2017.05.17 Phakding 2610m to Namche 市集 3440m

2017.05.17 Phakding  2610m to Namche 市集 3440m

我係慣早起身嘅人，唔使六點半，就執好晒嘢坐咗出餐廳等食早餐。呢尐行山團都好大程度我行我素，你出嚟餐堂坐定定，自己睇住餐牌點餐，完全唔使理其他人，總之係時候出發時，就搞掂一切，自己 daypack 自己孭，個大袋就鎖好擺喺房，挑伕自然幫你孭走去下一站。

今日餐堂有尐特別，一眾領隊及當地人都圍住電視，原來二十年後恢復嘅地方選舉，個結果陸續揭曉，第一次真正民選代議士，尼泊爾人梗係関心喇。

講好九點出發，呢件美國佬八點三個骨至浮（音葡）頭食早餐，大人大姐，又唔好意思兜口兜面講，卒之九點半準時出發。咁，係咪領隊應該同呢件美國佬講下呢？

喜馬拉雅山係年輕山脈，印度扳塊揳咗喺亞洲板塊底下，推下高尐，推下高尐，將中尼邊境呢處，推高成世界屋脊，全世界十座高山，有八座喺尼泊爾境內。呢尐造山運動，引致扳塊互相壓逼，潛藏巨大能量，睇下幾時唔好彩，一但突破臨界，就係造成地震嘅元兇。2015年4月25日，7.8 級地震，尼泊爾成萬條生命就此斷送。地震亦引起雪崩，額菲爾士峰大本營 EBC ，就死咗二十二人，其中有外來登山者，亦有雪巴嚮導。

美國佬話：吓？即係話今日嘅喜馬拉雅山，係高過噚日嗰個？我哋齊聲話：咁就梗係！呢件美國佬，已經四十幾歲人，成功靠「父幹」，連呢尐初中地理常識都唔知，真羞家。

望出窗外，由噚晚開始嘅緸雨，而家仍然濛濛，我哋冒住小雨出發，雨太細，毋用雨具。哈，果真天公造美，愈行愈好天，連件外套都除埋，行得好舒服。

行行重行行，我哋出發得早，沿路都見到細路返學。細路仔恤衫長褲，細路女長褲外再加短裙，十分有特色。山區細路由細行到大，半粒鐘、一粒鐘行返學係家常事。佢哋多數冇大人帶返學，沿路只見：大個帶住細，拖手上樓梯。咁樣嘅畫面，見完又見。佢哋又唔怕同我哋打招呼，行山人，行到氣喘如牛，見新力軍，都係一帖清涼劑。

由 Phakding 至 Namche ，中途又要經過撿查站，出示登山證就過關，多數行山團都順便喺呢度稍事休息，所以檢查站前空地，經常聚咗好人。我就費事等喇，搞掂手續，即刻出發。

由 Lukla 開始，去到 Namche 市集呢一段路，都未進入 Khumbu 河谷，我哋要行過一座又一座山。如果以前，就要好似忍者小靈精所唱：又越過高山又越過谷。要做好多上上落落至過到一座山。不過，尼泊爾地位特殊，有好多國際組織資金援助項目，起吊橋係其中之一。未到 Namche 市集前，我哋要過好多條咁樣嘅吊橋。吊橋多數喺山腰連接對面山腰嘅山路，咁樣就慳返走落河谷再行返上山呢段路。造福鄕民，亦令海外行山者，慳返唔少腳骨力。最初，見到咁樣嘅吊橋，當然驚為天人，又咁樣，又咁樣，搏命影相。之後，見得多，咪又係橋一條。

午餐後，行返落河谷，沿河直上，呢條河由前面兩座尖山中間深谷，蜿蜿蜒流出。抬頭望，兩座尖山山腰有兩條高架吊橋連住。 2012 年，我喺呢度影過相，當年只得一條吊橋，而家新橋起得更高，舊橋已經廢棄唔用。我哋行上呢座山，跨過吊橋，就已經喺對面山山腰，真方便。

行咗一日，知道美國佬係最慢嗰個。用佢嘅蟻速，我死都有份。所以行咗一日，已有共識，就係我哋先行，由得領隊同美國佬喺後面慢慢嘆。不過，其實咁樣唔係幾公道，佢自己一條友霸晒領隊嘅注意力，咁講解路經嘅山勢、幫手影相⋯⋯等等，就冇我份，我就係被忽略喇。好彩，我係第二次嚟，我寧願行快尐。再者，自拍係我專長，我OK嘅。

三人行，人生資歷最深係我，行得最快嗰個又係我。今日雖然只行 12 公里，但總共上昇高度係一千一百，即係話好多上斜，雖然都有尐難度，但一如既往，毫無懸念，我又係第一個到達 Namche  市集。

Namche Bazaar ，個名就係市集，佢係喜馬拉雅山區連接 Lukla 機場嘅重要市鎮，更重要嘅就係：過咗北面後山，就係 Khumbu 山谷，大家應該不斷聽我講 Khumbu Valley 。究竟有乜咁巴閉？額菲爾士峰大本營 Everest Base Camp (EBC) 就坐落於 Khumbu Glacier 之上，而四個高營都必須由 Base Camp 開始登上。即係話：（以前）要登上額菲爾士峰，就要經過 Nameche 市集。點解係以前？因為而家嘅登頂者，佢哋冇你咁好氣，慳返尐力，由 Lukla 用直升機直達大本營，再去第一二三四高營，然後登頂，呢班登頂攀山者，根本唔會行山！行山，係我呢尐二打六，只去大本營至會做嘅事也。我哋行緊呢段路時，不斷見到直升機來來回回，就係接載由大本營落山嘅登頂人士。極有可能其中有香港登頂女教師，都唔定？

再者，Khumbu 河谷就係雪巴人 Sherpa people 嘅發祥地，之後再逐漸向外擴散，甚至去到藏區。雪巴人對登山嘅貢獻，毋容置疑，呢個地區亦因之所以名聲大噪。

Namche 市集其實係一個基本向南嘅半碢形大斜坡，幾乎全無平地，所有建築物都依山而建，全部南向，咁獨特嘅形態，我離遠就認得，三步併埋兩步，走上 Namche 市集。市集就係一層又一層嘅石級，一級級起滿一座座兩至三、四層平房，樓下多數係舖頭，當然最多都係賣行山有関用品，及尼泊爾特產旅行手信，例如高山羊毛製品等等。而我最難忘嘅，就係一間叫做 Cafe 8848 嘅咖啡室，唔單止因為佢用 illy 咖啡，最重要嘅係佢有免費高速 wifi。即刻入去叫杯 latte ，攞埋杯嘢，坐出露台一路飲，一路 FaceTime 愛人喇。

我飲埋咖啡，講到口水乾，成個鐘後，至見到美國佬嘔晒白泡上到嚟，後面領隊施施然跟住。咁我都收綫，一齊埋棧嘞。

現代化與鄕下化，就由 Namche 開始，呢度都有套房、自己廁所，冷熱水冲涼 ，仲有要畀錢，不過無限量 wifi ⋯⋯。過咗 Namche ，就樣樣都原始，而且愈上愈差。Namche  就係一個分水嶺。

話咁快又晚飯，見到餐牌又有鐵板，仲使問，即點鐵板牦牛扒跟飯，果然唔錯。愈夜愈凍，又冇乜搞作，早尐瞓覺，聽日

再噏過

嚤囉