅係學生簽證過嚟，因澳洲支港政策，而家可續五年簽證，佢自己今後何去何從，就有大把時間考慮嘞。
個女仔嘅父母已經喺廿幾年前攞咗袋鼠國藉，然後再返香港搵銀，佢喺香港大，冇澳洲身份，而家香港咁嘅款，即刻隻身飛過嚟，憑藉父母，佢馬上就係 PR 永居身份，讀書、生活，都冇問題。心田先祖種，福地，咁咪，後人耕囉。各位，佢父母係咪好有遠見呢 … 。
我真係八卦。
江湖傳聞，澳洲雪山尐雪，梅花間竹，一年好，一年又冇咁好。舊年尐硬雪，撻到我裂咗三條肋骨，今年應該好嘞啩。
第一日，四驅車一早起程，經過雪山 gateway 小鎮 Jindabyne ，以往雪季人山人海場面去年咗邊？路邊租雪具嘅鋪頭都有開，不過客人就小貓三四！澳洲人，性格樂觀，冇乜生意，都嘻嘻哈哈，又係嘅，愁眉苦臉，又幫到尐乜呢？
駛離 Lake Jindabyne，四驅開始上山，西邊水氣東邊晴，蜿蜒山路出現雙彩虹，虹橋腳緊貼小山坡，幾乎觸手可及。咦，寓意吉祥喎。
雪山區天氣變化好大，外面小鎮，無風無浪。車上雪線，即刻風雲大變。陰埋個天不特只，大風夾住路邊碎雪打埋車窗，雖然冇落雪，足以令個個司機減慢速度。好多車都要停喺路邊 chain bay ，喺 drive wheels 裝上 snow chain ，以防畀路面對薄冰跣鑊金。不過，我哋架四驅就掂行掂過，梗係喇，四驅可以免鍊。
行冇遠，有架四驅車車仔跣咗落路邊小斜坡。我哋司機話，跣落山嘅，多數係四驅。點解？哦，信心爆棚，原來就係禍之源。呵，自稱強人，真係要睇路。
司機喺 Perisher Ski Tube station 掟低我哋，四個人就田雞過河，各有各撑嘞。
一落車，你就感受到凜冽寒風嘅威力，雪唔係粉、唔係雪花，而係細細粒嘅冰雹，卜卜聲打埋頭盔眼罩。快步走去售票處 confirm 一早網上訂咗嘅 lift pass ，再三整理好隨身裝備，跳上吊椅，咁就開始一日嘅雪板活動嘞。
本來呢組吊椅係可以上到2000m，然後用雪板跣過藍牛山雪場，今日咁大風，吊椅只係去到 mid station 就要落車。 卒之，喺大風雪中，成朝就喺 Perisher 山谷上上落落，當然自得其樂。
Mid staton 吊椅站邊就有一間餐廳 Mid Perisher Centre。睇 review ，有好多話佢係全澳最貴，食物又渣嘅評價。又係噃，我買杯細啤要13個幾，藍牛山嗰邊八個幾買到杯大嘅。不過而家去玩，邊計得咁多，人哋賣得咁貴，location location location 吖嘛，飲咗至算。哈，你咪話貴，咪一樣，排晒大隊。
今日，條隊排到出門口，一來，橫風橫雪，好多人搵埞匿。二來，共業病毒下，餐堂限人，又有社交距離，咁就搞出一條長龍。好彩都係嚟得早，好快輪到我。入餐堂前，唉風嘟QR code 登記，再捽搓手液，防範措施一一辦妥，就揀個低調嘅位坐低，解除武裝，去酒吧買杯啤，再配三文治，咁就可以 hea 佢粒幾鐘。我喺雪埸嘅午餐都係如此，面對皚皚白雪，眼光光，腦筋清空，如果有藍天白雲就更妙；俯仰之間，呷一口冰凍貴啤 … ，真係好享受。
下晝雖然一樣咁大風，好彩雪就停咗，咁樣玩起嚟就冇咁辛苦。我就不停咁，吊椅上雪板落，真係可以再玩足四粒鐘。愈夜，視野愈差，亦係時候收工。䢫出雪場，揪起雪板走出停車場。呵，四驅車已經等緊我，寒風下可以即刻跳上車返歸，呢種感覺，真係冇得弾。
回家路上，問下兩件香港仔女雪板玩成點。原來兩件友仔，跌多兩跌，朝早已經放棄咗，就淨係喺雪地䠮嚟䠮去，影相、砌雪人。大風下，仲打電話叫人早尐去接佢哋。一早預咗四點半，人吔司機啋佢哋都儍，卒之要等埋我盡興至返得歸。
玩唔玩到雪板事少，希望兩件香港後生仔女，喺追求新生活嘅路上，唔好咁易放棄喇。
我住嘅旅館喺 Berridale 雪山小鎮，離雪場60幾公里，正常大約一個鐘車程。旅館係兩公婆經營嘅家族生意，主要提供住宿饍食及租雪具畀雪山假期人士，佢哋有好穩定嘅本地學校及團體嘅客源。記得 ……
每逢雪季，停車場停滿旅遊車，早晚餐時間，餐堂坐滿人，仲要分兩輪食。
及後，都有十幾廿年前啩，慢慢興起唐人團。唐人點會食揸住隻碟，排隊畀人分派嘅鬼佬晚餐？於是，廣東名食就大顯神威嘞 。港式打邊爐，就成為為所有唐人雪山團必食晚餐。鬼子佬見邊爐咁過癮，又打埋一份。咁都好正常啫，自從第一艦隊登陸、唐人去維州新金山、二戰歐洲移民 … ，澳洲紅土大地上，邊一刻停止過文化交流？
戰後有大量意大利人移入，做就意大利餐；南越變色有越南餐；中東打仗又有黎巴嫩、伊朗美食 …，下一餐，會唔會係 … 車仔麵？
講多咗，拉返雪山旅館。一向旅館都有本地工人負責執房、廚房等工作。自從有工作假期計劃以來，旅館請多咗由台灣嚟嘅工作假期後生仔女，佢哋肯學肯做又聽話，年輕又有幹勁。最殺食嘅，佢哋都講國語，同普通話人溝通，毫無問題，服務唐人客合晒何車。
今次呢兩位台灣青年 Ariel and Jin，佢負責我五日晚餐。又因為我直頭係唯一客人，早餐亦係 order to cook ，而且任食唔嬲。而且每朝佢兩位都送咗我去雪場再去買餸。到黃昏又嚟雪場接我返旅館。五日貼心服務，真感激。及後醒多些少心意，都係應有之義。
過咗第一日大風大雪嘅雪板日，第二日明顯好返好多，雖然仍然大風，但係停咗落雪，視野就比較清晰，下晝仲有尐太陽𠻹，玩起上嚟都好過癮。可惜仍然係風大，吊車仍然上唔到頂，去唔到藍牛，我就只好喺Perisher 谷地上上落落，練習下 new tricks 喇。
司機下晝會送返兩件香港仔女返雪梨。多口問下佢哋雪板玩成點？原來根本冇玩過，就只係搭 Ski Tube 上咗藍牛山食下嘢、影下相。呢尐唐人雪山團，多數人唔識玩雪。好似 呢兩件後生仔女嘅情形，我見唔少。
當晚，成個餐堂就得我一個客。回想起十年來，喺同一個餐堂，嗰種虛冚，鼎沸嘅人聲，邊炉嘅蒸氣…，名副其實，就係「熱、鬧」。今日，打邊爐著住羽絨都覺得寒，孤零零，乜嘢叫做「冷、清」，而家深刻體會。
呢間旅館仔，個朵叫 Southern Cross Motor Inn ，睇陳設，都有相當一段歷史。不過都咪話，我間房居然仲有個浴缸！成日流流長，七、八粒鐘喺凍鐵鐡嘅雪地，返嚟打完邊爐，夜晚潯返個熱水缸，咁梗係好好瞓，點會失眠 …… ，一宿無話。
又到第三日，哈，直頭係大大好日子，一早喺旅館已經見到久違咗幾日嘅晴天。今日，台灣朋友仔送我去雪場，駛上雪線，遠望 Perisher 山谷上空，晴天萬里，暟暟白雪襯托尉藍天空，嘩，乜靚成咁！雪場嘅天氣預告話：The Calm between the Storms ，即係話，今日唔玩到夠本就笨嘞。四驅車停喺雪場入口，雖然係零下三度嘅氣溫，冇風又有陽光，好舒服。謝過兩位美麗島小朋友，即刻跳入雪場玩個飽。
不負所望，風和日麗，吊椅如常上到二千米，再沿 Blue Cow Home Trail 一路雪板跣去藍牛雪場。條路唔夠 2K ，其中又上又落，冇吊椅、冇T Bar、冇 Ski mat ，淨靠自己對腳，塊板又除又着，真係幾考功夫同體力。藍牛雪場有條约 2K 嘅坡道 the pleasant valley trail ，可以連續滑 2K ，澳洲雪場嚟講，已經係唔錯嘅長度。
其實講好玩，我鍾意 Perisher 多過藍牛，不過每次都會嚟藍牛，係為咗改變一下 routine 同埋挑戰吓自己。仲有必做嘅，就係嚟幫趁藍牛餐廳，飲杯八蚊嘅大啤。大佬，Perisher 飲杯細啤都要十三蚊！
藍牛呢邊冇一個好似 Perisher 咁大咁闊嘅雪坡，不過就有好多個蜿蜒曲折嘅窄尐嘅雪坡，都有吊椅或者 T Bar 連住，好多都係綠色雪道，一般水準都唔難應付，所以都吸引咗唔少人過藍牛。
呢度仲有一個好大嘅原因吸引人嚟，就算完全唔識玩雪嘅人，都可以搭 Ski Tube 嚟。講開 SkinTr我初初以為好似藍山吊車，Ski Tube 可能係以前採礦或者其他工程嘅遺物。卻原來，呢條地底火車，真係起嚟畀雪地假期嚟玩嘅人用嘅，第一期一九八五年由半山 Bullock Flat 站上到 Perisher ，八八年就再上到藍牛。咦，我九四年第一次搭 Ski Tube ，原來當時都算係新嘢。
跣過藍牛山、䬪罷藍牛啤，又係時間搭火車落返 Perisher 嘞。火車約半粒鐘一班，以前虛冚人逼人嘅車廂，今日只得三條友。我専揀車頭位置，因為可以一路睇住火車瓹山窿。「How are you mate ?」嘩，做乜車頭右邊原來有道門仔，有人行出嚟同我打招呼！呵，Driver compartment 。哈哈哈，今年新發現，唔知邊度嚟嘅印象，我一直以為 Ski Tube 火車係無人駕駛嘅。今日至知：唓，使唔使咁 Hi Tech 喎，有人揸車咪仲好。
難得咁好天，成個晏晝就係 Perisher Valley 四圍瓹窿瓹罅，有尐冇玩過嘅雪道同埋山坡都去跣佢一鑊，一直玩到四點半。嘩，就夠鐘嘞，由山上鏟落嚟，離遠見到吊椅工作人員收拾緊，預備收檔咁款，站內一兩張吊椅仲有客人，即飛奔落去。 「it’s closed」條友話。 「last one」，我大嗌。佢再大聲尐 「CLOSED」……。
我而家體會到乜嘢叫做「…… 我帶著依依不捨的心情，踏上歸途」。小學作文係咁講㗎。
一行出停車場，就有車喺度等接。兩位台灣小朋友一聽 uncle 今日做咗 44 Km，又話 uncle 棒，又話 uncle fit ，梗係飄飄然喇，就算係禮貌吹牛，我都受晒，不過，個口都要怍怍諦諦，用台灣腔噏：「那裏那裏！哈哈哈」。
後生仔女，果然快手快腳，六點鐘就打邊爐，之後仲預備埋聽日早餐拎返房。開熱水，一路飲啤一路浸缸，又係一宿無話。
花無百日香，秦可卿升咗天都報夢畀王熙鳳，話佢知，世事邊有永恆㗎。噚日咁好天只係偶然，今朝一上山，馬路已畀濃霧冚住，能見度唔夠一百米，架架車都行得好慢。落車入雪埸，咦，原來大霧係冇風嘅，又係喎，如果大風，霧都吹散喇。預測話下晝天氣會更差，見咁嘅款，即刻叫兩位台灣朋友，今日三點半嚟接我。
去到吊椅站，眼前雪坡，一片白茫茫，頭頂吊椅，滑行兩三步，就消失喺五里霧中。但係，貪玩勇士幾時會怕霧，左腳扣緊雪板，坐上吊椅，就向濃霧出發。
能見度低，係雪地大忌。玩雪板，就係講平衡。身體位置決定人嘅重心所在，而重心移向邊，同速度好有関係。如果我唔知自己速度，就冇可能準確調整重心，結果就係 …PK ，仲係好金嗰隻，因為係毫無示警嗰隻 PK 。眼前，連個地下喺邊都估估下 ……，哎唷，乜又係八月十五！我知係我嘅雪鏡水皮，應該換個塊高尐 VLT 透光值嘅鏡片。不過，要下次先喇。
又極有可能，唔夠透光嘅，唔只係塊雪鏡片，而係我自己嗰對天生嘅 lens。最近喺我飛時卜我話畀大家聽：我要換「鏡頭」，居然冇人知我講乜，仲恭喜我有新相機玩，真吹漲。其實眼醫話我有白內障，係兩隻都有，已經預備出年換過對人工晶體。我對靈魂之窗，仲有我未知點做嘅「低眼壓」青光眼… ，即係話，眼嘅兩大普遍麻煩，我都有齊！我嘅心態係睇得一日得一日，仲要萬事感恩，今日，我仲可以踩車、雪板、四圍䠮。
仲有，上雪山前大牙痛，照X光，原來一隻大牙裂咗，係冇得救嗰隻，安排咗玩完雪去剝。而家半塊面麻痺晒，痛個邊牙肉仲腫咗一嚿，連小孫女都幫我用可樂止痛。個個知我貪玩，原來最好嘅止劑就係 … 玩玩玩！雪板緊嘅時候，真係乜嘢痛都唔記得。喺雪地，記住成口掰大個囗，冰涷嘅風吹入牙肉，咦，咁咪係冰敷囉，而且百分百天然。哈，真係唔痛喎！
寄麈人世，臭皮囊都係上天借返嚟。又要捽木，好彩上倉呢位債主對我不薄，而家尐嘢分期還。2016年，還返些少胃，而家輪到隻大牙，跟手出年安排還埋對 lens。我自細聽老豆講：有借有還，上等之人。老友，大家都咁上下，歸還期近，最緊要做好安排，儘可能有計劃咁還返尐借人嘅嘢。仲有，當仲有得用嘅時候，唔好嘥，用多尐咯喂。即係，有眼睇多尐、有牙咬多啖、有腳撑多嘢、有心跳多下、有肺索深尐 ……etc., you name it 喇。真係唔知幾時要還㗎。
天氣真係差，偶爾仲有雪落。原來霧中嘅雪係一粒粒嘅，打落個身之後仲會融咗尐變成水，咁就死火嘞 … 成身濕晒！氣溫低、有霧、濕氣重，原來好鬼凍。可能呢尐就係江湖人稱：濕凍。
成身凍又濕𣲷𣲷，趁住人少尐，唔夠十一點就縮入餐廳匿埋，又係凍啤三文治。隔住玻璃望出雪地，愈嚟愈寒，又愈多人排隊入嚟，個個濕𣲷𣲷，尤其個 pat ，好多都濕咗一大笪！吓，點解我特別留意？哦，嗰度，又真係，特別明顯㗎喎。個個排隊入嚟，又要保持米半距離，又要嘟 QR code 登記，又要捽搓手液，條龍都幾長㗎，好彩個個都明白特別形勢，又保持禮貌，人人快手快腳，傾下偈，排下隊，時間都好快過。
今日都係唔好太 hea ，飲飽食醉，出去執返雪板，繼續喺雪坡上上落落。視野唔好，一定要減低速度，都好吖，畀我有機會微調一下我嘅幼稚技術。咦，跳下都得喎，好，轉身，一個、兩個、三 ……，哎唷，又係八月十五！
邊個話精力可以無限，跌到一仆一碌，又要爬起身，問你跌得幾多次？睇下時間，乜三點鐘就黑晒個天 ……，一分神，哎，哎、哎 … 碌咗三周半加轉體360，坐喺雪地，唞大氣，唉！真係完全控制唔到動作，睇樣，都係時侯收工嘞。
又要讚下自己，我咪係叫咗佢哋三點半嚟接我，哈，時間啱啱好。第四個雪板日，又劃上完美句號。晚餐、浸缸又一日。
平時雪山團，喺最後一個滑雪日，旅遊車就兼程趕路返雪梨。今次好特別，冇人送我返屋企，我第一次由雪山搭公共交通工具返歸，哈，咁嘅經驗，相信唔會好多人經歷過。
雪山假期第六日。一早，落 lobby ，同老闆娘 Renee 找埋條晩餐數，佢居然唔收我五支啤酒錢！五十蚊袋鼠幣喎。又係嘅，呢幾日，成間旅館餐廳淨係得我！咁畀面，請我飲啤亦好正常，多謝晒。Don’t worry，I’ll be back soon.
我嘅返歸路綫，係由有百七年歷史嘅雪山古鎮 Cooma 開始。
成個紐西威嘅鐵路系統，再加巴士由市鎮接駁到火車站，就叫做 NSW Train Link 。入佢網站，輸入由邊度去邊度等必需資料，網上畀錢，我就收到 confirm ，到時，攞住唉風就可以搭車，方便得很。而且，哈哈，我係紐省高級市民，仲有優惠𠻹。
九點半由旅館出發， Renee 車我出 Cooma ，講聲拜拜，就喺巴士站開展我一日 solo 返歸旅程。Train Link 巴士其實係旅遊車，高身有車底行李廂嗰隻，乾淨企理，非常舒適。所有乘客，都要預先買飛，編埋座位。呢程車，我優惠價，多謝A$九個八。不過，如果冇預訂，唔知上唔上到車？一粒鐘左右由 Cooma 去到坎培拉火車站，因為係接駁車，所以時間計得啱啱好。開車前十五分鐘已經坐咗入車廂。火車只拉四卡，我搭頭等廂，我嘅優惠價係 $39.77，乜咁零丁？呢卡車廂連埋 buffet kiosk ，可以柯打食物飲品，連酒都有，不過，全部要摷銀包。我，梗係食 BYO 喇。
每日有三班車由坎培拉開去雪梨，我搭中午個班，四粒鐘返到雪梨中央火車站。其實同搭雪山團旅遊車差唔多時間，而且更加舒服得多。
舊時以為玩雪一定要參加滑雪團，而家可以搞掂去雪山嘅公共交通，又有人載我上雪場，下次玩雪，就多咗好多選擇嘞。
既然咁方便，今年又咁好雪，哈哈。睇下幾時滑多次都好喎。諗諗佢。
咦，開頭話寫回顧噃 ……，不如又下次咯。
再噏過
嚤囉
No comments:
Post a Comment