2017.05.24 Dingboche 4410m to Chhukhung 4730

2017.05.24 Dingboche 4410m to Chhukhung 4730

第二味主菜，亦係呢個行程嘅重頭戲 —— 攀登 Island Peak 6189，正式出籠。

回顧一下由加德滿都飛入 Lukla 起計，開始行入山，至到噚日完成額峰營為止，總共用咗八日時間，所需時間，基本跟足預計行程。呢八日所到嘅地方，其實我五年前都到過。今日開始嘅行程，對我嚟講，絶對係揭開歷史新頁，每一步，都喺我生命歷程上，創造新嘅記錄。

我講過 EBC 額峰營，根本就唔係喺額菲爾士峰山腳，而我成日講嘅 Khumbu 河谷，亦唔係源自額菲爾士峰！反而我哋今日嘅目的地 Khhukhung ，佢附近嘅地理環境，同額峰有更接近嘅連繫。

噚晚住宿嘅 Dingboche ，旁邊東面嘅河流 Imja Khola ，就起源自額峰南面些少 Nuptse 峰 7861 嘅三條大冰川（ Nuptse、Lhotse Nup、Lhotse）。過晒呢三條冰川，就係 Island Peak。其實 Dingboche 客棧門口小路，就望到成個 Imja Khola 河谷，視野上，沿小路一直望向河谷盡頭，零零舍舍一座尖畢甩嘅山，就擺喺前方天邊，峰頂積滿白雪，呢座就係 Island Peak。由呢度睇，好難想象我可以爬上山頂！

前日入額峰營，離開客棧後就向西行入Khumbu 河谷。今日去 Island Peak 就向東行入 Imja Khola 河谷。離開村鎮冇耐，就行入河谷山路，呢段路，雖然唔似 EBC 咁多人行，睇個樣，都係幾熱門嘅路徑，沿途不時都遇到行山人士。今日行呢段路，仲有一個奇怪之處：咁上下就有成身跑步裝束嘅跑山人士跑過，原來五日後（五月廿九日），一年一度嘅額菲爾士馬拉松就會舉行，42 公里全馬，由額峰營跑去 Namche 市集，而家遇到嘅跑手，就係實地作最後衝刺練習。

前個十日八日，我一馬當先，成日帶頭，今日我試下包尾，總之成日跟住美國佬，親身感受下行慢慢行嘅感覺。

山路愈行愈偏僻，入 Khhukhung 村前一大段路，到處都係石頭。原來呢度係四條大冰川冰堤 terminal moraine 交匯嘅地方，四條大冰川將山上大大細細石頭推到呢度，唔怪得咁多石頭喇。

今日只係行咗五公里路，未到中午，已經嚟到 Chhukhung。食過中午飯，我哋就為登峰作凖備。首先就同兩位攀山嚮導見面，就係呢兩位雪巴爬山專家，將會帶領我哋爬上 6189 高峰。工欲善其事，必先利其器。爬山裝備可以喺客棧租到，我哋要租嘅係頭盔、攀登吊帶連上山下山扣、攀山靴、雪爪、冰斧。咁樣嘅裝備，租金承惠 100 美金。

美國佬自己知自己事，又自嘲一番，就講笑咁問兩位攀山嚮導，問佢哋會唔會抬人上山。意思好明顯就話佢自己水皮，可唔可以抬佢上山呢？呢個當然係爛 gag 喇。兩位嚮導即時反應：「我哋唔會抬人上山，不過就會抬人落山，如果係屍體嘅話」。幽默而不失尊嚴，笑得我吖。

今晚，我哋又要將行李再執一次，聽日會住喺 Island Peak Base Camp，係紮營嗰隻，為咗輕裝上上陣，如果同登山無關嘅嘢，就會留喺 Chhukhung 呢度。至於會喺營地幾耐，就視乎天氣而定嘞。

而家果然係淡季，Chhukhung 呢度，今日只得五、六個客人。比較額峰營外嘅 Gorakshep ，呢度更加偏僻，餐牌上除咗雞蛋外，就冇其他肉類，奄列已經係上佳菜式，早午晚都要食蛋，來回兩日，咁就要食四餐蛋，真悶蛋。

可能畀四條大冰川包圍住，呢度特別凍，太陽未落山又落起雪嚟，縮喺餐堂，食完蛋麪就瞓覺。今晚一定要瞓得好好，聽日入咗 Base Camp ，未必有覺好瞓。

再噏過

嚤囉仔