2017.05.23 Gorak Shep 5270m ， Kala Patthar 5545， back to Dingboche 4410m

2017.05.23 Gorak Shep 5270m ， Kala Patthar 5545， back to Dingboche 4410m

早睡早起，係我習慣，今朝仲要再早尐，四點零起身，五點就落到餐堂，領隊 Bimel 都好準時，其他兩件，噚晚已經話咗唔會早起。唔使等人，就即刻出發—— Kala Patthar 5545！

出咗客棧打橫行過小平原，就係 Kala Patthar 山腳，上山小路有清晰路牌。Kala Patthar，尼泊爾説話，就係黑石頭咁解。名副其實，遠睇，尤其係山頂，真係佈滿晒大大細細黑色石頭。佢係一個圓形小山崗，零零舍舍擺咗喺 Gorakshep 平原之上，個外形簡單到，喺山腳已經望到山頂，成個山就係砂同埋石，中問冇遮冇擋，山坡上所有物體都一目了然，永遠唔會蕩失路。

行上山頂，其實就係向西行，我就背靠東面額菲爾士峰等幾座星級高峰。噚日講過， EBC 睇唔到額峰，今日上嚟，其中一個節目，就係要睇多尐額峰。不過，要晨咁早起身，當然有另外一個理由，就係要睇「日出」。喺平地，日出於地平綫或者海平綫嘅情況，因為太陽一出就睇到晒，所以睇到嘅太陽，就好似雞蛋黃火紅色嗰種狀態。呢度周圍畀高山環抱，太陽畀七、八千米高山遮住，佢要昇到好高至睇得到。我哋由山腳行到山腰，差唔多六點幾，光燦燦嘅太陽就喺正額菲爾士峰右側出現，成個大地即刻光燦燦起嚟，燦爛朝陽照住我背脊，畀我登上 5545 嘅動力。

最初係碎石砂路，愈上得高，石頭愈大嚿，好多時要手腳並用爬過高過人嘅大石。雖然由山腳行上山頂，只係唔夠 2 Km 路程，但係已經上升咗兩百米，其實都幾斜，更加唔好忘記，而家係行緊五千五，唔單止腳骨力，心肺耐力都受緊考驗。又咁講，今次我少咗脂肪，放低負擔，果然行得更加輕鬆，我真係覺得我 Fit 過五年前喎。

山頂由好多嚿大石組成，好似其他山區地標一樣，Kala Patthar 山頂都掛滿一串串佛教經幡，一睇就知目的地已達。上到嚟，我梗要爬上石頭上，登頂吖嘛，梗係有咁高上咁高喇。Hey！stop it . Don't be silly！有雪巴嚮導，大聲呼喝！哦，唔係喝緊我。原來有件鬼仔唔顧危險，喺嚿山頂石行到好邊沿。須知道山頂呢嚿石，除咗向東山坡呢邊係安全外，其他三邊都係懸崖，跣一跣腳就係咁先喇，雪巴嚮導喝得啱。

靜靜坐喺大石上，360 度睇住 Khumbu 河谷。正前方（東）就係額峰，此時嘅額峰，仍然有一大截畀前面 Khumbutse 山峰遮住，不過，企高咗二、三百米去欣賞額峰真係雄偉好多。幾條 Khumbutse 山谷冰瀑布，佢哋係 Khumbu 冰川之源，而家就掛喺眼前。冰瀑布下冇幾遠，一粒粒黃色小點散佈喺冰川面上，嗰度就係 EBC 大本營，每個小點就係一個營。額峰登山者喺營裏面，等候雪巴嚮導審視天氣狀況後，一聲令下，就起程展開登頂之旅。

腳下 Khumbu 冰川由 Khumbutse 山腳起，一直伸延至 Dingboche 。南端 terminal moraine 同兩側 lateral moraine 將冰川圍住，冰川好直，好似一個長 lai lai 嘅方匝，就係因為企到咁高，成條 Khumbu 冰川，由頭到尾，就一目了然嘞。喺呢度影一張相，就係好好嘅冰川地理教材。

山頂石頭唔可以坐好多人，石下仲有人等緊上嚟。如人生，雖然咁靚風景，都有走頭之時，幾唔願都好，邊到你戀棧！趁仲企得喺度，影多幾張相，添尐記憶，就開開心心咁落山喇。

返到客棧，收拾好行李，就落餐堂食早餐。

噚晚唔記得講，呢間 Gorak Shep 客棧，有一個奇特之處。大家知山上客棧一定缺電，就算义電都鬼咁貴，點可能有好嘥電嘅電器用品？其實入山之後，美國佬同印度佬一路都話夜晚瞓覺唔夠暖，噚晚食飯後，美國佬居然話要電氈！我冇講乜嘢，個心差尐笑出嚟。好彩我反應慢咗兩拍，原來真係有電氈供應！客棧仲即刻幫我哋搬去有電氈嘅房。我入房一睇，嘩，今次發達喇，房裏面居然有電掣，我第一時間掹咗電氈挿蘇。點解？咁即係唔使錢义電囉。電氈，我根本唔需要，我個零下三十睡袋，有時仲暖到出汗。電掣，梗係用嚟义電喇。入山後，所有電都係嚟自太陽能板，視乎電器大細。每次义電，大約要三蚊至八蚊美金一件！房裏面有挿蘇頭，我第一次見，而且仲係喺五千二嘅 Gorakshep ，犀利！

我落嚟食早餐，見到呢兩件大哥，好似唔係好順氣，原來佢哋話電氈唔夠暖，仲問我張電氈如何。知道我掹咗電氈用嚟义電，吹到佢哋「啤」一聲。我同領隊 Bimel 細聲講，睡袋咁暖，使鬼用電氈咩，呢個投訴，最後都不了了之喇。

雖然我今次毋須用電氈，不過就見證時代進步，以後行EBC 應該愈嚟愈容易，即係愈多人可以行，又即係呢度嘅自然環境愈受衝擊 ⋯⋯。不過，咁樣，似乎係大勢所趨，環保與搵食，永遠係一對好難平衡嘅矛盾。

行程上，去咗 EBC 之後，晨早行上 Kala Patthar ，好似只係附加節目，其實我覺得 Kala Patthar  峰頂比額峰營更有旅遊價值。首先，佢高出二百幾米，而且係上山斜坡，體能上，就係較大嘅挑戰。其次，額峰營係喺凹入山谷冰川面，周圍高山環抱，咁當然係一種氣勢，但亦因此限制咗視野；而 Kala Patthar 係五千五高山，頂峰 360度視界，企喺嗰度，絶對係令人窒息個隻感覺。

但係不少人喺行完 EBC 後，寧願瞓覺都唔上 Kala Patthar 。最佳嘅解釋就係：額峰個朶，世界知名，無人不曉。去過額峰大本營，就係人生歷程上一個 CV 喇。因此，世人就花好多時間、克服種種困難嚟一親芳澤。呢個完全正常，因為我都係其中一員。但係 Kala Patthar ，連個名都咁縞口，有幾多人知有此山存在，去過又如何？唉！名氣真係咁緊要?！

上次六個人嘅行山小組，只有兩人登頂。今次三人小組，只有一人登頂。結論：根據統計，行EBC 團，只有三分一人，會登上 Kala Patthar 頂峰。

我用三粒鐘行完山返嚟，兩件大哥至起身冇耐，仲可以一齊食個早餐至出發！早起身，時間真係見使好多。

今日路綫非常簡單，就係沿舊路一直行返 Dingboche ，中途經過 Lobuche ，停一停，等埋一齊食中午飯，之後一條氣行返 Dingboche 過夜。

呢段路，已經第四次行，沿河谷，四圍都係高山、冰川，大路一條，點會行錯路，何須等任何人，一個人開足 turbo，行得好暢快。

如常，到達 Lobuche 就搵笪地方曬太陽，因為冇番半粒一粒鐘，包尾嘅美國佬都唔會浮頭。坐喺客棧外面石砌嘅矮牆頂，曬個四千九高山太陽，享受得很。咦，側邊呢隻黑狗，又係趴喺度同我享受一樣嘅陽光，睇佢眯起雙眼，個樣又真係好歎。呵呵，可能我個樣都同佢差唔多。尼泊爾山區係佛國，眾生果真平等！我又加深體會喇。

等埋美國佬，食埋午餐，再 hea 一陣，其實已經休息咗兩粒鐘，乜都夠晒皮喇，繼續起程。由今早Gorakshep 行去 Dingboche ，總共只係十四公里，而且係一路落緊成千米，輕鬆到不得了，下午呢段路，我愈行愈快，經常游目四顧，咁大個山，好多時，完全見唔到人，就只有我一條冷，喺個咁大嘅空間行緊路，嗰種感覺都好得意。

好似忍者小靈精，「又越過高山，又越過谷」，一路行一路唱歌係我習慣，行得兩行，見到 porters Sapta 同 Hokim 坐喺石頭休息，我即刻大叫「Jum jum」，係尼泊爾話，「起程」咁解。當然係講笑，叫佢哋唔好休息。佢哋每人孭住廿幾 K 嘢，笑笑口望住我，梗係啋你都儍，我一個人孭住嗰 5 K，邊使唞咁多，梗係繼續行。呵呵，我行得快過 Porters 喎。

呢 十四公里路行得好舒暢，鬼咁早就到達 Dingboche ，呢度老友鬼鬼，熟晒架埗，自己即刻走上餐堂，飲杯檸茶，等埋兩位 Porters 帶埋行李埋棧，又係趁有好太陽，安排熱水冲涼，跟住食飯、 hea 噏、瞓覺 ⋯⋯ ，咁又一日喇。

咪住，由而家起，最好休息多尐，因為第二味主菜，即刻出籠，而且係勁揪嘢嚟。瞓喇，聽日，

再㬛過

嚤囉仔

2017.05.22 Lobuche 4900m to Gorak Shep 5270m , visit Everest Base Camp 5364m

2017.05.22 Lobuche 4900m to Gorak Shep 5270m , visit Everest Base Camp 5364m

好多行山團都以 Everest Base Camp 做目的地，到埗後就回程，如果額峰大本營係主菜嘅話，今次我哋就有兩味主菜，今日先上第一味：EBC！

食過食極唔厭嘅早餐就出發。Lobuche 呢度嘅位置，其實就喺Khumbu 冰川末端冰堤西面旁邊，一離開客棧，就踏入冰川側堤 lateral moraine 地帶，遠睇側堤，就係一列好長好長，由沙石堆成嘅幾十米高山坡。開始時，沿住側堤左手邊（西）谷地向北行，谷地雖然平坦，但係佈滿大大細細嘅石頭，我哋經常要繞過大石嚟行，路綫非常迂迥。有時行行下會行咗入亂石堆，咁就要踩上石頭至出得返嚟。過晒亂石谷，行上前面小山坡，就跨過 Lobuche Pass 5110m，好嘢，踏入五千關口！再由山路行上側堤，中學地理都學過，側堤，係冰川行進時，將沙石堆向兩側而產生嘅地形 ，好明顯，行上側堤頂，大名頂頂嘅 Khumbu 冰川，就成條攞咗喺右手邊。

而家一路望住腳下冰川，一路繼續北行。此時額峰 8848，一路都出現喺我哋兩點鐘位置，同佢並排而立嘅，係佢南面(右手邊）嘅世界第四高峰 8414 Lhotse 洛子峰。不過，呢個角度，額峰並唔雄偉，因為佢前面又有座高山 Nuptse 7861m，呢座山只係排世界第 20 名，不過就企正喺額峰前面，好彩額峰都真係高出成千米，我哋都幾清楚睇到 8848 嘅峰頂。

腳下嘅冰川，因為一路南進擠壓嘅結果，愈近南邊末端，就愈似普通嘅一條平坦坦，佈滿黃黃黑黑砂石嘅長谷地。而冰川愈向北面，即係愈接近冰瀑布，其實就係冰川嘅上游，就比較崎嶇，冰面上佈滿大大細細嘅石頭，偶然亦有裂縫，露出冰嘅本相。由裂縫望落下面，雪白嘅冰透出幽幽嘅螢光藍色，非常詭異，遠遠望落裂縫裏面，感覺深不可測。

過咗Lobuche Pass 冇幾耐，左手面出現一個典型圓頂小山，右邊山腳前有一幅大平原，因乜有幅咁平坦嘅地，原來好古好古嘅以前，呢度係一個大湖 Gorakshep Lake，平源就係湖底，而家呢處地方，就叫做 Gorakshep  喇，平原西面呢個圓型小山崗就係 Kala patthar 5550m，聽朝一早，我就會登上呢個山頂。

海拔 5140m ，Gorakshep 呢笪係不毛之地，不過就就非常出名，因為呢度係Khumbu 山谷最後可以住客棧嘅地方，所有去 EBC 嘅都要喺呢度停一停，過咗 Gorakshep ，就係露營嘅世界。我地喺中午前亦已經埋棧，安頓好行李後即刻食晏，冇耐就再次起程，因為呢個行程嘅第一道主菜 —— 探訪額峰大本營 EBC 5364 即將上枱，而來回 EBC ，需時四粒鐘，為安全計，早尐出發，以免回程日落時天氣驟變。

其實，過咗五千，已經唔係少嘢，空氣愈嚟愈稀薄，高山症嘅風險其實愈嚟愈大。五年前，我哋個團六個人，就有一個加藉韓妹上到 Gorakshep  ，馬上頭痛作嘔，領隊見情況凶險，即刻派副領陪佢落山。原來高山症嘅最有效解決方法，就係即刻行返落山，直至去到一個高度係完全冇事為止。不過，如果情況危急，行都行唔切，領隊就會即刻叫直升機，直接將病者運去加德滿都。好嘞，咁樣出一次直升機，承惠六千美金，咁，邊個埋呢條單？行山公司同尼泊爾政府梗唔會做蝕本生意幫你找數，其實，喺我哋出發前，行山公司已經檢查我哋嘅保險，而我哋買咗嘅保險，一定要包埋：用任何方法運送受保人去接受醫療，咁大家就放心去行喇。

由 Gorakshep 行去額峰大本營，先要行過古時 Gorakshep 湖底平源，雖然好耐好耐以前係湖底，其實而家仍然濕立立，成日踩到好似沼澤咁嘅水氹，好多段路，要好小心踩住石頭至唔會濕腳。平源盡頭就踩上側堤頂，側堤同冰川中間堆咗好多大石，由側堤行落斜路，手腳並用爬過大石陣就踏上冰川。呢一段冰川其實係上游段，喺群山圍繞間，幾條冰瀑布就喺眼前。向上望，前面呢座雪峰就係 Khumbutse 6665m。數世界高峰榜，佢入唔到百五，但係佢應該世界聞名。首先，Khumbu 冰川就發源於此，Khumbu 冰川溶化成河水，流入 Khumbu 河谷，千百年來養育住 Khumbu 河谷嘅雪巴人，呢個重要性係歷史民族嘅因素。

2014年4月25日，7．8級地震引至廣乏雪崩，眼前 Khumbutse 雪峰下呢幾條冰瀑布，同時雪崩，大量積雪湧落 Khumbu 冰川呢度，冰瀑布底下嘅 EBC 露營區首當其衝，十九人死亡，其中十人係雪巴嚮導。呢段雪崩襲 Base Camp 嘅影片，好快就喺 YouTube 播出，震驚世界。因此，Khumbu 冰川呢個位置，就梗係世界知名嘞，不過如果我叫 Khumbu Glacier ，多數人都唔知我噏乜。但係我叫 Everest Base Camp，就個個都識喇。哦，原來額菲爾士峰大本營，唔係喺額菲爾士峰山腳嘅。

又原來，額峰大本營，唔係腳踏實地嘅，而係喺一條流動緊嘅（當然好慢）冰川之上！為咗證明行山友已經踩上 EBC ，唔知邊個，唔知幾時，就喺「入囗處」（即係最多行 EBC track 嘅人行落冰川嘅位置）附近，堆咗一大堆石，慌死人仍然唔知，仲有個牌仔寫住 EBC ，仲有年份𠻹。雪巴人係佛教徒，喺重要嘅山頭據點，都會掛上一串一串經幡。即係同水動經輪原理一樣，經幡隨風飄揚，每次飄動，就等於唸咗一遍經。呢度 EBC，亂石堆上，亦係掛滿經幡，大家排晒隊喺地標前影相，就係指定動作喇。

我睇過一篇嘢，話喺額峰營地欣賞壯麗嘅額峰！真係 sorly 囉，又原來喺營地，係完全，冇錯，完全，睇唔到額菲爾士峰。營地好似山谷地帶，前面、左面、右面都係高山。前面已經講過，正前方嘅 Khumbu 只係六千六，已經足夠遮住後面所有高山。如果再有人同你講營地睇額峰，佢說話嘅真確度就扣晒分喇。

我一條冷，又梗係最快踩落冰川嗰個，我影相又唔使等任何人，又唔係一定要企正石堆前面，只需幾分鐘，我已經前前後後影咗好多相。不過，咁未夠，我喺石堆後側擺好相機預好位，喺鋪滿碎石嘅冰面搵條平尐嘅路面，開着 video ，自拍三個側手翻係我嘅 EBC 指定動作。唔知係咪冰川移動關係，居然打到一仆一碌，唔多滿意喎。見有位哥仔影完相企喺我附近，就請佢幫我揸機，再打三個，今次好好多。做得好，梗係要 encore ，今次用 iPhone ，因為可以即刻些牙上飛事卜，咁又多三個！咦！今次又有紀錄，就係喺額峰大本營，打咗三組三個側手翻，三三不盡，長長久久，梗係好意頭。

亂石堆同真正 EBC 紥營營地，其實仲有一大段距離。真正營地，其實好近山腳冰瀑布，我估計由亂石堆行去嗰度，應該仲有半粒鐘路程。由亂石堆北望營地，冰面上佈滿黃色小點，每個小點就係一個營。我都講過，呢度紥營預備登頂嘅人，都係搭直升機嚟呢度，當登頂完畢，落返營地後，亦直接搭直升機飛走。行 EBC 同登頂，其實係兩類互不交集嘅人。

第一味主菜已欣賞過，此情只成追憶，再無可戀，起程走人。由冰川行返上側堤，美國佬又喘晒氣咁嚟到，我唔使等埋任何人，即刻踏上歸途，原路返返Gorakshep 。記得上次行返轉頭呢段路，我係一路瘟下瘟下咁行。今日精神爽利，行得走得，真係精靈過上次噃。

呢條路簡單明確，而且已經係第四次行，點會行錯路，一條冷行，唔使兩個鐘，就坐咗喺客棧餐堂預備點餐嘞。

山上客棧，冇電供應，义電永遠都係大問題。記得止次嚟，客棧出面有個汽油發電機，而且限時义電。而家山上嘅客棧都已經用太陽能，室內 LED 燈又好有效率，其實生活環境已經有好大改善，當然，义電需錢，就永遠不變。

頭先話，額峰營地睇唔到額峰，咁，邊度至係睇額峰嘅好地方呢？聽日喇，聽日就知嘞。聽日

再噏過

嚤囉

2017.05.21 Dingboche 4410m to Lobuche 4900m

2017.05.21 Dingboche 4410m to Lobuche 4900m

記得上次入山，有兩個休整日，一個喺過咗三千嘅 Namche ，另一個就係呢度，過咗四千嘅 Dingboche ，噚日太子爺已經問係唔係住兩日，睇返行程，原來冇休整，即係今朝即刻走人。係咪我三條友仔好 fit ，唔使點休整呢？

如常，早起身，食完早餐執好嘢仲有大把時間，孭埋 daypack 坐喺屋外同老闆一家傾偈。講起五年前嚟過，感覺人生聚散，都係緣份一場。五年前，太子爺只係十一歲細路，而家二八年華（十六），已經坐鎭櫃面，可以獨當一面打理客棧日常事務，英文仲 lark lark 聲，果真英雄出少年。

我哎唷都教過幾年書，有機會都會問一問細路讀書嘅情況。尼泊爾山區呢處，居民接受一般教育已經唔係問題，當然雪巴村落，住得好分散，學生每日用半粒鐘一粒鐘行返學校，對擁有雪巴人血統嘅細路，簡直就只係一件餅（ only a piece of cake），呢個就係我哋每朝行山，路上睇到嘅情形。不過，社會上階級分野，亦喺由細路仔開始。尼泊爾學校大致分成兩大系統：公校、私校。公校教育，只收象徵式費用，等大家都讀得起書。作為全民普及教育，現代尼泊爾，相信已經唔係大問題。不過，負擔得起嘅，都會送仔女入私校，嗰度用英文授課，學費就梗係唔係一般人可以負擔。錢作怪，理所當然，學校設施、師資等都比公校高幾皮。即係話，唔同嘅學校，就反映咗學生嚟自唔同階層，階級分野就成為咗好難逾越嘅鴻溝，呢一點，而家嘅香港人就最明白喇。

唔好意思，又要話當年。我哋有幸，成長於香港黃金歲月，社會好多上游機會，造就不少好似雪糕大狀嘅故事，醜小鴨變天鵝，並唔係童話故事。而家，喺新統治階層嘅塑造下，大學講師都要住劏房，上游？開玩笑。真係捽木感恩，投胎，真係要講時機。

眼前呢位十六歲太子爺，打理緊家族生意，成日見老闆喺褲袋攞大疊銀紙作日常生意找數之用。呢位雪巴公子，佢雖然有雪巴血統，睇嚟皮光肉滑，仲係咪好行得，我有好大疑問。又睇返今次我哋兩個 Porters ，Sapta 同埋Hakim ，佢哋絶對擔得抬得又行得，但係英文溝通又真係唔係幾得，所以，暫時，只係挑伕嘅材料，咁係運數係乜嘢？要打破困局，佢哋必先學好英文，再考牌做行山領隊。好似我哋今次嘅領隊 Bimel，佢都係由 porter 做起，而家做咗廿年領隊，間唔中，仲會show 下佢去泰國旅行嘅相。佢行過嘅路，正正係一眾 porter 將要跟隨嘅路徑。雖然當下，環境係艱辛，如果眼前目標清晰，路徑並唔係不可逾越嘅話，人就活得更有希望喇。

同老闆一家噏完一輪，亦係起程時間。雖然今次只住一晚，其實三日後又會返嚟。點解？走出客棧前石路，抬頭一望，正正前方嘅雪頂高山，就係 6189 Island Peak，村前流過嘅河水，亦係由 Island Peak 山下冰川流出。我哋一行完額峰大本營，就會返返呢度，再北上迎接今次戱肉 —— 人生第一次爬雪山！

上午嘅路非常簡單，就係行上 Dingboche 村嘅西坡，Ama Dablam 已經變咗喺哋背後，而且會越行越遠，跟住就係繼續沿 Khumbu 河谷直上。我哋左手面就係一條由 Khumbu 河谷流出嘅河。河水喺嶙峋嘅雪頂高山腳下流過，上面山谷都係冰川、冰瀑布。右手邊，全部係包括額菲爾士峰嘅著名大山，周圍風景，靚到令人窒息。

呢度係一個好大好長嘅谷地，周圍都係雪山、冰川，經常吹往好凍嘅大風，記得上次行到呢度，我着住羽絨褸，所有相機都凍到唔郁！今日都凍，好彩出猛太陽，風又唔太大，我著往 Tee 加件行山恤都搞得掂。

山谷地帶，雖然唔近河邊，都係到處石膥，大大細細，成個山谷都係。行山者休息時冇乜好做，就用石頭喺地上砌大字。行過一笪平地，見到一行砌字：I 💛U KIM。啱嘞，我將M字變成N，就係我個名喇，即刻叫 Septa 幫我影相，真開心。

山谷盡頭，就係今日午餐地點 Thukla 4620m，所有人都會喺呢度小休，唔單止因為午餐，仲因為呢度係著名大斜坡嘅山腳，大家係度歇一歇，上足電，至起程。今日咁好太陽，我一支公坐咗出露天，享受一個充滿陽光嘅午餐。

由斜坡底上到斜坡頂，只係一公里路程，坡頂係 Thukla Pass 4830m，呢一公里上升咗兩百米，其實都好鬼斜，而且係長命斜，斜坡佈滿大石細石，好多時要繞過人咁高嘅大石，有時仲要用埋手爬過亂石堆，石頭，增加咗上坡嘅難度。再者，唔好忘記，而家已經喺海拔四千六至四千八，空氣含氧量只得平地一半，唔夠氧，又去邊度產生能量！呢個長命斜，真係唔少嘢。我話過，我視斜坡為考驗，最鍾意一條氣上晒，一路唞大氣一路唱歌係我本色。上上上，一口氣， 4830m ，搞掂！

斜坡頂，其實好有特色。呢度一定坐滿人，行完大斜路，挑伕又好，行山友又好，個個都一身鬆晒，即刻掟低背脊尐嘢，搵嚿石坐低，唞返啖氣。跟住就望返落斜坡，睇住上緊嚟嘅人。唔係黑心，原來睇人喘晒氣上斜坡，其實都幾得意。有時拍下手掌叫人加油，又增加行山氣氛，呢尐係全世界斜路頂嘅普遍特色。記得我行印加古道，亦試過係咁。

斜坡頂，Thukla Pass 係一幅幾大嘅平地，唔知邊個、幾時開始，呢度擺放咗魂斷額菲爾士峰登山者嘅紀念碑。自從 1953年5月29日，紐西蘭爬家Edmund Hillary 同埋尼泊爾雪巴嚮導  Tenzing Norgay 首次登頂後，額峰就吸引咗好多探險家，但係同時，六十幾年嚟，返唔到屋企嘅登山者亦不知凡幾。有心人就喺呢度，用喜馬拉雅石頭，砌成大大小小，好多座紀念碑，以彰其志，以慰亡靈。善哉善哉。上到嚟，抖大氣之餘，行個匝緬懷「先行者」 —— 行先一步之人謂也，亦係附加節目之一。

斜坡頂，仲有一個最大嘅特色，呢度東面，就係頂頂大名 Khumbu 冰川嘅末端冰堤 Terminal moraine ，即係話，而家正式踏上 Khumbu 冰川嘅範圍。過咗斜坡頂，繞住山路上，其實就已經踩咗上冰川嘅側堤 lateral moraine ，當上得夠高時，右手邊下面「山谷」處，睇嚟好似一般泥地，其實已經係冰川面嘅砂石，有時冰川有裂縫，黑色砂石面就會露出透藍光嘅冰，由裂縫睇落去，深不可測，十分恐佈。

斜坡頂，哈，呢度又真係幾平，最啱 ⋯⋯ 打筋斛，一二三，咁咪三個側手翻囉。

今日過夜嘅地方係 Lobuche 4930m，呢處係我好有印象嘅地方。首先，五年前，住同一間客棧，當日到埗冇耐就落起雪嚟，係嗰次行山，第一次見落雪。今日又係咁啱，坐落冇耐，就飄起雪嚟，不過感覺就冇上次咁凍。再者，四千九，呢度締造咗我人生嘅一個紀錄，就係我嘅最高海拔冲涼紀錄，今次，行李到咗後，即刻再次冲涼，但係只係平咗紀錄。真可惜，冲涼紀錄過唔到五千！

就喺 Khumbu 冰川，瞓一個凍鐵鐵嘅覺。

再噏過，

嚤囉

2017.05.20 Tengboche 3870m to Dingboche 4410m

2017.05.20 Tengboche 3870m to Dingboche 4410m

記得五年前，行 high track 要三日至去到 Dingboche，今次行 low track 就慳返一日。

尼泊爾行山，費用都包早午晚三餐，去到客棧，總之餐牌有乜都可以任點。我嘅早餐多數都係一樣：黑啡、煎蛋加多士。今朝改下食 pancake ，點知個 cake 成隻碟咁大，即刻切一半，叫 porter 幫手搞掂埋佢。

美國佬坐埋嚟食早餐，我唔介意做醜人，又恃住年紀大佢一截，因話提話，我唔會專登講遲到咁露骨，啱啱相反，我會講準時出發，千其唔好無端端提早。我就講我以前帶學生 Outing 時，一定喺出發前 15、30 分鐘提醒，好等大家有充份時間預備：去廁所又好、著衫、 pack up 又好 。如果忽然話即刻出發，就會失咗預算，好 lea hea 也。我話，遇到咁嘅情形，我會好唔開心，云云。我咁樣兜個彎講嘢，唔知佢個腦仔收唔收到？

已經成例，領隊先交代我哋行到去邊，話明喺邊度食晏，小分隊又分成兩隊出發。

走出 TashI Delek 客棧仲係好早，天色晴朗，四圍乜嘢山都見到晒，咁好天行山，梗係識得多謝眷顧喇。行出佛寺前空地，有條見首不見尾嘅粗鋼䌫瞓咗喺地下，睇個樣，成百米長都唔出奇。前面有個人，係，得一個人，正在拉緊條䌫。見盡挑伕孭嘅貨物，未見過挑伕運送條咁嘢，佢係同大自然抜河，咁樣掹住條咁長嘅綱䌫，個畫面直情係笑話。但係，呢度生活又真係可以好艱苦，任何笑話，呢度都可以係現實！現實如果有如笑話，其實真係好殘酷，Not funny at all 。Hah ，呢條綱纜愛嚟做乜嘅呢又？

今日行呢段路首先要由高原落返河谷，接近河邊，就見到一條倒冧咗嘅鐵橋，冧橋再行前些少高處，兩邊山坡原來已經起咗吊橋石屎橋墩。山徑路邊又瞓咗幾條長鋼䌫，唔使問，呢尐綱䌫就係好似我今朝所見，都係一寸一寸咁靠人力拉過嚟呢度，預備作為新橋綱纜之用。再向前行，就係過河之處，係一條傳統河面石橋，河牀亂七八糟塞滿巨型大石，河水繞住大石罅隙竄進奔流。咁樣嘅傳統橋好受自然限制，初春溶雪大水，又或者山泥傾瀉，對渡河人可以產生極大危險。再唔講要過呢座山，就要先行到落河谷，過河後又撐返上山，行都行死嚟。山腰嘅吊橋起好後，就做造福行人喇。址大纜呢位人兄，加油咯。

由石橋過河後行返上半山，就喺山腰山徑一路行。穿過疊疊山巒，回望Khumbu 河谷之南，坐落高原嘅 Tengboche 佛寺起初依然雄偉。行得幾行，高原地勢依然清晰可見，喜馬拉雅第一佛寺雖然亦已經變得細小，但佛氣縈繞，莊嚴不減。雪巴人喺喜馬拉雅山，世世代代，上上落落，跌跌宕宕，幸有佛光高照，心靈得到安慰，人生之路就好行得多喇。

我呢個外邦人，都借佛光，順順利利行到 Pangboche 3930m  —— 今日食晏之地。睇嚟，包尾嗰兩件都有排至到，我就喺客棧外露天地堂揾張枱坐低，剝咗對行山 boots，大剌剌攤喺長櫈，曬一個 三千九日光浴。

Pangboche 係山路邊其中一個典型嘅雪巴人村莊，屋舍都起喺山路兩旁，多數都係前鋪後居，賣尐行山物品、小禮物、汽水零食等，客棧都一定連食肆，幫行者解決食宿問題。

高山太陽曬得好舒服，因爲不斷有雪山吹嚟嘅涼風，點曬都唔覺㷫，再加上高山紫外光特別勁，咁就好容易灼傷，呢度尐細路，個個都面珠 Dunn 紅紅，好似好 cutie 咁，其實係灼傷爆拆。我嘅一對朱唇都曬傷咗，差尐變咗孖潤腸，要勁搽萬秀雷敦，至臨時壓得住下。

曬曬下，隔籬枱嚟咗件黃口黃面嘅行山友，我當然唔會好似啊狼英咁，見到黃口黃面，就叫人唔理揸乜䕶照，都要認做「中囯人」咁顛喇。原來佢嚟自高棉，而家喺 UN 駐尼泊爾做難民事務，趁住放假，就嚟行下山。同一陽光下，我又向佢八卦下尼泊爾政局，又問下由藏區逃亡過嚟尼泊爾嘅難民狀況。萍水相逢，講呢尐都唔會太入肉，不過都係長知識嘅。

太陽底下，邊有新事，如常，粒幾鐘後，美國佬卒之撐到嚟，又係上氣唔接下氣個樣，領隊哼住雪巴山歌喺後面施施然跟住。我哋一見兩件出現，就走入餐聽點餐，拿拿冧，食完又趕路喇。

今日目的地係 Dingboche 四千四，無論行高山徑抑或低山徑，都會經過呢度。

Dingboche 鎮好特別，成條村就喺向東山坡腳下嘅一幅大平地，Khumbu 河就喺村嘅東邊流過，好明顯成條村就喺河谷地帶。河谷，最多就係鵝膥石。喺山腰行落山入村前，由較高處望落 Dingboche 鎮，成個鎮就好似一個石頭城。路係石砌，屋係石砌，最得意係每笪屋地，都用石頭氹氹匝砌成石牆。遠睇，成個村鎮就係由一個一個石砌嘅方陣組成。就我所見， 呢一區，Dingboche 係最有持色嘅村鎮。再者，呢度係進入好多座大山嘅必經之地，行山登山者又多尐，客棧又多尐，屋又多尐，人口又多尐，條村又大尐。

入村時，行入屋與屋嘅石巷中，有時石牆高過人，就好似走咗入迷宮。村嘅東面，抬頭一睇，就係頂頂大名嘅 Ama Dablam 6856m，原來，我哋就喺佢山腳。Ama Dablam 係其中一個非常熱門多人爬嘅雪山，佢嘅 Base Camp 就喺附近唔遠，所以要爬 Ama Dablam 嘅人，亦都會先嚟 Dingboche ，據說，旺季時，每日有成千人喺呢度過夜！你話，係幾大嘅一盤生意！

今晚，我哋就喺牦牛客棧 Yak Hotel 借宿一宵，客棧就喺村嘅中間。我入村後，就四圍𥄫，對比五年前景象。估唔到，牦牛客棧就喺五年前我住過嘅客棧對面，五年前嗰間室外沖涼房，而家仲喺度。原來兩間打對面客棧，寶號唔同，其實係同一老闆，佢哋會先住滿牦牛，就住對面。而家牦牛呢邊都係得三、幾個客，嗰邊就丟空喇。我八卦走過去對面睇，入返餐堂，回憶嘞 ⋯⋯ ，五年前我坐喺呢度，一針一針補返個背囊，當時情景，如在眼前。想當年過後，坐返過牦牛。

一般嚟講，每行到新客棧，porters 應該已經先到，佢哋一早幫客人攪掂房間，分好晒房，並且將行李放好。客人行到後，就安排坐喺餐堂休息，飲杯茶啡，派鎖匙，客人就可以返房整頓。而我亦要等行李入返房，我至去得沖涼。

記得五年前喺對面沖涼，係買一桶熱水，然後倒喺出面浴室頂個水桶度，水桶有膠喉引入浴室，連接開関及花酒頭，就冲得涼嘞。當時一桶水係賣一蚊美金。今日牦牛呢度，又係室外浴室，不過已經有石油汽爐，又不過客棧太子爺話唔用得，只有 bucket bath，即係賣一桶熱水過你，再加個売，你自己搞掂。幾錢？已經升價至 500 盧比，即係五蚊美金。殺你！趁住太陽照住，即刻沖個四千四嘅靚涼。

夏天，日照時間好長，五點幾，太陽仲係暖笠笠。唔好嘥，冲涼後坐喺屋前地堂灑太陽，非常享受，不過曬緊太陽時，已經換咗羽絨褸、羽絨褲，其實都好涼下。太陽未落晒山，氣溫已經驟降，再唔可以坐喺室外，餐堂中間火爐亦已經開始點着，迎接震驣驣嘅夜晚。

火爐旁邊有鐵桶放燃料，喺Tengboche ，仲係三千幾，燃料桶放嘅係柴枝。呢度四千幾，周圍好難搵到樹，燃料桶放嘅係一餅餅乾咗嘅牦牛糞，牛屎基本上係乾草，好好燒，又唔臭，夠晒環保。火爐頂有兩個圓窿，順便放水煲喺上面煲滾水，山上所有物質都有價，我哋買一杯滾水都要幾十個盧比，咁樣一㷛滾水，都唔少錢㗎。爐火開咗後，餐堂嘅人就會將櫈搬埋去圍爐取暖，順便大發議論，噏得就噏喇。旺季時，成個餐堂坐滿人，非常熱鬧。尐人食完晚餐都晤會返房，因為餐堂係唯一有發熱物體嘅地方，一直到午夜左右，爐火熄滅，亦係返房瓹入睡袋瞓覺嘅時候。

不過，今日餐堂就只得五個客，圍爐嘅都係領隊、副領，我唔係圍爐取暖嘅人，食完飯冇耐，就返房大覺索喇。又係話時話，嚟行山前，我好擔心我帶嚟嘅脂肪唔夠，瞓覺會好凍，點知暖到都唔知幾舒服，乜嘢虧佬褲，買咗嚟都冇用過。虧？虧你個頭，都唔知幾 fit！

再噏過

嚤囉

2017.05.19 Namche 3440m to Tengboche 3870m

2017.05.19 Namche 3440m to Tengboche 3870m

休整咗一日，就當身體產生多咗紅血素（血紅球蛋白， heamoglobin，咁係咪科學好多呢），血嘅載氧量增加，咁就唔怕高山反應喇。

又係約咗八點出發，又係唔可以準時，真攞命。當然又係去 cafe 8848 上網，好過坐喺度等佢喇。睇嚟，呢件城市美國佬都唔係好掂，唔止食唔好，而且出口事幹都有問題。前幾日佢至話：「going to the toilet is a bit challenge 」。我自己睇尼泊爾尐廁所已經算係咁，如果去咗大陸西部山區，佢死都有份。我當然又七情上面話佢知，大陸廁所㸃樣臭死人、點樣冇私隱嘅親身體會喇。

美國佬自知佢遲到同我哋經常準時有好大落差，出發時，佢居然話：使乜咁緊張啫，就算遲尐，The mountain is still there 喎。喂，山就梗係唔會走咗去，不過，我哋等嘅時間，就一去冇返頭喇。唔知佢明唔明尐咁淺嘅道理呢？

Namche 地形簡單，要入山就爬上坡向北行。而過咗後山，沿 Khumbu 河谷又分成兩條路入山。河谷東面係 low track，而西面就係 high track，高低兩條行山徑，都會喺四千四嘅 Dingbiche 鎮會合，再轉向偏西，行入大本營。2012 年，我哋就用高行徑入山，過咗 EBC 後，再用低行徑出山。高行徑長咗尐尐，要行多一日。今次我哋行低徑，慳返些少時間。

好似魯迅話齋，路係人行出嚟嘅。我哋一路行嘅路，其實就係村落與村落互通嘅山路。接近村落，路亦較好行，偏遠咗，路就較為原始。不過，行山徑，尤其呢條額峰大本營山徑，就係尼泊爾嘅經濟命脈，政府用好多資源去保持山徑𣈱通。喜馬拉雅山脈，旣年青又不覊，冧山泥係每日發生嘅事，點樣就地取材修補行山徑，就係當地人嘅專長。只要留意一下周圍山徑路面用嘅石塊，同埋崖邊擋土牆用嘅石材，當知原來就取自路邊山坡嘅石頭。沿途亦不時見修路工人喺度整路，佢哋即時採石，就地批鑿成合適尺寸，即時鋪砌，毋須水泥，方便快捷高效。

尼泊爾政府將喜馬拉雅山區山路連接起嚟，尤其係熱門嘅行山徑，更加經常保養好，稱之為 the Great Himalaya Trails ，GHT 分成好多段，情形就好似香港麥理浩徑一樣。旅遊當局再聯合各個行山旅遊公司，設計成不同難度嘅旅遊產品，向外宣傳、推廣，務求吸引多尐行山人士，以增加旅遊收益。

其實呢段路，我 2012 年行過，不過嗰次係落山，即係相反方向。要同五年前比較，印象中，路況又冇乜太大變化，不過，路上行嘅人與物，我就睇到同五年前有明顯分別。

首先就係動物。山區，物資供應，永遠係第一大難題。山路冇車，全部靠腳行，所有外來物資，都靠挑伕孭入山。沿途，你見到挑伕背脊嘅貨物，真係乜鬼都有，「小」如一箱箱汽水薯片零食，大如兩三個人咁高嘅大塊木材；又或者又輕又大份嘅乾稻草，亦有四罐唔係好巨型，不過又重到死嘅石油氣罐 ⋯⋯， 全部就喺挑伕背脊，一步一步孭上山。

點解唔用動物？我五年前就有此一問。今年所見，路上真係多咗動物，一隊隊驢仔騾仔牦牛隊駱驛於途，動物頸上都掛住響鈴，鈴聲隨風散喺清新嘅空氣中，真係好享受。不過，又因為路上多咗動物，佢哋嘅出口物資亦撒滿一地。我哋行山，除咗留意石頭、水氹外，又多咗一樣千其唔好踩到嘅嘢。咦，咁多動物幫手，咁，挑伕又係唔係舒服咗？據我觀察，動物運輸多數係建築材料，例如一袋袋水泥。佢哋似乎並冇取代挑伕地位。再講，唔畀挑伕佢哋孭石油汽罐，咁挑伕屋企一大棚人，又邊個養呢？善待人力 Vs 維持生計，呢個兩難之局，我呢個行山遊客，諗都唔敢諗，又點咁幫人出謀劃策，亂噏廿四呢？最後，係咪都係：有得孭，點都好過冇呢？

其二就係我件衫，2012，我上山前，喺加德滿都買咗兩件行山衫：尼泊爾 North Face 仿真卡奇快乾好似恤衫咁款嘅行山衫，記得當時我仲話：個個行山人好似着制服咁，人人一樣。今日，我嘅行山衫、褲、 daypack 背囊、行山 boots ，就係我五年前嘅同一裝備。不過而家，行勻成個山，我都再見唔到有人同我件衫一模一樣喇。

其三就係我自己。五年前，我帶齊上天畀我嘅裝備嚟，今次，少咗十幾磅脂肪，仲留低八成嘅胃冇帶嚟。輕裝上陣嘅結果，呢幾日得到證實，就係行得更快，更持久，又真係幾得噃。

行過吊橋，就喺吊橋河邊客棧午餐。領隊交帶今日目的地，我咃兩件𩟔飽後即刻起程，又係留低美國佬同領隊佢兩件大哥，包尾慢慢玩嘞。

沿山路都有留意到客棧、食肆嘅名，當然多數都會用當地地名作為店名，但係有好多會用  Himalaya 做名，咁好明顯，喜馬拉雅，個名響噹噹，梗要善用。再其次就係 Namaste ，Namaste 喺印度教教徒互相祝福嘅說話。因為所有西方遊客都識講 Namaste ，尼泊爾人眼中，呢句祝福語係英文嚟，喺山區，九成九以上居民係彿教徒，係藏傳嗰隻，由東土藏區向西傳返過嚟。山區居民佢哋互相祝福係講 Tashi Delek  見你係外人至會講 Namaste 嘅。而今晚我哋過夜嘅客棧，就係 Tengboche 鎭嘅 Tashi Delek客棧。

唔使審，我又係最快闖山門嗰件。由 Namche 入 Tengboche ，會經過山門，山門裏面兩邊放都放咗一排轉經輪，以前尐人唔識字，又㸃識唸經？撥郁經輪順時針轉一圈，再唸「唵嘛呢啤咩空」，就當唸咗一遍經喇。所以每次路邊經過經輪，都靠左行，用右手轉動經輪，就係喺山徑行走時必做動作。

穿過山門就踏入 Tengboche ，一座白色佛塔座落山門旁邊，正中一片大空地，右手邊就係兩間客棧，左手邊就係頂頂大名嘅Tengboche monastery ，佢係包括藏區，整個喜馬拉雅山區最大嘅佛寺，亦已經列咗入 UNESCO 世遺名冊。Tengboche 係喺Khumbu 河谷凸起嘅一塊高原，非常觸目，此後向山區繼續行入好耐，回頭時，仍然見到呢片原，Tengboche 佛寺喺 Khumbu 河谷，異常突出。佛光撫慰山區信眾心靈，平安富足。

記得五年前，我哋落山到達 Tengboche 正中呢片空地時，當時正在漫天飄雪，抬頭望遠山，以及身邊周圍，到處白茫茫一片，靚到無以復加。今日就艷陽高掛，雖然高山太陽，熱極有限，不過啱啱行咗大斜路上到嚟呢大片空地，身水身汗就梗嘅喇。呢片高原空地凸出喺Khumbu 河谷中間，企喺度就可以 360 度全方位睇到周圍高山：Everest、 Nuptse、Lhotse、Ama Dablam、Thamserku ，全部六七八千嘅世界高峰，粒粒巨星環抱住，雖然周圍吹住冷風，內心就非常溫暖。

喺捕捉五年前影子之餘，放下行裝，我第一件事就係趁仲有好太陽，冲返個熱水涼。五百盧比交畀老闆娘，攞鎖匙直趨浴室，呢度浴室居然有三格，算係我所見過最具規模嘅喇。扭開水喉，通過石油汽爐，熱水源源不絶！三千八百公尺熱水涼，點可以唔讃歏、多謝孭石油汽罐上山嘅壯士！話時話，咁樣孭四罐石油汽上山，其實佢又收到幾多錢呢？真係唔想亦唔敢多諗，就感受到世界分工，天命所歸；各司其職，必有其因緣使然也。

既然咁有佛性，暫時潔浄咗臭皮囊，三點鐘，佛寺有和尚頌經時間，趁機亦將染麈靈魂洗滌。

空地影向寺門，係最佳角度，個個都喺度影返張相。高大寺門常開，歡迎進入。門上浮雕金漆如新，可見經常保養，喜馬拉雅第一佛寺，當之無愧。唔同好多名山寺廟，鍾意窮山之㒹而起，唔險唔造；上千石級方達，比比皆是，以考驗意志。呢度高原開闊，毋需辛苦上石級，平地一笪。入前庭門內，放咗一塊高僧打座唸經嘅古老大石，石有深深坐印、鞋印，以示高僧經年累月，勤做功課。轉入大殿前庭，除鞋，再上十數級石級，就行入大殿。其實要參觀佛寺，隨時都嚟得，遊人揀三點嚟，目的就係要睇和尚做功課。我哋入寺後，自動自覺，倚牆坐喺寺嘅兩側，肅靜。

好似一般佛寺一樣，如來佛像端坐寶殿之上，展示無畏手印，以渡眾生。呢間佛寺大殿中堂，放咗四排呎零高嘅打坐行排，時辰到，和尚魚貫入座，將放喺自己坐席之上嘅厚披風披上身，再盤膝而坐，座前有小矮几仔放置茶水，和尚仔揪住真空玻璃內膽暖水壼，逐一幫各就座師傅斟上山水靚茶，各大師呷一口，安安神，就開始誦經。

唔似學生諗書，大家朗讀同一段文字。呢度，首先唔知邊個開聲打破沈寂，有人跟上，再跟上。有斷句、有抑掦；低沉吟哦之際，高吭又突圍而出，⋯⋯，大家似彼此交流、互應，多過齋讀，有尐似西洋歌劇嘅群唱，但又多咗幾分「禪」。我當然唔知佢哋噏乜嘢，但感覺就好禪好禪囉。佛寺來去自由，有緣人多坐一會，緣未到，亦冇人會挽留多一秒。緣起緣滅，隨心而至，亦隨心而止，何需強求。阿彌陀佛。

呢度同其他鎮仔好唔同，Tengboche 小高原上全無民居。不過，有冇民居都好，食過晚飯就邊度都晤使去，上牀瞓覺好過。吖，BTW，過咗 Namche，上得高，夜晚就好凍，零下三十睡袋，今晚出動喇。

再噏過，

嚤囉

2017.05.18 Namche 市集 3440m Acclimatization day

 2017.05.18 Namche 市集 3440m Acclimatization day

平時人喺平地，就當大氣中含氧量係 100%，咁上到海拔三千左右，氧量就會跌到得返 70％，即係以平時呼吸狀態，吸得七成氧！個腦一唔夠氧就會頭痛，亦因為空氣稀薄 （即所謂 thin air，其實就係講空氣含氧量低），心跳同呼吸都要加大工作，對心肺造成壓力，身體缺氧後產生種種不適現象，咁就係高山症喇。好明顯，如果平時有操練心肺嘅人，應該較容易適應。不過，成日聽到有人咁講，話愈 fit 嘅人愈容易有高山症！Sorry ，我唔買呢種講法。

今日上到三千四，傳統上就要「休整」，以適應高度。原來個身體知道吸氧量唔夠，又會產生多尐血紅素，以適應缺氧環境。實際操作就係唔會瞓喺再高尐嘅地方，不過又唔係坐喺度唔郁，而係積極休整：舒舒服服，行下山，再行上高尐都冇問題，即所謂 walk high ，sleep low。

又係約好九點出發，又係八點九，美國佬都未浮頭。我同印度朋友一早已搞掂，食晒早餐、執好晒嘢。冇佢咁好氣，話低畀領隊知，我地兩件走去 cafe 8848 ，飲多杯啡，邊上網邊等，點解要人浪費生命等你呢？

哈！今次有尐改善，九點 15 分，領隊走嚟 8848 話可以出發。咦！點解可以咁敏㨗呢又？原來美國佬唔多舒服，連早餐都冇胃口！咁就出發行山喇。

成個 Namche 市集喺山腰山坡興建，十分簡單，要行上山，就向北坡。要落山，就向南下，絶對唔會盪失路。

我哋離開 8848 咖啡室，見石級就上，沿路都好多行山嘅人，一批一批，有大組，有小組，非常熱鬧，個個情緒高漲，氣氛非常愉快。其實，嚟尼泊爾行山，唔一定要行好似 EBC 咁樣，具挑戰性嘅路綫。好多人飛入 Lukla 後，行入 Namche ，再喺附近行一兩日，就出返 Lukla 走頭。總之就住自己嘅能力就得喇。

我哋沿北波上，山腰東面有個小高原，嗰度有個雪巴人嘅簡單展覧館，門外又有一個象徵雪巴人刻克服困難登山嘅石像。呢個小高原南面望到成個 Namche 市集，東面下望，就見到又險又窄嘅刀削深谷，澎湃河水就喺幾百米下奔騰翻滾。向北抬頭遠望，一個個六千七千八千嘅雪頂峰，就聳立眼前。人人都即刻捉住自己嘅領隊問，呢個係乜山，嗰個係乜山。所有領隊都倒背如流，不過客人問完又問，答咗唔記得又問過，其實都好煩，又不過，做得呢行，咁就預咗嘞。

以行入 EBC 嘅行山友嚟講，喺一眾群山之中，其實最重要只有兩個：一個梗係額菲爾士峰 8848，我哋就因佢而嚟。另一個係六千八嘅 Ama Dablam ，佢喺Khumbu 山谷嘅東面，好似路標一樣，我哋一路入山，就會一路見到佢出現喺我哋右手面，由遠而近，直至去到四千四 Dingboche 鎮，Ama Dablam 就喺正我哋東面頭頂。跟住向西北行去 EBC ，Ama Dablam 就喺我哋背後，愈離愈遠喇。尼泊爾人視天地為父母，因為山勢形似，Ama Dablam 就係母親頸鍊嘅意思。有尐人不知天高地厚，成日要同天鬥同地鬥，仲話「其樂無窮」！殊不知，大自然一個小小板塊擵擦，就震到你七葷八素。海嘯升起幾米，冲走幾多萬物芻狗！再唔講唔知邊日，山仔咁細嘅磒石撞埋嚟，就可能係人類滅絕之時！同天地鬥？憑乜嘢？講呢尐嘢嘅人，窮一生精力，就係鬥緊自己同族嘅人之嘛。尼泊爾人登山，並唔係要鬥爭自己父母，而係想更接近父母之靈而已。唔好再誇誇其談，話乜嘢「征服」呢個山，「征服」嗰個山喇。

今日天氣好， Namche 呢度睇，額峰就喺我哋北面遠處，連峰頂上裊裊昇起嘅一陣薄薄緸霞都睇得清清楚楚。額峰 8848 ，世界之巔，初次邂逅，轉眼五年。今日，我又嚟喇。

所有人都會喺雪巴人像前影返張相，我哋都冇例外，連領隊四條冷，都影返張集體相喇。

人在外，我對自己母語最敏感。忽聞粵音耳後傳，回望背後，有兩件黃口黃面後生仔，其中一個成身掛滿名牌攝影器材，用緊流利粵語交談，再聽真口音，呵，係港式唔係廣州嗰隻，即係走埋去嗲兩句。原來兩件𡃁仔都係放大假而嚟，一個仲會留喺尼泊爾做一段時間義工。我梗係要向兩位致敬，身為香港仔，有假期，居然唔去「喪買日本、潮食星馬」；然後好似大把年紀輕輕嘅，大言奢談：雞有雞味，豬有口感 ⋯⋯。兩位居然嚟到呢度，考驗自己體能、意志，實屬難得。耍冧之餘，當然要加我飛事卜做忘年朋友喇。此後兩三日，喺路上都可以見到大家氣喘如牛個樣，此乃後話嘞。

由小高原呢度再向北沿山路行入尐，離遠就見到一座依向東北懸崖興建嘅兩、三層建築物，呢度幾特別，有大石塊行人路引入大樓前空地，上三五十級又闊又長嘅石級最係入口，上書：8848 Mountain view Hotel，酒店個名都明明白白喇啩，就係：喺呢度可以睇見額峰囉。就算唔喺度住，都可以穿過大堂行去洒店向東北面嘅崖邊露天茶座。不過當然唔可以入客房區。原來酒店起喺聖母峰國家公園 Sagamatha National Park 範圍內，政府要酒店撥出該部份畀公眾使用，作為批地條款，咁就一家便宜兩家著喇。

我又係最快嗰個，何需等人，搵張枱坐低，叫壺冇檸檬嘅熱檸茶，對住群山自斟自歎。今日好天到離晒譜，周圍雪山吹嚟嘅涼風，混和暖笠笠嘅陽光，灑遍全身，除咗個光頭同埋雙眼要好好冚住外，其他地方，任曬唔嬲喇。

曬到成身暖笠笠之際，美國佬又喘晒氣坐到埋嚟。茶到兩杯，又噏古怪嘢。佢話晚鈑大早，根本未肚餓，可以遲尐食嘛。我頂佢唔蒲即刻話，大佬，大家唔係細路仔嘞，其實係可以自選晚餐時間，邊個話一定要全部人坐理一齊食㗎？自此之後，就有共識，就係潮州音樂：自己顧自己，咁咪 OK 囉。

講起呢間 8848 峰景酒店，2012 年嚟尼泊爾，當時入山，我哋選行高行山徑，離遠已經見到佢。領隊話好多日本公公婆婆鐘意嚟呢度住兩、三日，佢哋唔使好似我哋咁，自己行上嚟，酒店前冇幾遠就有直升機升降點，落機後沿大塊石頭路行十零分鐘就到，啱晒花得起錢，但花唔起腳骨力嘅日本仔嘞。

曬完四千米高山太陽沿路落返客棧，食埋午餐，三四點後又出發落去cafe 8848 飲咖啡。話咗喇，就係貪佢嘅 wifi 夠快，卒之又坐到食飯時間。食埋晚飯冲埋涼，真無聊，一日又咁走去，留返聽日

再噏過

嚤囉