Waltzing Matilda, 首演再現夠醒爬；
雨林瀑布串，孭樽珊瑚吹氣圈
現代新人類anatomically modern human (AMH)，三十萬年前喺非洲向全世界發揚光大。由一隻搵朝唔得晚嘅弱小馬騮乾，變成統治地球嘅無敵巨人。要成為咁成功嘅物種，人類必須成日搞三搞四，冇嗰樣，整嗰樣，咁至有咁多發明創造。
呢班馬騮，點解又可以咁把炮？兩個字⋯無聊！因為生活可以富足到出現無聊，咁咪搵尐嘢搞搞，打發無聊。所以，千期唔好覺得無聊好鬼無聊，你有時間無聊，乃係藉得恭喜之事。最緊要，係⋯擅用無聊。
前嗰排，大小姐同占士飛咗上昆士蘭，凱恩斯玩咗十日，返嚟分享旅行過癮之處，哈。最近，邊度都冇得去，咁無聊。而家有大小姐嘅啓發，咁，我就要搵尐無聊嘢做吓喇。
Cairns ，由雪梨飛上去，分分鐘嚿幾水有交易。如果講行陸路，Cairns 喺昆士蘭北部，只要再揸多一千公里車，就已經係澳洲大陸最北角。如果由雪梨揸車上Cairns ，就係三千公里，計埋回程，全程就係六千公里！就講汽油費，係幾多＄？唔飛上去而揀揸車！咁無聊嘅事，人生，梗要做一次。至於，行程中，有乜嘢玩？有乜嘢好做？無聊人做無聊事，唔會計較呢尐無聊計算。
我呢個無聊旅行，只係用咗幾日準備，五月十五號，出發！
澳洲東岸，其中兩條貫通南北嘅幹線，一條係一號路，大平洋公路，係沿海嘅公路。另一條入咗內陸多尐，其實係喺大分嶺嘅山區之中。就係15 號路，新英倫公路。佢係連接雪梨至布里斯本嘅內陸公路，今次，我成條新英倫公路，883公里，由頭到尾行晒！
早一晩，已經執好行李，都係尐玩嘅嘢，eBoard 、摺車等等，今次仲帶埋汽車雪櫃，原來除咗隨時隨地有凍嘢飲之外，仲可以將食唔晒嘅食物，雪起留返下餐！我係細胃人，一向，一條冷去餐館叫餐好麻煩，怕食唔晒。哈哈，而家，乜餐都叫得，食唔晒？即刻雪起食兩餐！呢個旅行雪櫃，絕對係偉大發明！
呢兩年，因為聖女嬰現象，澳洲東岸水浸到七彩，大雨就喺大分嶺the great diving range 上空淋落嚟，分水嶺將洪水分成向東、向西兩股洪流，浸咗好多主要車路，我今次出車，好多路先至係啱啱開返，部分路段仲浸住成呎深水。第二日開車，就經過幾段咁嘅水浸路，如果跟到有前車，又或者睇到路面白綫，就可以知道有幾深水。好彩，條路開放得，都應該安全。當然又要多謝我架AWD ，四個轆都識郁，係安全尐嘅。
原來，遇到嘅水浸路。只係過咗昆士蘭冇耐入嘅一段較細嘅路，此後，一路注意要沿大尐嘅幹綫行，咁就再冇遇到水浸路，雖然路程可能長咗些少，但係安全好多。呢個，係我今次得到嘅經驗教訓：老友，記得行大路。
本來設計係直剷凱恩思，但係昆士蘭中間有個鎮：Winton Town，佢離海岸六百公里遠，呢個鎭，係我一生人必定要去探訪一次嘅地方。點解？詳情請返睇我五月二十號喺Winton 鎭貼嘅鋪士：
要入Winton 鎮，其實有難度。因為，Winton 鎮就已經喺Outback地區！澳洲所謂Outback ，就係一大片人跡罕見嘅沙漠，不過，又因為礦產資源、自流井artesian well 水源等因素，雖然係喺Outback 沙漠，亦開發咗不少城鎮。佢哋可以係種植，可以係畜牧，而Winton 鎮，就係昆士蘭一個非常重要嘅牧羊區。牧羊、羊毛相關產品，全國知名。就算乜都唔知，都應該知道世界着名嘅Marino sheep 。
有句說話，講咗二百幾年：Australia was build on the sheep’s back 。第一艦隊登陸雪梨係1788年，8年後，1796 年，已經由歐洲輸入第一批Marino sheep ，輾轉由紐省運入Winton 鎮附近嘅Longreach 區（係入Winton 鎭嘅中途站）。哈哈，因為袋鼠佬改造Merino sheep ，自此，澳洲羊毛質數，世界第一，Winton 呢區，就成為：Wool Capital of the World and Centre of the Golden Fleece’.
又因為牧羊業，又造就咗Waltzing Matilda 嘅澳洲傳奇。老友，once in a lift time 喎，唔嚟點得？
卒之，排除顧慮，一條冷踩入澳洲Outback 。由跨過昆士蘭開始計，行過A2、A4公路，一直向北、西北方向，都要揸三日車，先至到達Winton 鎮。
揸車入outback 嘅幹綫，都係標準瀝青路，沿住有字頭嘅公路，都保養得好好，路面有劃綫，路標清晰，基本可以揸到一百公里。沿途唔會見到人，亦好少車行，其實揸得好舒服。不過，我哋呢尐城市動物，見唔到人，會有尐擔心：如果、萬一、有乜閃失⋯有冇人幫到手？
有冇慄？其實都有㗎。不過，煮到嚟至算嘞。
當我到達Winton 鎮，嗰種心情，難以形容。就係：哦，I am here 喇。仲要住喺waltzing Matilda 故事發生嘅North Gregory Hotel。又去咗AB Paterson 嘅展覽館，bucket list ，又完成一單。
Waltzing Matilda 鎮，喺呢度，點可以唔唱Waltzing Matilda ？呢晚，North Gregory Hotel 有個opera 嘅晚會，仲係免費，買個餐、買杯酒，坐喺court yard 玩咗一晚，咁多人一齊唱waltzing Matilda ，仲有伴奏，過足癮喇。
如果鍾意睇opal ，Winton 鎮，其實係知名opal 鎮，可以喺附近opal 店安排opal 礦一日遊，一條龍睇晒採礦、加工、首飾、裝飾製作。當然，佢預你買些少返屋企！Opal ，唔係我杯茶，我冇咁做，不過，都有行入小鎮opal 舖頭，打個白鴿轉，同靚女店員傾下偈咁喇。
Winton 鎭一帶，原來，史前已經好巴閉。而家嘅outback 沙漠，N咁多千百萬年前，呢度有水有植物，最啱古怪動物生活。直至六千五百萬年前嗰粒大石撞地球，呢度尐（往）生物就長埋地下。直至歐洲拓荒者嚟到呢度，喂，本來想開地種田，點知，掘出大嚿骨頭！於是，咪變成恐龍發掘場。恐龍骨，有幾多？用而家嘅速度發掘，總之，有排掘，呢個考古遊戲，長玩長有。Winton 鎭，呢個age of dinosaur museum ，我玩咗一個day trip。
留咗兩晚喺Winton 鎭，第三日，晨咁早就揸車向海岸出發。一出車，我要行一條link road ，雖然都係壢靑路，不過，就更加偏僻，成條路要行兩粒鐘，對頭車只見到五架！又因為出車出得早，我喺路途中，一路揸車，一路睇住日出！又係好過癮嘅經驗。
我限自己，每日最多只揸約600公里，由Winton 鎮揸上Cairns ，需要兩日時間。中間儘量停尐較為出名嘅地方，咁都叫做去遊過。今次停咗海邊大城Townsville 。
Townsville 係大堡礁城市。大家知澳洲東面係太平洋，其實，沿東岸有兩個海：紐省至維多利亞、塔省，嗰個叫塔斯曼海Tasman Sea 。咁昆士蘭對出呢個大堡礁海，叫乜？咪就係：珊瑚海coral Sea囉，
一到埗，開動摺車踩出海邊。三點鐘都未食過嘢，即刻搵間海邊吧，想話一邊食嘢飲啤，一邊欣賞臨岸珊瑚。
問餐牌，佢話，三點後鐘，廚房落場，要等6點，晚餐時間至有嘢食！吓，我估唔到旅遊區冇下午茶？唯有買杯啤，坐喺無敵海景睇⋯，咦，珊瑚呢？係就係靚海景，卻原來要睇到珊瑚，一要夠淺水（如潮汐），二要夠陽光。原來，珊瑚海，都唔係度度就咁就睇到嘅。
位置上，Townsville 絕對係玩珊瑚活動嘅地點。不過，我只留一晚，第二朝就出發去呢個Trip 嘅北邊終點站⋯Cairns ，凱恩斯！
凱恩斯，就係大堡礁地標。可以喺珊瑚海潛水，夠晒號召力喇啩。橫掂都嚟到，不如攞埋個娛樂潛水牌recreational scuba diving certificate 。於是，出發前，匆匆忙忙喺網上報名，嘩，原來都好虛冚喎，咁好彩，只有一個位剩，卒之，報到名。仲講明，就算報到當日，如果有任何問題參加唔到，課程費用，全數退回。
只係4粒鐘車程，中午已經到達凱恩斯。慎防有乜嘢閃失，即刻去到潛水學校交代一下。點知，星期六下午，邊有人？嘿，聽日星期日，更加唔使旨意問到人。唯有等星期一開班至算。
凱恩斯，唔只係珊瑚海，向西行返入山區，有好多山林瀑布湖泊靚景，再向北行，嘩嘩，係全世界最古老嘅熱帶雨林。
龍頭旅遊區果然有風範，凱恩斯海邊中心 Esplanades 人山人海，單車、慢跑workout 男女，夠晒靑春陽光。lagoon 大泳池，𡃁仔、𡃁妺玩水，阿媽就喺池邊hea 曬太陽。仲有，就係昆士蘭放寛咗嘅電滑板。我都唔執輸，踩完摺車探路，就出動eBoard ，𨂽返轉過下癮。
海邊行入些少，係商場酒吧，擺出對海嘅枱櫈都坐滿人，朋友愛侶三三倆倆，人手一杯，開懷大飲之餘，笑話人生事。我一支公自摸酒杯底，分享偷聽返嚟嘅笑語。
雖然係冬天，熱帶嘅陽光可以曬到六點幾。日落前，踩住單車去搵食，客棧附近，就有間唐餐。入門口，仲講香港話𠻹。個名⋯添喜，都好香港噃。哈哈，仲有豆腐火腩煲，男人至愛，再跟一碗白飯。邊食得晒？打包入盒，可以食兩餐。唯一可惜，小餐館，冇酒牌，冇啤飲。
一宿無話，今日day trip 繼續北上，Daintree Rainforest 一日遊。
Daintree rainforest 原來係世界上現存最古老嘅熱帶雨林。又原來，舊時，成個！係全部，澳洲大陸，都係雨林。今日就只剰返昆士蘭呢一處仍然生存。
由客棧揸車上熱帶雨林遊客中心，要揸兩粒鐘車。睇資料，又有高塔，又有樹冠棧道，又有雨林漫步徑，又有各式動物展區，以為要搞成日，至行得晒。
我係紐省高級居民，而喺昆士蘭，身份一樣受到尊重。買飛，梗有折扣。賣飛阿嬸見我著短褲，眉頭一皺，喂，小朋友，呢度係熱帶地區，你唔怕畀蚊針咩？唔講唔覺，一講，真係周身痕。於是，即刻買支蚊怕水至入場。
以為要行好耐，原來，以上講及嘅入所有設施，都集埋一齊，要行晒佢，一粒鐘，乜都睇晒。仲有咁多時間，即刻趕下一場。驅車繼續北上，目的地，原來，又變成我嘅記錄：澳洲so far 我去過嘅最北點：Cape Tribulation
其實，嚟呢個區，只係想嚟一個叫做Mason’s swimming hole 嘅水潭仔。呢處其實係私家地，好鬼大，前面起咗一間餐廳㕑房，旁邊餐堂可以容納成百人。過咗屋仔有小路通去後面有個二、三十米見方嘅水潭，前後接住小溪。呢個水潭，就係swimming hole。咁又有乜咁巴閉？原來，南回歸線北上，就係鱷魚出沒嘅地方，喺昆士蘭，唔可以隨便喺野外游水。就算揸車去到河邊，都唔好隨便落車，因為，你唔知鱷魚喺邊？
不過，呢個水潭，佢就寫包單話冇鱷魚，佢仲話，鱷魚唔會喺水潭出現，因為，已經變咗佢哋公司嘅三文治喇。
千里迢迢嚟到，雖然天陰，我交低唉風畀一位婆仔，我游水潭嘅景象，佢不負所托，完成任務。
由凱恩斯到雨林呢段路，全部沿海興建，彎多，上上落落，路窄斜路又多，其實都要打醒十二份精神。不過，沿途可停留嘅風景點亦好多。雨林內亦有好多好有特色嘅雨林旅館，喺度留一兩晚享受雨林風味，亦係人生體驗。你問，我點知？哈哈，大小姐同占士就住過呢度，唔係，我點知有個swimming hole 喎。
游完野外水潭，我快手快腳，返返落凯恩斯，仲有成個下午飲啤hea 佢一hea。
廿三號星期一，係Cairns 戲肉。一早，就有專車接咗我去潛水學校，好快搞埋手續，開始上堂之際，教練話，阿伯，過咗45就要醫生開證明喎。
吓，我唔知嘅，我係填咗份medical review ，我唔為意年齡係medical condition 喎。如果我早知，一早叫醫生寫張紙過我，咁有幾難？而家麻煩嘞，我喺三千里之外，點攞醫生紙？仲要中午前搞掂！
即刻打電話。醫生太太話：「搞乜嘢？你都顧下自己喇，做乜鬼咁老仲玩埋尐咁嘢？咁危險，咪鬼玩喇！」佢咁講嘢！
千方百計氹到佢畀我同醫生講嘢。醫生問呢度有冇Fax 機？我轉述。嗰個教練問我：乜嘢係fax 機？哈哈，原來真係有代溝。
我個醫生可以好快用fax 傳醫生信過嚟，但係呢度冇fax 機收。如果叫醫生用email ，不過又要有晒醫生logo letter head ，醫生又要搞一大輪⋯！
最後，醫生選擇先照顧病人，等得閒至招呼我呢件貪玩無聊人。都明解嘅，你玩啫，佢嗰度件件生命攸關。乜嘢係輕重？一目了然喇嘛！
卒之，畀人踢出校！雖然回水，冇乜癮就必然喇。
嚟咗凱恩斯，冇潛過水，冇睇過珊瑚，係咪有些少遺憾呢？我，點會令呢件事發生！
即刻改變行程，並且踩車出去中心，居然畀我報到個snorkel diving 嘅day trip。
第二朝，一早專車接去碼頭，登船。呢隻船叫做reef experience ！
睇樣，係好有經驗嘅公司，一切都好well organised ，上咗船，每人派一件stinger suit ，其實係長䄂包晒手腳仲有頭套嘅Lycra 緊身游水overall ，仲有潛鏡吸管蛙鞋。
一切手續妥當，就開船離開碼頭。呢隻係快船，真係好快。開船後派早餐，哈，我點敢食，我知我好易暈船，仲即刻拍粒暈浪丸。
成粒鐘航程去咗100 公里外嘅Norman reef ，今日全日，就喺呢度活動喇。
我冇水肺沙紙，預咗玩徒手潛水skin diving 。哈哈，點知，原來係可以玩水肺喎。船公司作個名義，話係one day introductory course，咁，唔使牌都可以孭樽喇。
教過簡單減壓，清鏡及水中再戴呼吸咀，全部器材專人幫我著上身，浮水背心、鉛帶，幫你調好浮力，就一個帶兩個落水。
一落水，哈哈，原來我就處身珊瑚礁之上。保持呼吸，壓力，就跟住教練潛游。第一次孭樽，感覺十分良好。可惜，天好陰，冇乜陽光，珊瑚礁顏色陰暗，實在唔多靚。不過，可以同魚仔一齊穿梭珊瑚礁，乎復何求呢，老友。
大約半粒鐘就要上水，呢身裝備實在好重，根本唔可以自己上梯，我坐喺梯級，要大隻妹扯我上水，除低氣樽背心至企得起身。船上活動，包孭樽，只得一次，不過，snorkelling 就任玩唔嬲，我即刻咬住吸管，跳落水又玩過。
午餐後，可以繼續玩水，而且可以額外科水再孭多次樽，而且今次潛足45分鐘！咁過癮嘅嘢，我點會錯過。於是，我呢個reef experience 就玩咗兩次孭樽，一次snorkelling ，盡興而返咁話嘞。
失之東隅，收之桑榆。我安尉自己嘅大意：如果，可以咁樣casual 孭樽，有冇沙紙，其實，有乜所謂？況且，今次天氣咁差，要學潛，攞沙紙，都搵天氣好尐再做⋯。自我安慰，係我令自己經常開心嘅絕技。
Cairns 留咗四晚，雖然有些少不足，仍然可以講盡興而歸。第五日晨早揸車向南走頭，開始踏上，長達一個星期嘅歸家之路。
頭先講，由凱恩斯向西行，內陸山區有好多湖泊瀑布。我今次南行，就特登揸車入山，兜個圈再出返海。就係呢個全長100 公里嘅Tropical North Queensland waterfall circuit 。
聽大小姐介紹，第一站係Lake Barrine ，今早，我連早餐都冇食，就係為咗嚟呢度食個湖畔早餐。
由凱恩斯揸入嚟，呢50公里路程上好多斜，行好多髪夾彎，鬼咩，原來湖區係Atherton Tablelands ，卒之，要足足一粒鐘至到達大小姐介紹嘅湖邊Tea House。跟據指示，坐喺湖邊，叫份英式早餐，雙蛋班尼迪，再冲壼local brew tea，一支公，對住群山環抱嘅翠湖，學下人，靜思人生。
呢度雖然偏遠，但係客人絡繹不絕，靚景位置都坐咗客人，兩位靚女待應忙個不亦樂乎。原來location location location，唔係一定人聲鼎沸嘅地區嘅喎，人跡罕見，一樣係good location 。
唔似大小姐，佢上次住咗入雨林，大把時間嘆茶，我今日咁多地方要去，壼茶飲唔夠一半，三塊烘多士都要打包，坐咗湖畔茶室一粒鐘，就揸車去下一個點：Millaa Millaa Falls。
呢個waterfall circuit 有四個瀑布，好多day tours 由凱恩斯出發，用十四座遊晒湖區及瀑布，自己唔想揸車，絕對諗得過。
瀑布附近，都近大路，而且有充足車位，落車後只行幾分鐘，瀑布就係眼前。
Millaa Millaa Falls，我有任務，就係要游去瀑布水簾。當我視察環境時，有件英倫後生仔又喺附近，我話，咁好水，有冇興趣游下？卒之，我交低唉風畀路人甲，我同呢件英倫陌生人就喺水中擊掌。「暢游瀑布掀水簾」，大小姐呢份功課，我又完成喇。
兩粒鐘完成waterfall circuit ，出返海岸，已經係下晝兩點。路程關係，停一個中途站Cardwell ，只係借宿一宵。雖然冇嘢玩，都攞塊板出嚟兜下海邊。小鎮喺正A1 公路邊，唔少飲食街鋪。咦，有間餐廳加士多嘅鋪，好鬼虛冚喎。哦，原來係灰狗巴士嘅中途補給站。我都喺度買返個餐，加支啤，就係晚餐嘞。
曾經考慮過搭郵輪上Cairns ，itinerary 就有Airlie Beach 呢個地方，連郵輪都停嘅埠，今次行過，去下都無妨。佢喺海岸半島。所以唔喺A1 幹綫之上，要特登轉出沿海車路。佢唔只係大堡礁海岸，仲有不少著名外島，例如Hamilton island 、Whitsundays Islands ，加埋珊瑚礁，所以成為去外島嘅熱門跳板。
一入Airlie Beach ，就見到岸邊遊艇會、marina 停滿靚船，向海山坡，密密麻麻，起滿海景豪宅。咦，有錢佬區嚟喎。
我間客棧喺正海灘區中心，係咪好貴呢？哈哈，66 蚊一晚，係背囊客旅舍，佢起喺商場旁邊嘅小溪之上，全部種滿樹，入咗嚟，好似住咗喺樹林裏面。旅舍由好多座簡單雙層屋舍組成。有自助廚房及餐堂，可以自煮自食。我都住過不少YHA，呢間係好有特色。
沿岸海邊人工lagoon ，似乎係昆士蘭特色，好大好大，唔同形狀，唔同深淺嘅池，任玩唔嬲，免費，而且有救生員昅實。我冇時間嘆水嘆陽光，都攞出摺車兜佢一圏。嘿，個城，真係好細。
慳返住宿，今晚食豪尐。海邊雅座，fine dining ：盲鰽加啤，五十蚊有找。
一路由熱帶昆士蘭南下，點少得講Rockhampton ，我就專登停呢度一晚，目的要集多一個地標相，咁就齊一套嘞。
Rockhampton 就喺A1 幹綫之上，絕對係南北交通樞紐，而且向西嘅A4 Capricorn highway 就接住A2 Lanesborough highway ，咁，去邊呢？咪就係入咗outback 我啱啱去過嘅Waltzing Matilda, Winton 鎮咯。
A4 公路個名叫？Capricorn ！哦，呢個，就係Tropic of Capricorn ，南回歸線鎭咯。
嗰條線真正喺邊度，其實，唔太重要，因為，量度錯誤，係經常發生嘅事。最主要係有個清楚地標，方便影相。
喺正市中心嘅Rockhampton 遊客中心，門口就有高塔，兩邊有石牆，一邊話係溫帶temperate zone，另一邊話係熱帶Tropic zone。佢個溫帶標記同熱帶標記相差太遠，如果打筋斗，要打五六個至得，而且，高塔太高，前面又有花草樹木阻住，即係：根本影唔到靚短片。
好彩，呢條綫係環繞地球一周咁長，附近，就有個簡單尐嘅地標。由温帶過熱帶，我今次，三個手翻係例牌，再加eBoard 剷過去。於是，地球表面五條綫：赤道、南、北回歸線、格林尼治子午綫，已經集齊，國際換日線，喺正太平洋中間，冇可能收集得到嘅嘢，我當佢冇到，所以：宣佈成功集齊呢四條綫。
過咗回歸線，日照時間亦愈嚟愈短，附近唐餐食個海鮮豆腐煲，早尐唞，聽日，走入昆省大城Sunshine Coast 。
唔出海邊，Sunshine Coast 冇嘢好玩，只係借宿一宵而已。第二朝繼續南下，朝早九點前就係去到今日要玩成日嘅地方：Australia Zoo。
Australia Zoo 由鱷魚先生一手創辦。
講起鱷魚先生，澳洲知名嘅就有兩個：一個係Paul hogan ，佢係明星，演crocodile Dundee 只係扮嘢，唔講佢。另一個係Steve Irwin ，佢係堅嘅可以同鱷魚玩摔角嘅鱷魚先生，澳洲冇人唔識佢。到後來注重動物保育，仲同世界好多地球、動物保育團體拍咗好多動物生態纪錄片，世界知名。
2006年，佢幫Discovery Channel 拍一套動物紀錄片Ocean's Deadliest ，講述海洋危險生物，9月4號，喺大堡礁Port Douglas 一處淺海，佢snorkelled 跟住一隻8 呎長嘅stingray ，可能跟得太貼，stingray 用尾拮中佢心臓，Steve 當場死亡，當時只係44歲，正值當打之時。佢嘅死亡當然係澳洲嘅重大損失。Steve 舉殯時，雪梨大橋下半旗誌哀。
咁重要嘅人物，點可以唔去佢屋企行下？喺邊度？Australia zoo - home of the crocodile hunter。
由Sunshine Coast 揸車入zoo 只係半粒鐘車程，通去動物園嗰段6號公路，就叫做Steve Irwin way 。可見佢喺昆士蘭人心中嘅地位。我同好多人一樣，未到九點，已經喺門口等入場。
呢日，好好天，朝早吹住微微冷風，有溫暖太陽照住，動物園，行得好舒服。整體嚟講，以貨比貨，Australia Zoo 晤算好睇，佢都打理得井井有條，但規模都係細，多數動物只得一兩隻，如果話要睇鱷魚，可能更加失望，因為，數量真係唔夠。
呢個動物園，似Steve Irwin 嘅展覽園地多尐。中心，有展館介紹Steve Irwin 嘅一生，湖中島以佢個女Bindi 命名，阿仔Robert ，而家玩野生摄影，多過同鱷魚玩摔角；展館正在展出阿Robert 仔尐靚相。
下午一點，喺鱷魚館Crocoseum 有表演，最多係表演雀仔。只有一個壓軸，我有幸睇到Robert 上埸，不過，到真正近距離同大鱷接觸時，都會畀返其他老手搞掂。又係嘅，親眼睇住老豆喪命於野生勳物，而家又從事動物保育。佢哋嘅動物表演，又點可以刺激呢？
行完鱷魚先生之家，我相信畀錢入場嘅，係愛護、欣賞、支持Steve Irwin 嘅一生，多過鍾意嚟睇動物園，因為，咁樣，正正係我嘅心態。
Crocoseum 散場，亦係離場時候，我好珍惜呢次探訪，但再要專登嚟多次，可能⋯難尐嘞。
近黃昏，唔想揸咁耐車，就喺附近Caboolture 小鎮客棧借宿一宵。
晨早起身，繼續南行，今日，由北向南穿過成個布里斯本。我都好欣賞自己，睇住GPS 行市區路：天橋、隧道、freeways 轉嚟轉去，居然無行錯路，成功穿越成個布里斯本。犀利！
再由海岸M 1 穿返入A15，新英倫公路，六個鐘到達今次行程嘅最後一站Glen Ines 。
又要講1788 第一批澳洲新移民，之後，不斷有新人由世界各地移入，由於英倫出發，除咗Anglo Saxon外，其中不少塞爾特人Celts。乜人？咪就係蘇格蘭、愛爾蘭、威爾斯等等。佢哋嚟咗雪梨，發現天空唔夠好，尤其夏天太熱！喺英倫，佢哋住喺高地，雪梨喺海邊喎，點住？
Celtic people 喺跟住嗰幾十年，不斷向西北移動，佢開墾嘅路，就係New England Highway 。1838 年，第一批塞爾特人到達Glen Innes 。一睇，不得了，呢度，夏天平均係12度，海拔1100m ，咪就係英倫高地人highlanders 住慣嘅生活環境？！再睇，乜咁啱，呢度有好多戙高嘅大石standing stones ，當地土著Ngarabal people 都當呢尐係神石，而高地人喺英倫故鄉，亦用戙起大石去觀察夏至秋分，從而決定播種、收割時間。咁啱何車，於是，就定居於此，直到今時今日。
每年五月初，呢度就有Celtic Festival ，喺享受現代世界之餘，亦繼承先祖傳統及努力。
旅行嘅過癮之處，就係親身踏足過去，企喺歷史發生嘅地方，回味先祖嘅經歷。
Glen Innes 係就係充滿歷史，不過，冇乜好嘢食。黃昏後，仲翻起風，仲落起雨，夜晚，得返5度！費事出街搵嘢食嘞。噚晩食剩嘅半盒海鮮豆腐煲，再加日清杯麵，叮一叮，仲有凍啤。哈，咁又一餐。
五月三十一日，沿新英倫公路向南直踩，再轉F3 雪梨紐卡素高速公路⋯風馳電掣，三點半返到屋企，今日，九粒鐘，行咗580 公里。
呢個Trip 嘅第一次：
- Solo 連續揸車十七日
- Solo 連續揸車6260.9 km
- 揸車入澳洲outback
- 探訪Waltzing Matilda 之鄉
- 踏足澳洲最北去到Cape Tribulation
- 孭樽scuba 潛水
- 大堡礁snorkelling
- 昆士蘭熱帶雨林野外游水
- 游瀑布水潭
- 南回歸線側手翻
- 探訪Steve Irwin 之家
都要計下使費，埋單：
- 住宿16 晩⋯A$ 1644
- 汽油13 次⋯A$ 1081,83
- 玩⋯A$ 454.40
- 食⋯( 麥記：84.95 。
其他：299.13。）
A$ 376.07
總共使費：3556.32
唔理抵唔抵玩，總之過癮，又再去馬。
下次再玩過
嚤囉仔
No comments:
Post a Comment