2017.05.26 Island Peak Base Camp 4970 to Island Peak 6189 back Base Camp back Chhukhung
今日絶對係大大鑊嘅行程，最慘係噚日下午黃昏完全瞓唔入眼，即係話，連埋今日活動，兩日計埋，總共有連續 40 個鐘不停四圍䠮，咁梗係唔少嘢喇。今日將會發生好多事，都係我嘅人生第一次，呢一日，當然係我人生重要嘅一頁，
零時十五分，換晒行山裝備，戴埋夜行頭燈，走出帳幕。此時，四野黑孖孖，下午大風吹到頭都甩嘅山谷，入夜後，原來一粒風都冇，天氣非常穩定。而家就明白，點解要揀半夜三更出發嘞。氣溫係低，但因為冇風，第一次著住行山公司提供嘅羽絨 summit 大褸，已經夠晒暖，非常舒服。
食過廚師預備嘅簡單早餐，入好飲用水，檢查所有裝備，就集合出發。今次行程分成兩段：行山 trekking 、爬雪山 snow mountaineering 。即係話，裝備都應該有兩套，當行山嘅時候，背囊亦應該袋住爬山裝備。咁就真係麻煩嘞，一來，我哋個背囊又細，塞唔落咁多嘢；二來，我哋咁鬼弱雞，孭住幾公斤 daypack ，都唔係大問題，如果孭埋咁多重嘢，又唔知掂唔掂噃？下過，攀山領隊一定會有方法令人客滿意嘅，橫掂廚師冇乜嘢做，今日佢變身 porter，一個大袋，孭晒我哋三件友仔嘅爬雪山用具，隨隊出發。
凌晨一點，正式起程。起程亦有隊型，今次，成日包尾嘅美國佬排咗頭位，我就做咗包尾大番。好明顯，因為成隊人嘅行速要統一，要一齊行，所以就以最慢嗰個為依歸嘞。我哋首先沿住冰川側堤邊，行上緩緩上坡山路。四圍黑孖孖，頭燈只照往自己腳前幾米地方，淨係識跟住前面行，完全唔知周圍乜嘢環境。雖然係佈滿大大細細嘅石頭，條路都唔算難行，咁樣嘅路，行咗半粒鐘左右。
忽然嚟個左轉，跟住，就係無止境嘅上山路，仲係鬼咁斜嗰隻。山坡到處都係人咁高嘅大石，而條路就鋪滿一頁頁嘅扁平碎石，我哋上緊嘅係一個佈滿頁岩嘅山。N 咁多年前，喜馬拉雅呢度係汪洋大海，往生動物連同砂石沈葬海底，一年復一年，一層又一層，隨年月消逝，變成一頁一頁嘅頁岩，一頁又一頁咁寫成喜馬拉雅呢本地球演化歷史巨著。唔知邊一日開始，印度板塊東移，喜馬拉雅衝出海洋，挺拔而起，成為世界屋脊。頁岩裸露空氣中，受極寒、暴曬交替煎熬，佢哋一片片剝落，散佈山頭。
呢一頁頁嘅歷史見證，雖然好有詩意，但係因而扁平嘅關係，踩上去非常跣腳，實在都幾危險。當遇到一大疊頁岩堆喺路面時，攀山領隊就會踢晒佢哋落山，幫我哋清除障礙。一片片頁岩碎片瀡落山，即時引起連鎖反應，帶埋更多碎石碌落山，砰碐磅硠，歷久不散，加埋山谷回音，實在非常嚇人。雖然黑孖孖唔係幾睇到地形，憑落石入谷之聲，我哋知道原來已經身處險地 ⋯⋯ 我哋而家係爬緊一個唔見底嘅大斜坡。
繞過一嚿嚿巨岩，踩住一片片碎石，一路向上爬。仲唔好忘記，而家正係身處於五千幾高海拔，氧氣唔夠平地一半，美國佬行平路都喘晒大氣，今日咁嘅運動量，仲唔係攞緊佢條命咩，行唔夠三、五步，佢就要停步唞唞氣，進度非常緩慢。哈，不過，原來咁有咁好，因為大把時間攤抖，我由山腳行到上山脊，幾乎完全唔覺喘氣。為咗等佢回氣，我行到咁上下又坐低，咁上下又飲下水、影下相，就算五千幾爬斜坡，原來都可以咁他條。
睇住四周本來一片黑暗，東方天底逐漸曚朧映出山嶽輪廓，晨光雖然畀高山所阻，光華仍然喺群山背後散發異彩，雖然未見太陽，晨暉光芒已經拓出山巒起伏嘅大地。我哋愈行愈光，行緊嘅山勢亦一目了然，回望之前路徑，真係唔敢相信自己喺黑暗中，曾經行過尐咁驚險嘅路！
喺前幾篇，我話行上Kala Patthar 睇 Khumbu 冰川，個景靚到人窒息，而家企喺 Island Peak 山坡東望，直情已經死得，原來一山真係還有一山高。呢度雖然睇唔到額菲爾士峰，前面一列都係七、八千嘅世界級頂峰。當然，高峰慣見亦平常，卻原來最點睛嘅反而係三條大冰川：Lhotse Shar、Imja 、Amphulapcha Glacier，各自由高山谷裏面湧出，三條白龍沿山勢滑下，一齊匯集喺 Island Peak Base Camp 旁邊，冰川匯集盡頭又變成共同嘅 Terminal moraine，冰川末端溶解嘅水，就係前面 Imja Tsho 高山湖嘅源泉。企係㞳峭山坡，仰望蒼穹，雪峰、冰川、高山湖 ⋯⋯ ，原來，冰川嘅世界，真係可以靚成咁！
俯仰讃歎之間，攞出水壼呷一啖，唔知係咪個景靚過頭，神不守舍，居然跣手倒瀉，成個水壼嘅水付諸東流！真大劑，一滴水都冇，點捱埋跟住嗰十粒鐘！惟有見步行步喇。
用美國佬速度，進度非常緩慢，足足行咗四粒鐘，卒之都由碎石山腳行上山脊。
我話碎石山坡驚險，都係「驚」啫，原來喺山脊行走，就真係危險嘞。扶住山脊石牆，雙手抓緊石罅，雙腳踩喺大約半米闊嘅石「路」，然後一步一步好似蟹咁打橫跣住行，面向石牆，背脊下面就係唔知幾深嘅懸崖，咁嘅姿勢唔可以擰轉頭，明知唔可以差錯腳，就只係集中精神行過山脊，當然又係大步檻過。
山脊嘅另一邊連住一細幅平地，呢邊景觀完全唔同晒。細幅平地已經畀厚厚嘅雪覆蓋，平地後面斜坡就係一大幅一大幅冰掛，係一條條尖畢甩、㘣碌碌嘅典型冰鐘乳，直情好似睇緊 Frozen 冰雪奇緣咁款。只係轉個彎，就由石山變成冰天雪地，其實都幾震撼㗎。行到呢度，亦係第一階段行程嘅結束。太陽啱啱現身，即係話，而家係平時啱啱起身嘅鐘數，Nature call 又嚟，點能夠抗拒大自然嘅呼喚，大家行去山坡，面向住大自然鬼斧神工嘅雕塑，一齊唱一首大自然嘅頌歌。呵！舒服晒。
第二階段就喺雪地上開始，廚師 Porter 幫我哋孭上嚟嘅攀雪山裝備，而家出籠嘞。戴上頭盔，換返對登山靴，外加雪爪，再着上登山保護繩索 harness，掛上登山扣，落山扣 ⋯⋯，攀山領隊逐一幫我哋檢查，確保安穩無誤，之後，用條長繩穿過各人腰前扣環 carabiner ，並且綁實，咁五個人就串成一齊，從此，五個人就一齊行動。每個人左手拎住冰斧，就正式出發嘞。
離開呢幅小雪地，就踏上望唔見邊際嘅雪原，呵！原來我哋已經踩上高山冰川之上，腳踏雪爪，就可以喺鬆軟嘅雪地上行走，初初唔慣，都行到一仆一碌，不過，好快就掌握到節奏，就愈行愈順嘞。成串人行，美國佬梗係排頭位，雪地上行路，其實好攰好用力，尤其上斜路，加上，我哋已經身處海拔五千八、九，心肺、肌肉耐力都受到勁揪挑戰。領隊喺前面拉，成日行唔夠三、五步，就畀美國佬拉返轉頭，原來佢又要停低唞大氣，於是，成串人又企係度喇。
雪地上一串人咁行，我喺相片、電視電影見過，但唔明白點解要咁做。原來，冰川係會不停向下滑動，只係慢到我哋察覺唔到啫。企喺冰面睇，潔白平靜嘅冰面，好似好安全，但係其實充滿危險。冰川滑動時，會將冰體拉裂而形成好多裂縫，呢尐裂縫可以好窄，甚至好難察覺，但係，裂縫可以係萬丈深淵，跌咗落去實死冇生，而且屍骨都搵唔返，不過就可以保存好耐，等千百年後，可能出土做咗標本，陳列喺博物館都未定。所以咁樣串成一串，互相掹住，喺冰面上行走，就安全得多嘞。
如果呢尐裂縫好窄，我哋就喺上面㩜過。但係遇到闊嘅裂縫，又或其者有高低落差大嘅冰面，就會有鋁梯、固定繩索連接。因此，喺雪山嘅山徑上，其實已經有好多外加設施，幫助攀山者越過呢尐障礙。所以話，成功爬過雪山，千其唔好話自己有幾叻。我自己每向前一步，每創造一個記錄，其實已經有好多人幫緊我。冇佢哋嘅努力，我呢尐咁得意嘅經歷，絶對唔會發生。
呢一串五個人慢吞吞咁喺冰面上行，眼前一片大雪原，好似紅樓夢最後一回所言：白茫茫大地真乾淨。唔只乾淨，仲好寧靜，冰面上只係聽到雪爪挿落雪地嘅「颯颯」聲，當然仲有美國佬嘅沉重呼吸聲。偶然，山上有落石碌落嚟，「極力格嘞」劃過長空，領隊即刻抬頭四圍望，睇下落石由邊度碌落嚟，嗰種聲響都幾得人驚。
前面白色雪峰愈行愈近，峰頂就愈嚟愈高，峰頂下白色山坡卒之變成眼前一幅直畢甩嘅雪牆，我話佢係牆，因為佢直，咁又唔係 90 度咁誇張，不過，七、八十度走唔甩。但係，佢當然唔係牆，有冇一幅二百米咁高嘅牆？我哋而家就企喺 Island Peak 峰頂二百米垂直山坡腳下。山坡釘咗固定登山繩索 fixed ropes ，呢尐繩索唔係成條由峰頂落到山坡腳，而係分成四段。又因為一條繩每次只供一個人上落，所以每段都釘咗四、五條繩，以供多人同時使用同一坡段，咁就可以加快上落山速度。
全隊人串住行嘅時候，美國佬排頭位，而家嚟到固定繩索，全隊人鬆綁，我就一馬當先的嘞。
登山繩開端前，冰面上有一條約三米闊兩米深嘅裂縫長溝，上面平放咗一條鋁梯，我哋要利用鈻梯跨過呢條冰溝。靴底雪爪行鋁梯實在非常論盡，絶對唔敢企直身行過去。我將腰前扣環勾落梯邊繩索，就四腳爬爬咁爬過鋁梯。
躝過鋁梯，就正式開始登山。以防萬一，首先將腰前扣環 carabiner ，扣實山坡固定繩索，再將掛喺右邊腰間嘅登山扣 Ascender，套入固定繩索。登山扣一邊有繩連住我腰間安全繩 harness ，我右手握住登扣沿繩索向上推，左腳雪爪釘實雪坡，撐直左腳同時猛住登山扣借力，登山扣嘅設計係只會滑上而唔會滑落，咁就可以用右手拉郁身體向上移動。右腳縮上向上爬，再繼續推上登山扣，咁又爬多一步。如是者周而復始，就一步步向上爬嘞。
咁樣爬幾步，當然唔困難，但係要攀爬二百米，當然就唔係少嘢喇。好彩係淡季，成個山坡都係得我哋呢隊人，當我用緊一條固定繩索時，上下都冇人，我就可以用自己嘅速度爬山，就算攰嘅時候，絕對可以停低撐住山坡回氣，雖然好似凌空掛住，因為勾住晒繩，其實都好安全。
爬完一段固定繩索，就要將身上成組登山扣環，轉移到高一段固定繩索。因為已經愈爬愈高，登山扣環再三檢查有冇扣好，慌死扣錯咗就大劑喇。如是者一段接一段咁向上爬，當然係體能同埋意志嘅考驗。當爬到雪坡中段時，我已經身處海拔六千米高度，成晚冇瞓過而且已經連續做咗十個鐘大運動量嘅活動，我成個人感覺瘟瘟沌沌，靈魂好似出咗竅，塊面同頭皮好似發麻有針拮咁，又喉乾舌燥。我好想飲水，但係一大壼水已經係爬石山時倒瀉晒。愈想飲，愈口渴。仰天長嘆，我會唔會渴死呢？遊日四顧，靈光一閃，不識雪山真面目，只緣身在此山中，我周圍嘅冰係乜嘢嚟？咪就係水囉。伸手喺身邊一𢱑，鬆軟碎雪一手都係，搓成一嚿擺入口，真係入口即溶，清甜解渴，原來真係天無絶人之路，感恩。
已經唔再口渴，但係仍然瘟瘟沌，呢種感覺，睇嚟都唔可以消除，惟有打醒十二個精神，經常提醒自己步步小心。連續攀爬二百米係我人生第一次，體力、耐力有好大要求，個腦真係曾經閃過要唔要放棄，當然係好短暫嘅一閃念，不過，呢種「放棄」嘅閃念，係我從未發生過嘅事，咁就反證，爬呢個雪坡，絶唔係易事。
卒之爬到登山固定繩索嘅盡頭，呢度係山脊，但未係最高㸃，頂峰 6189m 喺右手邊五十米處。中間又有一截繩索沿住山脊，通向峰頂。因為打橫行，唔需要再用 Ascender 登山扣，我首先用腰間扣環扣實打橫呢段繩，再三再四檢查真係扣實咗，就解咗 Ascender 扣，離開垂直繩索，開始打橫行。
咪住！呢個位置咁重要，我要影張相留念。相機喺我左邊肩帶，我改裝咗一個袋仔放相機。自拍一張後，拉開魔術貼將相機放入肩帶袋仔，正在預備起行，領隊喺我後面嗌：Camera Camera！我以為佢想我同佢影相，右手一摸肩帶相機袋，扁 tat tat ，相機呢？原來我以爲已經放咗相機入袋，其實魔術貼未解，相機跌咗出嚟，領隊睇住相機喺佢身邊瀡落山，於是大叫 Camera。想當然，我架相機一定直落二百米山坡！相機係大小姐送畀我今次旅行嘅禮物，不過都可以買過一架，但係記憶咭冇咗，就冇晒尐相喇。但係，咁又可以點？
事到如今，都費事諗喇，收拾心情，雙手捉緊繩索，打橫行去峰頂。因為水平打橫行，繩索嘅支持力冇垂直上升咁穩定，呢五十米路有危險嘅感覺。好彩都只係感覺，冇耐 ⋯⋯ 登頂！ 6189 米，登雪峰頂，兩個人生記錄，同時創造！
峰頂，係一個約三、四米丁方，菱形嘅傾斜平面。因為傾斜，企係上面，一尐都唔安全，隨時好似瀡滑梯咁跣落山。所以登峰前，要將腰前扣環扣緊峰頂嘅安全繩，之後就坐喺一串串佛經幡布條前，因為要尊重上面經文，千期唔可以坐上去，又唔好用腳踩住，於是，原來登頂後，只可隊正衿危坐咁坐喺度，真係郁都唔敢點郁。仲以為登頂可以打側手翻，真係天真，果然，是非經過不知難。
呢組人，我係第一個登頂，坐低冇耐，好快印度佬又到，兩條友仔坐喺度，郁都唔敢太大動作。坐坐下仲落起雪嚟，好彩有晒羽絨登頂褸，仲着咗雪褲，又只係飄雪，完全冇風，坐喺峰頂，一尐都唔覺凍。冇乜好做，就叫領隊幫我哋影相，落緊雪，四圍白茫茫，坐喺峰頂雪地又係白茫茫，除咗佛經旗幡係五顔六色外，幅幅相影出嚟都係白茫茫，鬼知係峰頂咩。
我哋坐喺峰頂唔走得住，因為要等埋美國佬。而家問題係：美國佬可唔可以成功登頂？
二萬呎高空，身處白茫茫世界，時間好似凝結住。都唔知過咗幾耐，聽到沉重嘅呼吸聲， Hah ，美國佬居然登頂！原來意志真係可以克服體能上嘅不足，美國佬一旦掛上登山繩索，半天吊嘅形勢根本全無退路，激發起嘅潛能，威力果然強大。呢十幾日，我一路話佢水皮，冇句好說話，今日我都要讃下佢，以佢咁嘅身型、體能，居然能夠完成 Island Peak 登頂呢個艱難功課，我要寫「服」字畀佢。
估唔到登頂後要縮埋一角，行多步都唔得。反而領隊佢自己解開安全繩，仲喺個頂四圍行幫我哋影相，我睇見都牙煙，又唔敢出聲講尐乜嘢，只好暗暗多謝佢冒險幫我哋留低人生咁重要嘅記憶。
相又影過，登頂功課又完成，喺茸茸飄雪中，沿繩爬返落山。人哋話，上山容易落山難。不過，用攀山繩嘅話，落山就好似食生菜咁容易嘞。我一馬當先，打橫行過 50 米山嶺，返到固定垂直登山繩索，解開左邊腰間 8 字落山扣 descender ，將固定繩索套入。左手捉住繩索上端，右手則捉住下端。雪爪踩實雪坡，再三檢查安全扣環，就開始落山。右手將下端繩 feed 入落山扣，左手掹住上端繩索以穩固身體位置，同時控制下降速度，完全毋須用死力，此時，需要技術遠遠多過體力。如是者，經過一段又一段繩索，好快，真係好快就落返 200 米山坡腳。解開落山扣時，一模，成個 8 字扣熱辣辣，係辣手嗰隻溫度，咁就係繩索同落山扣摩擦嘅結果，可知落山速度真係好快。
記否，登山繩索起點前有一條冰溝？又記否我喺冰峰頂跌咗相機？講你都唔信，相機由峰頂沿雪山波瀡咗二百米落山，居然就畀呢條冰溝截住，就瞓喺冰溝上鋁梯下方！相機係黑色，喺冰面特別搶眼。我一見相機，開心到大嗌： My camera！嗰時，我未知冰面危險嘅事，想話行落冰溝執返相機。領隊即刻阻止我，並且二話不説，先將自己用繩扣住鋁梯，再小心翼翼爬落冰溝執相機，之後再同我解釋冰面危機嘅故事。我咁都執返相機，雖然碌咗二百米落山，相機已經瓜咗，但係執返張記憶咭，飲得杯落喇。
喺鋁梯邊，等齊人之後，五個人又串埋一齊，行雪地返返小平原。廚師 porter 已經等緊我哋，佢帶嚟嗰壼熱茶，經過十幾個鐘後，已經變成暖茶。口渴咗咁耐，卒之有杯暖茶到肚，真舒服。我哋唔嘥時間，即刻除低攀雪裝備，換返行山靴，沿舊路行返落山。因為有兩個領隊，我哋可以兵分兩路，印度佬同我跟住一位領隊快步落山，美國佬照舊喺後面歎慢板。
除咗近山頂嘅碎石路比較難行，要用較多時間外，之後嘅落山路，我哋加快步伐跟住領隊，行動速度非常理想。我雖然行得幾快，但係個腦仍然瘟沌，冇法喇，因為至此，已經連續活動咗十三、四個鐘頭，我仲識郁，已經好感恩喇。
落山嘅路其實即係上山嘅路，不過睇嚟完全陌生，因為當我哋上山時，正係大地潻黑一片嘅凌晨時份。Island Peak 嘅東坡係我上過嘅最高山坡。上得更高，睇得當然更遠。呢一刻，我可以論斷：呢個雪景，係我見過嘅靚景 number one 。雪山、冰川、高山湖⋯⋯，遊目四盼，到處都係一幅幅造物絕佳畫作。呢度高到雀仔都唔嚟，靜到連蟲叫都聽唔到，應晒呢首「千山鳥飛絕，萬徑人蹤滅」，不過，遠望高山湖，又睇唔到「孤舟簑笠翁」，雖然有「寒江雪」，不過又冇人去「獨釣」喎。
由高望落，只要向湖嘅方向行，就包冇行錯，因為 Base Camp 就喺湖嘅堤岸邊。正喺目的地愈嚟愈近之時，肚仔響起嘅「大」自然嘅呼喚，就愈嚟愈緊急。其實，我嘅生理時鐘一向好準時，早上起身不久，呢單嘢就要去解決。但係，今日嘅相同時份，我正在爬緊山。到開始落山時，其實肚仔都唔係幾 likie ，不斷嘰哩咕嚕，發出警告。而家，雖然大本營在望，實在真係忍無可忍，趁去到一笪平地仔稍作停頓之際，我問領隊邊度係解決問題嘅好地方，佢手一指，我即刻掟低背囊，連仆帶跑飛奔手指之處。五千幾米喜馬拉雅，唔好旨意有大樹好遮「陰」；呢度寸草不生，連草叢都欠奉。領隊介紹嘅好地方，係亂石堆，佈滿大嚿矮石，再行近尐，原來地下都有唔少牦牛留低嘅嘢。哦，領隊果然好介紹，咁多生物都嚟解決，呢度一定係解決問題嘅好地方。搵一嚿大石，喺咁意遮住下，叫做心安理得，不過周圍極目所見，一隻生物都冇，鬼睇到你咩，如是者，我就好安心咁解決咗呢件大事，同時亦創下又一個人生記錄：海拔五千米，曠野辦大事。
行行重行行，終於返返大本營嘞，第一時間瓹返入自己個營幕，卒之可以打橫攤低唞一唞，雖然攤唞只係一粒鐘左右，已經非常舒服。
又喺餐堂帳幕集合，食過廚師準備咗嘅簡單食物，仲有一尐「後事」要處理。今日過後，我就剩返一支公喇。美國佬完成登頂後就唔得閒再行落山，佢一早就約在直升機喺 Base Camp 呢度接佢返加德滿都，而印度佬因利乘便又跟埋佢去。我就一早話咗，就算你請我，我都唔會搭，因為我想用腳完成整個旅程：我由 Lukla 行嚟，就要用腳行返 Lukla。毋需要好大口氣可以咁講，由呢度飛 Lukla ，「只係」三千幾美金，我畀得起。今日，我有能力自己行出去，點解浪費天生我材？他日，好似盧冠廷話：「我倆已是無力前行」，咁先至畀錢搭直升機，嗰陣再「跟我一起飛去」都未遲喎。
既然係咁，餘下嘅安排就係：我唔會咁儍今晚仲瞓營幕，即刻叫 Sapta 、Hokim 兩個Porters 30分鐘後起程，同我一齊行返去 Chhukhung ，起碼住入客棧，食又食好尐，仲有張正正經經嘅牀瞓下吖。
因為同佢兩件係最後見面，所以快快趣趣搞掂埋畀貼士相關人士之事，跟手互相道別。由今早凌晨起計，我行咗十幾粒鐘，返嚟休息咗唔夠兩粒鐘之後，我又踏上歸航之途，而佢兩件繼續喺大本營守株待兔，靜候直升機嘅來臨。
一行三人，快步由 Base Camp 直奔 Chhukhung 。我估唔到我可以咁快回氣，兼且係落山路，兩粒鐘左右，真係氣都唔喘，三爬兩撥就行到客棧，領隊 Bimal 喺客棧迎接我哋，佢都話我哋好醒目，點解？原來我做咗英明決定。呢一區天氣唔穩定，就算 EBC 都飛唔到直升機。果然，你都咪話，我坐落客棧餐堂冇耐，外面就落起大雪。第一，好彩我早早決定離開 Island Peak ，如果唔係，行到半路落大雪就辛苦喇。再者，佢兩件話等直升機，打算今日黃昏前離開大本營。嘿，睇怕聽朝前都唔使旨意嘞。亦即係話我今晚高牀暖枕，佢哋兩件就要瞓喺帳幕過夜。不過咁，晚上聽住雪花打落帳幕嘅聲音，又可能好浪漫嘅哩 ⋯⋯ 除在嘈尐之外！
其實呢一晚落雪凍唔凍、嘈唔嘈，我真係完全唔知，食完晚飯，瞓咗落牀，睇怕我都係死豬一樣，四十粒鐘冇瞓，其中廿幾個鐘行緊路或者爬緊山，外面地震我都唔知㗎喇。
總結今日所破記錄：
一，四千九露營
二，行山超越五千九
三，用繩索、雪爪等登山裝備爬雪山
四，登雪山頂 6189 公尺（二萬0 三百0五英呎）
五，連續活動四十粒鐘
六，五千米曠野辦大事
七，⋯⋯仲有冇呢？
再噏過，
嚤囉仔
No comments:
Post a Comment