2017.05.25 Chhukhung 4730 to Island Peak Base Camp 4970

2017.05.25 Chhukhung 4730 to Island Peak Base Camp 4970

Chhukhung 絶對係偏僻嘅村莊，建築物都係鋪頭同客棧，居民住喺呢度，都係做為登山者提供服務嘅生意。而家係淡季，全條村就得我哋三、五個客仔。

一宿無話，食完奄列早餐就出發，今日，因為我哋要輕裝上陣，所以 兩位 Porters 都孭少咗好多。理論上，今日我哋三個人已經交咗畀兩位登山專家負責，但係領隊 Bimel 都同我哋一齊行，佢同兩個 Porters 只係陪我地去到 Island Peak Base Camp，稍後就回頭返返去 Chhukhung  ，等登山完畢後，再返 base camp 接返我哋。

行入 base Camp 條路非常簡單，就係喺高山腳下山谷大平地直綫前進。因為山谷係最低點，兩邊都有「山脊」包圍，「山脊」其實就係四條大冰川嘅末端冰堤。偶然，我哋會行上冰堤頂，咁就會睇到部份冰川。

唔知係唔係淡季嘅關係，呢條路絶對係非常非常偏僻，成朝行完咁長路段，路上遇到嘅人唔夠五個，而我哋三個人又拉得好開，兩位攀山領隊又要喺後面睇住美國佬，好多時，咁大個望極都望唔見邊嘅山谷，就得我我一個人喺度行。四野無人個感覺實在好奇特：自由、孤獨、舒𣈱、恐懼 ⋯⋯，兼而有之喇。

路線簡單，不過都好多上上落落，沿途不時都有食 energy bars、豬肉乾補充體力，中午前就行到 base camp 。今日只係行咗一個朝早，都覺得有尐攰。

Island Peak Base Camp 4970，座落喺三條冰川末端交匯處，其中包括源自世界第四高峰嘅洛子冰川，而南邊係 imja Tsho （湖）。營地一早已經紥咗十個八個營，我哋每人都有一個自己嘅獨立營幕，營地中間有個廚房營，裏面有石砌嘅爐灶，睇個樣，個營都紥咗喺呢度好耐。廚房側邊就有餐廳營，裏面有枱有櫈，枱面有冲茶、咖啡設備，雖然簡陋，但係行咗一朝，他他條條坐喺䁔笠笠嘅營，歎返杯啡，都真係非常享受。

行李一早放咗入自己嘅營，稍作整頓就走去餐廳營食午餐，野營需要有膳食提供，所以呢個爬山行程，除咗兩個攀山領隊外，我哋仲要請多個攀山廚師隨隊出發。

今日嚟到 Base Camp 嘅第一個大任務，就係學習使用攀山工具。午餐後稍作休息，就即刻帶埋攀山工具去營地旁邊嘅斜坡上堂，斜坡其實係冰川末端堤 terminal moraine ，都有三幾十米高。我哋戴上頭盔、着上登山靴，攀山領隊喺斜坡上釘上登山繩索，再幫我哋着上攀山吊帶，之後，簡單介紹點樣使用上、落山扣，就開始實習。其實技術只係非常簡單嘅手扳眼見工夫，一尐都唔複雜，上落兩三次，就基本掌握。呢個 base camp 係四千七，爬繩上上落落，唞晒大氣就梗嘅嘞，美國佬當然搞到面青口唇白，不過都呢尐簡單操作，佢都係做得到嘅。

練習完畢，我哋企係斜坡腳打牙骹。今朝行入 base camp 呢度，一路都睇到 Island Peak 嘅雪峰頂，個頂又尖又斜，實在都幾嚇人嘅。我話：咁嘅款，我其實都有尐擔心唔知上唔到頂。美國佬竟然講咗一句全程最啱聽嘅說話：「 Kin, if I were you, I'd think that if this  yankee can made it why I can't 」。My words ！呢句絕對係我內心嘅説話，識佢咁耐，只有呢句說話我百分百同意。

至此，全日活動基本完畢，但係仲有一個重要任務，就係好好休息，即刻貢入個營幕裏面。出面好大風，其實都幾凍，原來個營都好擋風，加上出猛太陽，瞓喺營裏面完全溫暖，非常舒服，可惜光燦燦，輾轉反側，碌嚟碌去都瞓唔著。太陽未落山，又出去餐㕔營幕食飯，三爬兩撥食完又返去自己個營再瞓過。

日光日白，點解要逼自己瞓覺呢？其實，除咗學爬繩外，今日嘅主要目的係好好休息。原來聽日活動，係喺凌晨零時開始，如果今日晏晝瞓唔著，就即係成日都唔使瞓嘞。而且聽日係連續十六粒鐘勁揪活動，冇精神、冇體力，好大鑊也。

估都估到喇，愈想瞓就愈瞓唔着，結果，成日都冇真正瞓過，只係眯埋眼喺個營裏面攤咗幾粒鐘。話時話，如果咁都算露過營，咁，喺四千九野營，係我人生嘅另一個記錄嘞。

是夜也，未能一宿，當然亦無話。碌嚟碌去，終於碌到「第二朝」—— 凌晨零時零分，撳熄 iPhone 鬧鐘，換過行山裝備，帶上頭燈，行出帳幕 ⋯⋯，跟住點樣？且聽我

再噏過，

嚤囉仔