2017.05.16 An exciting flight to Lukla

2017.05.16 An exciting flight to Lukla 

噚晚已經叫咗 morning call，亦叫咗 packed breakfast 。約咗 6:15 分大堂等，我一早搬埋行李咗嚟，冇耐印度朋友亦到。冇錯，美國佬又遲到，我連份 packed breakfast 都已經食晒，都未見佢蹤影。喂，飛機唔等人，領隊又要搵人上去摷佢，七摧八請至出現，出面的士已經等緊，歌仔又有得唱： all my bags are packed I'm ready to go. Taxis' s waiting. He's blowing his horn. 一見美國佬，馬上開車去機場！有隊友如此，點算。

加德滿都機場，國內線呢邊，停咗好多螺旋槳飛機仔，十分過癮。大堂 check in ，行李過磅，四個人行李原來超晒磅，冇嘢嘅，錢又可以搞掂，每人科 1000 Rupee 當貨運。不過 ⋯⋯ 雖然畀多咗錢啫，咁架機會唔會過重㗎？好驚！

Lukla 機場，係世界數一數二最危險機埸，當然主要因為地形關係。再加上以前航空公司競爭，就算天氣唔好都照飛，咁咪增加咗出事率。而家，只有一間航空公司獨家經營，冇咗競爭，反而唔會亂飛，touch wood ，就比以前安全好多喇。Hah，咁都得？世事真奇怪！話雖如此，呢條航線亦係世界數一數二最靚航線，冇法喇，無限風光，梗係在險峰。

山中天氣難料，所以去 Lukla 嘅航班成日唔凖時，甚至幾日冇得飛都唔係出奇嘅事，據說，噚日好幾班機都取消咗。但係無論如何都要喺機場等，先至有機會上機㗎。感恩，我哋果然受到眷顧， Check in 咗半粒鐘左右就 call 上機。機場雖然簡陋，但係國際民航嘅安撿手續都要一一做足，呢度，仲做多一瓣，就係搜身，登機閘口再分兩個通道：男界、女界。要模身摸勢喎，男女授受不親吖嘛。

穿過閘口行出空地，全機人上咗架簡陋老爺機場巴士，巴士上，職員數齊人數，即係幾多人？十七人！巴士開出停機坪，幾架老爺飛機仔停咗喺前，大鄉里搭飛機仔，梗係要影返幾張相。上三級樓梯，入機倉時，記得耷低頭，否則起高樓。自己搵個位坐好。樓梯亦係機門，閂好門後，飛機就駛出跑道就位。咦，機門唔係閂得好冚，透光透風，唔使冷氣、照明噃，真環保。

加德滿都飛入山區，五、六千以上至稱上一座「山」，飛機喺三千高度飛，千零米嘅地方叫平地。原來，要入 Lukla ，飛入嚟係唯一方法，當然仲有第二個方法，就係用腳行。

忽然，望出窗外，飛機被群山環抱，前面就係機場跑道，跑道順住懸崖興建，佢唔係平嘅，係向懸崖外斜上。機師安全平穩著隆，梗係搏得熱烈掌聲喇。

喺跑道邊客棧食個早餐，再會齊挑夫，先行休息整頓一下。Lukla 係Khumbu 河谷區重要運輸交匯點，遊客飛出飛入都要經過呢度，客棧、餐廳，成行成市，旅遊行山公司亦到處都有，散兵遊勇到處拉客幫人做嚮導、挑夫，散滿機埸閘口，總之乜都有。我哋稍作休整後，亦馬上出發嘞。

穿過石砌街道，兩旁好多賣行山用品街舖，呢個唔出奇，原來仲有唔少飛髪舖！點解？原來鬼子佬入山後大多數費事剃鬚，十幾日落山後，全部鬍鬚勒突，普通刀片搞唔掂，咁就要幫趁飛髪佬嘞。我？皮光玉滑，幾時會留到尐咁嘅原始人嘅毛，我用即棄刀刨，遊刃有餘，使乜幫趁飛髪佬？

喺巿集盡量頭，政府設有檢查站，所有人入山都要買登山證，當地人當然唔使喇。再行冇耐，就到達一座拱門，穿過拱門，就係山路，即係話行山旅程正式開始。咁重要嘅地標，梗要影相。原來呢座係紀念拱門，拱門上正中間有個著尼泊爾服飾女士嘅半身石像，佢係第一個登頂喀菲爾士峰嘅尼泊爾女士，個名叫做 Passing lhamu sherpa。可惜登頂後落返基地途中遇上暴風雪而亡，雖然返唔到落嚟，始終都係成功登頂，而且係首位尼國女士登頂，仲壯烈犧牲埋，呢個紀念拱門，實至名歸。

因為航班難料，所以第一日通常都唔會行遠，今晚嘅行程只係 10公里，由 Lukla  機場行去 Phakding，呢個係山路邊嘅小鎮仔，設施都係主要為路過嘅人而設。多數係士多仔、旅館連食肆。呢度仍然好接近機場，所以物資運輸未算十分困難，基本供應不缺，亦唔算太貴。當然中途客棧，就係照顧食宿等基本需要，唔會有太多苛求。

行到身水身汗，挑夫將行李送入房。我第一件大事，就係要搵熱水冲涼！入咗山區就變咗 BB ，一定要趁有好太陽沖涼，一入夜，分分鐘跌到零下，你冲埋我份喇。

行山工作人員之間，階級非常分明，只有領隊或副領隊可以住入客棧，其他挑伕，要住喺特別挑伕宿舍，挑伕宿舍好多時同客人客棧又有頗一段距離，挑伕因而又要走嚟走去，其實都好辛苦。唉！係咁嘅嘞，做細就要受多尐苦，到處楊梅。唔想辛苦，努力搏紥係唯一途徑。挑伕最大心願，就係學好英文，升做副領，繼而考牌坐正，呢個就係一般雪巴人嘅人生目標喇。

領隊或者副領又要負責客人饍食，落單傳菜執碗碟，都係佢哋嘅工作。所以有領隊嘅客人，客棧唔會直接同客人溝通，而係由領隊副領代客棧招呼容人，呢個都係 Khumbu 山區嘅待客傳統。

到達客棧後，我都費事行嚟行去，冲咗涼話咁快又係晚飯時間。講開講，我最擔心嘅食飯問題，原來都幾OK，托賴，出入平安，今晚仲點咗個鐵板牦牛扒，又食得幾好咁噃。

鄉下地方，有乜好玩，早尐瞓，聽日起身⋯⋯

再噏過

嚤囉

2017.05.15 A rainy day in Kathmandu ，Trip preparation

2017.05.15 A rainy day in Kathmandu ，Trip preparation 

 一路收到行山公司嘅 E 貓，通知今日十一點會喺公司開會。如常六點幾就落到餐堂，食個又長又懶嘅早餐。好天咗三日，今日終於落雨。雨唔大，不過已經夠晒整到條街滿晒泥辦。多謝上天眷顧，畀我有幾日好嘅天氣，可以將附近地區行到熟晒。今日咁嘅天，費事出街喇，就喺餐堂 hea 到夠鐘。

喺公司寫字樓集齊全部隊友，總共三個：一個美國肥佬，佢自稱係做 IT 尐咁嘢，又要四圍開會，今次完團後就會飛北京，據佢話，時間緊迫，佢唔行落山，直接喺 Island Peak 基地坐升機飛 Lukla ，再飛加德滿都喎。第二個：嚟自坎培拉嘅印度人，係白嗰隻，個樣似中東多尐。佢喺客什米爾出世，有山區血統。據說，出年會登頂額菲爾士峰咁話喎。第三個⋯⋯咪係我囉。

行山領隊我已經見過，佢就係接我機嗰個，個名叫 Bimel 。公司經理，前日我又已經見到過，而且畀埋錢，手續又已經辦妥。經理今日對住三個儍佬，巡例都講下行程，又講下注意事項，都係例牌嘢嚟。

經理噴完口水，各人就喺公司攞咗個大 duffle bag ，行山嘅所有行李就放喺裏面，放便挑伕孭住行山。大喼就留返喺加德滿都。上次行 EBC，個 duffle bag 有重量限制，今次，領隊居然話重量冇所謂，總之唔用嘅嘢唔好帶就OK喇。呵！咁就畀咗我好大走盞喇。

團費亦包埋借用羽絨睡袋，羽絨褸。睡袋可以頂得 - 30 度，而羽絨褸可以著上雪山登頂咁話。公司仲送咗兩件賣告白 Tee 恤，唔好睇佢免費，其實好衿著，五年前嗰兩件，我着到而家，睇怕仲有排着。

討論埋行程中嘅使費、貼士等其他事項，會議結束，講埋今晚歡迎晚餐嘅集合時間，就各自出街換錢、買嘢 ⋯⋯ 等。我冇嘢買，只係換尐錢山上用。

仍然落住毛毛細雨，邊度都唔去，又係去返噚日嗰間蘇州餐館。食個回煱肉加菜麪，就返歸執好嘢，準備大日子來臨喇。

噚日 book 咗酒店晚上八點按摩，居然可以改四點，執好嘢後，做個深層按摩。哈，原來同中式按摩有好大分別，果然舒服晒喎，記住行完山返嚟，再做多次。

頭先約好六點鐘大堂等，港、印兩個澳洲佬準時到達，美國佬到六點半都未見蹤影，要領隊加洒店職員上房摧請至出現。呢件美國佬，冇尐紀律，第一個印象唔多好噃。

喺微雨中，車仔離開 Thamel 區，直駛加德滿都市中心，呢一區係我完全未去過嘅地方，雖然都係雜亂，但係有名牌街舖，似舊時灣仔、上環咁嘅款。果然係行山國家， 就叫做 North Face 嘅行山用品舖頭都有十幾間， Bimel 話：只有兩間係堅嘢，其他都係冒牌嘅。咁又係，街邊乞兒都著住 North Face 乞食，邊得嚟咁多正貨？

車仔駛入一間古式古香嘅建築物，我唔識睇，直覺係好有當地色彩嘅建築。餐廳叫做 Bhojan griha，直譯就係食嘢地方，咪係餐廳囉。領隊話，呢間餐廳前身係政界各人嘅住宅，喺加德滿都，好多著名餐廳、酒店，都由名人住宅變身而成。我上次住嗰間 Shanker 酒店，原來前身就係一個富豪嘅住宅。

停車場穿過大門行入庭院，門房有人幫你額上點上珠沙，呢尐係印度教嘅必做儀式。再由側面細門行上窄窄圓梯，第二層走廊牆邊一列鞋架，各位貴客，請先除鞋再行入餐堂。

餐堂係一個肆正空間，八米乘三十米左右啩，靠牆及靠窗擺咗兩列長枱，餐具全部銅製，非常錘手。枱係矮枱，唔夠兩呎高，櫈係矮櫈，貼晒地，可以盤膝而坐，有墊褥有靠背，好過坐地下咁喇。入門處留有空間，樂隊就喺嗰度，長枱前亦留有空間，民族舞就喺嗰度上演喇。我哋只得四條友，喺大堂中靠牆開咗四張細枱對坐，陣間嘅舞蹈就喺我哋身邊上演。

呢種餐梗係好似 taste Manu 咁，乜都有尐。侍應首先攞住長咀酒壺，逐杯酙滿，稍微一呷，都好 Kung ，唔啱我，跟住前菜一小碟一小碟咁上，有 momo ，有咖哩，再跟住用大銅碟，有飯有菜有肉，逐少逐少放上銅碟內，全部都係尼泊爾嘅家常餸菜，侍應隨食隨添，保持餸菜溫度。

食食下，民族音樂舞蹈隨即上演，唔係話大劇院嘅水準，質樸平實，正係民族舞嘅特色。尼泊爾雖然國家細細，都有不少不同民族，舞蹈服飾當然大異其趣。其他乜都唔識，就有一個民族同 Tibet 一模一樣，問領隊。佢話，千百年來，山區人民走嚟走去，點分你我？有人話，藏區又話自古以來係中原漢人嘅，有冇搞錯？你「五族共和」時，有冇問過人哋肯唔肯同你「共和」呢，又？

呢個餐慢慢食，又幾啱我個胃仔，食咗粒幾鐘，又係歸家時分。車仔喺短短五分鐘路程，入咗兩次 road block ，警察見到載住遊客，馬上放行。又係嘅，尼泊爾靠旅遊業食飯，見到客仔，梗係放鬆一馬。

飲飽食醉，加上按摩後，成身鬆晒。早尐瞓，聽日大日子

再噏過

嚤囉

2017.05.14 The Election Day in Kathmandu

2017.05.14 The Election Day in Kathmandu

今日，星期日，係母親節，對民泊爾人嚟講，更加係重要嘅一日。其實，自從進入加德滿都之後，就隠隠感覺到好似充滿節日嘅氣氛，大街小巷頭頂，到處都掛住一串一串嘅紙旗仔。問起，原來係選舉，旗仔就係各黨派嘅標誌；候選人嘅照片連政綱（我估咋，鬼知佢寫乜咩）就擺滿通灈大道。

今次選舉，其實係地方選舉，全國一人一票直接選出三個省、34個分區及283個巿議會代議士，佢哋代表所屬選民，議決自己選區民生大小事務。相似嘅地方選舉，二十年前都試過一次。講起嚟，原來呢次選舉，同噚日講嘅故事都好有關係。

話說，俾自己個太子打死嘅皇帝，阿 King Birendra  佢，都好親民吓，據說，都好受人民愛戴，喺佢治下，其實已經係君主立憲，國家好多嘢都由議會議決。但係只係國家層面，而所有地方政府官員，都由國家政府委派，當地市民毫無置喙餘地。現代統治智慧話：當地人如果冇權選出代表自己利益嘅人做事，當地人點會順氣，矛盾只有愈嚟愈深。呢種感覺，香港人就一定感受得到。皇帝 King Birendra 於是放權於民，就喺 1997 年實行地方政府選舉舉，可惜國家政治形勢唔穩定，再加上受到各反對派杯葛，選舉以失敗告終。

皇宮謀殺事件，當然有損皇族信譽，人民開始另尋出路。之後 2003 至 2008 嘅內戰，更導至 廢除皇族建立共和，2008 年多黨派組成嘅政府，聯合提出新憲法。其中，建立三級議會，就喺憲法裏面訂明。 而今次地方選舉，正正係實行民主寭政行出溉第一步，跟住仲有再高層次嘅選舉嚟緊。為顯示公平公正，除咗聯合國協助外，尼泊爾亦邀請咗中國、澳洲、以色列、芬蘭、巴基斯坦等十個國家，派觀察員喺加德滿都地區，睇住選舉進行。

由此又令我諗起，我哋香港人由 1979 年開始話港人治港，而家係點，大家評價。不過，尼泊爾人就用血同生命去換取民主。150年嚟，香港人嘅自由都係恩𣈱嘅，幾時有好大力咁去爭取過。希望香港人福大命大，喺冇咗條羅湖中英邊界後，都可以延續嗰百五年歷史，上大人會繼續暢福自由⋯⋯ 。不過，毛主席又話過：「掃帚不到，灰麈不會自行消滅」，你唔去爭取，人哋又做乜要畀你？又不過，冇命？流血？唔係香港人杯茶噃！

又講遠咗，拉返嚟

為咗方便市民投票，今日，全國放假一天。未見過喺繁忙旅遊區，當所有舖頭收晒檔，會係乜嘢光景，同時再行熟 Thamel 、Durbar Square ，搞清尐東南西北。

如常，唔使六點就起咗身，歎個自助早餐。嘩，真歎世界，歎到成九點至出街。條街真係少咗好多人，我會話九成舖頭都唔開檔。當然有家爺仔乸生意，少量食物店士多都有開門營業。遊客都好容易搵到嘢食，又唔會話餓死嘅。

我由旅館主要向南，行向舊皇宫區 Durbar Square 。

舊皇宮區唔單止係遊客必到之地，因為呢度佛塔林立，當地人都嚟呢度拜神。星期日再加上二十年一遇嘅公眾假期，今日呢一區人山人海，非常熱鬧。

由 Thamel 行入，大街有更亭，當地人掂行掂過，遊客就會畀人叫住買飛，呢個係我上次嘅經驗，今日？唔收錢！點解，所有景點都喺地震中造成嚴重破壞，咁又點好意思收錢先！上次入過去嘅皇宮，而家已經圍晒板，全面封閉，由外面睇，到處成幅倒冧嘅圍牆，未冧嘅都有長長嘅裂痕由地下伸延到頂。對面佛塔，係全世界最高同類型嘅佛㙮，四層磚石結構塔座仍然完整，但上面嘅多層木給構佛塔，就完全倒冧，一條木都冇剩。

皇宮前係活女神嘅屋企，外面睇，又幾完整。入去裏面庭院，就見到牆一條二條裂痕，呢座建築物都畀一條二條長木頂住。望上窗口，完來仲有人住，希望女神法力無邊，保佑一家大細平安大吉就好嘞。

女神屋企同皇宮邊有一笪大空地，上次嚟係一個舊物市場，擺咗好多攤檔。而家，四周圍咗登天鐡絲網，唔係因為地震，原來架起咗帳篷，變身成為投票站，市民都好耐心排隊投票，話晒都係尼泊爾人嘅貼身大事。

皇宮正門係白鴿廣場，倒冧咗嘅高柱頂石刻，而家仲瞓喺地下，不過無減市民餵白鴿嘅興致。佛法講布施，餵白鴿其實係佈施嘅一種形式。廣場有賣粟米粒小販，佛教與否，毫無關係，買一袋仔粟米餵白鴿，其實都係遊戲一場。細佬仔，細路女喺滿晒白鴿嘅廣場奔跑，所到之處，白鴿飛舞漫天，當然又係攞景嘅好機會。

行到中午時分，喺街邊塭間仲開檔嘅餐廳仔，叫咗份 momo 加支可樂，只收 115 盧比，一蚊多尐食到飽，唔話得喇。

圍住皇宮區馬路寬施交通管制。平日，喺車水馬龍很元大路打橫行，係不可思義嘅事，今日我可以企喺馬路中間慢條斯理自拍，咁嘅機會，點會錯過。

一隊著咗迷彩軍服、面上塗咗油彩嘅軍人，荷槍實彈喺街上巡邏，佢哋穿梭於各個投票站之間，保證投票順利進行。表面觀察，巿民都非常冷靜，氣氛平和，絶唔緊張，應該冇問題啩。

今日咁行法，終於對 Thamel 連接 Durber Square 嘅地形搞清楚。信步行返酒店附近，搵咗間「江蘇飯館」食晚飯，半隻鹹雞加碗菜麪，慢慢食，居然食得八八九九，好食就唔講得喇，不過，都係啱我腸胃嘅一個餐。坐咗成晚，唐餐館只得我一枱散客同埋一枱旅行團，咁點做生意呢，可能旺季餐堂坐滿人喇。人哋生意，講多無謂，返歸瞓覺，聽日

再噏過

嚤囉

2017.05.13 A free day in Kathmandu

2017.05.13 A free day in Kathmandu 

出外旅行，有時差就梗嘅喇，不過，尼泊爾就比較古怪，佢比雪梨慢四小時十五分鐘！（做乜 15 分鐘咁撩能呢？）好彩，時差唔係好影響到我。通常我一上機，就用目的地時間做標準。當地係日頭時間就幾大都唔瞓，搞到殘晒，夜晚多數可以一覺瞓到天光，咁就減少時差影響喇。

六點至十點，酒店提供早餐，我瞓個懶覺，八點幾至落去食，自助早餐，仲有人煎蛋、奄列，平實兼啱口味，非常唔錯。餐堂內，貎似經理嘅西裝友，仲逐枱同客人傾偈，不過，鬼咩，淡季，成個餐堂都得幾枱人。嚟到尼泊爾， 對人合什，表示禮貌，同時 namaste 呢句話，就成日掛喺囗。

星期六，一早聯絡行山公司，約定老闆喺酒店對面，公司寫字樓等，交埋錢，搞埋手續就等星期一開會再見行山領隊嘞。

打算先行吓附近地方，午餐後再遊皇宮。一支公行出路口，路邊三輪車伕叫住我，我對呢尐車伕好有戒心，硬係覺得佢想搵我老襯。其實搵笨花招嚟嚟去去都差無幾：一係講咗半個鐘，吼住你唔覺，就踩夠一個鐘，又或者講過價錢唔算數。咁當然亦有老實車仔佬，好！今次為咗支持 local ，同時又試下你係邊類人，同佢講好，15 蚊美金，只踩半粒鐘，㤺死佢詐誤會，我仲大大聲話 ONE FIVE 。上車。

果然不出我所料，踩咗 15 分鐘，佢都冇意思回頭！咁即係出第一招喇。我話我有約會，要佢兜轉頭，好彩我對附近地區都略識一二，佢唯有回頭，冇耐我叫佢停喺三輪車站，呢區係我酒店附近，我都好熟。我畀十五蚊佢，佢居然再出第二招：佢話一百五十蚊！你唔好食埋人隻車？我話，我講明 15 ，係 ONE FIVE 呀，如果唔收就搵警察 ⋯⋯，佢奈我唔何，就咁算數。

去旅行，又唔使話唔坐車仔，不過事事小心尐，有人要搵你老襯，其實係常態。Hah ，下次應該搵張紙叫佢寫低貨幣、銀碼、時間 ⋯⋯，咁就少爭抝喇。

咁又到咗中午時份，搵間餐廳仔，叫咗份 momo 加支可樂，埋單只係 230 Rupee 盧比，即係 2.3 美金！所以話，喺加德滿都食嘢，使乜理價錢！回想車仔佬收咗我 15 蚊，即係1500 盧比，呢半粒鐘車仔，以本地生活水準計，就一尐都唔平喎。不過去得旅行，就唔計得咁多喇。

小館子家爺仔乸生意，老豆阿媽喺廚房，兩位小姐喺鋪面，氣氛非常親切。隔籬枱有兩個大男人食客，見我同兩位小姐溝通有尐困難，佢又識英文，就出手相助，跟住好自然就打開話匣。喺尼泊爾，因為居喀兵嘅関係，不少尼泊爾人對香港都知一二，知道我有香港背景，就住香港話題天南地北噏一輪。講講下，佢話：Hong Kong WAS very good。我笑住話：Was ！huh！大家相視而笑（苦笑）。

十粒 momo 都食唔晒，埋單起程去睇皇宮，皇宮就喺加德滿都名店街 Kantipath 對面，上次嚟失諸交臂，冇時間入去睇，只係喺門口同高大親仔侍衛影咗張相。今次畀 500 盧比入場可也。乜話，又要留低背囊，又唔准帶相機！冇計嘞，錢又畀咗，只好隻身闖皇宮喇。

 2006 年，革命後，尼泊爾廢除皇室，皇室人員限令離開納拉揚皇宮 Narayanhity Palace，皇宮交還政府，此後就變成皇宮博物館，展出尼泊爾皇族歷史，除一般皇族照片、油畫、老虎皮、鱷魚皮等矜貴陳設外，最特別之處，就係皇宮後面皇家花園內，保留咗一笪地方，永不裝修，維持當日原貌。由正門離開皇宮大樓，向右行去皇宮後面，路邊有個唔多起眼嘅路牌，上面寫住驚人指示： the Royal Massacre ！

2001 年六月一日星期五晚上九點，皇宮人員一齊食過每月一次嘅例牌皇家飯 monthly royal reunion dinner 後，就由主樓大餐廳走落御花園。一入御花園就係一間單層平房，第一間房就係 Billard room ，皇家人員就喺度休息談天。頭先晩餐中，國皇 King Birendra 同阿太子Crown Prince Dipendra 就住皇家婚嫁問題有好大抝撓，當晚太子飲大咗，又揩咗唔少 hashish （印度大麻尐咁嘢），態度梗係有尐過份，皇帝就喺飯枱省咗佢一餐，太子唔高興，自己走返房。

一個鐘後，太子摵住一大袋嘢嚟到桌球房，佢喺袋中掹出一支法製 SPAS-12 步槍，走向皇帝老父，一槍就打中老豆，繼而再向天花板開多一槍。趁其他人走去救皇帝之際，太子再出門口攞多支美製 M16 來福槍（？點解冇人去撳住太子？），皇家屠殺由此開始，桌球室內，差不多無一倖免，全部都係皇家親戚！太子攞住 M16 走出花園，佢阿媽  the Queen  Aishwarya 追出花園質問太子點解咁做！結果，太子連阿媽都殺埋！尐子彈窿，到而家仲清清楚楚喺水池邊嘅牆上見到。

太子唔知係咪已經黐咗，佢企喺水池中間向自己開槍，結果有六槍打中背脊（？點樣可以用M16打自己背脊？），一槍打中左手。咁都唔死得，喺醫院昏迷咗三日至魂歸天國。又因為皇帝已死，太子根據憲法登位成皇帝，佢就喺昏迷中做咗三日皇帝。又因為憲法保障皇帝不受檢控，咁樣，法院都唔可以控告任何人。

呢次皇家謀殺，包括太子自己，共有十人死亡，四人受傷，皇族當然係一個重創。

結果，皇叔 Gyanendra，喺輔政三日後，坐正登基為皇。正因為前朝 King Birendra 好得民心，而呢次皇家謀殺實在太過詭異，好多陰謀論，當然加上國內矛盾等等炒埋一碟，就導至2005年，毛派及其他反對派發動政變，直接導至 2007年修改憲法，第二年 2008年五月28日，尼泊爾民主聯邦共和國正式誕生⋯⋯。

昨日嘅皇宮，就係今日嘅博物館，父母親帶住細路嚟緬懷皇族光輝歲月，同時記取歷史教訓，呢尐咪就係一代傳一代嘅 Legacy 囉。

裏面影唔到相，就喺門口影多幾張，之後行返出 Thamel 。記得五年前2012 年五月喺度行過，而家再行，將舊記憶帶返眼前。今日時間唔多，只係急步而過，打算聽日再慢慢行。

又係煩惱時間 —— 晚飯，食咗個印度餐加焗薯仔，仲有罐額菲爾士啤酒，雖然食唔晒，但都算食得幾好。

行過爆渠水浸街嘅小巷，信步返返酒店，咁又一日，聽日

再噏過

嚤囉

2017.05.12 Sydney , Hong Kong, Kathmandu

2017.05.12 Sydney , Hong Kong, Kathmandu 

舊年，用 77 日，兜地球行咗一個匝，年尾返返雪梨屋企，以為好多時間畀我寫返環球回憶錄，點知幾個月落嚟，屋企搞呢搞嚕，又要家居維修，又要同孫女玩，最後，2017 年都就嚟過咗成半，環球遊記只寫得日本同海嵾威段！各位，信我，有拖冇欠，狗年未到，一定搞返掂佢。

今日，國泰 C162班機戴我去香港，即轉機飛尼泊爾。由今日起，又有個多月嘅新遊記因此而生，所謂，舊債未償，新債又舉。不過，欠債纍纍，正正係我繼續生存嘅動力，我當然慶幸仲有心有力去借呢筆債。

送機閘口別過愛妻同大小姐，上機去也。唔通真係旅遊淡季，架機大把吉位，任坐任瞓唔嬲，如果飛夜機就發達喇！

世界咁大， 個 bucket list  咁長，去過嘅地方，其實唔多想再去。不過，今次重訪尼泊爾有兩大原因：

偶然同人講起，有個叫「天與地」嘅節目，幾個藝員冇爬雪山經驗都可以參加。即劾搵資料，原來真係有咁嘅團，參加者無需經驗，行程亦以行山 trekking 為主，不過其中一日，會登上一個叫 Island Peak 6189m 嘅雪峯，並且登頂。當然，登頂前會有訓練，而且會有三晚住喺island Peak 嘅 Base Camp，仲係野營嗰隻。我未試過用雪爪冰斧、未試過喺 5000 以上露營，咦，咁又幾吸引噃。

再者，2004 年 4月，尼泊爾經歷又一次大地震，Everest Base Camp 雪崩，造成傷亡；古城加德滿都，好多歷史古蹟，頓成敗瓦於頃刻。今次有幸重遊，都想睇下百廢如何再興，人民又如何面對災變 ⋯⋯ 。

呢個 EBC 行山加埋 Island Peak 三日，再加些少加德滿都左近地方活動，頭尾 廿幾日，跟手飛德里，進入我從未踏足過嘅南亞次大陸 —— 印度。

印度，從來都唔喺我嘅 list 裏面。不過，泰姫陵，係都可以一去嘅地方。以前，我搵踩單車資料時，知道印度北泰姫陵一帶有條踩車路綫，咁啱，開旅行社嘅老友 Peggy，佢同印度朋友有尐 La Lung ，一開聲，佢就幫我出咗個好有趣嘅團，而且全團只得一個團友，就係我自己，司機、導逰、單車，住宿、內陸飛機、火車全包 ⋯⋯ ，只招呼我一個！咁貼身嘅服務，又真係未試過。即刻 ，Whatsapp 畀全世界最惜我嗰個，並且畀條單佢找數。佢冇托手踭，即㘩！歌仔都有得唱： don't thing twice is alright ，去馬！

個印度團以德里做大本營，頭兩日喺德里活動，跟住搭火車去 Agra ，就係泰姫陵 Taj Mahal 嘅所在地，然後開始踩單車行過幾個城，沿途有兩晚會住入 tent，個中風味如何？到時再話畀大家知曉。火車返德里之後就飛 Varanasi ，嗰度係暢遊恆河嘅好地方。當地遊行社仲安排一晚睇波里活，唔係睇戲，係睇印度朋友點睇戲，據說，一睇到波里活，尐觀眾就 Hi 到不得了，睇觀眾過癮過睇戲，應該非常有娛樂性。

飛返德里後，再 Hea 一兩日，兩個禮拜嘅印度之旅，就喺德里結束。

跟住飛香港，展開一段自 1992 年以來，未試過咁長時間逗留喺香港嘅日子！兩個月，可以做好多嘢。逐一搵老友傾偈，三三兩兩、個別小組，係我首選。又或者以香港為基地，三五七日，短時間外遊，亦係我所好。再唔啱，港九新界離島，遠足單車游船河又係一樂也。總之節目多多，到時再約喇。

Hah，懶人就係咁嘅嘞，梗係要困咗喺架飛機至撩得出幾個字嚟。寫下寫下，國泰機就登陸赤臘角，架機遲咗，得返45分鐘轉機，即刻跑去登機閘口。原來仲好 fit ，跑到閘口，仲有大把時間等上港龍機𠻹。

五粒鐘就降落加德滿都 Tribhuvan 國際機場。為方便旅遊業，尼泊爾可以造落地簽證，海関外擺咗好多部電櫃員機咁樣嘅自助簽證機，不過進展好慢，我多囗問聲，唓，原來如果有相嘅，係可以用傳統手填表格！人手梗係快好多，再交美金 40 蚊就買到 30 日旅遊簽證。

好快搞掂手續，拉住行李出閘。機場外行人路上，企咗一大排手揸住人名紙等接客人嘅人，離遠就睇到我個名，走埋去同行山圑職員相認，個心即刻定晒。

黑孖孖嘅加德滿都，昏暗燈光睇到街上景物，一如五年前嘅印象，加德滿都，仍然貧窮如昔。唔使半粒鐘車程，駛入窄窄嘅 Thamel 小街，呢度係加德滿都旅遊中心區，而家夜孖孖，仲有少許舖頭射出嚟嘅微弱燈光，遊人稀少，原來，而家正開始踏入旅遊淡季。

住嘅旅館喺正 Thames 大街，夠晒方便，不過，而家好眼瞓，入房手續搞得嚟，又話半夜三更喇，唔瞓覺有乜好做，聽日⋯⋯

再噏過

嚤囉